NA NTANGU ya Biblia, ntangu makanda zole vandá wisaná na kukwelisa bana ya bawu, dikanda ya bakala to yandi mosi vandá futá mbongo ya makwela na dikanda ya kento. Ba vandá pesa bawu mbongo, bibulu to bima ya nkaka ya ntalu. To na kisika ya kufuta mbongo, bakala zolá sala samu na dikanda ya kento ya yandi. Ni yina Yakobi salaka. Samu na kukwela Rashele, yandi ndimá kusala bamvula 7 na kisika ya tata ya Rashele. (Kub. 29:17, 18, 20) Samu na yinki bantu vandá futá mbongo ya makwela?

Carol Meyers, muntu mosi yina ke sala ba-commentaire na mambu ya Biblia me zonza: “Na ntangu yina, ni kisalu ya bilanga bantu vandá salaka. Na yawu, ntangu ba vandá kwela mwana ya kento, diboko yina vandá sadisa na bilanga vandá dyaka ve. Samu dikanda ya yandi bikana ve kaka mpila yina, ba vandá futá bawu mbongo ya makwela.” Mbongo ya makwela vandá kumisá mpe ngolo kindiku ya makanda yina me kwelisa bana ya bawu. Ya vandá sala ti si mambu kele, ba ke sadisa bampangi. Dyaka, kufuta mbongo ya makwela vandá lakisa ti mwana ya kento ke dyaka ve na maboko ya tata ya yandi, kasi yandi me kuma na maboko ya bakala ya yandi.

Kufuta mbongo ya makwela vandá lakisa ve ti mwana ya kento kumá kima ya kutekisa to ya kusumba. Buku mosi yina ke zonzila faso vandá luzingu na ntangu ya Biblia, ke zonzá: “Mambu ya kufuta mbongo ya makwela lenda nata bantu ya nkaka na kukanisa ti, na dikanda ya Izraele ba vandá tekisá to kusumba bana ya kento. Kasi ya vandá ve faso yina. Bantu vandá [futá mbongo ya makwela] samu dikanda ya mwana ya kento bikana ve maboko mpamba.”

Bubu yayi na babwala ya nkaka, bantu ke futá ntete mbongo ya makwela. Ntangu bibuti ya bakristo ke lombak’ yawu, ba ke natá ve bamambu ngolo. Ba ke salá nyonso samu ‘lembami ya bawu zabana na bantu nyonso.’ (Flp. 4:5; 1 Ko. 10:32, 33) Ntangu ba ke salak’ yawu, ba ke lakisá ti ba ke ve ‘bantu yina ke zolaka mbongo.’ (2 Tim. 3:2) Si ba nata ve bamambu ngolo, ya ke sala ti bakala yina zola kukwela mwana ya bawu nata ve kilumbu ya makwela na mantwala samu yandi ke na sosá ntete mbongo. To yandi bika ve kisalu ya pionnier samu na kukwenda sosa kisalu yina ke pesa yandi mbongo mingi samu yandi kwela mwana ya bawu.

Na babwala ya nkaka, ni luyalu ke zonzá mbongo yikwa ba ke futa samu na makwela. Bibuti ya bakristo yina ke vandá na babwala yina, ke landá misiku ya luyalu. Samu na yinki? Samu Biblia ke zonzá ti bakristo “fwana kutumama na bantu ya luyalu” mpe kulanda misiku yina Nzambi me nimina ve.—Rom. 13:1; Bis. 5:29.