1. Faso me zonza Baebre 12:1, yinki beto ke na yawu nsatu samu beto lenda kukima tii na nsuka?

 BIBLIA ke fwanisá luzingu ya beto bakristo na kukima mbangu. Ba yina ke kima tii na nsuka ke kuzwa luzingu ya ntangu nyonso. (2 Tim. 4:7, 8) Na yawu, beto me bonga kusala bangolo samu na kubika ve kukima samu ti nsuka me kuma pene-pene. Ntumwa Polo yina lendá kukima tii na nsuka zonzilá mambu yina lenda sadisa mpe beto na kununga. Yandi zonzá na beto na ‘kulosa dema mpe na kuvwanda na kibakala samu na kukima tii na nsuka mbangu yina Nzambi me zabisa beto na kukima.’​—Tanga Baebre 12:1.

2. Yinki zola zonza ‘kulosa dema’?

² Ntangu Polo soniká ti beto me lunga ‘kulosa dema,’ yandi vandá sosa kwandi kuzonza ti beto me bonga kulosa dema to bizitu nyonso? Ve, ni yawu ve. Kasi, yandi vandá zonzila bizitu nyonso yina ke ve mfunu. Bizitu yango lenda lembisa mpe kukwamisa beto. Na yawu, samu beto lenda kukima, beto me lunga kuzaba bizitu yina beto ke losa mpe yina beto ke nata. Kasi, kana beto me losa bizitu yina beto me bonga kunata, beto ke vanda dyaka ve na kati ya bantu yina ke kimá mbangu samu na luzingu. (2 Tim. 2:5) Wapi yina ke bizitu yango yina beto me fwana kunata?

3. a) Faso me zonza Bagalate 6:5, wapi yina ke bizitu yina beto me lunga kunata? b) Yinki beto ke longoka na disolo yayi mpe samu na yinki?

³ Tanga Bagalate 6:5. Polo zonzilá mambu yina beto me fwana kunata. Yandi soniká ti, “konso muntu fwana kunata kizitu ya yandi.” Awa Polo vandá zonzila mambu nyonso yina Yehova ke lombá na mosi na mosi na kati ya beto. Ata muntu lenda  nata kizitu yayi samu na beto. Na disolo yayi, beto ke tala wapi mambu ke na kati ya bizitu ya beto mpe wa’ faso beto lenda nata yawu. Beto ke tala mpe wapi bizitu beto ke natá yina ke ve mfunu. Beto ke longoka mpe wa’ faso beto lenda losa yawu. Kunata kizitu ya beto mpe kulosa yina ke ve mfunu ke sadisa beto na kubika ve kukima tii na nsuka.

4. Samu na yinki nsilulu yina beto salá na Yehova ya kusadila yandi luzingu ya beto nyonso ke ve mpasi mingi? (Tala mpe kizizi.)

⁴ Nsilulu yina beto salá na Yehova ya kusadila yandi luzingu ya beto nyonso. Ntangu beto pesá luzingu ya beto na Yehova, beto zonzá ti beto ke sadila kaka yandi. Beto me lunga kulungisa mambu yina beto zonzaka. Ya ke mambu ya nene, kasi ya ke ve mpasi mingi na beto samu ti Yehova yidiká beto samu na kusala luzolo ya yandi. (Luz. 4:11) Yandi yidiká beto na kifwani ya yandi mpe na nsatu ya kuzaba mpe kusadila yandi. Na yawu, beto lenda kuma pene-pene na yandi mpe kusadila yandi na kilengi nyonso. (Nku. 40:8) Ya kulutila, ntangu beto ke sepelisak’ yandi mpe ke landá kifwani ya Mwana ya yandi, beto ke “kuzwa  mvundulu [to ngolo]” beto mosi.​—Mat. 11:28-30.

5. Yinki ke sadisa nge na kulungisa nsilulu yina nge salá na Yehova? (1 Yoane 5:3)

⁵ Wa’ faso nge lenda nata kizitu yina? Bima zole lenda sadisa nge na kusala yawu. Ya ntete ni kubika ve kukulisa luzolo ya nge samu na Yehova. Nge ke sala yawu ntangu nge ke kanisa na mambu nyonso ya mbote yina yandi me pesa nge mpe bambote yina yandi me bumbila nge. Ntangu nyonso yina luzolo ya nge samu na Yehova ke kula, ya ke vanda ve mpasi na nge na kutumama na yandi mpe nge ke tala ti misiku ya yandi ke ve kizitu yina nge ke lenda ve kunata. (Tanga 1 Yoane 5:3.) Ya zole, landa kifwani ya Yesu. Samu yandi vandá lombá lubakusu na Yehova mpe vandá talá kaka bambote yina ke kwiza na mantwala, yandi lendá kusadila Yehova. (Ebr. 5:7; 12:2) Mutindu Yesu, sambila Yehova samu yandi pesa nge ngolo mpe kanisa kaka na bambote yina ke kwiza na mantwala. Kana, nge kulisa luzolo ya nge samu na Yehova, mpe nge landa kifwani ya Mwana ya yandi, nge ke lenda kulungisa nsilulu ya nge.

6. Samu na yinki beto me lunga kukipe dikanda ya beto? (Tala mpe kizizi.)

⁶ Mambu yina beto me lunga kusala na dikanda ya beto. Ntangu beto ke kimá mbangu samu na luzingu, luzolo ya beto samu na Yehova na Yesu me lunga kulutila luzolo yina beto ke na yawu samu na dikanda ya beto. (Mat. 10:37) Kasi ya zola zonza ve ti, beto ke kipe ve dikanda ya beto. Yehova na Yesu ke vanda na kilengi kana beto lungisa bizitu ya beto na dikanda. (1 Tim. 5:4, 8) Kusala yawu, ke pesa beto kilengi. Mpe Yehova me zaba ti makanda lenda vanda na kilengi kaka kana kento na bakala lakisa luzolo mpe buzitu, kana bibuti zola mpe sadisa bana ya bawu, mpe kana bana tumama na bibuti ya bawu.​—Ef. 5:33; 6:1, 4.

7. Yinki lenda sadisa nge na kunata kizitu ya nge na dikanda?

⁷ Wa’ faso nge lenda nata kizitu yina? Nge vanda kento, bakala to mwana, tula ntima na malongi ya Biblia mpe sadila yawu, kasi kulungisa ve kaka makanisi ya nge, to kusala ve kaka yina bantu ya nkaka ke salá to ke zonzaka. (Bin. 24:3, 4) Sadila mbote-mbote mikanda ya beto. Ya ke lakisá beto wa’ faso beto lenda sadila malongi ya Biblia. Na kifwani, na kati ya “Lubakusu samu na dikanda,” ya ke na masolo yina lenda sadisa ba yina ke ya kukwela, bibuti, mpe bantwenya samu na mambu yina ba ke na kutaná bubu yayi. b Kubika ve kusadila yina Biblia ke zonzá, ata ti bantu ya nkaka na dikanda ya nge ke salá ve yawu. Kusala yawu ke nata bambote na kati ya dikanda ya nge, mpe Yehova ke sakumuna nge.​—1 Pi. 3:1, 2.

8. Yinki mikanu ya beto lenda sala beto?

⁸ Kundima mambu yina mikanu ya beto ke nataka. Yehova me pesa beto bweso to dikabu ya kitoko ya kubaka mikanu beto mosi, mpe yandi zola ti beto sepela na mikanu ya mbote yina beto ke bakaka. Kasi, yandi ke bumbá ve beto na bampasi yina mikanu ya yimbi lenda natina beto. (Gal. 6:7, 8) Na yawu, ntangu beto ke baká mikanu ya yimbi, ke zonzá mambu ya yimbi mpe ke salá mambu ya yimbi, beto ndima bampasi yina ya lenda natina beto. Mambu yango yina beto me sala lenda banda kukwamisa ntima ya beto. Kuzaba ti ya ke kizitu  yina beto me fwana kunata, lenda nata beto na kuzonza pwelele mambu nyonso yina beto me sala, na kubalula ntima mpe na kuvutukila dyaka ve yawu. Kusala yawu ke sadisa beto na kubika ve kukima mbangu samu na luzingu.

9. Kana nge me sala dyambu ya yimbi, yinki lenda sadisa nge? (Tala mpe kizizi.)

⁹ Wa’ faso nge lenda nata kizitu yina? Kana nge me baka mukanu ya yimbi, yinki nge lenda sala? Kuzimbana ve ti, nge lenda vutuka ve manima samu na kusoba mambu yina me luta. Na yawu, kulutisa ve ntangu mingi na kukanisá kaka na mambu yango, na kukwendá nyongá mingi mpe na kukotisá bantu ya nkaka na mukanu ya yimbi yina nge me baka. Ndima foti ya nge mpe sala ngolo na kuvutukila dyaka ve yawu. Kana mambu yina nge me sala ke na kwamisá nge, sambila Yehova na kukuluka nyonso, ndima foti ya nge mpe lomba yandi na kulemvokila nge. (Nku. 25:11; 51:3, 4) Nge lenda lomba mpe mulemvo ya ba yina nge me nyongisa, mpe ntangu ya nkaka, kusosa lubakusu ya bakuluntu. (Zaki 5:14, 15) Benda bileso na mukanu ya yimbi yina nge me baka mpe na mambu yina ya me natina nge. Kana nge sala yawu, Yehova ke tala kyadi ya nge mpe yandi ke sadisa nge.​—Nku. 103:8-13.

10. Samu na yinki ya ke kilo na kutala ti yina beto ke na salá ke kaka fioti? (Bagalate 6:4)

¹⁰ Kutala ti yina beto ke na salá ke kaka fioti. Ntangu beto ke fwanisá kisalu yina bampangi ke salá na yina beto ke salá, ya ke dema yina ke lutilá bangolo ya beto. (Tanga Bagalate 6:4.) Ya ke sala ti beto vanda na musoki to kusepela ve na yina ke na bampangi, mpe kusosa kuvanda kaka na mantwala. (Gal. 5:26) Kusosa kusala yina bampangi ke na salá, lenda nata beto na kusosa kusala yina beto ke ve na ngolo ya kusala mpe ya lenda talisa beto mosi mpasi. Kanisa na mambu yayi Biblia ke zonzaka: ‘Kivuvu yina ke lungana ve nswalu ke salaka ti ntima beela.’ (Bin. 13:12) Na yawu, yinki ya ke sala nge na kusosa kulungisa mambu yina nge ke lenda ve lungisa? Kusala yawu ke lembisa kaka nge mpe ngolo ya nge ya kukima samu na luzingu ke kuma fioti.​—Bin. 24:10.

11. Yinki lenda sadisa nge na kusala ve mambu yina me lutila bangolo ya nge?

¹¹ Wa’ faso nge lenda losa kizitu yina? Nzambi ke lombá ve na nge na kupesa yandi yina nge ke ve na yawu. Ni na yawu, kusala ve yina yandi me lomba ve na nge na kusala. (2 Ko. 8:12) Kuzimbana ve ti, yandi ke fwanisá ve yina beto ke salá na yina bampangi ke salaka. (Mat. 25:20-23) Yandi ke sepelá na kisalu yina nge ke salá na ntima mosi, na kukwikama ya nge mpe na faso ya nge ya kukanga ntima. Na kukuluka nyonso, ndima ti ya ke na mambu yina nge lenda sala ve, samu ti nge me nuna, nge ke ve na mavimpi ya mbote to samu na mambu ya nkaka yina me kumina nge. Mpe mutindu Barzilai, kana nge na talá ti ba me pesa nge kisalu yina nge ke lenda ve kusala samu nge me nuna to nge ke ve na mavimpi ya mbote, nge lenda manga. (2 Sa. 19:35, 36) Mpe faso Moyize, pesa bisalu ya nkaka na bampangi samu ba sadisa nge. (Bas. 18:21, 22) Kusala yawu lenda sadisa nge na kusala ve bima yina lenda lembisa nge na kukima mbangu samu na luzingu.

12. Mikanu ya yimbi yina bampangi ke baká ke vandá kwandi foti ya beto? Zonzila yawu.

¹² Kutala ti mikanu ya yimbi yina bampangi me baka ke foti ya beto. Beto lenda baka ve mikanu samu na bampangi, to kubumba bawu na bampasi yina mikanu ya bawu lenda natina bawu. Na kifwani, mwana ya kento to ya bakala lenda baka mukanu ya kubika kusadila Yehova. Ya lenda sala mpasi mingi na bibuti ya yandi. Kasi, ya lenda vanda dema ya nene kana bibuti tala ti mukanu ya yimbi yina  mwana ya bawu me baka ke foti ya bawu. Yehova ke zolá ve ba lwata kizitu ya faso yayi.​—Rom. 14:12.

13. Kana mwana me baka mukanu ya yimbi, yinki tata to mama lenda sala?

¹³ Wa’ faso nge lenda losa kizitu yina? Beto zimbana ve ti Yehova me pesa bweso na mosi na mosi ya beto ya kusoola yinki yandi ke sala. Kusadila Yehova ke mpe na kati. Yehova zaba mpe ti beno bibuti ke bantu ya masumu. Mpe yandi zola ti beno sala yina beno ke lenda kusala. (Bin. 20:11) Kima yina mwana ke na soolá kusala ke na yintu ya yandi mosi, kasi ya beno ve. Ya lenda kumina nge na kukanisa ti nge vandá ve tata to mama ya mbote to nge salá mwa bafoti na faso ya kukulisa mwana ya nge. Zonzila yawu na Yehova mpe lomba yandi mulemvo. Yandi zaba ti nge lenda vutuka ve na manima mpe kusoba mambu yina nge salaka. Yandi zola ve ti nge bumba mwana ya nge na bampasi yina ndyatulu ya yandi ya yimbi me natina yandi. Kuzimbana ve ti Yehova ke ndima mwana ya nge, kana yandi sala bangolo samu na kuvutuka na yandi.​—Luke 15:18-20.

14. Samu na yinki kuvanda ntangu nyonso na manyongo na mambu yina beto salá, ke kizitu yina beto me bonga kulosa?

¹⁴ Kuvanda na manyongo ntangu nyonso na mambu yina nge salaka. Ntangu beto ke salá disumu, ya ke ve yimbi na kunyonga. Kasi, Yehova ke ve na nsatu beto vanda na manyongo ya kulutila. Ya ke kizitu yina beto me lunga kulosa. Kana beto zonzá pwelele mambu nyonso yina beto salá, beto balulá ntima mpe beto salá nyonso samu na kuvutukila dyaka ve yawu, beto lenda vanda na kundima ti Yehova lemvokilá beto. (Bis. 3:19) Na manima ya kusala nyonso yina, Yehova zola ve ti beto nyonga dyaka mambu yina beto salaka. Yandi zaba ti kusala yawu ke vanda ve mbote samu na beto. (Nku. 31:10) Ya ke manisa beto kilengi na ngolo, mpe ya ke sala ti beto lenda dyaka ve kukima samu na luzingu.​—2 Ko. 2:7.

15. Yinki ke sadisa nge na kuvanda dyaka ve na manyongo ya kulutila samu na masumu ya nge? (1 Yoane 3:19, 20) (Tala mpe kizizi.)

 ¹⁵ Wa’ faso nge lenda losa kizitu yina? Kana nge ke na kwendá nyongá kaka, kuzimbana ve ti na Yehova nge ke kuzwa “mulemvo ya tsyeleka.” (Nku. 130:4, nwt) Ntangu yandi ke lemvokilá na ba yina me balula ntima, yandi me pesa nsilulu yayi: ‘Munu ke bambuka dyaka ve masumu ya bawu.’ (Yer. 31:34) Ya zola zonza ti Yehova ke kanisá dyaka ve na mambu yina nge salaka. Ata ti foti ya nge me natina nge bampasi, kutala ve ti ya ke samu Yehova me lemvokila ve nge. Kutalisa ve nzutu ya nge mpasi, samu ti nge lenda sala dyaka ve bisalu yina nge vandá sala na kimvuka. Nge me lunga kusala bangolo samu na kukanisa dyaka ve na masumu ya nge, samu ti Yehova ke kanisá dyaka ve na yawu.​—Tanga 1 Yoane 3:19, 20.

16. Mutindu ba yina ke kimá, yinki beto me lunga kuzaba?

¹⁶ Samu beto ke na kimá samu na luzingu, beto me lunga ‘kukima samu na kununga.’ (1 Ko. 9:24) Beto ke lenda kusala yawu kana beto me zaba bakilo yina beto me lunga kunata, mpe bakilo yina beto me lunga kulosa. Na disolo yayi, beto me tala kaka mwa bifwani ya bizitu yina beto me lunga kunata mpe yina beto me lunga kulosa. Kasi, ya ke dyaka na mambu ya nkaka yina beto me zonzila ve. Yesu zonzá na beto na ‘kulutisa ve ntangu nyonso ya beto na kusala mikembo, kukola malafu, mpe na kuvwanda na manyongo samu na luzingu ya beto,’ samu ya ke bizitu. (Luke 21:34) Baverse yayi na ya nkaka ke sadisa nge na kuzaba yinki nge me lunga kubongisa samu na kukima mbangu samu na luzingu.

17. Samu na yinki beto lenda vanda na kundima ti ntangu beto ke kima mbangu samu na luzingu, beto ke nunga?

¹⁷ Ntangu beto ke na kimá mbangu samu na luzingu, beto lenda vanda na kundima ti beto ke nunga, samu ti Yehova ke pesa beto ngolo yina beto ke na yawu nsatu. (Iza. 40:29-31) Na yawu, kuvutuka ve manima. Landa kifwani ya ntumwa Polo yina salá bangolo samu na kukima mbangu samu na kununga. (Flp. 3:13, 14) Ata muntu lenda kima samu na nge. Kasi Yehova lenda sadisa nge na kunata bakilo yina ke mfunu, mpe kulosa yina ke ve mfunu (Nku. 68:19) Na yawu, kana nge kima na Yehova, nge ke lenda kukima tii na nsuka mpe kununga.