ARTIKLE YA KULONGOKA 7
Otorite yina bakuluntu ke na yawu na kati ya kimvuka
‘Kristo ke Mfumu ya kimvuka muvuukisi ya nzutu yayi.’—EF. 5:23, nwt-MK.
NZIMBU 137 Femmes de foi, chrétiennes fidèles
YINA BETO KE LONGOKA *
1. Wapi yina ke mosi ya barezon yina ke salá ti organizasion ya Yehova vanda na bumosi?
BETO ke na kilengi ya kuvanda na kati ya organizasion ya Yehova. Samu na yinki kizunu mpe bumosi ke na kati ya beto? Mosi ya barezon ke samu beto ke salá bangolo na kupesa buzitu na ba yina Yehova pesá otorite. Na yawu, si beto sosa kuzaba dyaka na faso ya bien samu na yinki Yehova tulá otorite na kati ya kimvuka, bumosi ya beto ke kuma dyaka ngolo.
2. Na wapi bakestion beto ke kuzwa bareponse na artikle yayi?
2 Na artikle yayi, beto ke tala nani ke na otorite na kati ya kimvuka. Beto ke kuzwa mpe reponse na bakestion yayi: Wapi yina ke kisalu ya bampangi ya kento na kati ya kimvuka? Bampangi nyonso ya bakala ke kwandi bachef ya bampangi nyonso ya kento? Otorite yina bakuluntu ke na yawu na zulu ya bampangi na kimvuka, ke kwandi faso mosi na otorite yina chef ya famiye ke na yawu na zulu ya kento mpe bana ya yandi? Na kubanda, beto zonzila wa’ faso beto zolá tadila bampangi ya kento.
WA’ FASO BETO ZOLÁ TADILA BAMPANGI YA KENTO?
3. Yinki ke sadisa beto na kupesa valere ya mingi na kisalu yina bampangi ya kento ke salá?
3 Beto ke pesá valere na bampangi ya beto ya kento yina ke salá mingi samu na kukipe famiye ya bawu, na kupreche nsangu ya mbote mpe na kusadisa bampangi ya kimvuka. Beto ke pesa dyaka bawu valere ya kulutila si beto kanisa na faso Yehova na Yesu ke talá bawu. Beto ke longoka mpe faso ya kubakila bakento si beto tala faso apotre Paul vandá bakilá bawu.
4. Wa’ faso Biblia ke na lakisá ti Yehova ke pesá valere mosi na bakento mpe na babakala?
4 Biblia ke lakisá ti Yehova ke pesá kaka valere mosi na kento mpe na bakala. Na kifwani, Biblia ke lakisá ti na siekle ya ntete, Yehova pesá mpeve ya santu na bakento mpe na babakala samu ba sala bamirakle mpe ba zonza na bandinga ya nkaka. (Bis. 2:1-4, 15-18) Yehova sadilá mpe mpeve ya santu samu na kusola bakento na babakala na kukwenda yala na Yesu na zulu. (Gal. 3:26-29) Yehova ke pesa mpe luzingu ya ntangu nyonso awa na ntoto na bakento mpe na babakala. (Luz. 7:9, 10, 13-15) Dyaka, ba pesá kisalu ya kupreche mpe ya kulonga bantu na bakento mpe na babakala. (Mat. 28:19, 20) Na kifwani, buku ya Bisalu ke zonzilá mpangi mosi ya kento na nkumbu ya Priscille. Yandi na bakala ya yandi Aquila, sadisá Apollos yina zabá mambu mingi na kimpeve, na kuzaba dyaka bien mambu ya Biblia.—Bis. 18:24-26.
5. Wa’ faso Luke 10:38, 39, 42 ke na lakisá ti Yesu vandá pesá bakento buzitu?
5 Yesu pesá bakento valere na buzitu. Yandi landá ve faso ya kusala ya bafarizien yina vandá kanisa ti bakento ke kaka bantu ya mpamba. Bafarizien vandá sololá ata fioti ve na bakento na mantwala ya bantu mpe ba vandá zonzilá ve bawu mambu ya Biblia. Kasi, Yesu vandá zonzilá mambu ya Biblia na bakento mpe na babakala. * (Tanga Luke 10:38, 39, 42.) Ntangu yandi vandá kwendá preche na babwala, yandi vandá biká bakento sala voyaje na yandi. (Luke 8:1-3) Mpe yandi pesá na bakento valere ya mingi, ntangu yandi salá ti ba vanda bantu ya ntete ya kuzonzila na ba-apotre ti, yandi me vumbuka na lufwa.—Yoa. 20:16-18.
6. Wa’ faso apotre Paul lakisá ti yandi vandá pesá buzitu na bakento?
6 Apotre Paul zonzá na Timote na kupesa bakento valere. Paul zonzá na Timote na kubakila “bakento ya kukula [faso] bamama” mpe “bakento ya [jeune faso bampangi ya yandi ya kento].” (1 Tim. 5:1, 2) Ata Paul salá mingi samu Timote vanda na kiminu ya ngolo, kasi yandi ndimá ti mama ya Timote na nkoko ya yandi, vandá bantu ya ntete ya kuzonzila na Timote ‘mambu ya Nzambi.’ (2 Tim. 1:5; 3:14, 15) Na mukanda yina yandi soniká na Baroma, Paul soniká bankumbu ya bampangi ya kento yina yandi filisá bambote. Paul zonzá yinki bampangi ya kento yayi salá, mpe faso yandi vandá sepela na kisalu ya bawu.—Rom. 16:1-4, 6, 12; Flp. 4:3.
7. Wapi bakestion beto mase zonzila?
7 Baparagrafe yina lutá vandá lakisa ti, ata verse ya Biblia ke zonzá ti bampangi ya kento ke na yisi ya bampangi ya bakala. Bampangi ya kento ke sadisá mingi kimvuka samu na luzolo yina ba ke lakisá mpe kifu ya bawu ya kukabulá. Mpe bakuluntu ke zolá faso ba ke tulá diboko samu kizunu mpe bumosi vanda na kati ya kimvuka. Kasi, beto ke dyaka na nsatu ya kuzwa reponse na bakestion yayi: Samu na yinki Yehova ke lombá bantangu ya nkaka na bampangi ya kento na kukanga yintu ya bawu? Samu na yinki kaka ni bampangi ya bakala lenda kuma bakuluntu to ba-assistant? Ya zola zonza kwandi ti ba ke bachef ya bampangi ya bakento na kati ya kimvuka?
BAMPANGI NYONSO YA BAKALA KE KWANDI BACHEF YA BAMPANGI NYONSO YA KENTO?
8. Faso me zonza Baefeze 5:23, bampangi nyonso ya bakala ke kwandi bachef ya bampangi nyonso ya kento? Zonzila yawu.
8 Reponse ya nkufi ni yayi: Ve! Bampangi ya bakala ke ve bachef ya bampangi ya kento nyonso na kati ya kimvuka. Ni Kristo muntu ke chef ya beto nyonso. (Tanga Baefeze 5:23.) Na kati ya famiye, ni bakala muntu ke na otorite na zulu ya kento ya yandi. Mwana ya bakala yina ke na bateme ke ve chef ya mama ya yandi. (Ef. 6:1, 2) Mpe na kati ya kimvuka bakuluntu ke kaka na otorite ya fioti na zulu ya bampangi ya kento mpe ya bakala. (1 Tes. 5:12; Ebr. 13:17) Bakento yina nabunu ba kwela mpe yina ke vandá dyaka ve na baparent ya bawu, zolá kontinye kupesa baparent buzitu mpe bakuluntu ya kimvuka. Kasi, faso bampangi ya bakala na kati ya kimvuka, ba ke kaka na chef mosi: Yesu.
Ba yina ke ve ya kukwela kasi ke vandá dyaka ve na baparent ya bawu ke na yisi ya otorite ya Yesu (Tala paragrafe 8)
9. Samu na yinki ntangu ya nkaka bampangi ya kento me lunga kukanga yintu ya bawu?
9 Ya vrai, Yehova pesá kaka na bampangi ya bakala otorite ya kulonga mpe ya kutwadisa kimvuka, kasi yandi pesá ve yawu na bampangi ya kento. (1 Tim. 2:12) Samu na yinki? Samu muvusu vanda ve na kati ya organizasion ya yandi. Kaka ni rezon yayi mpe natak’ yandi na kutula Yesu, chef ya bakala. Si mwa mambu nata mpangi ya kento na kusala kisalu yina Yehova pesá kaka na bampangi ya bakala, yandi me lunga kutula kitambala to kima ya nkaka samu na kukanga yintu ya yandi. * (1 Ko. 11:4-7) Yehova zola ti bampangi ya kento sala yawu samu na kulakisa ti, ba ke pesá buzitu na misiku ya yandi. Kasi ya ke ve samu na kunata bawu na kukanisa ti bampangi ya bakala lutila bawu. Na dikanisi yayi na yintu, beto sosa kuzwa reponse na kestion yayi: Wapi otorite bachef ya famiye na bakuluntu ke na yawu?
OTORITE YA BACHEF YA FAMIYE MPE YA BAKULUNTU
10. Samu na yinki kuluntu lenda kanisa ntangu ya nkaka ti yandi lendá tula misiku na kati ya kimvuka?
10 Bakuluntu ke zolá Yesu, mpe ba ke zolá “mameme” yina Yehova na Yesu zonzá na bawu na kukipe. (Yoa. 21:15-17) Samu yandi ke na kipe kimvuka, kuluntu lenda kanisa ti yandi me kuma papa ya ba yina ke na kati ya kimvuka. Na yawu, yandi lenda kanisa ti, si chef ya famiye me lunga kutula misiku samu na kubumba famiye ya yandi, kuluntu mpe lendá tula misiku samu na kubumba mameme ya Nzambi. Dyaka, bampangi ya nkaka ya bakala na ya kento lenda nata yandi na kuvanda na dikanisi yayi, ntangu ba ke lombá na yandi na kubaka badesizion na plase ya bawu. Na yawu, otorite ya bakuluntu na kati ya kimvuka na ya bachef ya famiye ke kwandi faso mosi?
Bakuluntu ke sadisá bampangi na kati ya kimvuka na kuvanda na kikamarade ya ngolo na Yehova mpe na kutala ti ba ke zolá bawu. Yehova pesá mpe bawu responsabilite ya kukatula na kimvuka ba yina salá masumu kasi nyongá ve masumu ya bawu (tala baparagrafe 11-12)
11. Wa’ faso otorite ya bachef ya famiye ke faso mosi na otorite yina bakuluntu ke na yawu?
11 Apotre Paul lakisá ti ntangu ya nkaka otorite ya chef ya famiye lendá vanda faso mosi na otorite yina bakuluntu ke na yawu. (1 Tim. 3:4, 5) Na kifwani, Yehova zola ti kento mpe bana, landa mambu yina ke zonzá chef ya famiye. (Kol. 3:20) Yandi zola mpe ti beto landa mambu yina ke zonzá bakuluntu. Yehova ke vingilá mpe ti bachef ya famiye na bakuluntu, sadisa ba yina ke na yisi ya otorite ya bawu na kuvanda na kimpeve ya ngolo. Yandi ke vingilá dyaka ti bachef ya famiye na bakuluntu lakisa luzolo na ba yina ke na yisi ya otorite ya bawu. Dyaka, faso bachef ya famiye, bakuluntu ke sadisá bampangi yina ke lutisá bantangu ya mpasi. (Zaki 2:15-17) Kima ya nkaka yina Yehova ke vingilá na bachef ya famiye mpe na bakuluntu, ni ya kusadisa ba yina ke na kati ya kimvuka to na kati ya bafamiye ya bawu, na kulanda misiku ya Yehova mpe na “[kulanda] kaka mambu yina [ba soniká]” na kati ya Biblia.—1 Ko. 4:6; nwt-MK.
Bachef ya famiye ke na otorite yina Yehova pesá bawu na zulu ya bafamiye ya bawu. Avant na kubaka badesizion, chef ya famiye ya mbote ke sololá ntete na kento ya yandi (Tala paragrafe 13)
12-13. Faso me zonza Baroma 7:2, yinki ke na lakisá ti otorite ya bachef ya famiye ke ve faso mosi na otorite yina bakuluntu ke na yawu?
12 Kasi, na bamambu mingi, otorite ya kuluntu ke ve faso mosi na otorite ya chef ya famiye. Na kifwani, Yehova pesá na bakuluntu responsabilite ya kuvanda bajuje, kasi na bachef ya famiye ve. Na yawu, si muntu me sala disumu mpe me nyonga ve masumu ya yandi, ba lenda basisa yandi na kimvuka.—1 Ko. 5:11-13.
13 Yehova pesá mpe na bachef ya famiye responsabilite yina yandi pesá ve na bakuluntu. Yandi pesá chef ya famiye otorite ya kutula misiku na kati ya famiye ya yandi, mpe ya kusala ti ba landa yawu. (Tanga Baroma 7:2.) Na kifwani, chef ya famiye lenda zonza na wapi heure bana ya yandi ke banda kukotá na yinzo na mpipa. Yandi ke mpe na otorite ya kungala to ya kupesa disipline na bana ya yandi si ba me landa ve misiku yina yandi tulá. (Ef. 6:1) Ya vrai, avant yandi tula misiku, chef ya famiye ya mbote zolá solola ntete na kento ya yandi, samu bawu zole ke “muntu mosi.” *—Mat. 19:6.
PESA BUZITU NA YESU SAMU NI YANDI KE CHEF YA KIMVUKA
Yesu, na yisi ya otorite ya Yehova ke na pesá misiku na bimvuka nyonso ya Batemwe ya Yehova (Tala paragrafe 14)
14. a) Yinki Marke 10:45 ke zonzá yina ke lakisá ti ya ke mbote yina Yehova tulá Yesu chef ya kimvuka? b) Wapi yina ke responsabilite ya Kimvuka ya Bantwadisi? (Tala tablo “ Responsabilite ya Kimvuka ya Bantwadisi.”)
14 Na nzila ya sakrifise ya Yesu, Yehova me sumba luzingu ya mosi na mosi ya beto mpe ya muntu nyonso yina ke tulá kiminu ya yandi na Yesu. (Tanga Marke 10:45; Bis. 20:28; 1 Ko. 15:21, 22) Na yawu, samu Yesu pesá luzingu ya yandi samu na beto, Yehova tulak’ yandi chef ya kimvuka. Samu yandi ke chef, Yesu ke na otorite ya kuzonza na bantu, na bafamiye mpe na bimvuka nyonso yinki ba me lunga kusala. Mpe yandi me lunga kuzaba si beto ke na landá misiku ya yandi. (Gal. 6:2) Kasi yandi ke suka ve kaka na kupesa misiku. Yandi ke kipeke na faso ya bien mpe na luzolo nyonso mosi na mosi na kati ya beto.—Ef. 5:29.
15-16. Yinki beto lenda longoká na mambu yina zonzá Marley na Benjamin?
15 Bampangi ya kento ke lakisá ti ba ke pesá buzitu na Yesu, ntangu ba ke landá misiku yina ke tulá babakala yina Yesu pesá otorite ya kukipe bawu. Bampangi ya kento mingi ke ndima mambu yayi ke zonza Marley, mpangi mosi ya kento yina ke vandá na États-unis. Yandi me zonza: “Responsabilite ya munu faso kento mpe faso mpangi ya kento na kati ya kimvuka, ke na valere mingi na meso ya munu. Mu ke kontinye kusala bangolo samu na kupesa buzitu na otorite yina Yehova pesá na bakala ya munu mpe na bakuluntu na kati ya kimvuka. Ya ke vandá ve mpasi na munu na kusala yawu samu bakala ya munu, na bampangi ya bakala na kati ya kimvuka ke pesá munu buzitu mpe ke lakisá ti ba ke sepelá na kisalu yina mu ke salá”
16 Bampangi ya bakala zaba ti na otorite yina ke na bawu, ba zolá pesa buzitu mpe valere na bampangi ya kento. Benjamin, mpangi mosi ya bakala yina ke vandá na Angleterre, me zonza: “Mu longoká mingi na bakomentere yina vandá pesá bampangi ya kento na balukutakanu. Dyaka, ba-idée yina ba vandá pesá munu na faso ya kulongoka Biblia sadisá munu. Kisalu yina ba ke salá ke na valere ya mingi.”
17. Samu na yinki beto zolá pesa buzitu na faso Yehova pesá otorite na bantu ya nkaka?
17 Ntangu bantu nyonso na kati ya kimvuka: babakala, bakento, bachef ya famiye, mpe bakuluntu ke pesá buzitu na faso Yehova pesá otorite na bantu ya nkaka, kizunu ke vanda na kati ya kimvuka. Mpe na nyonso, beto ke pesa nkembo na papa ya beto ya luzolo, Yehova.—Nku. 150:6.
NZIMBU 123 Fidèlement soumis à l’ordre théocratique
^ par. 5 Wapi kisalu Yehova pesá bampangi ya kento na kati ya kimvuka? Bampangi nyonso ya bakala ke kwandi bachef ya bampangi nyonso ya kento? Otorite yina bakuluntu ya kimvuka ke na yawu, ke kwandi faso mosi na otorite yina bachef ya famiye ke na yawu? Na artikle yayi, beto ke tala faso ba-ekzample yina ke na kati ya Biblia ke sadisa beto na kuzwa bareponse na bakestion yayi.
^ par. 5 Tala paragrafe 6 ya artikle “Pesa kuraje na bampangi ya kento ya kimvuka,” yina basiká na Yinzo ya Kengidi ya Septembre 2020.
^ par. 13 Na kuzaba nani zolá baka desizion ya kimvuka yina famiye ke kwenda, tala baparagrafe 17-19 ya artikle “Vanda na buzitu na plase yina bampangi ke na yawu na kati ya kimvuka,” yina basiká na Yinzo ya Kengidi ya Août 2020.
^ par. 59 Samu na kuzaba dyaka mingi mambu yayi, tala buku Restez dans l’amour de Dieu, p. 209-212.
^ par. 64 Na kuzaba mingi na responsabilite ya Kimvuka ya Bantwadisi, tala Yinzo ya Kengidi (na Français) ya 15 Juillet 2013, p. 20-25.
