1. Wapi yina ke desizion ya mbote yina beto nyonso zolá baka?

BAMBALA mingi, badesizion yina baparent ke baká ke landá bana ya bawu. Si ba baka badisizion ya yimbi, ya lenda natina bana baprobleme. Kasi, si ba baka badesizon ya bien, ba ke sadisa bana ya bawu na kuvanda na kilengi na luzingu. Bana mpe me lunga kubaka badesizion ya mbote. Desizion ya kulutila mbote yina muntu nyonso lenda baka ni ya kusadila Yehova, Papa ya beto ya zulu yina ke zolá beto mingi.—Nku. 73:28.

2. Wapi badesizion ya mbote Yesu na baparent ya yandi baká?

² Joseph na Marie vandá na nsatu ya kusadisa bana ya bawu na kusadila Yehova, mpe badesizion yina ba baká, lakisá yawu. (Luke 2:40, 41, 52) Yesu mpe baká badesizion ya mbote yina sadisak’ yandi na kusala volonte ya Yehova. (Mat. 4:1-10) Ntangu yandi kulá, Yesu vandá muntu mosi ya jenti yina ba lenda sala konfiance, mpe yandi vandá na kuraje. Baparent nyonso yina ke zolá Yehova, zolá vanda na kilengi ya kuvanda na mwana faso Yesu.

3. Na wapi bakestion beto ke kuzwá bareponse na artikle yayi?

³ Na artikle yayi, beto ke kuzwa bareponse na bakestion yayi: Wapi badesizion ya mbote Yehova baká samu na mwana ya yandi Yesu? Yinki baparent yina ke bakristo lenda longoka na ekzample ya Joseph na Marie? Mpe wa’ faso bakristo yina ke ntete bana ya fioti lenda baka badesizion yina Yesu baká?

4. Samu na mwana ya yandi Yesu, wapi badesizion ya mbote Yehova baká?

⁴ Yehova solá baparent ya mbote samu na Yesu. (Mat. 1:18-23; Luke 1:26-38) Bamambu yina Marie zonzá, yina ke na kati ya Biblia, ke na lakisá ti yandi zolá mingi mambu ya Nzambi. (Luke  1:46-55) Mpe faso yina yandi landá nzila ya Yehova lakisá ti, yandi zolá Nzambi mpe vandá na nsatu ya kusepelisa yandi.—Mat. 1:24.

5-6. Wapi bamambu Yehova biká ya kumina mwana ya yandi?

⁵ Zaba ti, Yehova solá ve samu na Yesu, baparent yina vandá na mbongo mingi. Sakrifice yina Joseph na Marie pesá ntangu Yesu butuká, lakisá ti ba vandá bapovre. (Luke 2:24) Ya lenda vanda ti, Joseph vandá na mwa atelier na kote ya yinzo ya yandi na Nazareth, kote yina yandi vandá sala kisalu ya charpentier. Ba vandá ve na mbongo mingi, ya vandá mpasi surtout na charje ya bana kuluta 7 yina vandá na bawu.—Mat. 13:55, 56.

⁶ Yehova bumbá Yesu na mantwala ya bamambu ya nkaka yina zola talisa yandi mpasi, kasi yandi sala ve yawu na mantwala ya bamambu nyonso ya mpasi. (Mat. 2:13-15) Na kifwani, bantu ya nkaka ya famiye ya yandi vandá ve na kiminu na yandi. Kanisa na mpasi ya salak’ yandi na ntima na kutala ti, bantu ya famiye ya yandi vandá ndima ntete ve ti yandi ke masiya. (Mrk. 3:21; Yoa. 7:5) Dyaka, ya lenda vanda ti, Joseph kufwa ntangu Yesu vandá ntete jeune. Ya vandá mpasi samu na yandi. Ntangu ya nkaka, lufwa ya Joseph, zolá zonza ti, Yesu, mwana ya ntete, zolá baka plase ya papa ya yandi mpe kusala kisalu yina yandi vandá salá. (Mrk. 6:3) Ntangu Yesu kulá, yandi longoká faso ya kukipe famiye ya yandi. Mpe yandi vandá salá mingi samu na kuzwa mwa mbongo mpe bima yina ba vandá na yawu nsatu. Na yawu, yandi zabá yinki zola zonza kuvanda ya kulemba na nsuka ya kilumbu na manima ya kisalu ya ngolo.

7. a) Wapi bakestion ba yina ke ya kukwela yina ke na bana zola yufulá? b) Wa’ faso Bingana 2:1-6 lenda sadisa baparent na kulonga bana ya bawu?

⁷ Si beno ke ya kukwela mpe beno zola kuvanda na bana, beno zola yufula: ‘Beto ke kwandi bantu ya kukuluka yina ke zola Yehova mpe mambu Biblia? Samu bana ke na valere na meso ya Nzambi, Yehova lenda sola kwandi beto na kukipe mwana yina ke butuka?’ (Nku. 127:3, 4) Si nge ke deja na bana, nge lenda yufula mpe: ‘Mu ke longá kwandi bana ya munu ti ya mbote na kuvanda na ngolo na kisalu?’ (Lon. 3:12, 13) Mu ke na salá kwandi bangolo yina me lunga na kubumba bana ya munu na mambu ya yimbi ya yinza yayi ya Satan?’ (Bin. 22:3) Ya vrai, nge lenda bumba ve bana ya nge na mambu nyonso ya yimbi yina lenda kumina bawu. Kasi, malembe-malembe,  nge lenda sadisa bawu mpe kukontinye kulonga bawu na luzolo nyonso, faso ya kutula ntima na mambu ya Biblia ntangu bamambu ya mpasi ke kumina bawu. (Tanga Bingana 2:1-6.) Na kifwani, si muntu ya famiye to kamarade ya nge me bika kusadila Yehova, sadisa bana ya nge na kulongoka na Biblia, samu na yinki ya ke mbote na kuvanda ya kukangama na Yehova. (Nku. 31:23) Si muntu yina nge ke zolá me kufwa, lakisa bana ya nge baverse ya Biblia yina lenda sadisa bawu na kuvanda ve na basusi ya kulutila.—2 Ko. 1:3, 4; 2 Tim. 3:16.

8. Faso ke na zonzá Kulonga Misiku 6:6, 7, yinki Joseph na Marie salá?

⁸ Joseph na Marie sadisá Yesu na kukuma muntu yina Nzambi ke zolá samu ba landá misiku yina Yehova pesá na baparent. (Kulonga Misiku 6:6, 7.) Joseph na Marie zolá mingi Yehova mpe dikanisi ya bawu ya ntete vandá ya kukulisa luzolo ya Nzambi na bantima ya bana ya bawu.

9. Wapi badesizion ya mbote Joseph na Marie baká?

⁹ Joseph na Marie baká desizion ya kusadila Yehova ntangu nyonso na bana ya bawu. Ntembe ve, ba vandá kwendá ba-semaine nyonso na balukutakanu na sinagog ya Nazareth, mpe mbala mosi na mvula, ba vandá kwenda sala Pâque na Jerusalem. (Luke 2:41; 4:16) Ya lenda vanda ti, na nzila ya voyaje na Jeruzalem, Joseph na Marie vandá longá Yesu na baleki ya yandi, mambu yina kuminá bisadi ya Yehova na ntama. Ntangu ya nkaka, ba vandá kwenda tala bisika yina Biblia ke zonzilá. Ntangu ba kuma na bana mingi, ya kuma mpasi na bawu, na kusadila Yehova ntangu nyonso na bana ya bawu. Kasi samu ba salak’ yawu, ba kuzwá bambuma ya mbote! Samu ba tulá volonte na Yehova na plase ya ntete, famiye ya bawu vandá kaka ya kukangama na Yehova.

10. Wapi baleson baparent yina ke bakristo lenda longoka na ekzample ya Joseph na Marie?

¹⁰ Yinki baparent yina ke pesá Nzambi buzitu lenda longoka na ekzample ya Joseph na Marie? Kima yina me lutila, ni kulakisa na bana ya nge na mambu yina nge ke salá mpe yina nge ke zonzá ti, nge ke zolá mingi Yehova. Kado ya kulutila nene yina nge lenda pesa bawu, ni ya kusadisa bawu na kuzola Yehova. Mosi ya bamambu ya mbote yina nge lenda longa bawu, ke ni ya  kusambilá, ya kulongoká Biblia mpe ya kukwenda na balukutakanu ntangu nyonso. (1 Tim. 6:6) Ya vrai, nge me lunga kupesa bana ya nge mbongo to bima ya nkaka yina ba ke na yawu nsatu. (1 Tim. 5:8) Kasi, kuzimbana ve ti, ni kikamarade ya ngolo na Yehova kasi mbongo to bimvwama ve, ke sadisa bana ya nge na kuvuuka na yinza yayi ya Satan mpe kukota na yinza ya malu-malu ya Nzambi. *—Ezek. 7:19; 1 Tim. 4:8.

11. a) Wa’ faso konseye yina ke na 1 Timote 6:17-19 ke sadisá baparent na kubaka badesizion ya mbote ntangu ba ke na kulisá bana bawu? b) Wapi badesizion famiye ya nge lenda baka, mpe wapi bambote ya lenda natina beno? (Tala tablo “ Wapi badesizion beno ke baka?”)

¹¹ Ya ke kilengi mingi na kutala baparent ya bakristo, kubaka badesizion ya mbote samu na kusadisa bana ya bawu, samu ba sala kikamarade na Yehova! Ba ke sadilá Yehova ntangu nyonso na bana ya bawu. Ba ke kwendá na bana ya bawu na balukutakanu ya kimvuka mpe na balukutakanu ya nene. Mpe ba ke salá kisalu ya predikasion na bana. Bafamiye ya nkaka ke kwendá precheke na babwala yina baproklamatere ke ve mingi. Bafamiye ya nkaka mpe ke kwendá tala bisalu yina ke salamá na bethel, to ke tulá diboko na kutunga bayinzo yina organizasion ya Yehova ke sadilá. Bafamiye yina ke baká badesizion yayi ke basisá mbongo samu na kulungisa yawu, mpe ya lenda vanda mpasi samu na bawu. Kasi Yehova ke pesa bawu bambote mingi samu na yina ba ke salá. (Tanga 1 Timote 6:17-19.) Babana yina ke kulá na baparent ya faso yayi, ke kontinyeke kusala bamambu ya mbote yayi ntangu ba ke kulá mpe ba ke na kilengi yina baparent ya bawu me kulisa bawu na faso yayi! *—Bin. 10:22.

12. Samu na yinki Yesu vandá na nsatu ya kubaka badesion ya mbote?

¹² Yehova papa ya Yesu ya zulu ke baká kaka badesizion ya mbote, Joseph na Marie mpe baká desizion ya mbote. Kasi, ntangu Yesu kulá, yandi zola baka badesizion ya yandi, yandi mosi. (Gal. 6:5) Faso beto nyonso, yandi vandá na liberte ya kusola yina yandi zolá sala. Yandi lenda sola kulanda ba-interet ya yandi mosi, kasi volonte ya Nzambi ve. Kasi, yandi solá kubumba kikamarade ya ngolo na Yehova. (Yoa. 8:29) Wa’ faso ekzample ya yandi lenda sadisa bajeune bubu yayi?

13. Yinki Yesu salá ntangu yandi vandá ntete jeune?

¹³ Ntangu Yesu vandá jeune, yandi solá kuwa baparent ya yandi. Ata Yesu zaba mambu mingi kulutila baparent ya yandi, kasi yandi vandá wá bakonseye ya bawu. (Luke 2:51) Yesu vandá mwana ya ntete, ya zola zonza ti yandi vandá na mwa baresponsabilite na kati ya famiye. Yandi sala nyonso na kulungisa yawu. Yesu salá  bangolo na kulongoka kisalu ya charpentier na papa ya yandi Joseph samu yandi mpe kuzwa mbongo ya kusadisa famiye.

14. Wa’ faso beto me zaba ti Yesu vandá longoká mambu ya Nzambi na faso ya mbote?

¹⁴ Ya lenda vandá ti, baparent ya Yesu zabisa yandi ti kubutuka ya yandi vandá mirakle mpe mambu yina ba-ange zonzá samu na yandi. (Luke 2:8-19, 25-38) Yesu suká ve kaka na kuwa mambu yina ba zonzilak’ yandi, kasi yandi baká mpe ntangu ya kulongoka mambu ya Nzambi. Wa’ faso beto me zaba ti Yesu vandá longoká mambu ya Nzambi na faso ya mbote? Samu ti ntangu yina yandi vandá ntete mwana ya fioti, ba yina ke longá bantu na Jeruzalem “pamuká na kutala mayela ya yandi mpe bareponse yina yandi vandá pesa.” (Luke 2:46, 47) Ntangu yandi vandá kaka na bamvula 12, Yesu ndimá deja ti Yehova vandá papa ya yandi.—Luke 2:42, 43, 49.

15. Wa’ faso Yesu lakisá ti yandi baká desizion ya kusadila volonte ya Yehova?

¹⁵ Ntangu Yesu zabá yinki ke volonte ya Yehova, yandi salá yawu. (Yoa. 6:38) Yandi zabá ti, bantu mingi zolá yiina yandi, ata faso yina, yandi baká desizion ya kuwa Yehova. Ntangu Yesu kuzwa bateme na mvula 29 N.B., kima yina lutilá mbote na meso ya yandi, ni ya kusala mambu yina Yehova zola yandi sala. (Ebr. 10:5-7) Ata ntangu yandi vandá kufwa na zulu ya poto, Yesu kontinyeke kusala volonte ya papa ya yandi.—Yoa. 19:30.

16. Wapi mambu babana lenda longoka na ekzample ya Yesu?

¹⁶ Kuwa papa na mama ya nge. Faso Joseph na Marie, baparent ya nge ke bantu ya masumu. Kasi, Yehova pesá bawu responsabilite ya kubumba mpe ya kulonga nge. Si nge sadila bakonseye ya bawu mpe nge pesa bawu buzitu, “mambu ke simba na luzingu ya nge.”—Ef. 6:1-4.

17. Faso Yosua 24:15 ke na zonzilak’ yawu, wapi desizion ba-jeune zola baka bawu mosi?

¹⁷ Sola nani nge ke sadila. Nge zolá sosa kuzaba nge mosi nani ke Yehova, yinki ke volonte ya yandi mpe faso nge lenda landa yawu na luzingu ya nge. (Rom. 12:2) Na yawu, nge ke vanda na ngolo ya kubaka desizion ya kulutila mbote na luzingu ya nge: Desizion ya kusadila Yehova. (Tanga Yosua 24:15; Lon. 12:1) Si nge bumba programe ya mbote ya kutangá Biblia mpe ya kulongoká, luzolo ya nge samu na yandi mpe kiminu ya nge ke kuma ngolo.

18. Wapi desizion ya nkaka ba-jeune zola baká, mpe yinki ya ke natila bawu?

 ¹⁸ Baka desizion ya kutula volonte ya Yehova na plase ya ntete na luzingu ya nge. Yinza ya Satan ke zonzá ti si nge sadila ngolo mpe mayela ya nge samu na ba-interet ya nge mosi, nge ke vanda na kilengi. Kasi beto zaba ti, ba yina ke tulá mbongo mpe bimvwama na plase ya ntete na luzingu ya bawu, ‘ke talisá banzutu ya bawu bampasi ya bafaso mingi.’ (1 Tim. 6:9, 10) Kasi, si nge baka desizion ya kuwa Yehova mpe ya kutula volonte ya yandi na plase ya ntete, nge ‘ke sala bamambu na mayela nyonso’ mpe luzingu ya nge ke vanda na kilengi.—Yos. 1:8.

19. Yinki baparent zolá zimbana ve?

¹⁹ Baparent, beno sala nyonso na kusadisa bana ya beno na kusadila Yehova. Beno sala Yehova konfianse, mpe yandi ke sadisa beno na kubaka badesizion ya mbote. (Bin. 3:5, 6) Beno zimbana ve ti, bana ya beno ke talá mingi mambu yina beno ke salá, kulutila yina beno ke zonzá. Na yawu, baka badesizion yina ke sadisa bana ya nge na kusala bamambu yina ke talisa Yehova kilengi.

20. Wapi bambote ba-jeune ke kuzwa si ba baka desizion ya kusadila Yehova?

²⁰ Ba-jeune, baparent ya beno lenda sadisa beno na kubaka badesizion ya mbote na luzingu. Kasi, beno zolá baka badesizion ya mbote samu na kupesa Yehova kilengi. Na yawu, landa ekzample ya Yesu, mpe sadila Yehova, Papa ya nge ya zulu, yina ke zola nge mingi. Si nge sala yawu, luzingu ya nge ke vanda kitoko na kilengi mpe nge ke vanda na bima mingi ya mbote ya kusala. (1 Tim. 4:16) Mpe na bilumbu ke kwiza, nge ke vanda na luzingu ya kulutila mbote!