NA MISIKU ya Moyize, Yehova vandá ndima ti bana ya Izraele pesa yandi bandeke ya mitindu zole: dibembe na kiduka (tourterelle). Na yina me tadila minkayulu, ntangu Misiku ya Moyize ke zonzá ndeke mosi, ya ke zonzilá mpe ya nkaka. Muntu yina vandá ve na dibembe lendá pesa kiduka, mpe muntu yina vandá ve na kiduka lendá pesa dibembe. (Lev. 1:14; 12:8; 14:30) Samu na yinki musiku yayi vandá mbote? Ya vandá samu kiduka vandá talaná ve ntangu nyonso. Samu na yinki bantangu ya nkaka ya vandá mpasi na kuzwa kiduka?

Kiduka ke ndeke mosi yina ke vandá ve ntangu nyonso kisika mosi. Ya vandá vandá na bwala ya Izraele na bangonda ya tiya. Bamvula nyonso, na ngonda ya octobre, bandeke yayi vandá kwendá na babwala ya nkaka, kisika yina tiya vandá. (Nz. 2:11, 12; Yer. 8:7) Na bantangu yina, samu madidi vandá na bwala ya Izraele, ya vandá mpasi na kuzwa yawu.

Kasi, dibembe ke vandá kaka kisika mosi. Ni na yina, mvula ya muvimba ya vandá ve mpasi na kuzwa yawu na Izraele. Mpe bantu ya nkaka vandá kulisá yawu na bayinzo ya bawu. (Tala Yoane 2:14, 16.) Buku mosi yina ke zonzilá bayinti na bibulu na ntangu ya Biblia me zonza: “Na bisika nyonso na palestine (Izraele), bantu vandá kulisá mabembe. Muntu na muntu vandá na mwa yinzo ya fioti yina yandi yidiká samu na kutula bawu. To ba vandá tobola mwa dibulu na kibaka ya yinzo ya bawu samu mabembe vanda kuna.”—Tala Izaya 60:8.

Samu Yehova zonzá na bana ya Izraele na kupesa bandeke ya mitindu zole yayi, ya vandá ve mpasi na kuzwa ndeke na kupesa na munkayulu. Ya ke na lakisá luzolo ya yandi mpe ntima ya yandi ya mbote.