1. Yinki David zonzá na yina me tadila kukuluka ya Yehova?

BETO lenda zonza kwandi ti Yehova ke ya kukuluka? Ee, yandi ke ya kukuluka. David zonzá: “Nge me pesa munu bukliye ya nge samu ya bumba munu mpe kukuluka ya nge ke kumisá munu muntu ya nene.” (2 Sa. 22:36; Nku. 18:35) Ntangu David soniká mambu yayi, ntangu ya nkaka yandi vandá kanisa na kilumbu yina profete Samuel kwizá tula yandi mafuta samu yandi kuma mfumu ya Izraele. David vandá mwana ya nsuka na kati ya bana 8, kasi ni yandi Yehova solá samu na kubaka plase ya mfumu Saul.—1 Sa. 16:1, 10-13.

2. Yinki beto ke zonzila na artikle yayi?

² Beto lenda zonza ti David ke ndima mambu yina ke na Nkunga 113, yina ke zonzá samu na Yehova: “Yandi ke kokamá samu na kutala zulu na ntoto, yandi ke katulá muntu ya mpamba na pusiere. Yandi ke nanguná muntu ya povre [. . .] samu na kuvandisa yandi na bantu ya nene.” (Nku. 113:6-8) Na artikle yayi, beto ke zonzila mwa baleson ya mbote na faso Yehova lakisá ti, yandi ke ya kukuluka. Beto ke longoka mpe mingi kifu yango na ekzample ya mfumu Saul, ya profete Danyele, mpe ya Yesu.

3. Wa’ faso Yehova ke bakilá beto, mpe yinki ya ke na lakisaka?

³ Yehova ke lakisá ti yandi ke ya kukuluka na faso yandi bakilá bisadi ya yandi. Yandi ke ndimá ve kaka nyonso yina beto ke salá samu na kusambila yandi, kasi yandi ke bakilá mpe beto nete bakamarade ya yandi. (Nku. 25:14) Samu beto vanda bakamarade ya yandi, Yehova baká desizion ya kupesa mwana ya yandi faso sakrifise samu na masumu ya beto. Ntembe ve, Yehova ke talá kyadi ya beto!

4. Yinki Yehova me pesa beto, mpe samu na yinki?

 ⁴ Beto tala dyaka faso ya nkaka yina Yehova lakisá ti yandi ke ya kukuluka. Samu ni yandi muntu yidika beto, Yehova vandá na posibilite ya kunata beto na ngolo na kusala kaka luzolo ya yandi. Kasi, yandi salá ve yawu. Yandi yidiká beto na kifwani ya yandi, mpe yandi pesá beto liberte ya kusala yina beto zola. Ata beto ke fioti mpe ya kulemba na mantwala ya yandi, Yehova zola ti beto sadila yandi na ntima ya beto nyonso samu beto ke zolak’ yandi. Mpe beto zaba ti, yandi ke pesá beto bambote ntangu beto ke kuwak’ yandi. (Kul. 10:12; Iza. 48:17, 18) Beto ke vutulá matondo mingi samu Yehova Nzambi ya beto ke ya kukuluka!

5. Wa’ faso Yehova ke longá beto na kuvanda ya kukuluka? (Tala foto ya kuverture.)

⁵ Yehova ke longá beto na kuvanda ya kukuluka na faso ya yandi ya kubakila beto. Yehova lutila bantu nyonso na mayela. Ata faso yina, yandi ke ndimá na ntima mosi yina bampangi ke zonzaka. Na kifwani, Yehova ndimá mwana ya yandi sadisa yandi ntangu yandi vandá yidika bima nyonso. (Bin. 8:27-30; Kol. 1:15, 16) Mpe, ata Yehova ke muntu ya kulutila ngolo, yandi ke pesá mpe bampangi baresponsabilite. Na kifwani, yandi tulá Yesu Mfumu ya Kimfumu ya Nzambi, mpe yandi pesá ndambu ya baresponsabilite na ba 144 000 yina ke vanda na Yesu na zulu. (Luke 12:32) Ntembe ve, Yehova pesá Yesu formasion samu yandi vanda prete ya nene. (Ebr. 5:8, 9) Yandi ke na pesá mpe formasion na ba yina ke kwenda sala na Yesu, samu ba lungisa na faso ya mbote kisalu yina yandi me pesa bawu. Kasi yandi ke kontroleke ve faso ba ke na salá kisalu yango. Yandi zaba ti ba ke sala luzolo ya yandi.—Luz. 5:10.

6-7. Yinki beto lenda longoka na faso Tata ya beto ya mazulu ke pesá baresponsabilite na bantu ya nkaka?

⁶ Si Tata ya beto ya mazulu, yina ke na nsatu  ata muntu sadisa yandi, ke pesá bampangi baresponsabilite, samu na yinki beto lenda sala ve faso yandi? Na kifwani, nge ke chef ya famiye to kuluntu na kati ya kimvuka? Landa kifwani ya Yehova, na kupesá bampangi baresponsabilite mpe na kusosá ve kukontrole ntangu nyonso faso ba ke na salá kisalu yango. Si nge landa ekzample ya Yehova, kisalu ke salama na faso ya mbote, nge ke pesa formasion na bampangi mpe nge ke sadisa dyaka bawu na kuvanda dyaka na konfianse na bawu mosi. (Iza. 41:10) Yinki ba yina ke na baresponsabilite na zulu ya bampangi lenda longoka dyaka na kifwani ya Yehova?

⁷ Biblia ke lakisá ti, Yehova ke sepelá ntangu bana ya yandi ba-ange ke zonzilak’ yandi makanisi ya bawu. (1 Mf. 22:19-22) Batata na bamama, wa’ faso beno lenda landa ekzample ya Yehova? Na ntangu ya mbote, zonza na bana ya nge ba pesa makanisi ya bawu na faso kisalu lenda salama. Ntangu beno ke wisana, landa makanisi ya bawu.

8. Wa’ faso Yehova lakisá ntima ya yinda na Abraham na Sarah?

⁸ Faso ya nkaka yina Yehova ke lakisá ti yandi ke ya kukuluka, ni ntangu yandi ke lakisá ntima ya yinda. Na kifwani, Yehova ke lakisá ntima ya yinda na bisadi ya yandi, ntangu ba ke sosá kuzaba samu na yinki yandi ke baká badesizion ya nkaka. Yandi baká ntangu ya kuwa faso Abraham vandá tadila desizion ya yandi ya kufwa bwala ya Sodome na ya Gomore. (Kub. 18:22-33) Beto zimbana ve faso Yehova bakilá Sarah kento ya Abraham. Yandi nyongá ve to yandi dasuká ve ntangu Sarah seká na ntangu yandi kuwá ti yandi ke kuzwá kivumu na buboba ya yandi. (Kub. 18:10-14) Kasi, yandi bakila Sarah na buzitu nyonso.

9. Yinki batata na bamama mpe bakuluntu lenda longoka na ekzample ya Yehova?

⁹ Batata na bamama mpe bakuluntu, yinki beno lenda longoka na ekzample ya Yehova? Yinki nge ke sala si bana ya nge to bantu ya nkaka na kati ya kimvuka me manga desizion ya nge. Nge ke zonza na bawu ti ba ke na tor? To nge ke sosa kuwa desizion ya bawu? Beto lenda ndima ti bafamiye na bimvuka ke zwa bambote mingi, si ba yina ke na zulu ya bawu landa kifwani ya Yehova. Tii awa, beto me longoka wa’ faso beto lenda vanda ya kukuluka nete Yehova. Beto mase zonzila ba-ekzample ya nkaka ya Biblia, yina ke lakisa faso beto lenda vanda ya kukuluka.

10. Wa’ faso Yehova ke sadilá ekzample ya bantu ya nkaka samu na kulonga beto?

¹⁰ Faso “Profesere [ya beto] ya nene,” Yehova ke pesá beto ba ekzample na Biblia samu na kulonga beto. (Iza. 30:20, 21) Beto ke longoká ntangu beto ke kanisá mbote-mbote na masolo ya Biblia yina ke zonzilá bantu yina vandá na bifu yina ke sepelisá Yehova, faso kukuluka. Beto ke longoká mpe, na ba yina lembaná kulakisa kifu ya mbote yayi.—Nku. 37:37; 1 Ko. 10:11.

11. Yinki beto lenda longoka na ekzample ya yimbi ya Saul?

¹¹ Kanisa na yina kuminá mfumu Saul. Ntangu yandi vandá mwana ya fioti yandi, vandá ya kukuluka. Mpe vandá eziteke na kundima baresponsabilite mingi. (1 Sa. 9:21; 10:20-22) Kasi na manima, Saul kumá na lulendo mpe bandá kusala bima yina ba lombá ve yandi na kusala. Yandi kumá na bifu ya yimbi yayi, kaka ntangu fioti na manima ya kukuma mfumu. Kilumbu mosi, yandi lenda ve kuvingila profete Samuele. Na kisika ya kutula ntima na Yehova, Saul yoká sakrifise ata ya vandá ve kisalu ya yandi. Ya salá ti Yehova manga Saul, mpe ndima dyaka ve yandi vanda mfumu ya Izraele. (1 Sa. 13:8-14) Beto ke lakisa ti beto ke na mayela, si  beto longoka na ekzemple ya Saul mpe beto manga kusala bima yina beto zola sala ve.

12. Samu na yinki Danyele vandá ekzample ya mbote?

¹² Saul vandá ekzample ya yimbi, kasi beto zonzila ekzample ya mbote ya profete Danyele. Na luzingu ya yandi nyonso, Danyele vandá muntu ya kukuluka mpe ntangu nyonso, yandi vandá sosá kuzaba dikanisi ya Yehova. Ntangu Yehova sadilak’ yandi samu na kuzonzila ndosi ya Nabuchodonosor, Danyele zonzá ve ti yandi salak’ yawu na ngolo ya yandi mosi. Kasi, yandi pesá nkembo nyonso na Yehova. (Dan. 2:26-28) Wapi leson samu na beto? Si bampangi ke sepelá na badiskur ya beto, to si beto ke zwá bambuma ya mbote na predikasion, beto zimbana ve, beto zolá pesa nkembo nyonso na Yehova. Ya ke ve na kima yina beto lenda sala, si Yehova sadisa ve beto. (Flp. 4:13) Si beto sala yawu beto ke landa ekzample ya mbote ya Yesu. Wa’ faso?

13. Na Yoane 5:19, 30, yinki beto me longoka na ekzample ya Yesu?

¹³ Ata yandi vandá mwana ya Nzambi mpe yandi vandá ve na disumu, Yesu tulá ntima ya yandi na Yehova. (Tanga Yoane 5:19, 30.) Yandi sosá ata fioti ve kubaka kisika ya Tata ya yandi ya mazulu. Bafilipi 2:6 ke zonzá ti, Yesu “kanisá ve na kubotola kimfumu, ya zola zonza yandi vanda faso Nzambi.” Yesu zabá yinki yandi lenda sala mpe yinki yandi lenda sala ve, mpe yandi vandá pesá Tata ya yandi buzitu.

14. Wapi reponse Yesu pesá ntangu ba zonzá na yandi na kusala mambu yina, ni yandi ve zolá sala?

¹⁴ Kanisa na mambu yina Yesu salá ntangu Zaki na Yoane mpe mama ya bawu, lombak’ yandi na kusala mambu yina, yandi ve zolá sala. Na mbala mosi, Yesu zonzá na bawu ti, kaka Tata ya yandi ya mazulu lenda zonza nani lenda vanda na diboko ya yandi ya droite na ya gauche na Kimfumu ya Nzambi. (Mat. 20:20-23) Yesu lakisá ti, yandi zaba yinki yandi lenda sala mpe yinki yandi lenda sala ve, mpe yandi vandá ya kukuluka. Yandi salá ata fioti ve mambu yina Yehova zonzá ve na yandi na kusala. (Yoa. 12:49) Wa’ faso beto lenda landa ekzample ya mbote ya Yesu?

15-16. Wa’ faso beto lenda sadila konseye ya Biblia yina ke na 1 Bakorinto 4:6?

¹⁵ Beto ke landá ekzample ya Yesu ntangu beto ke sadila konseye ya Biblia yina ke na 1 Bakorinto 4:6. Ya ke zonzá: “Beno landa kaka mambu yina basoniká.” Si bampangi ke na sosá beto pesa bawu konseye, beto zolá nata ve  bawu na ngolo na kundima konseye ya beto, kasi beto zolá kanisa mbote-mbote na yawu. Beto zolá pesa bawu konseye yina me katuka na Biblia mpe na mikanda ya beto. Na faso yina, beto ke lakisa ti beto zaba ve mambu nyonso. Si beto sala yawu, beto ke lakisa ti beto ke ya kukuluka, samu beto ke lakisá ti “misiku ya Yehova ya kulunga” ke lutilá kaka bakonseye ya bantu.—Luz. 15:3, 4.

¹⁶ Na zulu ya nkembo yina beto ke pesá na Yehova, beto ke na barezon ya kaka ya mbote na kuvanda ya kukuluka. Wa’ faso kuvanda ya kukuluka ke natiná beto kilengi mpe ke sadisá beto na kuwisana na bampangi? Ni yina beto mase zonzila.

17. Samu na yinki bantu yina ke ya kukuluka ke vandá na kilengi?

¹⁷ Si beto ke ya kukuluka, beto ke vanda na kilengi na luzingu. Samu na yinki? Samu ntangu beto ke zabá ti ya ke na bima yina beto lenda sala ve, ya ke vanda ve mpasi na beto na kundima bampangi sadisa beto. Kanisa na kilumbu yina Yesu belusá bantu 10 yina vandá na lepre. Kaka mosi na bawu vutuká na kwiza zonza mersi na Yesu, samu yandi belusak’ yandi na maladi ya ngolo yina vandá na yandi. Bakala ya kukuluka yina zaba ti yandi lenda beluka ve na yandi mosi, na yawu, yandi vutulá matondo na nyonso yina Yesu salá samu na yandi, mpe yandi pesá nkembo na Nzambi.—Luke 17:11-19.

18. Wa’ faso ntima ya kukuluka ke sadisa beto na kuwisana na bampangi? (Baroma 12:10)

¹⁸ Ya ke vandá ve mpasi na bantu ya kukuluka, na kuwisana na bampangi mpe na kutunga kindiku na bawu. Samu na yinki? Ba ke ndimá na kilengi nyonso ti, bampangi ke na bifu ya mbote, mpe ba ke salá bawu konfianse. Bantu ya kukuluka ke sepelá ntangu ba ke talá bampangi ke na salá na faso ya mbote bisalu  yina ba ke na yawu na kati ya kimvuka, mpe ba ke eziteke ve na kufelisite bampangi mpe na kuzonzila bambote ya bawu.—Tanga Baroma 12:10.

19. Samu na yinki beto zolá losa lulendo?

¹⁹ Kasi, bantu ya lulendo ke tala mpasi na kufelisite bampangi, ba ke zolá ba zonzila kaka bawu. Ba ke sosá ntangu nyonso kusala bampangi kimbanda mpe kulakisa ti ba lutila bampangi. Bantu yina ke na lulendo ke kanisa ntangu nyonso ti ba zolá sala babima nyonso bawu mosi. Samu na makanisi ya bawu, bampangi lenda sala ve bisalu faso bawu. Muntu yina ke na lulendo ke zolá kulakisa ti yandi lutila bampangi. Yandi ke talá ntima mpasi ntangu bampangi ke lutilak’ yandi. (Gal. 5:26) Bantu ya faso yayi ke fwá na mbangu kikamarade ya bawu na bampangi. Si beto me tala ti, lulendo mase mena na bantima ya beto, beto zolá sambila mingi Yehova, yandi kumisa makanisi ya beto malu-malu, samu kifu ya yimbi yayi kula ve na kati ya bantima ya beto.—Rom. 12:2.

20. Samu na yinki beto zolá vanda ya kukuluka?

²⁰ Beto ke sepelá mingi na bifu ya mbote ya Yehova! Beto ke talá ti, yandi ke ya kukuluka na faso yina yandi ke bakilá bisadi ya yandi, mpe beto ke na nsatu ya kulanda ekzample ya yandi. Beto ke mpe na nsatu ya kulanda ekzample ya ba yina sadilak’ yandi na kukuluka nyonso. Bika Yehova kuzwa ntangu nyonso lukumu mpe nkembo yina yandi me lunga kuzwa. (Luz. 4:11) Si beto sala mambu nyonso yayi beto me zonzila, beto lenda vanda ntangu nyonso bakamarade ya Yehova samu yandi ke zolá bantu ya kukuluka.