Nge me tanga mbote-mbote masolo ya Yinzo ya Kengidi ya mvula yayi? Beto tala kana nge lenda pesa bamvutu na byuvu yayi:

Wapi kifwani Yehova me pesa beto na yina me tadila faso ya kubakila bakento?

Yandi ke bakilaka bakento faso yandi ke bakilaka bantu nyonso. Nzambi ke kuwaka bakento, yandi ke tulaka dikebi na bamambu yina bakento ke na yawu na ntima mpe na bamambu yina ke kwamisaka bawu. Yandi ke tulaka ntima na bakristo ya kento samu na kusala kisalu ya yandi.—w24.01, p. 15-16.

Wa’ faso beto lenda sadila bamambu yina ke na Baefeze 5:7, yina ke zonzaka: “Beno sala ata kima kintwadi na bawu”?

Ntumwa Polo kebisaka beto na kusala ve kindiku na bantu yina lenda nata beto na kuzitisa ve malongi ya Nzambi. Ya ke bantu yina beto ke lutisaka ntangu na bawu kisika mosi to na internet.—w24.03, p. 22-23.

Na mantwala ya wapi bamambu ya luvunu beto me bonga kusala keba?

Beto ke na nsatu ya kusala keba na masolo yina beto me zaba ve kana ya ke ya tsyeleka to ya luvunu yina bampangi yina beto me zaba me kabula beto, bansangu na internet yina me katuka na bantu yina beto me zaba ve, na bambeni ya beto to ba apostats yina ke bumbanaka mpe ke sosaka kulakisa ti ba ke sepelaka na matsyeleka.—w24.04, p. 12.

Yinki beto me zaba mpe yinki beto me zaba ve na yina me tadila mutindu Yehova ke sambisa mfumu Salomoni, bantu ya bambanza Sodome mpe ya Gomore mpe bantu yina kufwaka na mvula ya nene?

Beto me zaba ve kana Yehova ke vumbula bawu samu na luzingu ya ntangu nyonso. Kasi beto me zaba ti yandi me zaba mbote-mbote bamambu faso ya kele, mpe yandi ke Nzambi yina ke lakisaka ntima ya kyadi.—w24.05, p. 3-4.

Kuzaba ti Nzambi ke “Ditadi” zola zonza yinki samu na beto? (Det. 32:4)

Beto lenda sosa kisika ya kubumbana na Yehova. Yandi ke muntu yina ba lenda tudila ntima. Bansilulu nyonso yina yandi ke pesaka, yandi ke lungisaka yawu. Mpe yandi ke sobaka ve, yandi ke ve mabaluka-ntangu, mpe yandi me soba ve dikanisi ya yandi ya ntete.—w24.06, p. 26-28.

Yinki lenda sadisa nge na kumesana na kimvuka ya malu-malu?

Tudila Yehova ntima, yandi ke sadisa nge faso yandi salaka yawu na bisadi ya yandi ya ntama. Kufwanisa ve bampangi ya kimvuka ya malu-malu na ya kimvuka ya nge ya ntama. Tula bangolo ya nge nyonso na kimvuka ya nge ya malu-malu, mpe sosa bandiku ya malu-malu.—w24.07, p. 26-28.

Wapi bileso beto lenda longoka na bifwani yina Yesu pesaka na Matayi kikapu 25?

Kifwani ya mameme na bankombo ke kindisaka beto na kuvanda ya kukangama mpe ya kukwikama na Yehova. Kifwani ya bantwenya ya bakento ya bizoba mpe ya mayela ke sadisaka beto na kuvanda ya kubongama mpe ekenge. Mpe kifwani ya batalenta ke lakisaka mfunu ya kuvanda ve na bobolo kasi kuvanda na tiya.—w24.09, p. 20-24.

Wapi yina vandaka ntela ya kisika ya kukotila ya tempelo ya Salomoni?

Na 2 Bansangu 3:4, ya ke na ba manuscrits ya ntama yina ke zonzaka ti ntela ya yawu vandaka “maboko 120,” yina ke bametre 53. Na ba manuscrits ya nkaka beto ke tangaka “maboko 20,” yina ke bametre 9. Bametre 9 yayi lenda vanda ntela ya bibaka ya tempelo.—w24.10, p. 31.

Samu na basadisi, yinki zola zonza ‘kuvanda bakala ya kento mosi? (1 Tim. 3:12)

Ya zola zonza kuvanda ya kukwelana na kento mosi mpe kusala ve kinsunza. Mpe kulula ata fioti ve kento ya nkaka.—w24.11, p. 19.

Samu na yinki beto lenda zonza ti Yoane 6:53 ke zonzilaka ve Madya ya nkokila ya Mfumu?

Yoane 6:53 ke zonzilaka mfunu ya kudya nzutu ya Yesu mpe kunwa menga ya yandi. Yesu zonzaka bamambu yayi na Galile, na mvula 32 N.B., na bazwife yina vandaka na nsatu ya kutula kiminu na yandi. Kasi, Yesu tulaka Madya ya nkokila ya Mfumu mvula mosi na manima na Yeruzalemi. Kuna Yesu zonzaka na ba yina zola yala na yandi na mazulu.—w24.12, p. 10-11.