Nge zabaka yawu?
Samu na yinki mfumu Davidi, soolaka ba yina vandaka ve bana ya Izraele na kuvanda basoda ya yandi?
SELEKI muntu ya Amoni, Uria muntu ya Heti, mpe Yitma muntu ya Moabi, a vandaka banzenza yina vandaka na kati ya basoda ya mfumu Davidi (1 Ns. 11:39, 41, 46) Na basoda ya mfumu Davidi vandaka mpe na “bantu ya Kereti, bantu ya Peleti, na bantu ya Gati.” (2 Sa. 15:18) Bakereti na Bapeleti vandaka bantu ya dikanda ya Filistia. (Ezk. 25:16) Bagati katukaka na Filistia yina ke mbanza ya Gati.—Yos. 13:2, 3; 1 Sa. 6:17, 18.
Samu na yinki mfumu Davidi kotisaka banzenza na kati ya basoda ya yandi? Yandi vandaka ya kundima ti ba ke bikana ya kukangama na yandi mpe ya kulutila mfunu na Yehova. Na kifwani, na yina me tadila Bakereti mpe Bapeleti buku The New Interpreter’s Dictionary of the Bible zonzaka: “Ba lakisaka kukangama na Davidi ata na kati ya bantangu ya mpasi yina yandi kutanaka na yawu ntangu yandi vanda yala.” Wa’ faso? Na ntangu ‘bantu nyonso ya Izraele’ mangaka kulanda mfumu Davidi samu na muntu ya muvusu na nkumbu ya Sheba, ata faso yina, bantu ya Kereti mpe ya Peleti bikanaka ya kukangama na Davidi mpe sadisaka yandi na kumanisa muvusu ya Sheba. (2 Sa. 20:1, 2, 7) Kifwani ya nkaka ke ntangu Adoniya mwana ya mfumu Davidi sosaka kubaka kimfumu ya tata ya yandi. Dyaka, bantu ya Kereti mpe ya Peleti lakisaka kukangama ya bawu na Davidi mpe sadisaka Salomo na kukuma mfumu, muntu yina Yehova soolaka samu na kukuma mfumu.—1 Mf. 1:24-27, 38, 39.
Muntu ya nkaka yina lakisaka kukangama na Davidi vandaka Itai muntu ya Gati. Itai na basoda ya yandi 600 sadisaka mfumu Davidi na ntangu mwana ya yandi Absalomi balulaka ntima ya bana ya Izraele samu na kutula yandi mfumu. Davidi zonzaka na Itai samu ti yandi ke nzenza, ya zola bonga ve yandi nwana samu na yandi. Kasi Itai zonzaka: ‘Ya tsyeleka mutindu Yehova ke moyo mpe ya tsyeleka mutindu mfumu ya munu ke moyo, kisika nyonso mfumu ya munu ke vanda, ya vanda samu na lufwa to samu na luzingu kisadi ya nge ke vanda kuna’—2 Sa. 15:6, 18-21.
Itai vandaka ya kukangama na Davidi, mfumu yina Yehova soolaka
Bantu ya Kereti, bantu ya Peleti mpe bantu ya Gati vandaka banzenza, ba kwiza ndima ti Yehova ke Nzambi ya tsyeleka mpe ti Davidi ke muntu yina yandi soolaka. Davidi fulukaka na matondo samu na bisadi ya yandi ya kukangama!
a Musiku ya Nzambi yina ke na kati ya Kulonga Misiku 23:3-6 niminaka bantu ya Moabi mpe ya Amoni na kuvanda na kati ya kimvuka ya bana Izraele. Ata ti, Musiku yango vandaka pesa ve bawu luve na kuvanda bantu ya Izraele na meso ya luyalu, kasi ya vandaka nimina ve bawu na kuvukana na dikanda ya Yehova samu na kusadila yandi. Tala Étude perspicace des Écritures, Volume 1, p. 100-101.
