Ya ke na mambu zole ya mfunu yina beto nyonso me zaba. Ya ntete, ni luyalu ya Yehova. Ya zola zonza ti faso ya yandi ya kuyala me lutila mbote. Ya zole, ni kukangama ya bantu na Yehova. Kasi, na kati ya disolo yango, beto kwizá longoka ti mambu zole yayi ke na kati ya dyambu mosi ya kulutila mfunu yina bantu na bambazi nyonso me bonga kuzimbana ve: kusukula nkumbu ya nene ya Yehova.

Na disolo yayi, beto ke tala samu na yinki nkumbu ya Yehova mpe kusukula yawu me lutila mfunu na mambu nyonso.

Ya ntete, Satana vuniná nkumbu ya Yehova mambu na bilanga ya Edeni. Na kubanda, kyuvu yina Satana yufulá Eva vandá sosa kuzonza ti Yehova ke Nzambi ya munimi mpe yandi ke pesá bisadi ya yandi misiku ya ngolo. Mambu yina Satana zonzá na manima, vandá sosa kuzonza ti Yehova ke zonzá ve matsyeleka. Yandi vandá sosa kuzonza ti Yehova ke Nzambi ya luvunu. Na kusala yawu, yandi bebisá nkumbu ya Yehova. Ni na yawu, yandi kumá ‘Dyabulu,’ yina zola kuzonza “muntu yina ke vuná samu na kubebisa nkumbu ya muntu.” (Yoa. 8:44) Eva mangá Yehova yala na zulu ya yandi. Kasi yandi salak’ yawu samu yandi kuwá mpe ndimá luvunu ya Satana. (Kub. 3:1-6) Tii bubu yayi, Satana ke zonzá luvunu na nkumbu ya Yehova mpe na kimuntu ya yandi. Samu bantu mingi ke landá luvunu yayi ya Satana, ba ke tumamá ve na Yehova. Samu na bisadi ya Yehova, ya ke ve na mambu yina me lutila yimbi na luvunu yina Satana ke mwangisá na nkumbu ya santu ya Yehova. Ni luvunu yina Satana zonzá na nkumbu ya Yehova me nata bampasi mpe mambu ya yimbi nyonso yina ke na yinza tii bubu yayi.

Ya zole, samu na ba yina nyonso yandi yidiká, Yehova ke na nsatu ya kusukula nkumbu ya yandi na luvunu yina ba losilak’ yawu. Na meso ya Yehova, ya ke ve na mambu ya nkaka yina me lutila mfunu. Ni yawu me nata yandi na kuzonza: ‘Ya tsyeleka, munu ke kumisa santu nkumbu ya munu ya nene.’ (Ezk. 36:23) Yesu kwizá lakisa wapi mambu bisadi ya Yehova me bonga kutula na kisika ya ntete ntangu ba ke sambilá Yehova. Yandi zonzaka: ‘Bika nkumbu ya nge kuvanda ya santu.’ (Mat. 6:9) Biblia ke zonzá ntangu nyonso ti ya ke mfunu mingi na kupesa nkumbu ya Yehova nkembo. Beto tala mwa bifwani: ‘Beno pesa Yehova nkembo yina me fwanana na nkumbu ya yandi.’ (1 Ns. 16:29; Nku. 96:8) ‘Beno yimba bankunga samu na kukumisa nkumbu ya yandi ya nkembo.’ (Nku. 66:2) ‘Munu ke pesa nkumbu ya nge nkembo ya mankululu.’ (Nku. 86:12) Kilumbu mosi na kati ya tempelo na Yeruzalemi, Yesu zonzá na Tata ya yandi: “Tata, kembisa nkumbu ya nge.” Yehova pesá mvutu: “Mu me kembisa yawu yimeni, mpe mu ke kembisa dyaka yawu.”​—Yoa. 12:28. a

Ya tatu, ntangu nyonso, mambu nyonso yina Yehova ke kanisá kusala, ke vandá samu na nkumbu ya yandi. Ntangu bamvula 1000 ya Kimfumu ya Yesu ke luta, Satana ke meka bantu ya mbala ya nsuka. Mambu yina ke salama na manima ya yawu ke lakisá beto mfunu ya nkumbu ya Yehova. Na ntangu yina, yinki bantu mpe bambazi ke kanisa na yina me tadila nkumbu ya Yehova? Na kupesa mvutu na kyuvu  yayi, beto zonzila mambu ya kuvanda ya kukangama na Yehova, mpe luyalu ya Yehova. Na ntangu yina, bisadi ya Yehova ke kutana dyaka ve na mambu yina ke sosa kumeka kukangama ya bawu na Yehova. Ba ke vanda dyaka ve na masumu mpe ba lakisá kiminu ya bawu na mambu mpe bampasi nyonso yina kuminá bawu. Na ntangu yina, ba ke kuzwa luzingu ya ntangu nyonso. Yehova ke vanda dyaka ve na nsatu ya kulakisa ti faso ya yandi ya kuyala me lutila mbote. Bantu mpe bambazi nyonso ke vanda na kiwisa mpe ke ndima Yehova yala na zulu ya bawu. Kasi, yinki beto lenda zonza na yina me tadila nkumbu ya Yehova?

Na ntangu yina, bantu nyonso ke zaba matsyeleka na nkumbu ya Yehova. Mpe nkumbu ya yandi ke vanda ya kusukula. Kasi, samu na bisadi ya Yehova nyonso na zulu mpe na ntoto, nkumbu ya Yehova ke vanda kaka kima ya kulutila mfunu. Samu na yinki? Samu ti, Yehova ke sala kaka mambu ya kitoko mpe ya ngitukulu. Samu ti na kukuluka nyonso, Yesu ke vutula kimfumu na Tata ya yandi, Yehova ke “vwanda mfumu ya bantu mpe bima nyonso.” (1 Ko. 15:28) Bantu na zulu ya ntoto ke sepela na “kimpwanza mpe nkembo yina yandi ke pesa na bana ya yandi.” (Rom. 8:21) Dikanisi ya Yehova ya kusala ti bantu nyonso na ntoto mpe bambazi nyonso na mazulu vanda na bumosi mpe mutindu dikanda mosi ya nene, ke lungana.​—Ef. 1:10.

Na manima ya mambu nyonso yayi, bambazi nyonso na zulu mpe bantu nyonso na ntoto, ke vanda kaka na nsatu ya ngolo ya kukembila nkumbu ya nene ya Yehova. Nkunga mosi ya Davidi ke zonzaka: ‘Bika Yehova Nzambi kubaka lukumu. Bika ba kumisa nkumbu ya yandi ya nkembo ya mankululu.’ (Nku. 72:18, 19) Ntangu nyonso, beto ke vanda kaka na mambu ya malu-malu mpe ya kitoko yina ke nata beto na kukembila nkumbu ya Yehova.

Nkumbu ya Yehova ke bambulá beto nyonso na yina me tadila Yehova, mingi-mingi luzolo ya yandi. (1 Yoa. 4:8) Ntangu nyonso, beto ke zimbana ve ti ni luzolo natá Yehova na kuyidika beto, na kupesa Mwana ya yandi samu na beto, na kusala nyonso samu na kulakisa ti faso ya yandi ya kuyala me lutila mbote. Beto ke banda kutala kaka bafaso ya malu-malu yina Yehova ke lakisa beto luzolo ya yandi. Ya ke sala ti ntangu nyonso, beto lutila kukuma pene-pene na Yehova mutindu Tata na mwana ya yandi mpe beto yimba samu na kukembila nkumbu ya yandi ya nene.​—Nku. 73:28.