Ndefi ke ‘nsilulu yina muntu ke salá mingi-mingi na mantwala ya Nzambi samu na kusala kima mosi. Mpe yandi ke sala nyonso na kulungisa bamambu yina yandi me zonza.’ Ndefi lenda vanda ya kuzonza to ya kusonika.

Bantu ya nkaka ke talá ti kuzenga ndefi ke yimbi samu Yesu zonzaka: “Kuzenga ve ndefi [. . .] Nge fwana kutuba kaka ‘Mu me ndima’ to ‘Mu me manga’. Mambu nyonso ya nkaka yina bantu ke bwelaka ke katukaka na Mfumu ya yimbi.” (Mat. 5:33-37) Yesu zabá ti bantangu ya nkaka Musiku ya Moyize vandá lomba na bana ya Izraele na kuzenga ndefi. Mpe bisadi ya nkaka ya Yehova ya ntama, zengak’ yawu. (Kub. 14:22, 23; Bas. 22:10, 11) Yandi zabá ti Yehova mpe zengá bandefi. (Ebr. 6:13-17) Ya ke na talaná pwelele ti Yesu vandá nimina ve beto na kuzenga bandefi. Yandi vandá kebisa beto na kuzenga ve ndefi na bamambu yina ke ve mfunu mpe yina me lunga ve. Bamambu yina beto ke zonzá, Yehova ke wak’ yawu. Na yawu, beto zolá sala nyonso na kuzitisa bamambu yina beto me zonza. Tekila beto zonza, beto zolá kanisa.

Yinki nge ke sala si ba zonza na nge na kuzenga ndefi? Na kubanda, sosa kuzaba si nge ke lenda kusala bamambu yina nge ke na zengilá ndefi. Si nge me tala ti nge ke lenda ve, bika kuzenga ndefi. Biblia ke kebisá beto: ‘Ya me luta mbote na kusala ve nsilulu, na kisika ya kusala nsilulu mpe kulungisa yawu ve.’ (Lon. 5:5) Na manima, tala baverse ya Biblia yina ke na zonzilá bamambu yina ba me zonza na nge na kuzenga ndefi. Mpe baka mukanu yina ke na kwelaná na misiku ya Biblia yina nge zaba. Wapi yina ke misiku ya Biblia yina nge lenda landa?

Bandefi yina ke kwelaná na luzolo ya Yehova. Na kifwani, Bambangi ya Yehova yina ke kwelaná ke salá nsilulu ya kuvanda kaka ya kukangama na bampangi. Nsilulu yayi ba ke salá ke ndefi. Na mantwala ya Nzambi mpe ya bantu, kento na bakala yina ke kwelaná ke salá nsilulu ya kuzola, kukipe, mpe kupesa bampangi buzitu. Ba ke zonzá ti ba ke sala yawu “tii lufwa ke kabula bawu.” (Bantu ya nkaka yina ke kwelaná ke zonzá ve bamambu ya mutindu yayi. Ata bamambu yina ba ke zonzá lenda vanda mutindu ya nkaka, kasi ya ke mpe nsilulu yina ba me sala na mantwala ya Nzambi.) Na manima ya kuzonza bamambu yayi, ba yina ke na kwelaná ke kumá kento na bakala. Mpe makwela ya bawu zolá vanda kaka tii lufwa. (Kub. 2:24; 1 Ko. 7:39) Nsilulu yina ba ke salá na makwela ke mbote mpe ya ke kwelaná na luzolo ya Nzambi.

Bandefi yina ke kwelaná ve na luzolo ya Nzambi. Ya ke na bandefi yina bakristo ya tsyeleka me lunga ve kuzenga. Na kifwani, ba lenda zenga ve ndefi ya kubaka minduki samu na kunwanina bwala, to ya kuvanda dyaka ve bisadi ya Nzambi. Kana ba sala yawu, ba ke landa ve misiku ya Nzambi. Bakristo “kele ve bantu ya yinza.” Ni na yina beto ke kotá ve na bamambu yina ke swanisá bantu ya yinza yayi, mpe beto ke baká ve minduki na ntangu ya guerre.—Yoa. 15:19; Iza. 2:4; Zaki 1:27.

 Bandefi yina mosi na mosi me lunga kutadila si yandi ke zenga to ve. Bantangu ya nkaka tekila beto zenga ndefi, beto me lunga kutadila mbote-mbote mambu yayi Yesu zonzaka: “Beno pesa na ntinu Sezale bima yina kele ya Sezale mpe na Nzambi bima yina kele ya Nzambi.”—Luke 20:25.

Kanisa na mambu yayi: mukristo ke na sosá kukuma muntu ya bwala mosi, to kuzwa passeport. Kasi samu yandi kuzwa bima yayi, yandi me bonga kuzenga ndefi mpe kuzonza ti yandi ke landa misiku ya bwala yina. Kana kuzenga ndefi yina ke lomba ti yandi sala bamambu yina ke sepelisa ve Yehova, mayela yina yandi kuzwá na Biblia ke nimina yandi na kusala yawu. Dyaka, si mpangi ya beto yayi lakisa na bantu ya guvernema ti, na kati ya ndefi yina, ya ke na kima yina mayela ya yandi ya Biblia ke na pesá ve yandi nzila ya kusala, ntangu ya nkaka ba lenda katula yawu, samu yandi zenga ndefi.

Kana ba me ndima kukatula na ndefi yina mambu yina ke na sepelisá ve Yehova, mukristo lenda ndima kuzenga ndefi ya kulanda misiku ya bwala. Ya ke na kwelaná na Baroma 13:1 yina ke zonzaka: “Konso muntu fwana kutumama na bantu ya luyalu.” Na yawu, mukristo ke talá ve yimbi na kuzenga ndefi na mambu yina Nzambi ke zonzá deza na yandi na kusala.

Ntangu ya nkaka na kuzenga ndefi, ba lenda zonza na beto na kusimba kima to na kunanguna diboko. Baroma na Bantu ya Sikite vandá sadilá bambele ya bawu ya kunwana, yina vandá bidimbu ya Nzambi ya guerre, samu na kulakisa na Nzambi yina ti, muntu yina ke na zengá ndefi ke sala bamambu yina yandi me zonza. Ba-grec vandá nanguná diboko na zulu samu na kuzenga ndefi. Ba vandá salak’ yawu samu na kulakisa ti ba ke ndimá ti ya ke na Nzambi na zulu yina ke na wá bamambu yina ba ke na zonzá mpe ke na talá yina ba ke na salá. Mpe yandi ke na vingilá ba sadila bamambu yina ba me zonza.

Bisadi ya Yehova lenda sadila ve bidimbu ya bwala yina ke pesá nkembo na banzambi ya luvunu samu na kuzenga ndefi. Kasi yinki nge ke sala si na mantwala ya tribunal ba me zonza na nge na kutula diboko na zulu ya Biblia mpe kuzenga ndefi ya kuzonza kaka matsyeleka? Nge lenda baka mukanu ya kusala yawu. Na Biblia, ya ke na bisadi ya Yehova yina simbá kima samu na kuzenga ndefi. (Kub. 24:2, 3, 9; 47:29-31) Ya ke mfunu na kuzimbana ve ti, si nge me zenga ndefi yina, Nzambi ke vingila ti nge zonza matsyeleka. Nge me bonga kuyidama samu na kupesa bamvutu ya tsyeleka na byuvu nyonso yina ba lenda yufula nge.

Samu kindiku ya beto na Yehova ke mfunu mingi, beto me bonga kusambila, mpe kubaka ntangu ya kukanisa mbote-mbote tekila beto zenga ndefi ni ndefi yina ba ke zonza na beto na kuzenga. Sosa kuzaba si ndefi yina ke na kwelaná na mayela yina nge kuzwá na Biblia to na misiku ya Biblia. Si nge me baka mukanu ya kuzenga ndefi, nge me lunga kuzitisa yawu.—1 Pi. 2:12.