1. Yinki ke paradiso ya kimpeve mpe yinki beto me lunga kusala?

 BUBU yayi, ya ke na paradiso mosi na zulu ya ntoto. Na kati ya yawu, ba millions ya bantu ke na zingaka na kilengi mpe kizunu. Ba ke na nsatu ya ngolo na kubikana na kati ya yawu mpe ba ke na sosaka ti bantu mingi kuzwa bweso ya kukota na kati ya yawu. Ya kele yinki? Paradiso ya kimpeve! a

2. Samu na yinki paradiso ya kimpeve ke mambu mosi ya ngitukulu?

² Na kati ya yinza ya Satana, bantu me fuluka na yimbi mpe ke na zolasanaka ve bawu na bawu. Na faso mosi ya ngitukulu, Yehova me bongisa kisika mosi ya kitoko yina kizunu na bumosi kele. (1 Yoa. 5:19; Luz. 12:12) Yehova ke na talaka bamambu ya yimbi yina Satana ke na kusalaka awa na zulu ya ntoto. Ata faso yina, yandi yidikaka kisika ya mbote samu ti bisadi ya yandi sadila yandi na kati ya kizunu na bumosi. Biblia ke zonzilaka paradiso ya kimpeve mutindu ‘kisika mosi samu na kubumbana’ mpe ‘bilanga yina ke butaka bima ya mbote.’ (Iza. 4:6; 58:11) Ata ti beto ke na zingaka na nsuka ya yinza yayi, na lusakumunu ya Yehova, ba yina ke na zingaka na paradiso ya kimpeve ke na kilengi mpe kizunu.​—Iza. 54:14; 2 Tim. 3:1.

3. Na ntangu ya ntama wa’ faso Izaya kikapu 65 lunganaka?

³ Na nzila ya mbikudi Izaya, Yehova zonzaka mutindu luzingu ke vanda na paradiso ya kimpeve. Izaya kikapu 65 ke lakisaka mbala ya ntete yina mambu yayi lunganaka. Ni na 537 T.N.B. Kaka na ntangu yina, Bazwife balulaka ntima, ba basikaka na bungaamba na Babilone mpe vutukaka na bwala ya bawu. Yehova sakumunaka dikanda ya yandi mpe sadisaka bawu na kutunga dyaka bwala ya Yeruzalemi mpe na kutunga tempelo samu na kuvutula lusambu ya tsyeleka na Izraele.​—Iza. 51:11; Zak. 8:3.

4. Wa’ faso mbikudulu ya Izaya kikapu 65 ke na lunganaka na ntangu ya beto?

⁴ Kulungana ya zole ya mbikudulu ya Izaya bandaka na 1919 N.B.,  ntangu Yehova basisaka bisadi ya yandi na mpimpa ya Babilone ya nene. Na manima, Paradiso ya kimpeve bandaka kukula na ntoto nyonso. Na tiya ya basamuni, bimvuka mingi bandaka kubutuka mpe ba bandaka kubuta bambuma ya kimpeve. Babakala na bakento yina vandaka na ndyatulu ya yimbi, bifu mutindu bibulu, kwizaka kuma “bantu ya malu-malu.” (Ef. 4:24) Bambote ya nkaka yina Izaya zonzilaka ke lungana mbote-mbote na yinza ya malu-malu. Kasi bubu yayi, na kati ya paradiso ya kimpeve beto ke na kuzwaka bambote yina ke na pesaka beto kilengi. Beto tala wapi yina ke bambote yango mpe samu na yinki beto me lunga kubikana na kati ya paradiso ya kimpeve.

BAMBOTE YA KUVANDA NA PARADISO YA KIMPEVE

5. Wa’ faso Izaya 65:13, ke na lunganaka samu na ba yina ke na kati ya paradiso ya kimpeve?

⁵ Mavimpi mpe kuvanda na ngolo. Mbikudulu ya Izaya zonzilaka luswaswanu yina kele na bantu yina ke na paradiso ya kimpeve na bantu yina ke na ngaanda. Izaya 65:13 Ke zonzaka: ‘Na yina, Yehova Mfumu ya kuluta nene me tuba: “Tala! Bisadi ya munu ke kudya, kasi beno, beno ke vanda na nsatu. Tala! Bisadi ya munu ke kunwa, kasi beno, beno ke vanda na nsatu ya maza. Tala! Bisadi ya munu ke vanda na kyese, kasi beno ke tala nsoni.’ Yehova ke pesaka na bisadi ya yandi bima yina ba ke na yawu nsatu samu ba bikana pene-pene na yandi, yandi ke pesaka mpe na bisadi ya yandi mpeve ya santu ya yandi, Biblia, mikanda, bavideo mpe bima ya nkaka. Na yawu, beto ke ‘kudyaka, . . . kunwaka, . . . [mpe ke vandaka] na kyese.’ (Fwanisa na Luzabusu 22:17.) Kasi, ba yina ke ve na paradiso ya kimpeve ke na “nsatu . . . , ke na nsatu ya kunwa maza . . . , [mpe] ke na kuwaka nsoni” samu ba zaba ve Nzambi.​—Amo. 8:11.

6. Wa’ faso Yoele 2:21-24 ke zonzilaka madya ya kimpeve yina Yehova ke pesaka beto, mpe wapi bambote ya ke na natinaka beto?

⁶ Mbikudi Yoele sadilaka kifwani ya madya, vinu mpe malafu samu na kuzonzila madya yina Yehova ke pesaka beto samu beto vanda na kiminu ya ngolo. (Yoe. 2:21-24) Bubu yayi, yandi ke salaka yawu na nzila ya Biblia, mikanda, na nzila ya site jw.org, balukutakanu ya nene mpe ya fioti. Beto lenda kuzwa bambote ya madya ya kimpeve yayi bilumbu nyonso samu na kuvanda na mavimpi ya mbote mpe na ngolo.

7. Yinki ke salaka ti ‘ntima ya beto vanda mbote’? (Izaya 65:14)

⁷ Kilengi ya tsyeleka. Izaya 65:14 ke zonzaka: ‘Tala! Bisadi ya munu ke sala milolo ya kyese samu ntima ya bawu ke vanda mbote, Kasi beno ke dila samu na mpasi ya ntima. Mpe beno ke dila samu mabanza ke ya kuniokwama.’ Mambu ya mbote yina Yehova ke pesaka na bisadi ya yandi ke nataka bawu na kusala “milolo ya kyese”. Matsyeleka, bansilulu yina ke na Biblia, kivuvu yina beto ke na yawu na nzila ya munkayulu ya Yesu ke salaka ti ‘ntima ya beto vanda mbote.’ Kusolola na bamambu yayi na bampangi ya beto ya kimvuka ke pesaka beto kilengi!​—Nku. 34:8; 133:1-3.

8. Wapi yina ke bambote zole ya mfunu ya paradiso ya kimpeve?

⁸ Luzolo mpe bumosi yina ke na kati ya bisadi ya Yehova ke bambote ya paradiso ya kimpeve. “Kukangama na bumosi” ke na sadisaka beto na kutala faso luzingu ke vanda na yinza ya malu-malu, na ntangu bisadi ya Yehova ke sepela na luzolo mpe bumosi ke lutila yina ke na bawu bubu yayi. (Kol. 3:14) Na kifwani, samu na kuzonzila yinki ya salaka yandi na ntima mbala ya ntete yina yandi kutanaka na Bambangi ya Yehova, mpangi mosi ya kento me zonza: “Mu zabaka ve yinki ke kilengi ata na kati ya dikanda ya munu. Kasi mbala ya ntete yina mu talaka luzolo ya tsyeleka, ni na kati ya dikanda ya Yehova.” Kana muntu ke na nsatu ya kuvanda na kilengi ya tsyeleka yandi me fwana kukota na paradiso ya kimpeve. Bantu ya yinza ke bakilaka Bambangi ya Yehova na faso ya yimbi. Kasi, na meso ya Yehova bawu nyonso ke mfunu. Ata ti bantu ya yinza ke tadilaka na faso ya yimbi bisadi ya Yehova, beto lenda vanda na kundima ti ba ke na nkumbu ya mbote na meso ya yandi mpe ya kimvuka.​—Iza. 65:15.

9. Na yina me tadila bampasi, wapi nsilulu Izaya 65:16, 17 ke pesaka beto?

 ⁹ Vanda swi mpe na kizunu. Izaya 65:14 ke zonzaka ti ba yina me soola kuvanda na ngaanda ya paradiso ya kimpeve ‘ke dila samu na mpasi ya ntima [mpe] ke dila samu na mabanza yina ke ya kunyokwama.’ Kasi, yinki beto lenda zonza samu na bamambu yina talisaka bisadi ya Yehova mpasi? Bamambu nyonso yayi ke vanda ‘bampasi ya ntama, meso ya munu ke tala dyaka ve yawu.’ Izaya 65:16, 17 ke zonzaka: ‘Mpila yina konso muntu yina ke sosaka lusakumunu samu na yandi mosi na ntoto Nzambi ya tsyeleka ke sakumuna yandi, mpe konso muntu yina ke dya ndefi na ntoto ke dya ndefi na nkumbu ya Nzambi ya tsyeleka. Samu ba ke zimbana bampasi ya ntama. Meso ya munu ke tala yawu dyaka ve. Tala! Munu ke na yidikaka zulu ya malu-malu mpe ntoto ya malu-malu. Mpe mambu ya ntama ke kwiza ve na mabanza, ya ke kwiza mpe ve na ntima.’ Ya ke vanda na ntangu yina Yehova ke manisa bampasi ya beto, mpe beto ke zimbana nyonso yina ya salaka beto na ntima.

10. Samu na yinki ya ke bweso samu na beto na kuvanda kintwadi na bampangi ya kento na ya bakala? (Tala mpe kizizi.)

¹⁰ Bubu yayi beto ke vandaka na kizunu na ntangu beto ke kwendaka na balukutakanu ya beto. Ya ke sadisaka beto na kuzimbana mambu nyonso ya yimbi yina yinza ke na salaka beto. Beto ke sadisaka mpe bampangi ya beto na kuvanda na kizunu ntangu beto ke lakisaka bawu bifu ya kimpeve mutindu luzolo, kilengi, kizunu, ntima ya yinda, bumbote. (Gal. 5:22, 23) Beto ke vutulaka Yehova matondo na kuvanda na kati ya dibuundu ya yandi! Ba yina ke na kati ya paradiso ya kimpeve ke tala na meso ya bawu kulungana ya nsilulu ya “zulu ya malu-malu mpe ntoto ya malu-malu.”

11. Faso ke na lakisaka Izaya 65:18, 19, yinki paradiso ya kimpeve yina Yehova yidikaka ke salaka beto?

¹¹ Kufuluka na matondo mpe tiya. Izaya zonzaka samu na yinki beto me bonga “kuyangalala mpe kuvanda na kyese” na kati ya paradiso ya kimpeve. Paradiso ya kimpeve yango ni Yehova yidikaka yawu. Izaya 65:18, 19 ke zonzaka: ‘Na yina beno yangalala mpe beno vanda na kyese ntangu nyonso na bima yina munu ke na yidikaka. Tala! Munu ke na yidikaka Yeruzalemi samu ya vanda kisika ya kyese, mpe bantu ya yandi ke kuma ya kuyangalala. Munu ke vanda na kyese samu na Yeruzalemi mpe ke yangalala samu na bantu ya munu; milolo ya kudila to milolo ya mpasi ke wakana dyaka ve na kati ya yandi.’ Ya ke na pamusaka ve beto na kutala mutindu Yehova ke na basisaka bantu na yinza ya yimbi yayi samu ba kota na paradiso ya kimpeve yina ke kitoko samu na bawu! Beto ke zonzaka na tiya nyonso na bantu ya nkaka bambote yina beto ke na kuzwaka na kati ya matsyeleka.​—Yer. 31:12.

12. Yinki nsilulu yina Yehova me pesa beto na Izaya 65:20-24 me sala nge na ntima, mpe samu na yinki?

¹² Beto ke tondaka mpe ke sepelaka na kuvanda  bantu yina ke zingaka na paradiso ya kimpeve. Kanisa na nyonso yina beto ke tala mpe ke sala na yinza ya malu-malu! Biblia pesaka nsilulu ti: ‘Na kisika yina, mwana ya fioti . . . yina ke zingaka kaka bilumbu fioti ke vanda dyaka ve, kiboba yina me lungisa ve bilumbu ya yandi ke vanda mpe dyaka ve.’ Beto ke ‘tunga bayinzo mpe ke zinga na kati ya yawu [mpe] ke kunda bilanga ya vinu mpe ke kudya mbuma ya yawu.’ Beto ke ‘sala ve kisalu ya ngolo samu ya vanda ya mpamba’ samu ‘Yehova ke sakumuna.’ Yandi pesaka beto nsilulu ti yandi ke na dikanisi yina yandi ke lungisa. Yandi ke pesa beto lukengolo mpe luzingu ya mbote. ‘Tekila ba bokila,’ yandi ke zaba bawu nyonso mpe yandi “ke lungisa nsatu ya konso kima yina kele na luzingu.”​—Iza. 65:20-24; Nku. 145:16.

13. Wa’ faso Izaya 65:25 ke lakisaka bansobolo yina bantu ke salaka samu na kukuma bisadi ya Yehova?

¹³ Kizunu mpe lukengolo. Na lubakusu ya mpeve ya santu ya Yehova, bantu mingi yina vanda nataka luzingu ya mutindu bibulu sobaka luzingu ya bawu. Izaya 65:25 ke zonzaka: ‘Kibulu ke kudya kisika mosi na mwana ya dimeme, Nkonsi ke kudya matiti kaka mutindu ngombe, mpe madya ya nyoka ke vanda fundu-fundu. Ba ke sala ata yimbi mosi ve mpe ke bebisa ata kima mosi ve na mongo ya munu nyonso ya santu, Yehova muntu me tuba.’ Ba salaka bangolo samu na kubika bifu ya bawu ya yimbi ya ntama. (Rom. 12:2; Ef. 4:22-24) Ya tsyeleka, dikanda ya Nzambi ke na bantu ya masumu. Bantangu ya nkaka ba lenda sala bafoti. Ata faso yina, Yehova ke na vukisaka “bantu nyonso” na nzila ya luzolo mpe kizunu. Ni yina ke salaka ti na kati ya bawu kizunu kele mpe bumosi. (Tite 2:11) Bansobolo yina bantu ke na salaka bubu yayi ke na lakisaka ti kaka ni Yehova Nzambi ya nene ke na ngolo ya kunata bantu na kusala yawu!

14. Wa’ faso butsyeleka ya Izaya 65:25 ke na lunganaka na luzingu ya mpangi mosi ya bakala?

¹⁴ Bantu lenda sala kwandi bansobolo na luzingu ya bawu? Beto tala disolo yayi. Ntwenya mosi yina vandaka na bamvula 20 yina vanda kotaka boloko bambala mingi, vanda na luzingu mosi ya yimbi. Yandi vanda zingaka na kinsuza, mpe vanda salaka bamambu ya ngolo na mutindu mosi ya kulutila. Yandi kotaka boloko samu yandi labaka camion, vanda labaka na bayinzo ya bantu mpe samu na bamambu ya nkaka ya yimbi. Yandi vandaka ve na boma na kunwana na muntu ni muntu. Ntangu yandi kuwaka matsyeleka ya Biblia na mbanla ya ntete, mpe bandaka kukwiza na balukutakanu ya Bambangi ya Yehova, yandi vandaka na kudima ti yandi kuzwaka kima ya kusala na luzingu ni kusadila Yehova na kati ya paradiso ya kimpeve. Na manima ya kuzwa mbotokolo, yandi vanda kanisaka mingi na mutindu Izaya 65:25 lunganaka na kimuntu ya yandi. Yandi bikaka ndyatulu ya bibulu yina vandaka na yandi mpe kumaka muntu ya kizunu mutindu Dimeme.

15. Samu na yinki beto ke na nsatu ya kubokila bantu na kuvukana na beto na kati ya paradiso ya kimpeve, mpe wapi mutindu beto lenda sala yawu?

¹⁵ Izaya 65:13 ke bandaka na bamambu yayi: ‘Yayi ni mambu Yehova Mfumu ya kuluta nene me tuba.’ Verse 25 ke manisaka na bamambu yayi: ‘me zonza Yehova.’ Bamambu yina yandi ke zonzaka ke lunganaka kaka. (Iza. 55:10, 11) Beto ke na zingaka ya tsyeleka na paradiso ya kimpeve. Yehova me yidika dikanda mosi ya bantu yina ke sadilaka yandi. Dikanda yango ke ve faso makanda ya nkaka. Samu beto ke na kati ya dikanda yango, beto ke na kizunu bubu yayi, mpe ke ya kubumbana na kati ya yinza yayi yina ke ya kufuluka na mambu ya yimbi. (Nku. 72:7) Samu na bamambu yayi, beto ke na nsatu ya kusadisa bantu mingi na kukota na kati ya dikanda ya beto ya bakristo. Beto lenda sala yawu ntangu beto ke salaka bangolo nyonso na kukumisa bantu bilandi.​—Mat. 28:19, 20.

WAPI MUTINDU BETO LENDA BENDA BANTU NA KATI YA PARADISO YA KIMPEVE

16. Yinki lenda sadisa bantu yina ke na nsatu ya kukota na paradiso ya kimpeve?

¹⁶ Mosi na mosi na beto ke na kisalu ya mfunu ya kusala samu paradiso ya kimpeve benda bantu.  Beto ke lenda kusala yawu kana beto landa Yehova. Yandi ke bendaka ve bantu na ngolo na dibuundu ya yandi. Kasi, yandi ke “bendaka” bantu na malembe nyonso. (Yoa. 6:44; Yer. 31:3) Ntangu bantu ya ntima ya mbote ke longokaka kuzaba ntima ya mbote ya Yehova mpe kimuntu ya yandi ya mbote, yandi ke bendaka bawu na yandi. Wa’ faso na bifu ya beto ya mbote mpe na ndyatulu ya beto, beto lenda benda bantu na paradiso ya kimpeve?

17. Wa’ faso beto lenda benda bantu na paradiso ya kimpeve?

¹⁷ Mosi ya bafaso beto lenda benda bantu na paradiso ya kimpeve ke ni na kubakilaka bampangi ya beto na luzolo nyonso mpe ntima ya mbote. Ntangu bantu ya malu-malu ke kwizaka na balukutakanu ya beto, beto ke vandaka na nsatu ba vanda na dikanisi mosi na yina vandaka na bantu yina vanda kwikilaka ve, yina ntangu ya nkaka landaka balukutakanu na Korinto. Ba zonzaka: “Nzambi ke ya tsyeleka na kati-kati ya beno.” (1 Ko. 14:24, 25; Zak. 8:23) Beno fwana kutatamana na kulanda dilongi yayi “beno vanda na kizunu beno na beno.”​—1 Tes. 5:13.

18. Wapi mutindu beto lenda benda bantu na dibuundu ya beto?

¹⁸ Beto me bonga kutadila bampangi ya beto ya kento na ya bakala ntangu nyonso mutindu Yehova ke tadilaka bawu. Beto ke salaka yawu ntangu beto ke kangamaka na bifu ya bawu ya mbote, mpe ke talaka ve bafoti ya bawu yina ke zimbana. Beto lenda bongisa bamambu na luzolo, kana beto lakisa ntangu nyonso ‘ntima ya mbote beto na beto, beto vanda na mawa ya bampangi mpe beto lemvokila bampangi na ntima nyonso.’ (Ef. 4:32 NWT) Na mutindu yina paradiso ya kimpeve ke benda bantu nyonso yina zola ti ba bakila bawu na luzolo ya mutindu yina. b

 BENO BIKANA NA KATI YA PARADISO YA KIMPEVE

19. a) Mutindu encadré “ Ba kwendaka mpe ba vutukaka” me lakisa yawu, yinki ba ya nkaka zonzaka na manima ya kuvutuka na paradiso ya kimpeve? b) Na yinki beto me bonga kutatamana na kusala? (Tala mpe kizizi.)

¹⁹ Beto ke sepelaka na paradiso ya beto ya kimpeve! Ya me lutila kitoko mingi kuluta na ntama, mpe ya ke ya kufuluka na bantu mingi yina ke sadilaka Yehova banda ntama. Bika beto vutula ntangu nyonso matondo na Yehova na yina yandi me yidika paradiso yayi samu na beto. Muntu ni muntu yina ke na nsatu ya kuvanda na ngolo, na kilengi ya tsyeleka, kuvanda na kizunu mpe lukengolo me lunga kukwiza na paradiso ya kimpeve mpe kubika yawu ata fioti ve! Na yawu, beto sala keba samu Satana ke na salaka nyonso yina ke na ngolo ya yandi samu na kubasisa beto na kati ya paradiso ya kimpeve. (1 Pi. 5:8; Luz. 12:9) Beto me fwana kubika ve yandi nunga na zulu ya beto. Bika beto sala bangolo samu na kubumba kitoko, bunkete mpe kizunu ya paradiso ya kimpeve.