1. Yinki muntu me bonga na kusala samu na kusolola na mfumu ya Perse?

KANISA ntete, si nge ke na zingá na Perse bamvula 2500 me luta. Nge ke na nsatu ya kuzonzila mfumu ya bwala mambu yina ke na kwamisá nge. Na yina, nge me sala voyage tii na Shushan, kisik’ yina mfumu ke vandaka. Kasi avant nge zonza na mfumu, nge zola kuzwa ntete permision ya yandi. Si nge meka kusosa kusolola na mfumu kaka faso yina, ba lenda kufwa nge!—Est. 4:11.

2. Yinki Yehova ke zolá beto sala ntangu beto ke vandá na bamambu na ntima?

² Beto ke na kilengi mingi samu ti Yehova ke ve faso mfumu ya Perse! Yehova lutila bamfumu nyonso ya ntoto na mfunu mpe na ngolo, kasi beto lenda solola na yandi ntangu nyonso. Yandi zola ti beto vanda ve na boma ya kuzonzila yandi bamambu yina ke na beto. Na kifwani, Yehova ke na batitre ya nene faso Muntu-yina-Yidikaka-Bima-Nyonso, Muntu-ya-Kulutila-Ngolo mpe Mfumu ya Bamfumu. Kasi, yandi zola ti beto bokila yandi “Tata.” (Mat. 6:9) Bantima ya beto ke na ninganá yina beto me zaba ti Yehova zola beto vanda pene-pene na yandi!

3. Samu na yinki beto lenda bokila Yehova “Tata,” mpe yinki artikle yayi ke zonzila?

³ Ya me bonga na beto na kubokila Yehova “Tata”, samu luzingu katuká na yandi. (Nku. 36:9) Samu yandi ke Tata ya beto, ya me lunga beto kuwa yandi. Si beto sadila misiku ya yandi, beto ke vanda na kilengi ya kuzwa bambote yina yandi me bumbila beto. (Ebr. 12:9) Na kati ya bambote yango, ya ke na luzingu ya ntangu nyonso na zulu to na ntoto. Beto ke kuzwá mpe bambote  ya nkaka bubu yayi. Na artikle yayi, beto ke tala barezon yina ke na lakisaka ti Yehova ke Tata ya beto ya luzolo, mpe samu na yinki beto lenda ndima ti, yandi ke bika beto ata fioti ve na bilumbu ke kwiza. Ntete-ntete, beto zonzila samu na yinki beto lenda ndima ti Tata ya beto ya mazulu ke zolá beto mpe ke kipeke beto.

4. Samu na yinki ya ke vandá mpasi na bantu ya nkaka na kutala Yehova neti Tata ya bawu?

⁴ Ya ke vandá mpasi samu na nge na kutala Nzambi neti Tata ya nge? Ba ya nkaka ke kanisá ti ba ke ve mfunu na mantwala ya Yehova, samu yandi ke muntu ya kuzangama. Ba ke vandá na ntembe ti Nzambi Muntu-ya-Kulutila-Ngolo, lenda kipe mosi na mosi ya beto. Kasi, Tata ya beto ya luzolo ke zolá ve ti beto vanda na makanisi ya faso yina. Yandi pesá beto luzingu, mpe yandi zola ti beto vanda na kindiku ya ngolo na yandi. Ni na yawu, Apotre Paul zonzá na bantu ya Athene ti, Yehova “ke ve ntama na mosi na mosi na beto.” (Bis. 17:24-29) Nzambi zola ti mosi na mosi na beto pusana pene-pene na yandi, faso mwana nyonso ke vandá na nsatu ya kuvanda pene-pene na bibuti ya yandi.

5. Yinki disolo ya mukristo mosi ya kento ke na longá beto?

⁵ Ya ke vandá mpe mpasi na bantu ya nkaka na kutala Yehova neti Tata ya bawu, samu batata yina butá bawu lakisa ve bawu luzolo. Tala mambu zonzá mukristo mosi ya kento: “Tata ya munu vanda dasuka na mbangu mpe yandi vandá na mambu ya ngolo. Ntangu mu banda kulongoka Biblia, ya vandá mpasi samu na munu na kutunga kindiku na Tata ya beto ya mazulu. Kasi ntangu mu zabá Yehova, makanisi ya munu sobaka.” Nge mpe ke na makanisi ya faso yayi? Si ya ke faso yina, kulemba ve. Fioti-fioti, nge mpe ke ndima ti Yehova ke Tata ya kulutila mbote.

6. Faso ke na zonzila Matayi 11:27, yinki ke na lakisá ti Yehova ke sadisá beto na kutala yandi faso Tata ya luzolo?

⁶ Yehova sadisá beto na kutala yandi faso Tata ya beto ya luzolo, ntangu yandi tulá mambu yina Yesu salá na kati ya Biblia. (Tanga Matayi 11:27.) Samu yandi landá kifwani ya Tata ya yandi, Yesu zonzá: “Muntu yina me tala munu, me tala mpe Tata.” (Yoa. 14:9, nwt-MK) Bambala mingi Yesu lakisá ti Yehova ke Tata. Na buku ya Matayi, Marke, Luke mpe Yoane, Yesu bokilá Yehova “Tata” bambala 165. Samu na yinki Yesu zonzilá mingi Yehova? Mosi ya barezon ke samu yandi zolá kunata bantu na kundima ti Yehova ke Tata ya luzolo.—Yoa. 17:25, 26.

7. Yinki beto me longoka na faso Yehova vanda bakila mwana ya yandi?

⁷ Beto tala yinki beto ke longoka na faso Yehova vanda bakila mwana ya yandi, Yesu. Yehova vanda kuwa ntangu nyonso balusambu ya Yesu. Yandi vanda kuwa ve kaka, kasi yandi vanda pesa mpe bamvutu. (Yoa. 11:41, 42) Ata na bantangu ya mpasi, Yesu talá luzolo mpe diboko ya Tata ya yandi.—Luke 22:42, 43.

8. Wa’ faso Yehova pesá Yesu nyonso yina yandi vandá na yawu nsatu?

⁸ Yesu ndimá ti ni Tata pesak’ yandi luzingu, mpe ni yandi vanda kipe yawu ntangu yandi zonzá: “Mu ke zingá samu na Tata.” (Yoa. 6:57, nwt-MK) Yesu tulá ntima ya yandi nyonso na Tata, mpe Tata pesak’ yandi nyonso yina yandi vandá na yawu nsatu samu na kuzinga. Yina me lutila mfunu, Yehova sadisá Yesu na kuvanda ya kukangama na yandi.—Mat. 4:4.

9. Wa’ faso Yehova lakisá ti yandi ke zolá mingi Yesu?

⁹ Samu yandi ke Tata ya luzolo, Yehova natá Yesu na kuzaba ti yandi vandá na yandi ntangu nyonso. (Mat. 26:53; Yoa. 8:16) Ata Yehova bumbá ve yandi na bamambu ya fioti fioti yina kuminak’ yandi, Yehova sadisak’ yandi na kukanga ntima na bamambu nyonso. Yesu zabá ti bampasi ya yandi nyonso ke vanda na nsuka.  (Ebr. 12:2) Yehova lakisá ti yandi zolá Yesu, ntangu yandi kuwak’ yandi, ntangu yandi pesak’ yandi yina yandi vandá na yawu nsatu, mpe ntangu yandi pesak’ yandi formasion mpe diboko na ntangu ya mpasi. (Yoa. 5:20; 8:28) Beto tala faso Tata ya beto ya mazulu ke kipeke beto na bafaso mingi.

10. Faso Nkunga 66:19, 20, ke na zonzilak’ yawu, wa’ faso Yehova ke lakisá ti yandi zola beto?

¹⁰ Yehova ke wá balusambu ya beto. (Tanga Nkunga 66:19, 20.) Yandi zola ve ti beto vanda na boma ya kusambila yandi; yandi me lomba na beto na kusambila yandi ntangu nyonso. (1 Tes. 5:17) Na buzitu nyonso beto zola zonzila yandi ntangu nyonso mambu yina beto ke na yawu na ntima. Yandi ke ve faso bantu samu yandi vanda ve na ntangu ya kuwa beto. Ntangu nge ke tala faso Yehova ke pesa bamvutu na balusambu ya nge, nge ke zola yandi mingi. Mosi ya ba yina soniká Bankunga zonzá: “Mu zola Yehova, samu yandi ke wá ndinga ya munu.”—Nku. 116:1.

11. Wa’ faso Yehova ke pesá bamvutu na balusambu ya beto?

¹¹ Tata ya beto ke wá ve kaka balusambu, kasi yandi ke pesá mpe bamvutu. Apotre Yoane zonzá: “Kima nyonso yina beto ke lomba yina ke na kwelaná na luzolo ya [Nzambi], yandi ke kuwa beto.” (1 Yoa. 5:14, 15, nwt-MK) Ya tsyeleka Yehova ke pesá ve bamvutu na balusambu ya beto na faso yina beto ke vingilak’ yawu. Yandi zaba yina ke mbote samu na beto. Bantangu ya nkaka mvutu ya yandi ke vandá: Ve. To yandi ke sosá beto vingila.—2 Ko. 12:7-9.

12-13. Wa’ faso Tata ya beto ya mazulu ke pesá beto bima yina beto ke na yawu nsatu?

¹² Yehova ke pesá beto yina beto ke na yawu nsatu. Yandi ke salá yina yandi ke lombá na batata nyonso na kusala. (1 Tim. 5:8) Yandi ke pesá bana na yandi bima yina ba ke na yawu nsatu na luzingu. Yandi zola ve beto vanda na basusi samu na madya, bilele, to kisika ya kuvanda. (Mat. 6:32, 33; 7:11) Samu yandi ke Tata ya luzolo, Yehova me yidika nyonso samu na kulungisa bansatu yina beto ke vanda na yawu na bilumbu ke kwiza.

¹³ Yina me lutila mfunu, Yehova ke pesá beto yina beto ke na yawu nsatu samu na kuvanda na kindiku ya mbote na yandi. Na Biblia, Yehova me zabisa beto nani yandi kele, faso yandi zola ti bima yina yandi yidiká vanda, samu na yinki yandi yidiká beto, mpe yinki ke salama na bilumbu ke kwiza. Ntangu beto bandá kulongoka Biblia, yandi lakisá ti yandi ke kipeke beto. Yandi sadilá bibuti ya beto to bantu ya nkaka samu na kusadisa beto na kuzab’ yandi. Mpe Yehova ke kontinyeke na kusadisa beto na nzila ya bakuluntu ya kimvuka mpe na nzila ya bampangi yina ke ya kukula na kimpeve. Dyaka, Yehova ke longá beto na nzila ya balukutakanu, kisika yina beto ke longoká kintwadi na dikanda ya beto ya kimpeve. Ni na faso yayi na ya nkaka, Yehova ke lakisá beto luzolo ya yandi ya kitata, na mosi na mosi ya beto.—Nku. 32:8.

14. Samu na yinki Yehova ke pesá beto formasion, mpe wa’ faso yandi ke pesá beto yawu?

¹⁴ Yehova ke pesá beto formasion. Beto ke bantu ya masumu, kasi Yesu ve. Na yina, ntangu ya nkaka samu na kupesa beto formasion, Tata ya beto ya luzolo ke pesá beto disipline ntangu ya ke talaná mbote. Biblia ke zonzá: “Yehova ke [pesá disipline] na bantu yina yandi ke zolaka.” (Ebr. 12:6, 7, nwt-MK) Yehova ke pesá beto disipline na bafaso mingi. Na kifwani, mambu yina beto ke tangá mpe ke wá na balukutakanu lenda soba makanisi to ndyatulu ya beto. Ntangu ya nkaka, yandi ke sadisá beto na nzila ya bakuluntu. Ya vanda disipline ya ngolo to ya pete, Yehova ke pesá beto yawu samu yandi zola beto.—Yer. 30:11.

15. Wa’ faso Yehova ke bumbá beto?

¹⁵ Yehova ke pesá beto diboko na ntangu ya  mpasi. Kaka faso tata ya luzolo ke sadisá bana ya yandi na bantangu ya mpasi, Tata ya beto ya mazulu mpe ke pesá beto diboko na bantangu ya mpasi. Yandi ke pesá beto mpeve ya santu, yina ke bumbá beto na nyonso yina lenda bebisa kindiku ya beto na yandi. (Luke 11:13) Yehova ke sadisá beto mpe ntangu beto ke vandá ya kulemba. Na kifwani, yandi me pesa beto kivuvu mosi ya kitoko. Kivuvu yina beto ke na yawu samu na bilumbu ke kwiza, ke sadisá beto na kukanga ntima na mantwala ya bampasi. Beto zaba ti: Ata mambu ya yimbi kumina beto, Tata ya beto ya luzolo ke belusa na faso ya kulunga baputa ya beto. Bampasi ya beto ke manisa kilumbu, kasi bambote yina Yehova ke pesa, ke vanda ya ntangu nyonso.—2 Ko. 4:16-18.

16. Yinki salamá ntangu Adam mangá kuwa Tata ya yandi ya luzolo?

¹⁶ Beto ke talá luzolo ya Yehova samu na beto, ntangu beto ke kanisá na yina yandi salá ntangu Adam mangá kuwa yandi. Ntangu Adam mangá kuwa Tata ya yandi ya mazulu, yandi zimbisá bweso yina vandá na yandi ya kuvanda na kati ya dikanda ya Yehova, samu na yandi mosi, mpe samu na bana ya yandi. (Rom. 5:12; 7:14) Kasi Yehova salá kima samu na kusadisa bana ya Adam.

17. Yinki Yehova salá kilumbu yina Adam mangá kuwa yandi?

¹⁷ Yehova sembá Adam, kaka kilumbu yina, yandi pesá promese ya kusadisa bana ya yandi, mpe ya kuvutula ba yina ke kuwa yandi na kati ya dikanda ya yandi. (Kub. 3:15; Rom. 8:20, 21) Yehova me lungisa promese yango na nzila ya nkayulu (sacrifice) ya mwana ya yandi kaka mosi, Yesu. Samu yandi pesá mwana ya yandi samu na beto, Yehova lakisá ti yandi zola beto mingi.—Yoa. 3:16.

18. Samu na yinki beto lenda ndima ti Yehova ke zolá beto neti bana ya yandi ata beto biká kimvuka ya yandi?

¹⁸ Ata beto ke bantu ya masumu, Yehova ke na nsatu ya beto na kati ya dikanda ya yandi. Mpe yandi ke kanisá ata fioti ve ti ya ke mpasi na kusadisa  beto. Beto lenda nyongisa yandi to kuzimbana yandi mwa ntangu fioti, kasi yandi ke biká ve beto. Yesu lakisá bunene ya luzolo ya Yehova samu na bana ya yandi na disolo ya mwana ya yintu ngolo yina biká yinzo. (Luke 15:11-32) Na disolo ya Yesu yayi, tata biká ata fioti ve na kukanisa ti, kilumbu kele, mwana ya yandi ke vutuka. Ntangu mwana vutuká na yinzo, tata yambak’ yandi na kilengi nyonso. Si beto biká kimvuka ya Yehova kasi beto ke na sosá kuvutuka, beto lenda ndima ti, maboko ya Tata ya beto ya luzolo ke ya kufunguka samu na kuyamba beto.

19. Wa’ faso Yehova ke katula mambu nyonso ya yimbi yina disumu ya Adam nataka?

¹⁹ Tata ya beto ke katula mambu nyonso ya yimbi yina disumu ya Adam nataka. Na manima ya disumu ya Adam, Yehova baká desizion ya kukumisa bantu 144 000 bana ya yandi, yina ke vanda bamfumu mpe ba-pretre na mazulu kintwadi na mwana ya yandi. Yesu na bakristo yina, ke sadisa bantu yina ke wá Nzambi, na kukuma bantu ya kulunga na yinza ya malu-malu. Na manima ya kulutisa mbala ya suka yina Satan ke meka bantu (épreuve finale), Nzambi ke pesa bawu luzingu ya ntangu nyonso. Tata ya beto ke vanda na kilengi mingi, ntangu yandi ke tala ntoto ya kufuluka na bana ya yandi ya kento na ya bakala na nzutu ya kulunga. Ya ke vanda ntangu mosi ya kilengi mingi!

20. Wa’ faso Yehova me lakisa ti yandi zola beto mingi, mpe yinki ke zonzila artikle ke landa?

²⁰ Yehova me lakisa ti yandi zola beto mingi. Yandi ke Tata ya mbote. Yandi ke wá balusambu ya beto mpe ke pesá beto yina beto ke na yawu nsatu na kisuni mpe na kimpeve. Yandi ke pesá beto formasion mpe diboko na ntangu ya mpasi. Yandi ke sala mpe mambu ya kulutila kitoko samu na beto na bilumbu ke kwiza. Bantima ya beto me fuluka na kilengi yina beto me zaba ti, Tata ya beto ya luzolo ke kipeke beto! Na artikle yina ke landa, beto ke tala wa’ faso beto bana ya Yehova, lenda vutula yandi matondo samu na luzolo ya yandi.