Ntangu mambu ya mutindu yayi ke salamá, kimvuka ke talá ti dikwela ya ntama me kufwa, samu bakala me kwela muntu ya nkaka. Mpe kimvuka ke talá ti makwela ya malu-malu ke ya kulunga. Na kuzaba samu na yinki beto ke na zonzá yawu, beto tala bamambu yina Yesu zonzá na yina me tadila kufwa makwela mpe kukwelana dyaka.

Na Matayi 19:9, Yesu zonzilá kima kaka mosi yina lenda pesa nzila na muntu na kufwa makwela. Yandi zonzaka: “Kana bakala katula kento ya yandi na makwela samu na dyambu yina kele ve ya kuvukisa mfulu na bakala ya nkaka, mpe kwela kento ya nkaka ke sala kinsuza.” Bamambu yayi Yesu zonzá ke na longá beto ti 1) kaka ni kinsuza lendá pesa muntu nzila ya kufwa makwela ya yandi, mpe 2) bakala yina ke kufwá makwela na kento ya yandi ntangu Biblia ke pesá ve yandi nzila mpe me kwelana na muntu ya nkaka, me sala kinsuza. *

Bamambu yayi Yesu zonzá zolá zonza kwandi ti bakala yina me sala kinsuza mpe me baka mukanu ya kufwa makwela ya yandi ke na nzila na meso ya Yehova ya kukwelana dyaka? Beto zimbana ve mambu yayi: Ntangu bakala ke salá kinsuza, ni kento ya yandi me lunga kubaka mukanu ya kulemvokila yandi to ya kumanga yandi. Si kento me manga yandi mpe ba me pasula mikanda ya makwela na mantwala ya luyalu, bawu zole lenda kwela bantu yina ba zola.

Ntangu ya nkaka, kento lenda lakisa ti yandi zola ve kufwa makwela ya yandi mpe yandi me lemvokila bakala ya yandi. Kasi yinki ke salama si bakala, muntu yina me sala kinsuza, zola dyava ve kuvanda na kento ya yandi, mpe me kwenda na mantwala ya luyalu samu na kufwa makwela? Samu kento ya yandi me lakisa ti yandi me lemvokila yandi mpe yandi zola ve kufwa makwela ya bawu, Biblia ke pesá ve nzila na bakala na kukwela muntu ya nkaka. Si yandi kwela muntu ya nkaka ntangu Biblia me pesa ve yandi nzila, yandi me sala dyaka kinzuza. Mpe bakuluntu ke sambisa mambu ya yandi na comité.—1 Ko. 5:1, 2; 6:9, 10.

Kana bakala yayi me kwela dyaka ntangu Biblia me pesa ve yandi nzila, wa’ faso kimvuka ke tadila makwela ya yandi ya ntama mpe dikwela ya yandi ya malu-malu? Na meso ya Yehova dikwela ya yandi ya ntama ke ntete? Na ntangu yayi, kento ke kwandi na luve ya kulemvokila to ya kumanga bakala ya yandi? Bakala yayi na muntu yina yandi me kwela, ba ke kwandi na kati ya kinsuza?

Na ntama beto vandá zonzá ti kimvuka zolá tala ti bakala yina, na kento ya yandi ya malu-malu ke na kati ya kinsuza, samu kento ya yandi ya ntama me kufwa ve, me kwela ntete ve, mpe me sala ve kinsuza. Kasi ntangu Yesu zonzá mambu ya kufwa makwela mpe ya kukwela dyaka, yandi zonzilá mingi-mingi muntu yina me sala kinsuza. Yandi zonzilá ve muntu yina me sala ata kima. Yandi lakisá ti bakala yina me kufwa makwela  ya yandi ntangu Biblia me pesa ve yandi nzila mpe me kwela muntu ya nkaka, me sala kinsuza. Ntangu mambu yayi ke salamá, bakala me kufwa makwela mpe me kwelana na muntu ya nkaka. Na meso ya Yesu yandi me sala kinsuza. Na yawu dikwela ya yandi ya ntama ke dyaka ve.

Ntangu bakala ke fwa makwela na kento ya yandi mpe ke kwelana na muntu ya nkaka, ya ke dyaka ve na kento ya yandi ya ntama na kusola si yandi ke lemvokila yandi to yandi ke manga yandi. Mukanu ya kulemvokila bakala ya yandi to kumanga yandi ke dyaka ve na maboko ya yandi. Kana kento ya ntama kwela to kwela ve, kufwa to vanda moyo, sala kinsuza to ve, ni yawu ve ke sala ti kimvuka tala ti dikwela ya malu-malu ke ya kulunga to ve. *

Na kifwani yayi, beto me zonzila bakala yina me sala kinsuza tekila yandi kufwa makwela. Kasi yinki beto ke zonza kana bakala me sala ve kinsuza kasi yandi me kufwa makwela mpe me kwela muntu ya nkaka? To si bakala me sala kinsuza na manima ya kufwa makwela, mpe kento ya yandi ya ntama me zonza ti yandi ke lemvokila yandi? Na bamambu nyonso yayi, samu bakala me kufwa makwela mpe me kwelana na muntu ya nkaka, kinsuza me salama. Na yawu, dikwela ya ntama ke dyaka ve. Dikwela ya malu-malu ke ya kulunga na mantwala ya luyalu. Yinzo ya Kengidi ya 15 Février 1980 paje 31-32 zonzaka: “Na ntangu yayi bakala me kota na dikwela ya malu-malu, mpe yandi ke ve na nzila ya kufwa yawu mpe ya kuvutuka na kento ya yandi ya ntama. Dikwela ya bawu manisá ntangu yandi kufwak’ yawu, salá kinsuza, mpe kwelá muntu ya nkaka.”

Ya ke ve samu beto me soba faso ya kutadila mambu yayi ti dikwela ke dyaka ve kima ya santu, mpe kinsuza ke dyaka ve disumu ya nene. Bakala yina me kufwa makwela ntangu Biblia me pesa ve yandi nzila, mpe me kwelana na muntu ya nkaka ntangu Biblia me pesa ve yandi nzila, ke luta na mantwala ya bakuluntu ya kimvuka mpe ba ke sambisa mambu ya yandi, samu yandi me sala kinsuza. Mpe si muntu yina yandi me kwela ke kisadi ya Yehova, yandi mpe ke luta na mantwala ya bakuluntu samu ba sambisa kinsuza yina yandi me sala. Ata beto zolá tadila ve dikwela ya malu-malu mutindu dikwela ya kinsuza, bakala yina ke sala mambu ya faso yayi lenda kuzwa ata kisalu na kimvuka na kati ya bamvula mingi. Samu ba pesa dyaka yandi bisalu, mambu yina yandi me sala me lunga kuzimbana na yintu ya bantu, mpe ya zolá talana ti yandi lenda dyaka kuzwa buzitu ya bampangi ya kimvuka. Bakuluntu ke tala mpe si bamambu yina yandi salá ke na bebisá luzingu ya kento ya yandi ya ntama mpe bana yina ba kuzwá, tii bubu yayi.—Mal. 2:14-16.

Kumwangisa makwela ntangu Biblia ke pesá ve nzila mpe kukwela muntu ya nkaka, ke natá bamambu mingi ya yimbi. Ni na yawu bakristo ke salá bangolo na kulanda faso ya Yehova ya kutadila makwela. Dikwela ke santu na meso ya yandi.—Lon. 5:4, 5; Ebr. 13:4.