1. Basamuni nyonso ke sepelaka kwandi na kisalu ya kusamuna? (Tala mpe kizizi.)

 BETO Bambangi ya Yehova beto ke samunaka samu beto ke zolaka Yehova mpe bampangi. Mingi na kati ya beto ke zolaka kusamuna, kasi samu na ba ya nkaka, ya ke mwa mpasi na kusala yawu. Ya lenda vanda ti ba ke talaka nsoni to ba ke kanisaka ti ba zaba ve kulonga. Ba ya nkaka ke zolaka ve kukwenda na bayinzo ya bantu kana ba ke ve na vingilaka bawu. Ba ya nkaka ke vandaka na boma ba kuwa ve bawu to ba ke zolaka ve kuswana na bantu. Ata ti ba ke zolaka Yehova, bampangi yayi ke talaka ti ya ke mpasi na kusamuna bantu yina ba me zaba ve. Ata faso yina, ba me zaba ti kisalu yayi ke mfunu mpe ba ke samunaka ntangu nyonso. Yehova ke sepelaka na bangolo ya bawu!

2. Kana ya ke mpasi na nge na kuzwa kilengi na kisalu ya kusamuna yinki lenda sadisa nge?

² Kulemba ve kana nge ke na nwanaka na makanisi ya mutindu yayi. Kuvanda na makanisi yayi, lenda lakisa ti nge ke muntu ya kukuluka. Nge zola ve ba pesa nge lukumu to nge zola ve kuswana na bantu. Beto nyonso beto ke zolaka bantu, ni yawu yina ya ke salaka beto mpasi ntangu ba ke zonzilaka beto bamambu ya ngolo. Yehova ke na nsatu ya kupesa beto lubakusu samu yandi zaba ti ya ke vandaka mpasi na kusamuna bantangu ya nkaka. (Iza. 41:13) Na disolo yayi, beto ke tala bamambu tanu yina lenda sadisa beto na kunwana na makanisi ya mutindu yayi mpe na kuzwa kilengi na kisalu ya beto ya kusamuna.

 BIKA MAMBU YA NZAMBI PESA NGE NGOLO

3. Yinki sadisaka Yeremia na kusamuna?

³ Na ntangu ya ntama, bamambu yina Yehova zonzaka, pesaka ngolo na bisadi ya yandi ntangu ba vandaka na kisalu ya mpasi ya kusala. Beto zonzila kifwani ya mbikudi Yeremia. Ntangu Yehova pesaka yandi kisalu ya kusamuna, yandi vanda kanisa ti yandi ke ve na makoki ya kusala yawu. Na yawu yandi zonzaka: “Munu zaba ve kuzonza, samu mu kele kaka mwana ya fyoti.” (Yer. 1:6) Kasi yinki pesaka yandi ngolo ya kusamuna? Ni bamambu yina Yehova zonzilaka yandi pesaka yandi ngolo. Yandi zonzaka: ‘Ya kumaka mutindu tiya yina ke pelaka, yina ba me kanga na mikwa ya munu mpe mu vanda lenda ve kubumba yawu.’ (Yer 20:8, 9) Ya vandaka ve pete na Yeremia na kusamuna kisika yina yandi vandaka, kasi mambu yina Yehova zonzaka na yandi, pesaka yandi bukindi ya kusala yawu.

4. Wapi mutindu kutanga Biblia mpe kuyindula na yawu ke sadisa beto na kukumisa kiminu ya beto ngolo? (Bakolose 1:9, 10)

⁴ Mambu yina Yehova zonzaka na Biblia pesaka bakristo ngolo. Ntangu ntumwa Polo sonikaka na kimvuka ya Bakolose, yandi zonzaka na bawu ti kulongoka mingi na yina me tadila Yehova ke sadisa bawu na kubika ve “kubuta mbuma na konso kisalu ya mbote” mpe ni faso yayi ba zola “tambula na mutindu yina me fwanana na Yehova.” Bakolose 1:9, 10 ke zonzaka: ‘Ni yawu yina, beto ke na kubika ve na kusambidila beno katuka kilumbu yina beto kuwaka nsangu ya kiminu ya beno na Yesu Kristo. Beto ke na kulomba na Nzambi na kulakisa beno mambu yina yandi ke zolaka. Beno ke bakula yawu na ndwenga mpe mayela yina Mpeve ke pesaka. Beno vanda na luzingu ya kudedama na mantwala ya Mfumu na kusala mambu yina ke sepelisaka yandi. Beno ke sala bisalu ya mbote ya mutindu na mutindu, mpe beno ke kula na luzabu ya Nzambi.’ Kisalu ya kusamuna nsangu ya mbote ke na kati ya bisalu ya mbote yina. Kutanga Biblia mpe kuyindula na yawu ke sadisa beto na kukumisa kiminu ya beto ngolo mpe na kubakula mfunu ya kusamuna.

5. Yinki beto lenda sala samu ti kutanga mpe kulongoka ya beto ya Biblia natina beto bambote?

⁵ Samu Biblia kindisa beto, beto me bonga ve kutanga yawu na zulu-zulu. Kasi beto me bonga kubaka ntangu na kutanga, kulongoka mpe kuyindula na yawu. Kana nge kutana na verse mosi yina nge na lendaka ve kubakula mbote-mbote, kukima ve yawu. Sadila Index des publications des Témoins de Jéhovah to Buku ya kusosa samu na Bambangi ya Yehova na kuzaba dyaka mbote-mbote yinki verse yango zola zonza. Kubaka ntangu ya kulongoka ke kumisa dyaka ngolo kundima ya beto ti mambu ya Nzambi ke ya tsyeleka. (1 Tes. 5:21) Kundima ti mambu ya Nzambi ke tsyeleka ke pesa beto nsatu mpe kilengi ya kukabula yawu na bampangi.

 BONGAMA MBOTE-MBOTE TEKILA NGE KWENDA SAMUNA

6. Samu na yinki ya me lunga beto bongama tekila beto kwenda samuna?

⁶ Kana nge bongama mbote-mbote tekila nge kwenda samuna, ya ke sadisa nge na kuvanda ve na boma ya kusolola na bantu. Tekila Yesu filisa bilandi na kukwenda samuna, yandi sadisaka bawu na kubongama mbote-mbote. (Luke 10:1-11) Na manima ya kusadila mambu yina Yesu longaka bawu, bilandi kuzwaka kilengi mingi na kisalu ya kusamuna.​—Luke 10:17.

7. Wapi mutindu beto lenda bongama tekila beto kwenda samuna? (Tala mpe kizizi.)

⁷ Wa’ faso beto lenda bongama tekila beto kwenda samuna? Tekila beto kwenda samuna beto me bonga kukanisa na mambu yina beto ke zonza, mpe na faso ya kuzonzila yawu samu ya vanda pete na bantu na kubakula yawu. Beto lenda kanisa na mantwala na mwa bamambu yina bantu ke zonzaka na Bambangi ya Yehova kisika beto kele mpe kusosa mvutu yina beto lenda pesa. Ntangu beto ke na sololaka na bantu beto sala mutindu beto me zabana. Beto lenda seka mpe kubakila bawu mutindu bandiku.

8. Samu na yinki ntumwa Polo zonzaka ti bakristo ke mutindu bima ya ntoto?

⁸ Kanisa na bifwani yina ntumwa Polo bakaka samu na kuzonzila kisalu ya kusamuna. Yandi zonzaka: “beto ke na kimvwama yayi na kati ya bima ya ntoto.” (2 Ko. 4:7) Yinki ke kimvwama yina ntumwa Polo me zonzila na verse yayi? Ya ke kisalu ya kusamuna yina ke vuukisaka bantu. (2 Ko. 4:1) Bima ya ntoto ke yinki? Ya ke bisadi ya Nzambi yina ke nataka nsangu ya mbote na bampangi. Na ntangu ya Polo, bantu vanda sadilaka bandonga ya ntoto samu na kunata bima ya ntalu mutindu madya, vinu to mbongo. Mutindu mosi mpe, Yehova ke sadilaka beto samu nsangu ya mbote kuma na bantu ya nkaka. Beto ke lendaka kusamuna na ngolo ya beto mosi ve, kasi ni Yehova ke pesaka beto ngolo ya kusala yawu.

SAMBILA SAMU NA KUZWA BUKINDI

9. Yinki lenda sadisa beto na kununga boma ya beto? (Tala mpe kizizi.)

⁹ Bantangu ya nkaka, beto lenda vanda na boma ti bantu manga kuwa beto. Wa’ faso beto lenda nunga makanisi ya faso yayi? Lusambu yina bantumwa salaka ntangu ba niminaka bawu kusamuna lenda sadisa beto. Bantumwa vandaka ve na boma, ba lombaka na Yehova na kusadisa bawu samu “bawu mwangisa nsangu ya [yandi] na kivuvu nyonso.” Yehova pesaka mvutu na lusambu ya bawu na mbala mosi. (Bis. 4:18, 29, 31) Kana boma ya kukwenda samuna ke na kwamisaka  beto, beto lenda lomba lubakusu ya Yehova na lusambu. Beto lomba na Yehova na kukulisa luzolo ya beto samu na bantu. Ni yawu ke sala ti beto vanda dyaka ve na boma ya bantu.

10. Wa’ faso Yehova ke sadisaka beto samu na kusala kisalu ya beto ya kusamuna? (Izaya 43:10-12)

¹⁰ Yehova soolaka beto mutindu Bambangi ya yandi, mpe yandi me pesa nsilulu ti yandi ke pesa beto bukindi. Izaya 43:10-12 ke zonzaka: ‘‘‘Beno kele Bambangi ya munu,” Yehova muntu me tuba, “Ee, kisadi ya munu yina mu soolaka, samu beno zaba mpe beno kwikila na munu. Mpe beno bakula ti mu kele mutindu mosi. Na mantwala ya munu ata Nzambi mosi salamaka ve, mpe na manima ya munu, ata mosi ve vandaka. Munu​—munu kele Yehova, mpe katula munu muvukisi ya nkaka kele ve.’’ “Munu muntu tubaka, vuukisaka, mpe zabisaka ntangu nzambi ata mosi ve ya nzenza vandaka na kati na beno. Na yina beno kele Bambangi ya munu,” Yehova muntu me tuba, “mpe munu kele Nzambi.’’’ Beto zonzila bafaso yiya yina yandi ke pesaka beto bukindi. Ya ntete, Yesu ke na beto bilumbu nyonso ntangu beto ke samunaka. (Mat. 28:18-20) Ya zole, Yehova ke sadilaka bambazi samu na kusadisa beto. (Luz. 14:6) Ya tatu, Yehova pesaka beto mpeve ya yandi ya santu samu ti ya bambula beto bamambu yina beto longokaka. (Yoa. 14:25, 26) Ya yiya, Yehova ke pesaka beto bampangi samu beto sala kintwadi. Na lubakusu ya Yehova, ya bampangi ya beto, beto ke lenda kusamuna na bukindi.

BONGAMA NA KUSOBA MPE BONGISA FASO YA NGE YA KUTADILA KISALU YA NGE YA KUSAMUNA

11. Yinki lenda sadisa beto na kukutana na bantu mingi na kisalu ya kusamuna? (Tala mpe kizizi.)

¹¹ Ya ke lembisaka kwandi nge ntangu nge ke kutanaka ve bantu na bayinzo ya bawu? Kana ni yawu, nge lenda kukiyufula: ‘Wapi kisika ba kele?’ (Bis. 16:13) ‘Ba ke na kisalu to na zandu?’ Kana ni yawu, mu lenda samuna kwandi na banzila? Mpangi mosi na nkumbu ya Joshua me zonza: “Ntangu mu ke samunaka na banzila mpe na bisika yina bantu ke mingi, mu ke kuzwaka masolo mingi na bantu.” Yandi na kento ya yandi Bridget, kutanaka bantu mingi ntangu ba bandaka kusamuna na nkokila mpe dimanche na manima ya midi.​—Ef. 5:15, 16.

12. Yinki lenda sadisa beto na kuzaba bamambu yina muntu ke kwikilaka na yawu to mutindu ya masolo yina muntu ke zolaka kusala?

¹² Ntangu muntu zola ve kuwa nge sosa kuzaba yinki ke na yintu ya yandi, yinki ke na kwamisaka  yandi, mpe wapi mutindu ya masolo yandi ke zolaka. Samu na kubanda masolo na bantu, Joshua na Bridget ke sadilaka kyuvu yina ke na paje ya ntete na mikanda ya beto ya fioti. Na kifwani, ntangu ba ke sadilaka mukanda Yiki nge ke kanisaka samu na Biblia? Ba ke yufulaka: “Samu na bantu ya nkaka Biblia ke dyambu ya Nzambi, kasi ba ya nkaka ke zonzaka ti ya ke kaka makanisi ya bantu. Yinki nge me kanisa?” Ya ke nataka masolo ya kitoko.

13. Ata ti bantu ke mangaka kuwa beto, yinki zola pesa beto kilengi? (Bingana 27:11)

¹³ Kilengi ya beto ke katukaka ve na lutangu ya bantu yina ke kuwaka beto. Mambu ya kulutila mfunu samu na beto ni kupesa kimbangi. Ni yawu Yehova na Yesu zola ti beto sala. (Bis. 10:42) Ata beto me kutana ve na muntu na yinzo to bantu nyonso me manga kuwa beto, beto lenda vanda na kilengi samu beto me zaba ti beto me sepelisa Tata ya beto Yehova.​—Bingana 27:11 ke zonzaka: ‘Mwana ya munu, vanda mayela mpe pesa ntima ya munu kyese, samu munu pesa mvutu na muntu yina ke sombolaka munu.’

14. Samu na yinki beto ke sepelaka ntangu mpangi ya nkaka me kuzwa muntu yina ke zolaka matsyeleka?

¹⁴ Kima ya nkaka yina lenda pesa beto kilengi, ni ntangu musamuni ya nkaka ke kutanaka na muntu yina ke zolaka matsyeleka. Yinzo ya Kengidi zonzaka ti kisalu ya beto ya kusamuna ke mutindu kisalu ya kusosa mwana ya fioti yina me zimbana. Bantu mingi ke na sosaka yandi na bisika nyonso. Kasi ntangu mwana me talana bantu nyonso ke sepelaka, kaka ve muntu yina me tala yandi. Faso mosi mpe, kukumisa muntu kilandi ya Yesu ke kisalu yina ke lombaka ti bampangi nyonso ya kimvuka tula diboko. Kimvuka ke na nsatu ya bampangi nyonso samu na kusamuna na bisika nyonso, mpe ntangu muntu mosi ke ndimaka kukwiza na balukutakanu, bampangi nyonso ke sepelaka.

MAMBU YA KULUTILA MFUNU KELE LUZOLO YA NGE SAMU NA YEHOVA MPE SAMU NA BAMPANGI

15. Samu na yinki kusadila mambu yina ke na Matayi 22:37-39 lenda sadisa beto na kukulisa kilengi ya beto na kisalu ya kusamuna? (Tala mpe kizizi ya paje ya .)

¹⁵ Kilengi ya beto na kisalu ya kusamuna ke kula kana beto zimbana ve ti kima ya kulutila mfunu ke ni luzolo ya beto samu na Yehova mpe samu na bampangi. Matayi 22:37-39 ke zonzaka: ‘Nge fwana kuzola Yehova Nzambi ya nge na ntima ya nge nyonso, na mwela ya nge nyonso, mpe na makanisi ya nge nyonso.’ Yayi ni musiku ya ntete mpe ya kulutila mfunu. Ya zole yina ke ya kukwelana na yayi kele:  ‘Nge fwana kuzola mpangi ya nge mutindu nge mosi.’ Kanisa na kilengi yina ya ke salaka na Yehova, ntangu yandi ke talaka beto na kusamuna mpe na kilengi yina kubanda kulongoka Biblia ke nata na bantu. Kuzimbana ve ti ba yina ke kuwaka beto, mpe ke bakaka mukanu ya kusadila Yehova lenda kuzwa luzingu ya ntangu nyonso!​—Yoa. 6:40; 1 Tim. 4:16.

16. Wa’ faso beto lenda kuzwa kilengi na kisalu ya kusamuna ntangu beto ke na maladi? Pesa bifwani.

¹⁶ Kana nge ke na maladi to nge lenda ve kubasika na yinzo, kanisa na yina nge lenda sala samu na kulakisa luzolo ya nge na Yehova to na bampangi. Na ntangu ya COVID-19, Samuel na Dania vandaka kaka na yinzo. Na ntangu ya mpasi yina, ba vanda samunaka na télephone, kusonika mikanda mpe kulonga bantu Biblia na nzila ya Zoom. Ntangu yandi vandaka na lupitalu samu na maladi ya yandi ya cancer, Samuel vanda samuna bantu yina yandi vanda kutana mpe yandi me zonza: “Bamambu ya mpasi lenda lembisa beto, ya ke nyongisaka mpe ya lenda meka kiminu ya beto. Kasi kilengi ya beto ke katukaka na kisalu ya Yehova.” Na kati ya ntangu yina, Dania kubwaka mpe yandi lutisaka bangonda tatu yina yandi vanda lenda ve kutelama. Yandi vanda sadila fauteuil roulant. Yandi me zonza: “Mu sosaka kusala nyonso yina mu vandaka na makoki ya kusala na ntangu yina. Mu vanda samuna kento yina vanda sadisa munu na kubeluka mpe ba yina vanda nataka munu bima na yinzo. Mu kuzwaka mpe masolo ya kitoko na kento mosi yina vanda tekisaka manganga.” Samuel na Dania lendaka ve kusala nyonso yina ba vanda sosa kusala. Kasi, samu ba salaka nyonso yina ba lendaka kusala na makoki ya bawu, ya pesaka bawu kilengi.

17. Samu na yinki malongi nyonso yina beto me tala ke mfunu samu na kukulisa kilengi ya beto na kisalu ya kusamuna?

¹⁷ Beto sala bangolo samu na kusadila bamambu nyonso yina beto me tala na disolo yayi. Malongi nyonso yina beto me kuzwa ke mutindu bima nyonso yina beto ke sadilaka samu na kulamba madya ya kitoko. Kana kima mosi kele ve, madya ke bonga ve. Kana beto sadila malongi nyonso yayi, beto ke nunga makanisi ya yimbi mpe beto ke kulisa kilengi ya beto na kisalu ya kusamuna.