Ntumwa Polo zonzaka na Timote yina vandaka mpe kuluntu na kati ya kimvuka: “Mu ke na lombaka nge na mantwala ya Nzambi, na mantwala ya Kristo Yesu mpe ya bambazi yina ba me soola, na kulanda malongi yayi kukondwa kukanisa mambu ya yimbi na bantu to kusoola bizizi.”—1 Tim. 5:21, NWT.

Na kubanda, beto ke tala banani ke ve bambazi yina ba me soola. Ya ke na talanaka pwelele ti ya ke ve ba 144 000. Na ntangu Polo sonikilaka Timote mukanda yayi, kuvumbuka na lufwa ya ba yina ba tulaka mafuta samu na kwenda zinga na mazulu vandaka ntete nabunu ya banda. Bantumwa mpe bantu ya nkaka yina ba tulaka mafuta vandaka ntete nabunu ba kuma bambazi. Na yawu, ba lenda vanda ve “bambazi yina ba me soola.”—1 Ko. 15:50-54; 1 Tes. 4:13-17; 1 Yoa. 3:2.

Dyaka, “bambazi yina ba me soola” lenda vanda ve bambazi yina tumamaka ve na Yehova na ntangu ya mvula ya nene. Bambazi yayi kumaka na kisika ya Satana mpe kumaka bampeve ya yimbi yina vandaka bambeni ya Yesu. (Kub. 6:2; Luke 8:30, 31; 2 Pi. 2:4) Mpe na bilumbu yina ke kwiza, ba ke losa bawu na kati ya dibulu ya yinda mpe na manima ya bamvula 1 000, bawu na Dyabulu, ba ke kufwa bawu.—Yude 6; Luz. 20:1-3, 10.

Ya ke na talanaka ti “bambazi yina ba me soola” kele bambazi yina ke na mazulu. Ba ke ya kukwikama na ‘Nzambi na Yesu.’

Bambazi yayi ya kukwikama ke mingi ya kulutila. (Ebr. 12:22, 23) Ya lenda vanda ti bawu nyonso ke salaka ve kisalu mosi. (Luz. 14:17, 18) Na kifwani, kaka ni mbazi mosi kuzwaka kisalu ya kufwa basoda 185 000 ya Asiria. (2 Mf. 19:35) Mpe ya lenda vanda ti ni na bambazi ya nkaka ba pesaka kisalu ya “[kukatula] na kati ya Kimfumu ya [Yesu] bantu nyonso yina ke salaka ti bampangi bula dibaku, mpe bantu yina ke salaka bamambu ya yimbi.” (Mat. 13:39-41) Mpe ya lenda vanda ti bambazi ya nkaka kuzwaka kisalu ya “[kuvukisa] bantu yina yandi soolaka” na mazulu. (Mat. 24:31) Mpe, bambazi ya nkaka ke na kisalu ya ‘kubumba beto na banzila ya beto nyonso.’—Nku. 91:11; Mat. 18:10; fwanisa na Matayi 4:11; Luke 22:43.

Ya lenda vanda ti “bambazi yina ba me soola” yina ke na 1 Timote 5:21, kele bambazi yina ba pesaka bisalu ya mfunu samu na kusadisa bimvuka ya bisadi ya Nzambi. Awa, Polo ke na pesaka malongi na bakuluntu yina bimvuka me bonga kuzitisa. Na yina me tadila bakuluntu, ba me bonga kusala bisalu yina ba me pesa bawu “kukondwa kukanisa mambu ya yimbi na bantu to kusoola bizizi” mpe tekila ba baka mukanu, ba me bonga kukanisa mbote-mbote. Na manima, Polo me lakisa bawu samu na yinki ya ke mfunu na bawu na kulanda dilongi ya yandi. Yandi me zonza ti bakuluntu ke salaka samu na bampangi ya bawu “na mantwala ya Nzambi, na mantwala ya Kristo Yesu mpe ya bambazi yina ba me soola.” Ya ke na talanaka pwelele ti, ya ke na bambazi yina ba pesaka kisalu ya kusadisa kimvuka. Na kati ya bamambu nyonso yina ba ke salaka, ba ke bumbaka bisadi ya Nzambi, ba ke sadisaka bawu na kisalu ya kusamuna. Mpe na manima, ba ke pesaka Nzambi bansangu na yina me tadila bamambu yina ba ke talaka na ntangu ba ke na lungisaka kisalu ya bawu.—Mat. 18:10; Luz. 14:6.