ARTIKLE YA KULONGOKA 41
Faso ya kusadisa ba yina ke longoká Biblia na kukwenda tii na bateme—Kitini 1
“Beno me lakisa ti beno ke mukanda ya Kristo yina beto soniká samu na kisalu ya beto.”—2 KO. 3:3, nwt-MK.
NZIMBU 78 “ Toi qui enseignes la Parole de Dieu ”
YINA BETO KE LONGOKA *
Ya ke pesá kilengi ya kulutila na kimvuka nyonso na kutala muntu yina ke longoká Biblia, kukwenda tii na bateme! (See paragraph 1)
1. Wa’ faso 2 Bakorinto 3:1-3 ke sadisá beto na kuzaba ti, kulonga bantu ya nkaka mambu ya Biblia mpe kunata bawu na bateme, ke dikabu ya nene yina me katuka na Yehova? (Tala foto ya kuverture.)
YINKI ya ke salá nge na ntima, ntangu muntu yina ke longoká Biblia na kati ya kimvuka ya beno me kuzwa bateme? Ntembe ve, ya ke sala nge kilengi mingi. (Mat. 28:19) Mpe si ni nge ke longoká Biblia na yandi, nge ke vanda na kilengi ya kulutila! (1 Tes. 2:19, 20) Ba yina ke kuzwá bateme malu-malu ke “mikanda ya [mbote] yina me lunga,” kaka ve samu na ba yina vandá longoka Biblia na bawu, kasi samu na kimvuka nyonso.—Tanga 2 Bakorinto 3:1-3.
2. a) Wapi kestion ya nene beto ke na nsatu ya kuzonzila, mpe samu na yinki? b) Kulongoka Biblia na muntu zola zonza yinki? (Tala note ya yisi ya paje.)
2 Ya ke kilengi mingi na kutala ti, na bamvula yiya yayi me luta, bangonda nyonso, beto me longoka Biblia * na bantu 10 000 000 na yinza nyonso. Mpe na kati ya bamvula yina, bantu kuluta 280 000 vandá kuzwa bateme bamvula nyonso. Wa’ faso beto lenda sadisa bamilion ya bantu yayi ke longoká Biblia na kuzwa bateme? Yehova ke na kontinyeke kupesa bantu okazion ya kukuma batemwe ya yandi. Ni na yina, beto ke salá nyonso samu na kusadisa bantu na kukula na kimpeve mpe na kuzwa bateme.—1 Ko. 7:29a; 1 Pi. 4:7.
3. Yinki beto ke zonzila na artikle yayi na yina me tadila kulongoka Biblia na bantu?
3 Samu kukumisa bantu badisiple ke kisalu ya nene, Kimvuka ya bantwadisi (Collège central) lombá na bakomite ya filiale, yinki beto lenda sala samu mingi ya ba yina ke longoká Biblia kwenda tii na bateme. Na artikle yayi mpe na yina ke landa, beto ke tala yina beto lenda longoka na bambote yina kuzwá bapionier, bamisionere na bantwadisi ya sirkonskripsion. * (Bin. 11:14; 15:22) Ba ke na zonzá yinki bantu yina ke longoká Biblia na ba yina ke longá bawu lenda sala. Na artikle yayi, beto ke zonzila bima 5 yina muntu nyonso yina ke longoká Biblia zolá sala, samu na kukwenda tii na bateme.
LONGOKA BA-SEMAINE NYONSO
Lomba na muntu yina ke longoká na nge si beno lenda vanda samu na kulongoka mambu ya Biblia (Tala baparagrafe 4-6)
4. Yinki beto zolá zimbana ve ntangu beto ke lutisá kaka mwa ntangu fioti na kulongoka Biblia na bantu?
4 Mingi ya bampangi ya beto ke bandá kulongoka Biblia na bantu na mantwala ya baporte ya bayinzo ya bawu. Ata ya ke faso ya mbote ya kukulisa nsatu ya Biblia na ntima ya muntu, kasi masolo ya faso yayi ke vandá mingi nkufi, mpe ya lenda sala ti kulongoka ya Biblia salama ve ba-semaine nyonso. Samu na kukulisa interet, bampangi ya nkaka ke lombá numero ya telephone ya muntu yina mpe ke bokila to ke sonikila yandi mesaje samu na kukabula dikanisi ya Biblia na yandi. Masolo ya nkufi yayi lenda salama bangonda mingi mpe ya lenda nata ve muntu na kukula na kimpeve. Muntu yina ke longoká na beto ke kula kwandi na kimpeve mpe ke kwenda tii na bateme, si yandi * ke pesá kaka ntangu fioti mpe ke salá ve bangolo? Ve.
5. Yinki Yesu zonzá na Luke 14:27-33, yina beto lenda sadila samu na kusadisa ba yina ke longoká na beto?
5 Kilumbu mosi, Yesu sadilá ekzample mosi samu na kulakisa yinki muntu lenda sala si yandi zola kukuma disiple ya yandi. Yandi pesá ekzample ya muntu yina ke na nsatu ya kutunga yinzo ya nene mpe ya mfumu yina ke na sosa kukwenda nwana guerre. Yesu zonzá ti, muntu yina ke na nsatu ya kutunga yinzo, zolá ‘vanda ntete samu na kutala si yandi ke na mbongo ya kulunga’ samu na kumanisa yinzo ya yandi. Mpe mfumu zolá ‘vanda ntete mpe kusosa konseye’ samu na kutala si bamilitere ya yandi lenda lungisa mambu yina yandi ke na sosá kusala. (Tanga Luke 14:27-33.) Faso mosi mpe, Yesu lakisá ti, muntu yina zola kukuma disiple ya yandi zolá kanisa mbote-mbote na yina zola zonza kulanda yandi. Na yawu, beto zola nata ba yina ke longoká Biblia na beto na kulongoka ba-semaine nyonso. Wa’ faso beto lenda sala yawu?
6. Yinki beto lenda sosa kusala samu na kulongoka na bantu yina lenda kula na kimpeve?
6 Sosa kulutisa mwa ntangu mingi na muntu yina ke zolá kaka kusolola na nge ntangu fioti. Na kifwani, si beno ke sololá kaka na verse mosi, nge lenda bwela verse ya nkaka ntangu nge ke kwenda tala yandi. Ntangu yandi ke mesana na mosolo yina beno ke salá, lomba na yandi si ya ke ve na plase yina beno lenda vanda samu na kukontinye masolo ya beno. Reponse yina yandi ke pesa, ke lakisa si yandi ke pesá valere na masolo ya Biblia yina beno ke salá. Dyaka, samu na kunata yandi na kulongoka mambu mingi, nge lenda lomba na yandi si yandi lenda ndima beno longoka bambala zole na semaine. Kasi, kulongoka mbala mosi to zole na semaine me lunga ve.
BONGISA MAMBU YINA BENO KE LONGOKA AVANT NA KWENDA TALA YANDI
Baka ntangu ya kuprepare mambu yina nge ke kwenda longa mpe lakisa muntu yina ke longoká na nge faso ya kuprepare (Tala baparagrafe 7-9)
7. Wa’ faso proklamatere lenda bongisa mambu yina yandi ke kwenda longa?
7 Faso profeser, nge ke na nsatu ya kuprepare na faso ya mbote, mambu yina nge ke kwenda longa na mosi na mosi ya bantu yina ke longoká na nge. Nge lenda banda na kutanga mambu yina beto ke longoká mpe kusosa baverse na Biblia. Kuzimbana ve malongi yina ke na basiká na mambu yina nge ke na tangá. Kanisa na titre ya leson, basutitre, bakestion ya kulongoka, baverse yina ba me sonika “tanga”, bafoto, mpe bavideo yina lenda sadisa nge na kulonga na faso ya mbote. Dyaka, kanisa na muntu yina ke longoká na nge, na faso yina nge lenda sala ti malongi ya nge vanda ve mpasi samu na yandi, samu yandi simba yawu na mbangu mpe sadila yawu.—Neh. 8:8; Bin. 15:28a.
8. Wa’ faso mambu yina apotre Paul zonzá na Bakolose 1:9, 10 ke na natá beto na kusambila samu na ba yina ke longoká na beto?
8 Kusuka ve kaka na kuprepare mambu yina nge ke kwenda longa. Sambila mpe Yehova samu na muntu yina ke longoká na nge mpe samu na bansatu ya yandi. Lomba na Yehova na kusadisa nge na kulonga na faso yina ke simba ntima ya yandi. (Tanga Bakolose 1:9, 10.) Kanisa na mambu yina lenda vanda mpasi na yandi na kusimba to yina yandi lenda ndima ve na mbangu. Kuzimbana ve ti nge zolá sadisa yandi na kukula na kimpeve mpe na kuzwa bateme.
9. Wa’ faso beto lenda sadisa muntu yina ke longoká na beto na kuprepare mambu yina beto ke longoka na yandi? Zonzila yawu.
9 Beto lenda ndima ti, kulongoka Biblia na muntu ntangu nyonso, ke sadisa yandi na vutula matondo na Yehova mpe na Yesu samu na nyonso yina ba salá. (Mat. 5:3, 6) Samu malongi ya Biblia sadisa yandi, muntu yina ke longoká, zola baka ntangu ya kukanisa na mambu yina yandi ke na longoká. Na kunata yandi na kusala yawu, lakisa yandi samu na yinki ya ke mbote samu na yandi na kuprepareke mosi na mosi ya baleson yina beto ke sala. Na yawu, yandi ke tanga leson avant nge kwiza, mpe ke kanisa na faso ya kusadila malongi yina na luzingu ya yandi. Wa’ faso nge lendá sadisa yandi? Samu na kulakisa yandi faso ya kusala, prepare leson mosi na yandi. * Lakisa yandi faso ya kuzwa bareponse na bakestion, mpe yandi sulinye yawu samu yandi zimbana ve yawu. Na manima, zonza na yandi, na kupesa reponse faso ya ke na basika na ntima ya yandi. Ntangu yandi ke sala yawu, nge ke zaba bien faso yandi ke na tadila mambu yina beno me longoka. Beto zonzila dyaka kima ya nkaka yina nge lenda sala.
LAKISA YANDI TI YA KE MBOTE NA KUSOLOLÁ NA YEHOVA
Longa muntu yina ke longoká na nge faso ya kusolola na Yehova (Tala baparagrafe 10-11)
10. Samu na yinki ya ke mbote na kutangá Biblia bilumbu nyonso, mpe yinki muntu yina ke longoká Biblia zola sala samu mambu yina yandi ke na longoká sadisa yandi?
10 Na zulu ya kulongoka ba-semaine nyonso na batemwe ya Yehova, muntu yina ke longoká Biblia zolá, sala bima ya nkaka bilumbu nyonso samu yandi kula na kimpeve. Yandi zolá vanda na kifu ya kusolola na Yehova. Na wa’ faso? Na kuwak’ yandi mpe na kusambilak’ yandi. Yandi lenda kuwa Nzambi na kutangá Biblia bilumbu nyonso. (Yos. 1:8; Nku. 1:1-3) Lakisa yandi faso ya kusadila mukanda, “ Programme de lecture de la Bible, ” yina ke na jw.org. * Samu mambu yina yandi ke tangá na Biblia sadisa yandi, nata yandi na kukanisa mbote-mbote na yina Biblia ke longá samu na Yehova, mpe wa’ faso yandi lenda sadila malongi ya Biblia na luzingu ya yandi.—Bis. 17:11; Zaki 1:25.
11. Wa’ faso muntu yina ke longoká Biblia lenda longoka kusambila na faso ya mbote, mpe samu na yinki ya ke mbote na yandi na kusambilá Yehova bambala mingi?
11 Nata muntu yina ke longoká na nge na kusolola na Yehova na lusambu bilumbu nyonso. Sambila na ntima ya nge nyonso ntangu beno ke bandá mpe ke manisá kulongoka. Mpe tula nkumbu ya yandi to mambu ya yandi na balusambu yango. Ntangu yandi ke kuwa balusambu ya nge, yandi ke longoka faso ya kuzonzila mambu yina ke na yandi na ntima na Yehova na nkumbu ya Yesu. (Mat. 6:9; Yoa. 15:16) Kanisa na faso kifu ya kutangá Biblia bilumbu nyonso (kuwa Yehova) mpe ya kusambilá (kuzonza na Yehova) ke sadisa yandi na kutunga kikamarade ya ngolo na Nzambi! (Zaki 4:8) Si yandi sala mambu nyonso yayi bilumbu nyonso, ya ke sadisa yandi na kupesa luzingu ya yandi na Yehova mpe na kuzwa bateme. Yinki lenda sadisa dyaka yandi?
SADISA YANDI NA KUTUNGA KIKAMARADE NA YEHOVA
12. Wa’ faso nge lendá sadisa muntu yina ke longoká na nge na kutunga kikamarade ya ngolo na Yehova?
12 Beto ke zolá ti muntu yina ke longoká na beto, longoka na kuzaba Yehova. Kasi mambu yina yandi ke longoká, zolá simba ntima ya yandi mpe kunata yandi na kusadila yawu. Yesu longá bantu mambu mingi, mpe ba vandá zolá malongi ya yandi. Kasi bantu vandá landak’ yandi samu malongi ya yandi vandá simbá bantima ya bawu. (Luke 24:15, 27, 32) Muntu yina ke longoká na nge, ke na nsatu ya kutala Yehova faso Papa ya yandi, Nzambi ya yandi mpe kamarade ya yandi. (Nku. 25:4, 5) Ntangu nge ke na longoká na yandi, zonzila yandi mingi bifu ya mbote ya Nzambi. (Bas. 34:5, 6; 1 Pi. 5:6, 7) Na baleson nyonso yina beno ke sala, nata yandi na kutala ti Yehova ke muntu ya mbote. Sadisa yandi na kutala luzolo na ntima ya mbote ya Yehova mpe kifu ya yandi ya kutalá kyadi ya bantu. Yesu zonzá ti “musiku yina me lutila nene,” ni ya “kuzola Yehova Nzambi ya nge.” (Mat. 22:37, 38) Sosa kusadisa yandi na kuzola Yehova.
13. Pesa ekzample yina ke na lakisá faso nge lenda sadisa muntu yina ke longoká na nge na kuzaba bifu ya mbote ya Yehova.
13 Lakisa na muntu yina ke longoká na nge samu na yinki nge ke zolá Yehova. Ya ke sadisa yandi na kutala ti, yandi mpe zolá kuma kamarade ya Yehova mpe kulongoka na kuzola yandi (Nku. 73:28) Na kifwani, ya ke kwandi na fraze na kati ya mukanda yina beno ke longoká to na verse yina beno me tanga, yina ke na zonzilá mambu yina ke na lakisá luzolo, mayela, kifu ya kusalá mambu ya kulunga mpe ngolo ya Yehova yina me simba ntima ya nge? Zonzila yandi yawu, mpe nata yandi na kuzaba ti, ya ke mosi ya barezon mingi yina ke natá nge na kuzolo Yehova Papa ya beto ya zulu. Ya ke na kima ya nkaka yina mosi na mosi ya ba yina ke longoká Biblia zolá sala samu na kukwenda tii na bateme.
SADISA MUNTU YINA KE LONGOKÁ NA NGE NA KUKWIZA NA BALUKUTAKANU
Kuvingila ve samu na kusadisa muntu yina ke longoká na nge na kukwiza na balukutakanu! (Tala baparagrafe 14-15)
14. Wapi faso mambu yina ke zonzá na beto Baebre 10:24, 25 na yina me tadila balukutakanu lenda sadisa muntu yina ke longoká na beto na kukula na kimpeve?
14 Beto nyonso ke zolá ti ba yina ke longoká na beto kwenda tii na bateme. Mosi ya bafaso ya mbote ya kusadisa bawu, ni ya kubokilá bawu na balukutakanu. Baproklamtere yina me lutisa bamvula mingi na kisalu ya kulonga ke zonzá ti, ya ke vandá ve mpasi na ba yina ke kwizá na balukutakanu na kukula na kimpeve. (Nku. 111:1) Baproklamatere ya nkaka ke zonzá na ba yina ke longoká na bawu ti, ya ke na bima mingi yina ba ke longoka na balukutakanu, yina ba lenda zaba ve si ba nsuka kaka na kulongoka na yinzo. Tanga Baebre 10:24, 25 na yandi, mpe lakisa yandi samu na yinki ya ke mbote na yandi na kukwiza na balukutakanu. Tala na yandi video Que se passe-t-il dans une Salle du Royaume ? *, mpe sadisa yandi na kubaka desizion ya kuvandá na balukutakanu nyonso.
15. Yinki beto zola sala na kusadisa muntu yina ke longoká na beto na kuvanda na balukutakanu ntangu nyonso?
15 Si muntu yina ke longoká na nge nabuna yandi kwiza na balukutakanu to si yandi ke kwizá ve ntangu nyonso, yinki nge lenda sala? Nge lenda banda na kuzonzila yandi mambu yina nge me longoka ntama mingi ve na balukutakanu. Ntangu yandi ke tala faso nge ke zolá balukutakanu, yandi ke zola kukwiza. Pesa yandi Yinzo ya Kengidi to Cahier Vie et ministère yina beno ke na longoká na lukutakanu. Lakisa yandi yinki ke zonzila lukutakanu yina ke na kwiza mpe lomba na yandi wapi kitini yandi ke na zola kuwa. Mambu yina yandi ke tala mpe ke kuwa na lukutakanu ya ntete yina yandi ke vanda, ke lutila mambu nyonso yina yandi kuwá mpe talá na mabuundu ya nkaka. (1 Ko. 14:24, 25) Yandi ke kutana na bantu ya nkaka ya mbote yina yandi lenda landa ekzample mpe ba yina lenda sadisa yandi na kukwenda tii na bateme.
16. Samu na yinki beto ke na nsatu ya kulongoka na bantu yina lenda kwenda tii na bateme, mpe yinki beto ke longoka na artikle ke kwiza?
16 Wa’ faso beto lenda nata ba yina ke longoká Biblia na beto tii na bateme? Beto zola nata bawu na kutala samu na yinki ya ke mbote na kulongoka Biblia. Na yawu, beto longoka na bawu ba-semaine nyonso mpe beto sadisa bawu na kuprepare baleson avant beto kwiza. Beto zolá sadisa mpe bawu na kusolola na Yehova bilumbu nyonso mpe na kutunga kikamarade na yandi. Dyaka, beto zolá nata bawu na kukwiza na balukutakanu. (Tala tablo na paje 12, “ Yinki zolá sala ba yina ke longoká Biblia samu na kukwenda tii na bateme.”) Na artikle ke landa, beto ke tala bima 5 ya nkaka yina beto lenda sala, samu na kunata ba yina ke longoká na beto tii na bateme.
NZIMBU 76 Dis, qu’est-ce que tu ressens ?
^ par. 5 Kulonga muntu mambu, zola zonza kusadisa yandi na “kukanisa to na kusadila bamambu na faso ya malu-malu.” Dikanisi ya Biblia ya mvula 2020, Matayi 28:19, lakisá beto samu na yinki ya ke mbote na kulongoka Biblia na bantu, mpe na kulonga bawu faso ya kukuma badisiple ya Yesu. Artikle yayi mpe yina ke landa, ke lakisa beto faso ya kuvanda dyaka ngolo na kisalu ya nene yayi.
^ par. 2 YINA YA ZOLA ZONZA: Samu na kutula na rapor ya nge ti, nge me banda kulongoka Biblia na muntu, nge zolá longoka na muntu yango bambala zole deja, si nge me lakisa yandi faso kulongoka ya Biblia ke salamá, mpe si nge ke na talá ti, mba beno ke kontinye kulongoka.
^ par. 3 Ba-artikle yayi ke na vutukilá mpe bamambu yina ke na serie, “ Dirigeons des études bibliques qui favorisent les progrès ” yina basiká na Ministère du Royaume na Juillet 2004 tii Mai 2005.
^ par. 4 Ba-reference nyonso yina ke na zonzilá babakala, nge lenda sadila mpe yawu na bakento.
^ par. 9 Tala video ya baminute 4: Apprenons á nos étudiants á se préparer. Na JW Library®, kota na MULTIMÉDIA > NOS RÉUNIONS ET NOTRE MINISTÈRE > DEVENONS PLUS HABILES.
^ par. 10 Kota na LA BIBLE ET VOUS > OUTILS D’ÉTUDE DE LA BIBLE
^ par. 14 Na JW Library®, kota na MULTIMÉDIA > NOS RÉUNIONS ET NOTRE MINISTÈRE > OUTILS POUR LA PRÉDICATION.
