1. Samu na yinki kilumbu ya kubambuka moyo lufwa ya Yesu ke kilumbu ya kulutila mfunu na mvula? (Luke 22:19, 20)

 SAMU na Bambangi ya Yehova, kilumbu ya kubambuka moyo lufwa ya Yesu ke mfunu mingi. Kaka ni kilumbu yina Yesu lombaka na bilandi ya yandi na kubambuka moyo. Luke 22:19, 20 ke zonzaka: “Na manima, yandi bakaka dimpa. Yandi tondaka Nzambi, bukunaka [zengaka] dimpa, mpe pesaka bawu yawu na kutuba: ‘Yayi ni nzutu ya munu yina mu me pesa samu na beno. Beno sala mutindu yayi samu na kubambuka munu moyo.’ Mutindu mosi mpe, na manima ya kudya, yandi pesaka bawu mbungu ya vinu, mpe tubaka: ‘Mbungu yayi kele ngwisani ya malu-malu yina me salama na menga ya munu yina me mwangana samu na beno.” Bamambu mingi ke nataka beto na kuvingila kilumbu ya kubambuka moyo. Beto tala mwa bamambu yango.

2. Wapi bamambu ke nataka beto na kubongama na kilumbu ya kubambuka moyo?

² Kilumbu ya kubambuka moyo ke sadisaka beto na kutala mfunu ya munkayulu ya Yesu. (2 Ko. 5:14, 15) Ya ke pesaka mpe beto bweso ya kuzwa “nkindusulu na kiminu” ya bampangi ya kento na ya bakala. (Rom. 1:12) Mingi ya bampangi yina ke kwizaka dyaka ve na balukutakanu ke vingilaka kilumbu yayi. Ya ba nkaka ke ndimaka kuvutukila kusadila Yehova samu ti ba yambaka bawu na kilengi nyonso. Bantu mingi bandaka kulongoka Biblia na manima ya kutala mpe kuwa bamambu na kilumbu ya kubambuka moyo. Ntembe ve, kilumbu ya kubambuka moyo lufwa ya Yesu ke ntalu mingi samu beto!

3. Wa’ faso kilumbu ya kubambuka moyo lufwa ya Yesu ke tulaka bumosi na kati ya beto? (Tala mpe kizizi.)

³ Kanisa mpe na bumosi yina kilumbu ya kubambuka moyo ke tulaka na kati ya bampangi na yinza nyonso. Bambangi ya Yehova ke salaka  yawu ntangu nkokila ke kubwaka. Beto nyonso ke kuwaka disolo yina ke lakisaka mfunu ya munkayulu ya Yesu. Beto ke yimbaka banzimbu zole samu na kukembila Yehova. Beto ke lutisaka dimpa na vinu mpe na ntima nyonso beto ke zonzaka “ameni” na balusambu yiya yina ke salamaka kuna. Na kilumbu mosi, bimvuka nyonso ya Bambangi ya Yehova ke salaka lukutakanu yayi. Kanisa na kilengi yina ya ke salaka Yehova na Yesu ntangu ba ke talaka bumosi yina ke na kati ya beto na faso yina beto ke kembilaka bawu.

4. Yinki beto ke zonzila na disolo yayi?

⁴ Na disolo yayi, beto ke zonzila byuvu yayi: Wa’ faso beto lenda bongisa bantima ya beto samu na kilumbu ya kubambuka moyo? Wa’ faso beto lenda sadisa bantu ya nkaka na kuzwa bambote yina ya ke nataka? Wa’ faso beto lenda sadisa ba yina me kota madidi? Bamvutu na byuvu yayi ke sadisa beto na kuvanda ya kubongama samu na kilumbu yango.

WA’ FASO BETO LENDA BONGISA BANTIMA YA BETO SAMU NA KILUMBU YA KUBAMBUKA MOYO?

5. a) Samu na yinki beto me lunga kuyindula na mfunu ya munkayulu ya Yesu? (Nkunga 49:7, 8) b) Yinki nge me longoka na video Samu na yinki Yesu fwaka?

⁵ Mosi ya ba faso yina lenda sadisa beto na kubongisa bantima ya beto samu na kilumbu ya kubambuka moyo ke kuyindula na mfunu ya munkayulu ya Yesu. Ya ke ve na muntu lenda sumba luzingu ya yandi mosi na lufwa mpe na masumu. Nkunga 49:7, 8 ke zonzaka: ‘Muntu mosi ve na kati ya bawu lenda sumba dyaka mpangi ya yandi ata fioti to kupesa Nzambi munkayulu samu na yandi, (Ntalu ya munkayulu samu na luzingu ya bawu ke mfunu mingi. Ni na yawu, ba ke lembana ntangu nyonso na kufuta yawu).’ Tala mpe video Samu na yinki Yesu fwaka?) a Yehova yidikaka bamambu samu Yesu pesa luzingu ya yandi samu na kuvuukisa beto. Ya vandaka ve pete samu na bawu na kusala yawu. (Rom. 6:23) Ntangu beto ke yindulaka na yina Yehova na Yesu salaka samu na beto, ya ke kulisaka luzolo ya beto samu na munkayulu ya Yesu. Beto tala mwa bamambu ya fioti yina ya lombaka na Yehova na Yesu samu na munkayulu ya Yesu.

6. Yinki munkayulu ya Yesu salaka?

⁶ Ntangu Yehova salaka Adami, yandi vandaka ya kulunga. Kasi ntangu yandi tumamaka ve na Yehova, yandi sumukaka mpe vandaka dyaka ve na bweso ya kuzinga ntangu nyonso. Kaka yandi mosi ve, kasi mpe bana ya yandi nyonso. Ni na yawu, Yehova fidisaka Yesu na kupesa luzingu ya yandi mutindu munkayulu. Ntangu Yesu vandaka awa na ntoto, yandi “salaka ve disumu mpe ata dyambu ya luvunu basikaka na yinwa ya yandi.” (1 Pi. 2:22) Ntangu Yesu kufwaka, yandi vandaka na luzingu ya kulunga mutindu Adami tekila yandi sumuka. Na yawu, lufwa ya yandi pesaka difuta samu na kusumba luzingu yina Adami bebisaka.​—1 Ko. 15:45; 1 Tim. 2:6.

7. Wapi yina ke bamambu yina mekaka kiminu ya Yesu awa na ntoto?

⁷ Ntangu Yesu vandaka awa na ntoto, yandi kutanaka na bamambu mingi yina mekaka kiminu ya yandi. Kasi ata faso yina, yandi tumamaka na faso ya kulunga na Tata ya yandi ya mazulu. Ata ti yandi butamaka muntu ya kulunga, Yesu vanda tumamaka na bibuti ya yandi yina vandaka bantu ya masumu. (Luke 2:51) Ntangu yandi vandaka ntwenya, yandi kubwaka ve na mutambu ya bantu yina zola nata yandi na kuzola ve kutumama na bibuti ya yandi to kuvanda ve ya kukwikama na Yehova. Dyaka, ntangu Yesu kulaka, yandi kubwaka ve na bantotolo ya Satana yina vandaka na nsatu ti yandi vanda dyaka ve ya kukwikama na Nzambi. (Mat. 4:1-11) Satana salaka nyonso samu Yesu sala masumu mpe vanda ve na makoki ya kufuta munkayulu ya yandi.

8. Wapi yina ke bamambu ya nkaka ya mpasi yina Yesu kutanaka na yawu?

⁸ Yesu kangaka mpe ntima na mantwala ya bankwamusu ya nkaka ntangu yandi vandaka samuna awa na ntoto. Bambeni ya yandi vanda kwamisa yandi mpe ba vanda sosa kufwa yandi. (Luke 4:28, 29; 13:31) Dyaka, yandi zola kanga ntima samu na bafoti ya bilandi ya yandi. (Mrk. 9:33, 34) Ntangu ba nataka yandi na mantwala ya bazuzi, ba vanda nyokola mpe kuseka yandi. Ba kufwaka yandi mutindu ba ke kufwaka bantu yina ke salaka mambu ya yimbi  mpe yandi talaka mpasi mingi. (Ebr. 12:1-3) Yehova sadisaka ve Yesu na mpasi ya nsuka yina Yesu kutanaka awa na ntoto. b​—Mat. 27:46.

9. Ntangu nge ke kanisaka na mukayulu ya Yesu, yinki ya ke salaka nge? (1 Piere 1:8)

⁹ Yesu talaka mpasi mingi samu na kufuta munkayulu. Ntangu beto ke kanisaka na munkayulu yina Yesu pesaka samu na beto, ya ke kumisaka ngolo luzolo ya beto samu na yandi.​—1 Piere 1:8 ke zonzaka: “Beno ke zolaka yandi ata ti beno talaka yandi ve. Beno ke kwikilaka yandi ata ti nabunu beno tala yandi. Ni yawu yina, beno kele ya kufuluka na kilengi ya nene yina ata muntu lenda kuzonzila.”

10. Yinki ya salaka Yehova na kupesa Mwana ya yandi mutindu munkayulu?

¹⁰ Yinki Yehova salaka samu ti Yesu lenda kupesa luzingu ya yandi mutindu munkayulu? Kindiku ya Yehova na Yesu ke kaka mutindu kindiku ya papa na mwana ya yandi. (Bin. 8:30) Beto lenda kanisa na yina ya salaka Yehova ntangu Mwana ya yandi Yesu vanda lutisa bantangu ya mpasi awa na ntoto. Ntembe ve, ya salaka Yehova mpasi na kutala mutindu bavanda nyokola, kumanga mpe kutalisa Mwana ya yandi mpasi.

11. Sadila kifwani yina ke na lakisaka yinki ya salaka Yehova ntangu ba vanda kufwa mwana ya yandi awa na ntoto.

¹¹ Bibuti nyonso yina me fwidilaka mwana me zaba mpasi yina ya ke salaka na ntima. Ata ti beto ke na kiminu ya ngolo ti Yehova ke vumbula bantu ya kufwa, kasi ya ke katulaka ve beto mpasi yina lufwa ya muntu beto ke zolaka ke salaka. Kifwani yayi ke na sadisaka beto na kuzaba yinki ya salaka Yehova ntangu yandi vanda tala Mwana ya yandi yina yandi ke zolaka mingi kutala mpasi mpe kufwa awa na ntoto na kilumbu ya 33 N.B. c​—Mat. 3:17.

12. Tekila kilumbu ya kubambuka moyo, yinki beto lenda sala?

¹² Tekila kilumbu ya kubambuka moyo salama, nge me bonga kusosa kulongoka mingi na yina me tadila munkayulu ya Yesu, ya vanda na kulongoka ya nge mosi to ya dikanda. Sadila Buku ya kusosa samu na Bambangi ya Yehova to Biblia yina nge lenda longoka samu na kufyongonina mbote-mbote mambu yayi. d Nge lenda sadila mpe programme ya kutangu Biblia yina ke na kati ya Mukanda ya Lukutakanu​—Luzingu mpe kisalu ya beto ya bukristo. Mpe kilumbu ya kubambuka moyo, kuzimbana ve kutala dikanisi ya Biblia samu na kilumbu ya kubambuka moyo. Ntangu beto ke bongisaka ntima ya beto samu na kilumbu ya kubambuka moyo, ya ke vandaka ve mpasi na beto na kusadisa bampangi samu na kuzwa bambote yina ya ke nataka.​—Esd 7:10.

 SADISA BANTU YA NKAKA NA KUZWA BAMBOTE

13. Wapi yina ke kima ya ntete yina beto lenda sala samu na kusadisa bantu ya nkaka na kuzwa bambote yina kilumbu ya kubambuka moyo ke nataka?

¹³ Wa’ faso beto lenda sadisa bantu ya nkaka na kuzwa bambote ya kilumbu ya kubambuka moyo lufwa ya Yesu? Ya ntete, bokila bawu na lukutakanu yayi. Beto ke suka ve kaka na kubokila ba yina beto ke samunaka bilumbu nyonso, kasi beto lenda sonika na mukanda bankumbu ya bantu yina beto ke na nsatu ya kubokila samu na lukutakanu yayi. Na kati ya bawu kele na bantu ya dikanda ya beto, bampangi ya lukolo, bampangi ya kisalu mpe bantu ya nkaka. Ata ti beto ke ve na mikanda mingi samu na kubokila bawu na lukutakanu ya kubambuka moyo, beto lenda fidisa bawu yawu na nzila ya internet. Beto lenda pamuka na kutala bantu mingi kukwiza na lukutakanu yango.​—Lon. 11:6.

14. Pesa kifwani yina ke lakisaka mfunu ya kubokila muntu na lukutakanu ya kubambuka moyo.

¹⁴ Kukanisa ve ti kupesa muntu mukanda to kufidisa yawu na nzila ya internet ke salaka ata kima. Mpangi mosi ya kento, yina bakala ya yandi ke ve mbangi ya Yehova pamukaka ntangu yandi zonzaka na yandi ti yandi ke na nsatu ya kukwenda na lukutakanu ya kubambuka moyo. Samu na yinki ya pamusaka yandi? Samu ti bantangu mingi na manima, yandi vanda bokilaka yandi samu na lukutakanu yayi, kasi yandi vanda mangaka kaka. Yinki sobaka na ntangu yina? Bakala ya yandi me zonza: “Ba pesaka munu mukanda samu na kubokila munu na lukutakanu ya kubambuka moyo lufwa ya Yesu.” Ni kuluntu mosi yina vanda longokaka na yandi bokilaka yandi. Yandi kwizaka na lukutakanu ya mvula yina mpe bamvula yina landaka yandi vanda kwizaka dyaka.

15. Yinki beto me fwana kuzimbana ve ntangu beto ke bokilaka bantu na lukutakanu ya kubambuka moyo lufwa ya Yesu?

¹⁵ Kuzimbana ve ti bantu yina nge ke bokila lenda vanda na byuvu, mingi-mingi ba yina ke kwizaka ve na balukutakanu. Beto lenda kanisa na mantwala na byuvu yina ba lenda yufula mpe kubongama na kupesa bawu mvutu. (Kol. 4:6) Na kifwani, ba lenda yufula: ‘Yinki ke salamaka na lukutakanu yango?’ ‘Ya ke bakaka bantangu yikwa?’ ‘Kulwata wa’ faso?’ ‘Ba ke lomba kwandi mu futa samu na kukota?’ ‘Ba ke pesaka kwandi mabonza?’ Ntangu beto ke bokilaka muntu samu na lukutakanu ya kubambuka moyo beto lenda yufula yandi: “Nge ke na byuvu?” Na manima, pesa mvutu na byuvu ya yandi. Beto lenda sadila mpe bavideo Beno bambuka lufwa ya Yesu mpe  Yinki ke salamá na Yinzo ya Kimfumu? Ya ke sadisa yandi na kutala yandi mosi wa’ faso balukutakanu ke salamaka. Kileso 28 ya buku Sepela na luzingu ya ntangu nyonso! ke pesa beto bima mingi ya kitoko yina beto lenda kabula.

16. Wapi byuvu bantu lenda vanda na yawu na manima ya kilumbu ya kubambuka moyo?

¹⁶ Na manima ya kulanda lukutakanu yango, ba yina ke sepela na malongi ya Biblia lenda vanda na byuvu. Ba lenda yufula samu na yinki kaka bantu ndambu ke dyaka dimpa mpe ke kunwaka vinu. Ba lenda yufula beto mpe kubambuka moyo lufwa ya Yesu ke salamaka kaka mutindu yayi. Mpe ba lenda yufula kana balukutakanu nyonso ya Bambangi ya Yehova ke salamaka kaka mutindu yayi. Ata ti ba me zonzila bamambu yayi ntangu lukutakanu ya kubambuka moyo vanda luta, ba yina me kwiza mbala ya ntete lenda vanda na nsatu ya kuzaba dyaka mingi. Beto lenda kuzwa na jw.org disolo “Pourquoi les Témoins de Jéhovah célèbrent t-ils le repas du Seigneur différemment des autres religions?” Ya ke sadisa beto na kupesa bamvutu na mwa byuvu yayi. Beto ke na nsatu ya kusala yina beto lenda sala tekila ntangu, mpe na manima ya kilumbu ya kubambuka moyo.​—Bis. 13:48.

SADISA BA YINA ME KOTA MADIDI NA KIMPEVE

17. Wa’ faso bakuluntu lenda sadisa ba yina me kota madidi na kimpeve? (Ezekiele 34:12, 16)

¹⁷ Wapi mutindu bakuluntu lenda sadisa ba yina me kota madidi na kimpeve na ntangu ya kubambuka moyo? Ni na kulakisa bawu luzolo. Ezekiele 34:12, 16 ke zonzaka: ‘Mu ke keba mameme ya munu mutindu muvungi yina me tala mameme ya yandi yina mwanganaka mpe ke dikisa bawu, mu ke vuukisa bawu na bisika nyonso yina ba mwanganaka na kilumbu ya matuti mpe ya mpimpa ya ngolo. . . . “Mu ke sosa yina me zimbana, mu ke vutula yina ke ve na kisika ya kuvanda, mu ke kanga babande na yina me lwala, mpe mu ke pesa yina me lemba ngolo. Kasi mu ke fwa yina ke na mafuta mingi mpe yina ke na ngolo. Mu ke sambisa yandi mpe ke pesa yandi masembo yina me fwana.”’ Tekila kilumbu ya kubambuka moyo, nge me lunga kusala nyonso yina nge lenda sala samu na kubokila ba yina me kota madidi na kimpeve. Zonza na bawu ti nge ke zolaka bawu mpe nge ke na nsatu ya kusadisa bawu. Bokila bawu na kuvanda na kilumbu ya kubambuka moyo lufwa ya Yesu, mpe kana ba kwiza, yamba bawu na kilengi nyonso. Na manima ya kilumbu ya kubambuka moyo, kubika ve  kubokila to kutala bampangi ya kento na ya bakala yina kotaka madidi na kimpeve. Sala nyonso yina nge lenda sala samu na kusadisa bawu na kuvutuka na Yehova.​—1 Pi. 2:25.

18. Wa’ faso beto nyonso lenda sadisa bampangi yina kotaka madidi na kimpeve? (Baroma 12:10)

¹⁸ Wa’ faso beto nyonso na kati ya kimvuka lenda sadisa ba yina kotaka madidi mpe me landa lukutakanu yayi? Na kulakisaka bawu luzolo, ntima ya mbote mpe buzitu. Baroma 12:10 ke zonzaka: “Beno vwanda na luzolo beno na beno mutindu bampangi yina ke zolasanaka. Beno vwanda na nsatu ya kulutila ya kuzitisa bampangi beno na beno.” Beno zimbana ve ti bampangi yayi lenda vanda na mwa nsoni ya kuvutuka na balukutakanu. Ba lenda vanda na boma ti ba ke yamba ve bawu na faso ya mbote. e Na yawu, beto me lunga ve kuyufula bawu byuvu to kuzonzila bawu bamambu yina lenda nyongisa bawu. (1 Tes. 5:11) Bampangi yayi ke mpe Bambangi ya Yehova mpe beto ke na kilengi ya kukembila dyaka Yehova kintwadi na bawu.​—Nku. 119:176; Bis. 20:35.

19. Wapi bambote beto ke kuzwaka ntangu beto ke bambukaka moyo lufwa ya Yesu?

¹⁹ Beto ke na vutulaka matondo na Yesu na yina yandi zonzaka na beto na kubambuka moyo lufwa ya yandi bamvula nyonso, mpe beto me zaba samu na yinki ya ke mfunu. Kusala yawu, ke natinaka beto mosi mpe bampangi ya nkaka bambote mingi. (Iza. 48:17, 18) Ya ke kulisaka mpe luzolo ya beto samu na Yehova na Yesu. Beto ke lakisaka ti beto ke sepelaka na yina nyonso ba salaka samu na beto. Beto ke kulisaka kindiku ya beto na bampangi ya kimvuka. Beto lenda sadisa bantu ya nkaka mpe na kulongoka wa’ faso ba lenda sepela na bambote yina munkayulu ya Yesu ke nataka. Beto sala nyonso yina beto lenda sala samu na kuvanda ya kubongama na kilumbu ya kubambuka moyo yina ke kilumbu ya kulutila mfunu ya mvula.