1-2. a) Na wapi ntangu beto ke kanisá mingi na muntu ya beto yina kufwá? b) Yinki Yesu salá na mpimpa tekila yandi kufwa?

BETO ke zimbaná ve bantu ya beto yina kufwá, ata bamvula mingi me luta. Beto ke kanisá mingi na bawu ntangu beto ke kumá kilumbu yina ba kufwá.

² Bamvula nyonso, beto ke vandá na kati ya bamilion ya bantu yina ke vukaná kilumbu ya lufwa ya Yesu, muntu yina beto ke zolá mingi. (1 Pi. 1:8) Beto ke vukaná samu na kukanisa na yina Yesu pesá luzingu ya yandi samu na kuvuukisa beto na disumu mpe lufwa. (Mat. 20:28) Yesu vandá na nsatu bilandi ya yandi bambukila moyo lufwa ya yandi. Na mpimpa tekila yandi kufwa, samu na madya ya nsuka yina yandi kudyá na bilandi ya yandi, yandi zonzá: “Beno sala mutindu yayi samu na kubambuka munu moyo.”—Luke 22:19.

3. Yinki beto ke zonzila na artikle yayi?

³ Kaka ndambu ya bantu yina ke vandá na kilumbu ya kubambukila moyo, ke na kivuvu ya kwenda vanda na zulu. Bamilion ya bantu yina ke na kivuvu ya kuzwa luzingu ya ntangu nyonso awa na ntoto, ke vandá mpe. Na artikle yayi, beto ke tala samu na yinki bawu nyonso mvula na mvula, ke vingilá na ntima mosi kilumbu yina. Beto ke tala mpe wapi bambote beto ke kuzwá ntangu beto ke vukaná. Na kubanda, beto zonzila samu na yinki bakristo yina Yehova soolá samu na kwenda vanda na zulu ke vandá kilumbu ya kubambukila moyo.

4. Samu na yinki bakristo yina ke kwenda vanda na zulu ke baká dimpa mpe vinu na kilumbu ya kubambukila moyo?

⁴ Bamvula nyonso, na kilumbu ya kubambukila moyo, bakristo yina ke kwenda vanda na zulu ke baká dimpa mpe vinu. Samu na yinki ba ke bakak’ yawu? Samu na kuzaba yawu, beto tala bamambu yina salamá na mpimpa ya nsuka yina Yesu lutisá awa na ntoto. Na manima ya kudya pake, Yesu salá mbala ya ntete madya yina ba ke bokilá Madya ya Mfumu. Yandi lutisá dimpa mpe vinu na bantumwa 11 yina bikaná ya kukangama na yandi, mpe yandi zonzá na bawu na kudya mpe kunwa yawu. Yandi zonzilá bawu baluwawanu zole: luwawanu ya malu-malu mpe luwawanu samu na Kimfumu. * (Luke 22:19, 20, 28-30) Baluwawanu yayi vandá fungula nzila na bantumwa, mpe bakristo ndambu na manima ya bawu, na kukuma bamfumu mpe banganga-Nzambi na zulu. (Luz. 5:10; 14:1) Kaka ndambu ya bakristo yina Yehova soolá ke ntete awa na ntoto. Samu ba ke na kati ya baluwawanu zole yayi, ba ke baká dimpa mpe vinu na nkokila ya kubambukila moyo.

5. Yinki bakristo yina Yehova soolá zaba samu na kivuvu ya bawu?

⁵ Bakristo yina ke kwenda vanda na zulu ke zolá mpe kuvanda na kilumbu ya kubambukila moyo samu ya ke sadisá bawu na kukanisa na kivuvu yina ke na bawu. Yehova me pesa bawu kivuvu mosi ya kitoko. Na zulu, ba ke kuzwa nzutu yina ke kufwá ve mpe ke bolá ve. Dyaka, ba ke yala na Yesu na ndambu ya nkaka ya bakristo 144000 yina tekilá kukwenda na zulu. Kulutila nyonso, ba ke tala Yehova Nzambi! (1 Ko. 15:51-53; 1 Yoa. 3:2) Ba zaba na ntima ya bawu ti, Yehova me pesa bawu bweso ya kukwenda vanda na zulu. Kasi samu ba kwenda na zulu, ba me lunga kuvanda ya kukangama na Nzambi tii na lufwa. (2 Tim. 4:7, 8) Kivuvu ya bawu ke pesá bawu kilengi ya mingi. (Tite 2:13) Yinki beto lenda zonza samu na “mameme ya nkaka”? (Yoa. 10:16) Samu na yinki ba ke vandá kilumbu ya kubambukila moyo?

6. Samu na yinki mameme ya nkaka ke vandá bamvula nyonso na kilumbu ya kubambukila moyo?

⁶ Mameme ya nkaka ke na kilengi ya kuvanda kilumbu ya kubambukila moyo, kasi ba ke baká ve dimpa mpe vinu. Ni na 1938, ba lakisá bawu mbala ya ntete ti ba zolá vanda kilumbu yina. Yinzo ya Kengidi ya 1^er Mars 1938 zonzá: “Ya ke mbote mameme ya nkaka vanda na lukutakanu yina mpe tala faso ya ke na lutilá [. . .] Ya zolá vanda ntangu ya kilengi samu na bawu mpe.” Kaka faso ba yina ke kwizá na makwela ke sepelá na ba yina ke na kwelaná, mameme ya nkaka mpe ke na kilengi ya kuvanda kilumbu ya kubambukila moyo ata ba ke baká ve dimpa to vinu.

7. Samu na yinki mameme ya nkaka ke zolá kuwa diskur ya kilumbu ya kumbabukila moyo?

⁷ Na kilumbu ya kubambukila moyo, mameme ya nkaka mpe ke kanisá na kivuvu yina ke na bawu. Ba ke zolá kuwa diskur yina ke salamá kilumbu yina, samu ya ke zonzilá mingi yina Yesu mpe bakristo 144000 ke sala samu na ba yina ke vanda ya kukangama na Nzambi. Na kati ya bamvula 1000, Yesu na bakristo yina, ke yala ntoto. Ba ke sadisa bantu na kukumisa ntoto paradi mpe ba ke katula masumu ya bantu. Mameme ya nkaka ke vandá na kilengi ntangu ba ke kanisá na faso ke lungana  bamambu yina ke na Izaya 35:5, 6; 65:21-23; mpe Luzabusu 21:3, 4. Kukanisa na faso ke vanda luzingu ya bawu mpe ya bantu yina ba ke zolá na yinza ya malu-malu, ke kumisá ngolo kivuvu ya bawu, mpe nsatu ya bawu ya kuvanda ya kukangama na Nzambi tii na nsuka.—Mat. 24:13; Gal. 6:9.

8. Wapi kima ya nkaka ke salá ti mameme ya nkaka vanda kilumbu ya kubambukila moyo?

⁸ Mameme ya nkaka ke vandá mpe kilumbu ya kubambukila moyo, samu na kulakisa luzolo mpe nsatu ya bawu ya kusadisa bakristo yina Yehova soolá. Biblia zonzá ti bakristo yina ke kwenda vanda na zulu mpe ba yina ke kuzwa luzingu ya ntangu nyonso awa na ntoto ke sala kintwadi mpe na bumosi. Beto tala mwa bifwani yina ke na lakisak’ yawu.

9. Yinki Zakari 8:23 ke zonzá na faso mameme ya nkaka zolá tadila bakristo yina ke kwenda vanda na zulu?

⁹ Tanga Zakari 8:23. Verse yayi ke na lakisá faso ya kitoko yina mameme ya nkaka zolá tadila bakristo yina ke kwenda vanda na zulu. ‘Jwife mosi’ mpe “beno” ke na zonzilá bakristo yina ke kwenda na zulu yina ke ntete awa na ntoto. (Rom. 2:28, 29) Mpe ‘bantu kumi ya bandinga nyonso ya makanda’ ke mameme ya nkaka. Ntangu Biblia ke zonzá ti ba ke na ‘simbá ngolo,’ ya ke na lakisá ti ba ke ya kukangama na bakristo yina ke kwenda vanda na zulu mpe ba ke na sambilá Yehova na bawu. Na yawu, ba ke lakisá kukangama ya bawu na bakristo yayi ntangu ba ke vandá na nkokila ya kumbukila moyo.

10. Yinki Yehova me sala samu na kulungisa mbikululu ya Ezekiele 37:15-19, 24, 25?

¹⁰ Tanga Ezekiele 37:15-19, 24, 25. Yehova me lungisa yina ke zonzá na baverse yayi, ntangu yandi me sala ti bakristo yina ke kwenda vanda na zulu mpe mameme ya nkaka sala kintwadi na bumosi. Mbikululu yayi ke zonzilá bitini ya bayinti zole. Ba yina ke kwenda vanda na zulu ke faso kitini ya yinti “ya Yuda” (dikanda yina vandá basika bamfumu ya Izraele). Mpe bakristo yina ke kuzwa luzingu ya ntangu nyonso awa na ntoto ke faso yinti “ya Efrayimi.” * Yehova zolá vukisa ba yina ke na bivuvu zole yayi samu ba kuma faso ‘yinti mosi.’ Ya zola zonza ti bawu nyonso zolá sala na bumosi na manima ya Yesu, Mfumu ya bawu. Bamvula nyonso, na kilumbu ya kubambukila moyo, ba ke vandá ve ya kukabuka. Ba ke vukaná samu ba ke ‘kimvuka mosi’ na manima ya “muvungi mosi.”—Yoa. 10:16.

11. Wapi yina ke faso ya ntete yina “mameme” ya Matayi 25:31-36, 40 ke sadisá bampangi ya Yesu?

¹¹ Tanga Matayi 25:31-36, 40. “Mameme” yina Yesu ke na zonzilá awa ke mameme ya nkaka. Ba ke bantu ya mbote yina, na kati ya bilumbu ya nsuka, ke na kivuvu ya kuzwa luzingu ya ntangu nyonso awa na ntoto. Faso ya ntete yina ba ke sadisá bampangi ya Yesu, ke ni ya kutulá diboko na kisalu ya nene yina Yesu pesá bawu: kusamuna mpe kukumisa bantu bilandi na yinza nyonso.—Mat. 24:14; 28:19, 20.

12-13. Na wapi bafaso ya nkaka mameme ya nkaka ke sadisá bampangi ya Yesu?

¹² Bamvula nyonso, ya ke vandá na kampanye na yinza ya muvimba samu na kubokila bantu na kilumbu ya kubambukila mosi. Na kati ya bantangu yina, mameme ya nkaka ke salá dyaka ya kulutila samu na kusadisa bampangi ya Yesu. (Tala enkadre “ Yinki nge me kanisa kusala na kati ya bilumbu ya kubambukila moyo?”) Ba ke salá mpe nyonso samu kilumbu yina luta na faso ya mbote, ata na kimvuka  ya bawu ya ke ve na bampangi yina ke baká dimpa mpe vinu. Mameme ya nkaka ke na kilengi ya kusadisa bampangi ya Yesu na bafaso yayi. Ba zaba ti Yesu ke talá yina ba ke salá samu na bampangi ya yandi nete ba ke na salak’ yawu samu na yandi mosi.—Mat. 25:37-40.

¹³ Wapi bima ya nkaka ke salá ti beto nyonso vanda kilumbu ya kubambukila moyo?

14. Wa’ faso Yehova na Yesu lakisá beto luzolo ya mingi?

¹⁴Beto ke vutulá matondo na luzolo yina Yehova na Yesu lakisá beto. Yehova lakisá beto luzolo na bafaso mingi. Faso ya kulutila kitoko yina yandi lakisak’ yawu ni ntangu yandi filisá mwana ya yandi yina yandi ke zolá mingi, kutala mpasi mpe kufwa samu na beto. (Yoa. 3:16) Yesu mpe lakisá beto luzolo ya mingi samu yandi ndimá kupesa luzingu ya yandi samu na beto. (Yoa. 15:13) Beto lenda futa ata fioti ve Yehova na Yesu samu na luzolo ya bawu. Kasi, beto lenda vutula bawu matondo na mutindu ya kunata luzingu ya beto. (Kol. 3:15) Beto ke vandá kilumbu yina samu na kubambukila moyo luzolo yina ba lakisá beto, mpe kulakisa ti beto ke zolá bawu.

15. Samu na yinki munkayulu ya Yesu ke ntalu mingi samu na bakristo yina ke kwenda vanda na zulu mpe mameme ya nkaka?

¹⁵Munkayulu ya Yesu ke ntalu mingi na meso ya beto. (Mat. 20:28) Munkayulu ya Yesu ke ntalu mingi na meso ya bakristo yina Yehova soolá, samu ni na nzila ya yawu ba kuzwá kivuvu ya kwenda na zulu. Samu ba ke na kiminu na munkayulu ya Yesu, Yehova ndimá bawu faso bantu ya lunungu, mpe kumisá bawu bana ya yandi. (Rom. 5:1; 8:15-17, 23) Mameme ya nkaka mpe ke sepelá na munkayulu ya Yesu. Samu ba ke na kiminu na yawu, ba ke bunkete na mantwala ya Nzambi, ba ke pesak’ yandi kisalu ya santu, mpe ba ke na kivuvu ya kuvuuka “na mpasi ya nene.” (Luz. 7:13-15) Kuvanda mvula na mvula na kilumbu ya kubambukila moyo, ke faso ya bakristo yina ke kwenda vanda na zulu mpe mameme ya nkaka na kuvutula matondo na yina Yehova pesá mwana ya yandi.

16. Wapi kima ya nkaka ke salá ti beto vanda kilumbu ya kubambukila moyo?

¹⁶ Kima ya nkaka yina ke salá ti beto bambukila moyo lufwa ya Yesu ke samu beto ke landá musiku yina Yesu pesá. Mosi na mosi na kati ya beto zola kulanda bamambu yayi Yesu zonzá na nkokila yina yandi salá Madya ya Mfumu: “Beno sala mutindu yayi samu na kubambukila munu moyo.”—1 Ko. 11:23, 24.

17. Wa’ faso kilumbu ya kumbabukila moyo ke sadisá beto na kukuma dyaka pene-pene na Yehova?

¹⁷Beto ke kumá dyaka pene-pene na Yehova. (Zaki 4:8) Faso beto me longoka yawu, kilumbu ya kumbabukila moyo ke sadisá beto na kukanisa na kivuvu yina Yehova me pesa beto, mpe na luzolo ya mingi yina yandi me lakisa beto. (Yer. 29:11; 1 Yoa. 4:8-10) Kusala yawu ke kulisá luzolo ya beto na Yehova mpe kindiku ya beto na yandi.—Rom. 8:38, 39.

18. Kukanisa na yina Yesu salá samu na beto ke pesá beto nsatu ya kusala yinki?

¹⁸Beto ke kulisá nsatu ya beto ya kulanda kifwani ya Yesu. (1 Pi. 2:21) Mwa bilumbu tekila beto bambukila moyo lufwa ya Yesu, beto ke tangá masolo ya Biblia yina ke zonzilá lumingu ya nsuka yina Yesu lutisá awa na ntoto, lufwa ya yandi mpe kuvumbuka ya yandi na lufwa. Na nkokila ya kilumbu yina, beto ke kuwá diskur yina ke bambuká beto luzolo ya Yesu samu na beto. (Ef. 5:2; 1 Yoa. 3:16)  Kutanga faso Yesu na ntima mosi pesá luzingu ya yandi samu na beto, mpe kukanisa na yawu, ke pesá beto nsatu ya ‘kuzinga mutindu Yesu Kristo zingaka.’—1 Yoa. 2:6.

19. Wa’ faso beto lenda bikana na kati ya luzolo ya Yehova?

¹⁹Beto ke kulisá nsatu ya beto ya kubikana na kati ya luzolo ya Nzambi. (Yude 20, 21) Beto ke bikaná na luzolo ya Nzambi ntangu beto ke kuwá yandi, ke kumisá santu nkumbu ya yandi, mpe ke pesá ntima ya yandi kilengi. (Bin. 27:11; Mat. 6:9; 1 Yoa. 5:3) Kuvanda kilumbu ya kubambukila moyo ke faso ya mosi na mosi ya beto ya kuzonza na Yehova: ‘Mu ke na nsatu ya kuvanda ntangu nyonso na kati ya luzolo ya nge!’

20. Samu na yinki beto ke vandá kilumbu ya kubambukila moyo?

²⁰ Ya ke na bima mingi yina ke salá ti beto vanda kilumbu ya kubambukila moyo, ya vanda ba yina ke na kivuvu ya kwenda na zulu to ba yina ke kuzwa luzingu ya ntangu nyonso awa na ntoto. Ntangu beto ke vukaná bamvula nyonso kilumbu yina, beto ke bambukilá moyo lufwa ya Yesu, muntu yina beto ke zolá. Mpe beto ke kanisá na luzolo ya mingi yina Yehova lakisá beto na yina yandi filisá mwana ya yandi kupesa luzingu ya yandi faso munkayulu. Na 2022, beto ke bambukila moyo lufwa ya Yesu na nkokila ya Vendredi 15 Avril. Beto ke zolá Yehova na mwana ya yandi. Na yawu, beto ke bika ata kima kukanga beto nzila ya kuvanda kilumbu yina.