DISOLO YA KULONGOKA 49
NZIMBU 147 Nsilulu ya luzingu ya ntangu nyonso
Yinki nge me fwana kusala samu na kuzinga ntangu nyonso?
“Muntu nyonso yina me ndima Mwana mpe ke na lakisaka kiminu na yandi, kuzwa luzingu ya ntangu nyonso.”—YOA. 6:40, NWT.
YINA BETO KE LONGOKA
Yinki ba yina ba tulaka mafuta mpe mameme ya nkaka lenda sala samu na kuzwa bambote ya munkayulu ya Yesu?
1. Wapi dikanisi bantu mingi lenda vanda na yawu na yina me tadila luzingu ya ntangu nyonso?
SAMU na kuvanda na luzingu ya yinda, bantu mingi ke salaka keba na yina ba ke kudyaka mpe ba ke salaka sport. Ata mpila yina, ba zaba ti ya ke sadisa ve bawu na kuzinga ntangu nyonso mpe ba zaba ti bubu yayi bantu lenda zinga ve ntangu nyonso. Kasi na Yoane 3:16 na 5:24, Yesu zonzaka ti bantu lenda kuzwa “luzingu ya ntangu nyonso.”
2. Yinki Yoane kikapu 6 ke zonzaka na yina me tadila luzingu ya ntangu nyonso? (Yoane 6:39, 40)
2 Kilumbu mosi, Yesu salaka kimangu samu na kupesa mampa mpe bambisi na bantu mingi. a Ya kamwisaka bawu mingi. Kasi, bamambu yina Yesu zonzaka na kilumbu yina landaka kamwisaka dyaka bawu ya kulutila. Yandi zonzaka na kikunku ya bantu yina landaka yandi na Kapenawume, pene-pene ya nzadi ya Galile ti, bantu lenda vumbuka na lufwa mpe kuzwa luzingu ya ntangu nyonso. (Tanga Yoane 6:39, 40.) Kanisa na bampangi ya nge mpe bantu yina nge ke zolaka yina kufwaka. Yesu me zonza ti bantu mingi yina kufwaka lenda vumbuka na lufwa mpe nge na bantu yina nge ke zolaka lenda kuzwa luzingu ya ntangu nyonso. Kasi, samu na bantu mingi bamambu yina Yesu zonzaka na manima na Yoane kikapu 6 lenda vanda mpasi ya kubakula. Yinki yandi zonzaka?
3. Yinki Yesu zonzaka na Yoane 6:51 na yina me tadila yandi mosi?
3 Kimangu ya mampa yina Yesu salaka nataka bantu na kukanisa na mane yina Yehova pesaka na bankooko ya bawu na ntoto ya kuyuma. Ni na yawu, Biblia ke bokilaka mane “dimpa yina katukaka na zulu.” (Nku. 105:40; Yoa. 6:31) Yesu sadilaka mane na kulonga kileso ya mfunu. Ata ti ni Nzambi pesaka mane, kasi ba yina kudyaka yawu zingaka ve ntangu nyonso. (Yoa. 6:49) Kasi, Yesu zonzaka ti yandi kele “dimpa ya tsyeleka yina me katuka na zulu,” “dimpa ya Nzambi,” mpe “dimpa ya luzingu.” (Yoa. 6:32, 33, 35) Yesu lakisaka pwelele ti yandi ke ve faso mosi na mane. Yandi zonzaka: “Mu ke dimpa ya luzingu yina katukaka na zulu. Kana muntu kudya dimpa yayi, yandi ke zinga ntangu nyonso.” (Tanga Yoane 6:51, NWT.) Mambu yayi, pamusaka Bazwife. Wa’ faso Yesu lenda zonza ti yandi ke “dimpa” yina katukaka na zulu mpe ya me lutila mane yina Nzambi yandi mosi pesaka na bankooko ya bawu? Yesu sadisaka bawu na kuzwa mvutu na kyuvu yayi, ntangu yandi zonzaka: “dimpa yina mu ke pesa ke ni musuni ya munu.” Yinki yandi vanda sosa kuzonza? Kubakula mvutu na kyuvu yayi, ke sadisa beto na kuzaba yinki ke salaka ti beto na bantu yina beto ke zolaka kuzwa luzingu ya ntangu nyonso. Beto zonzila yawu.
DIMPA YA LUZINGU MPE MUSUNI YA YANDI
4. Samu na yinki bamambu yina Yesu zonzaka lwalisaka ba yina vanda kuwa yandi?
4 Bamambu yina Yesu zonzaka lwalisaka ba yina vanda kuwa yandi, samu yandi zonzaka na bawu ti yandi ke pesa “musuni ya yandi samu na luzingu ya yinza.” Ya lenda vanda ti, bantu yayi vanda kanisa ti ba zolaka kudya musuni ya nzutu ya Yesu. (Yoa. 6:52) Mambu ya nkaka yina salaka dyaka bawu mpasi ni ntangu Yesu bwelaka: “Kana beno kudya ve musuni ya Mwana ya muntu mpe beno kunwa ve menga ya yandi, beno ke ve na luzingu na kati ya beno.”—Yoa. 6:53, NWT.
5. Samu na yinki beto lenda vanda na kundima ti Yesu vanda sosaka ve kuzonza ti bantu zola kunwa menga ya nzutu ya yandi?
5 Na ntangu ya Nowe Nzambi niminaka bantu na kudya to kunwa menga. (Kub. 9:3, 4) Yehova vutukila dyaka mambu yayi na musiku yina yandi pesaka na bana ya Izraele. Ba me fwana ‘kufwa’ muntu nyonso yina ke kudya menga (Lev. 7:27) Yesu zonzaka ti Bazwife zola zitisa bamambu nyonso yina ke na musiku ya Moyize. (Mat. 5:17-19) Na yawu, yandi sosaka ve kuzonza na Bazwife na kudya musuni ya nzutu ya yandi to kunwa menga yina ke na kati ya yawu. Kasi Yesu zonzaka bamambu ya ngolo yayi samu na kulonga bantu yinki ba me fwana kusala samu na kuzwa “luzingu ya ntangu nyonso.”—Yoa. 6:54, NWT.
6. Wa’ faso beto me zaba ti ntangu Yesu zonzaka na kudya musuni ya nzutu ya yandi mpe kunwa menga ya yandi vandaka kaka kifwani?
6 Yinki Yesu vanda sosa kulonga? Awa, yandi sadilaka kifwani kaka mutindu yandi salaka ntangu yandi zonzaka na kento ya bwala ya Samariya ti: “Muntu yina ke kunwa maza yina mu ke pesa yandi, ke vanda dyaka ve ata fioti na nsatu ya maza. Kasi maza yina mu ke pesa yandi ke kuma na kati ya yandi mukelo ya maza yina ke basikaka samu na kupesa luzingu ya ntangu nyonso.” (Yoa. 4:7, 14, NWT) b Yesu vanda sosa ve kuzonza ti ya vandaka na dibulu yina vandaka na maza yina zola pesa luzingu ya ntangu nyonso na kento yayi ya bwala ya Samariya. Mutindu mosi mpe, Yesu vanda sosa ve kuzonza ti kimvuka ya bantu yayi vanda kuwa yandi ya Kapenawume zola kuzwa luzingu ya ntangu nyonso kana ba kudya musuni ya nzutu ya yandi mpe kunwa menga ya yandi.
NTANGU YA NKAKA YINA YESU ZONZILAKA NZUTU MPE MENGA YA YANDI
7. Yinki bantu ya nkaka ke kanisaka na bamambu yina Yesu zonzaka na Yoane 6:53?
7 Mabuundu ya nkaka ke zonzaka ti ba me fwana kusadila mambu yina Yesu zonzaka na Yoane 6:53, ntangu ba ke salaka lukutakanu ya Madya ya nkokila ya Mfumu. Ba ke kanisaka mutindu yina samu ti, yandi sadilaka kifwani ya kudya musuni ya nzutu ya yandi mpe kunwa menga na Yoane 6:53 mpe na Matayi 26:26-28. Na yawu ba ke zonzaka ti, bantu nyonso yina ke kwizaka na lukutakanu yayi me fwana kudya dimpa mpe vinu yina ba ke lutisaka. Ya ke kwandi ni faso yina? Beto me fwana kutala mbote-mbote kana mambu yayi yina ba ke zonzaka ke tsyeleka to ve. Ya ke mfunu samu ti bantu mingi na bisika nyonso na yinza ke vukanaka na beto na lukutakanu yayi. Beto ke tala samu na yinki bamambu yina ke na Yoane 6:53 ke ve faso mosi na bamambu yina Yesu zonzaka na lukutakanu ya Madya ya nkokila ya Mfumu.
8. Yinki ke lakisaka ti Yesu vanda zonzila ve bamambu mosi? (Tala mpe bizizi.)
8 Yinki ke na lakisaka ti Yesu vanda zonzila ve mambu mosi? Mambu ya ntete, na wapi ntangu mpe kisika Yesu vanda zonzila bamambu yina ke na Yoane 6:53-56? Yandi zonzaka yawu na Galile na mvula 32 ya N.B. na kimvuka ya Bazwife. Yandi zonzaka mambu yayi, mvula mosi tekila yandi sala lukutakanu ya Madya ya nkokila ya Mfumu na Yeruzalemi. Mambu ya zole, banani vandaka kuwa yandi? Bantu mingi yina vandaka kuwa yandi na Galile vanda kanisa kaka na madya, kasi ve na bansatu ya bawu ya kimpeve. (Yoa. 6:26) Na yawu, samu ba bakulaka ve bamambu yina Yesu zonzaka ba bikaka kukwikila na yandi. Ata bilandi ya yandi ya nkaka bikaka mpe kulanda yandi. (Yoa. 6:14, 36, 42, 60, 64, 66) Kasi, ni yawu ve salamaka ntangu Yesu salaka lukutakanu ya Madya ya nkokila ya Mfumu na 33 N.B., mvula mosi na manima. Awa ba yina vandaka kuwa yandi vandaka bantumwa 11 yina bikanaka ya kukangama na yandi ata ti ba bakulaka ve bamambu nyonso yina yandi longoka. Kasi bantumwa yayi, vanda ve mutindu mosi na bantu yina vandaka na Galile. Ba vandaka na kundima ti Yesu vandaka Mwana ya Nzambi yina katukaka na mazulu. (Mat. 16:16) Yesu zonzaka na bawu: “Beno ke ba yina bikanaka ntangu nyonso na munu na kati ya bampasi ya munu.” (Luke 22:28) Bamambu zole yayi, ke na lakisaka ti na Yoane 6:53 Yesu vanda zonza ve na bantu faso ya kusala lukutakanu ya Madya ya nkokila ya Mfumu. Beto tala dyaka mambu ya nkaka yina ke na lakisaka yawu.
Yoane kikapu 6 ke zonzilaka bamambu yina Yesu zonzaka na kimvuka ya bantu ya Galile (na diboko ya kento). Mvula mosi na manima Yesu zonzaka na bantumwa 11 ya kukwikama na Yeruzalemi (na diboko ya bakala) (Tala paragrafe 8)
YINKI BAMAMBU YINA YESU ZONZAKA ZOLA ZONZA SAMU NA NGE?
9. Bamambu yina Yesu zonzaka na lukutakanu Madya ya nkokila ya Mfumu ke samu na banani?
9 Na lukutakanu ya Madya ya nkokila ya Mfumu, Yesu pesaka mampa yina vandaka ve na levire na bantumwa ya yandi mpe yandi zonzaka na bawu ti ya ke fwanisaka nzutu ya yandi. Na manima Yesu pesaka bawu vinu mpe yandi zonzaka ti vinu yayi zola zonza “menga ya luwawanu.” (Mrk. 14:22-25; Luke 22:20; 1 Ko. 11:24) Ya ke mfunu mingi na yina Yesu me zonzila luwawanu awa. Kaka ba yina ke yala na Yesu na Kimfumu ya Nzambi ke na kati ya luwawanu yayi. Kasi, ve bantu nyonso. (Ebr. 8:6, 10; 9:15) Ntangu Yesu zonzaka yawu bantumwa bakulaka ve, kasi mwa ntangu na manima ba tulaka bawu mafuta na mpeve nsatu mpe ba kotaka na luwawanu ya malu-malu na kuvanda kisika mosi na Yesu na mazulu.—Yoa. 14:2, 3.
10. Samu na yinki bamambu yina Yesu zonzaka na Galile ke ve faso mosi na yina yandi zonzaka na Yeruzalemi? (Tala mpe kizizi.)
10 Beto zimbana ve ti na lukutakanu ya Madya ya nkokila ya Mfumu, Yesu vanda solola kaka na “kikunku ya fioti” ya mameme. Bantumwa 11 yayi bikanaka ya kukangama na Yesu mpe vandaka kintwadi na yandi. Ni bawu vandaka bantu ya ntete ya kukota na kikunku ya fioti yayi. (Luke 12:32) Ni bawu zola kudya dimpa mpe kunwa vinu. Mpe bantu ya nkaka yina zola vanda na kati ya kikunku yayi zola kuzwa mpe bweso ya kudya dimpa mpe kunwa vinu yayi. Ya ke ni bawu ke kuzwa kisika na mazulu na Yesu. Bamambu yina Yesu zonzaka na bantumwa ke ve faso mosi na yina yandi zonzaka na kimvuka ya bantu na Galile, samu bamambu yina yandi zonzaka na Galile vandaka samu na bantu mingi ya kulutila, kasi bamambu yina yandi zonzaka na Yeruzalemi na bantumwa 11 vandaka kaka samu na kimvuka ya fioti.
Kaka ba yina ba tulaka mafuta ke kudyaka dimpa mpe ke kunwaka vinu, kasi “bantu nyonso” lenda lakisa kiminu na Yesu mpe kuzwa luzingu ya ntangu nyonso (Tala paragrafe 10)
11. Yinki ke na lakisaka ti mambu yina Yesu zonzaka na Galile vandaka ve samu na kimvuka ya fioti?
11 Bantu yina vanda kuwa Yesu na Galile na mvula 32 N.B., vandaka kaka na nsatu ya madya. Kasi Yesu sosaka kusadisa bawu na kuzaba ti ya vandaka na mambu ya nkaka ya kulutila mfunu yina zola sadisa bawu na kuzwa luzingu ya ntangu nyonso. Mpe Yesu zonzaka ti ba yina kufwaka lenda vumbuka na kilumbu ya nsuka mpe kuzwa luzingu ya ntangu nyonso. Awa Yesu vanda zonzila ve na kikunku ya fioti mutindu yandi salaka yawu na lukutakanu ya Madya ya nkokila ya Mfumu. Na Galile yandi vanda zonzila balusakumunu yina bantu nyonso lenda kuzwa. Yandi zonzaka: “Kana muntu kudya dimpa yayi, yandi ke zinga ntangu nyonso. . . . Dimpa yina mu ke pesa ke ni musuni ya munu samu na luzingu ya yinza.”—Yoa. 6:51, NWT. c
12. Yinki beto me bonga kusala samu na kuzwa luzingu ya ntangu nyonso?
12 Yesu vanda sosa kwandi kuzonza ti muntu nyonso yina zingaka ke kuzwa luzingu ya ntangu nyonso? Ve. Yesu zonzaka ti kaka ni ba yina ke ‘kudya dimpa yayi’ ya zola zonza ba yina ke lakisa kiminu na yandi ke kuzwa luzingu ya ntangu nyonso. Bantu mingi bubu yayi ke zonzaka ti ba ke vuuka kana ba “kukwikila [Yesu]” mpe ba bakila yandi mutindu muvuukisi ya bawu. (Yoa. 6:29, Ngwisani ya Malu-Malu) Na kati ya ba yina kuwaka Yesu ya vandaka na ba yina kwikilaka na yandi kasi na manima ba mangaka yandi. Samu na yinki?
13. Yinki zola zonza kulakisa kiminu na Yesu?
13 Mingi na kati ya bantu yina vanda landa Yesu vandaka na nsatu yandi pesa bawu bima yina ba vandaka na yawu nsatu. Ba vanda sosa ti yandi sala kimangu samu na kubelusa bawu, kupesa bawu madya ya mpamba mpe kuzonzila bawu bamambu yina ba vanda zola. Kasi, Yesu lakisaka pwelele ti kuvanda kilandi ya yandi ke sukaka ve kaka kuna. Yandi kwizaka ve na ntoto kaka samu na kupesa bawu bima ya kinsuni yina ba vandaka na yawu nsatu. Ba zola ndima kulanda Yesu ntangu yandi zonzaka na bawu na “kukwiza na sika ya” yandi mpe kutumama na bamambu nyonso yina yandi longaka.—Yoa. 5:40; 6:44.
14. Yinki beto me fwana kusala samu na kuzwa bambote ya musuni mpe menga ya Yesu?
14 Yesu lakisaka pwelele na kimvuka ya bantu yina vandaka kuwa ti, ba vandaka na nsatu ya kulakisa kiminu na yandi. Kulakisa kiminu na yandi vanda sosa kuzonza ti, ba zola ndima ti munkayulu ya Yesu yina yandi pesaka musuni mpe menga ya yandi zola pesa na bantu bweso ya kuzwa luzingu ya ntangu nyonso. Ya vandaka mfunu na Bazwife na kuvanda na mutindu ya kiminu yayi. Ya ke mpe mfunu samu na beto bubu yayi. (Yoa. 6:40) Mutindu Yoane 6:53 me lakisa yawu, samu beto kuzwa bambote ya nzutu mpe menga ya Yesu, beto me fwana kulakisa kiminu na munkayulu ya luzingu ya yandi. Ya ke bweso yina me pesama na bantu mingi ya kulutila.—Efe. 1:7.
15-16. Yinki Yoane kikapu 6 me longa beto?
15 Bamambu yina ke na Yoane kikapu 6 ke mfunu mingi samu na beto bubu yayi mpe samu na bantu yina beto ke zolaka. Ya ke lakisaka luzolo yina Yesu ke na yawu samu na bantu. Na ntangu yandi vandaka na Galile, Yesu belusaka ba yina vanda beela, longaka bawu na yina me tadila Kimfumu ya Nzambi, mpe salaka nyonso samu na kupesa bawu bima yina ba vandaka na yawu nsatu. (Luke 9:11; Yoa. 6:2, 11, 12) Ya kulutila mfunu, yandi longaka bawu ti yandi kele “dimpa ya luzingu.”—Yoa. 6:35, 48, NWT.
16 Ba yina ke na kati “mameme ya nkaka” me fwana ve kudya mpe kunwa vinu yina ba ke lutisaka na lukutakanu ya Madya ya nkokila ya Mfumu. (Yoa. 10:16) Kasi, bawu mpe ke kuzwaka bambote ya nzutu mpe ya menga ya Yesu Kristo. Samu ba lakisaka kiminu na munkayulu ya Yesu mpe na bamambu ya ngitukulu yina ya ke na nataka. (Yoa. 6:53) Kasi, ba yina ke kudyaka dimpa mpe ke kunwaka vinu ke lakisaka ti ba me kotisa bawu na kati ya luwawanu ya malu-malu mpe ba ke na kivuvu ya kuyala na Kimfumu ya mazulu. Ya vanda ti beto ke na kati ya bakristo yina ba tulaka mafuta to na mameme ya nkaka, bamambu yina ke na Yoane kikapu 6 ke mfunu mingi samu na beto. Na yawu, ya ke mfunu mingi na beto nyonso na kulakisa kiminu na munkayulu ya Yesu samu na kuzwa luzingu ya ntangu nyonso.
NZIMBU 150 Sosa Nzambi samu na kuvuuka
a Beto me zonzila Yoane 6:5-35 na disolo yina me luta.
b Maza yina Yesu zonzilaka ke kifwani yina ke lakisaka bamambu yina Yehova me sala mpe yina yandi ke na salaka samu bantu lenda kuzwa luzingu ya ntangu nyonso.
c Yoane kikapu 6 ke sadilaka nzonzolo yina ba lenda bangula na “muntu yina” mpe “muntu nyonso” samu na kuzonzila bantu yina lenda kuzwa luzingu ya ntangu nyonso.—Yoa. 6:35, 40, 47, 54, 56-58.
