DISOLO YA KULONGOKA 5
NZIMBU 108 Luzolo ya kukwikama ya Nzambi
Bambote samu Yehova ke zolaka beto
“Kristo Yesu kwizaka na yinza samu na kuvuukisa basumuki.”—1 TIM. 1:15.
NA BUNKUFI
Beto ke tala balusakumunu yina beto ke kuzwaka na nzila ya ntalu ya kufuta mpe faso beto lenda vutula Yehova matondo.
1. Yinki beto lenda sala samu na kusepelisa Yehova?
KANISA mwa fioti: Nge me pesa muntu mosi yina nge ke zolaka mingi dikabu ya kitoko mpe yina lenda sadisa yandi. Yinki ya ke sala nge na ntima kana muntu yango me baka dikabu mpe me sadila ve yawu? Ya ke sala nge mpasi mingi. Kasi yinki ya ke sala nge kana muntu yayi me sadila yawu mpe me vutula nge matondo? Ntembe ve, ya ke pesa nge kilengi mingi. Yinki kifwani yayi ke na lakisaka? Yehova me pesa Mwana ya yandi na kufwa samu na beto. Ntembe ve, ya ke salaka Yehova kilengi mingi ntangu beto ke vutulaka yandi matondo na dikabu ya kitoko yina yandi me pesa beto mpe na luzolo yina yandi me lakisa beto, na yina yandi me pesa Mwana ya yandi mutindu ntalu ya kufuta.—Yoa. 3:16; Rom. 5:7, 8.
2. Yinki beto ke zonzila na disolo yayi?
2 Samu ntangu ke na lutaka, ya lenda kumina beto na kutala dyaka ve mfunu ya ntalu ya kufuta. Kasi, kana ya kumina beto, ya ke vanda mutindu beto me tula dikabu ya kitoko yina Nzambi me pesa beto, na kisika yina beto lenda tala ve yawu to na kisika yina beto lenda kanisa ve na yawu. Samu ya kumina ve beto, beto me fwana kukanisaka ntangu nyonso na yina Nzambi na Kristo me sala samu na beto. Disolo yayi ke sadisa beto na kusala yawu. Na disolo yayi, beto ke zonzila bambote yina beto ke kuzwa bubu yayi na nzila ya ntalu ya kufuta mpe bambote yina beto ke kuzwa na bilumbu ya mantwala. Beto ke zonzila mpe mutindu beto lenda vutula Yehova matondo na luzolo ya yandi, mingi-mingi na kati ya balumingu tekila kilumbu ya kubambuka moyo lufwa ya Yesu mpe na manima ya yawu.
BAMBOTE YINA BETO KE KUZWAKA BUBU YAYI
3. Wapi yina ke mosi ya bambote beto ke kuzwaka bubu yayi na nzila ya ntalu ya kufuta?
3 Bubu yayi, beto ke na kuzwaka bambote ya munkayulu ya luzingu ya Yesu. Na kifwani, na nzila ya ntalu ya kufuta Yehova ke lemvokilaka masumu ya beto. Yehova ke lemvokilaka beto ata ti beto me lunga ve kuzwa mulemvo ya yandi. Samu na kuvutula Yehova matondo muntu mosi yina sonikaka Bankunga zonzaka: “Samu ti nge [Yehova], nge kele mbote. Nge ke lemvokila.”—Nku. 86:5; 103:3, 10-13.
4. Samu na banani Yehova pesaka ntalu ya kufuta? (Luke 5:32; 1 Timote 1:15)
4 Ba ya nkaka lenda tala ti ba me lunga ve na kuzwa mulemvo ya Yehova. Na kutala, beto nyonso me lunga ve na kuzwa mulemvo. Ntumwa Polo kwiza tala ti ya “lungaka ve ti ba bokila yandi ntumwa.” Kasi yandi bwelaka: “Samu na ntima ya kulutila mbote ya Nzambi, mu ke muntu yina mu kele.” (1 Ko. 15:9, 10) Na ntangu beto ke balulaka ntima mpe ke lombaka mulemvo ya masumu ya beto, Yehova ke lemvokilaka beto. Samu na yinki? Ya ke ve samu beto me lunga kuzwa mulemvo ya yandi, kasi ya ke samu yandi me zola beto. Kana makanisi ke na kwamisaka nge, mpe ke na nataka nge na kukanisa ti nge me lunga ve na kuzwa mulemvo ya Yehova, kuzimbana ve Yehova pesaka ve ntalu ya kufuta samu na bantu yina ke ve na masumu, kasi samu na basumuki yina me balula ntima.—Tanga Luke 5:32; 1 Timote 1:15.
5. Ya ke kwandi na muntu na kati ya beto yina me bonga kukanisa ti yandi me lunga kuzwa mulemvo ya Yehova? Zonzila yawu.
5 Muntu mosi ve na kati ya beto me bonga kukanisa ti yandi me lunga na kuzwa mulemvo ya Yehova, ata ti yandi me lutisa bamvula mingi na kisalu ya yandi. Ya zola zonza ve ti Yehova ke zimbanaka bamambu nyonso yina beto ke salaka samu na yandi. (Ebr. 6:10) Yandi pesaka beto Mwana ya yandi mutindu dikabu ya ofele, kasi ve mutindu difuta samu na bamambu ya mbote yina beto me sala samu na yandi. Na yawu, ya ke vanda yimbi na kukanisa ti beto me lunga kuzwa mulemvo ya Yehova samu beto me sala bamambu mingi ya mbote. Kana beto vanda na makanisi yayi, ya ke sosa kulakisa ti ya vandaka ve mfunu ti Yesu kufwa samu na beto.—Fwanisa na Bagalate 2:21.
6. Samu na yinki Polo pesaka bangolo ya yandi nyonso na kisalu ya Yehova?
6 Polo zabaka ti yandi lungaka ve na kuzwa mulemvo ya Nzambi. Kasi, samu na yinki yandi pesaka bangolo ya yandi nyonso na kisalu ya Yehova? Yandi pesaka bangolo ya yandi nyonso samu na kulakisa ti yandi vanda vutula Yehova matondo samu na ntima ya yandi ya mbote mpe mulemvo yina Yehova pesaka yandi. (Efe. 3:7) Mutindu Polo, beto ke sadilaka Yehova na tiya nyonso samu na kuvutula yandi matondo na yina yandi me sala samu beto, kasi ve samu beto kuzwa mulemvo.
7. Wapi yina ke bambote ya nkaka yina beto ke na kuzwaka na nzila ya ntalu ya kufuta? (Baroma 5:1; Zaki 2:23)
7 Kindiku ya ngolo na Yehova a ke mosi ya bambote ya nkaka yina beto ke kuzwaka bubu yayi na nzila ya ntalu ya kufuta. Kaka faso beto talaka yawu na disolo yina me luta, na ntangu beto butukaka beto vandaka ve na kindiku na Nzambi. Kasi samu na ntalu ya kufuta beto lenda kuzwa “kizunu na Nzambi” mpe kukuma pene-pene na yandi. Zaki 2:23, Ngwisani ya malu-malu, ke zonzaka: “Na yina, mambu yina ba sonikaka na dibuku ya Nzambi salamaka: ‘Abalami kwikilaka Nzambi, mpe Nzambi talaka yandi ya kudema samu na kiminu ya yandi,’ mpe ba bokila yandi ndiku ya Nzambi.”—Tanga Baroma 5:1.
8. Samu na yinki beto me bonga kuvutula Yehova matondo na bweso yina beto ke na yawu ya kusambila yandi?
8 Kusambila Yehova ke mosi ya bamambu ya mfunu yina lenda sala ti kindiku ya beto na Yehova kuma dyaka ngolo. Yehova ke waka ve kaka balusambu yina beto ke salaka na mantwala ya bantu mingi ntangu beto ke vukanaka. Kasi, yandi ke waka mpe balusambu yina mosi na mosi ya beto ke salaka ntangu yandi ke kaka yandi mosi. Lusambu ke pesaka beto kizunu na ntima mpe na makanisi. Kasi kaka ni yayi ve ke bambote yina beto ke kuzwaka na nzila ya lusambu. Lusambu ke kumisaka ngolo kindiku ya beto na Nzambi. (Nku. 65:2; Zaki 4:8; 1 Yoa. 5:14) Na ntangu Yesu vandaka awa na ntoto yandi vanda sambilaka mingi samu ti yandi zabaka ti Yehova ke kuwaka balusambu, mpe ti lusambu zola sadisa yandi na kusala ti kindiku ya yandi na Tata ya yandi vanda kaka ngolo. (Luke 5:16) Beto ke na kilengi mingi samu ti na nzila munkayulu ya Yesu, beto lenda vanda bandiku ya Yehova mpe kuzonzila yandi na lusambu!
BAMBOTE YINA BETO LENDA KUZWA NA MANTWALA
9. Wapi bambote bisadi ya Yehova ya kukwikama ke kuzwa na mantwala na nzila ya ntalu ya kufuta?
9 Wapi bambote bisadi ya Yehova ya kukwikama ke kuzwa na mantwala na nzila ya ntalu ya kufuta? Ba ke kuzwa luzingu ya ntangu nyonso. Bantu mingi ke kanisaka ti ya lenda salama ve, samu ti bantu me banda ve kufwa bubu yayi. Kasi dikanisi ya Yehova vandaka ti bantu zinga ntangu nyonso. Kana Adami sumukaka ve bantu zola sala ve ntembe ti muntu lenda zinga samu na ntangu nyonso. Ata ti ya ke mpasi na bantu na kundima ti muntu lenda zinga samu na ntangu nyonso, beto lenda vanda na kundima ti Yehova futaka ntalu ya nene samu ya salama. Ntalu ya nene yango ke ni luzingu ya Mwana ya yandi.—Rom. 8:32.
10. Na wapi kivuvu Bakristo yina ba tulaka mafuta mpe mameme ya nkaka ke yindulaka?
10 Ata ti luzingu ya ntangu nyonso ke kima yina beto ke kuzwa na bilumbu ya mantwala, Yehova zola ti beto kanisa na yawu bubu yayi. Bakristo yina ba tulaka mafuta ke yindulaka na luzingu ya kitoko yina ba ke vanda na yawu na ntangu ba ke yala ntoto kintwadi na Yesu. (Luz. 20:6) Mameme ya nkaka ke na kivuvu ya kuzinga na paradiso awa na ntoto, kisika yina mpasi mpe mawa ke vanda dyaka ve. (Luz. 21:3, 4) Nge ke na kati ya mameme ya nkaka yina ke na kivuvu ya kuzinga luzingu ya ntangu nyonso awa na ntoto? Ya zola zonza ve ti ba yina ke kuzwa luzingu ya ntangu nyonso awa na ntoto ke kuzwa difuta ya kulutila fioti. Yehova yidikaka beto samu beto zinga ntangu nyonso. Na yawu, luzingu ya ntangu nyonso awa na ntoto ke fulusa beto na kilengi.
11-12. Wapi bambote yina paradiso ke nata yina beto lenda sepela na yawu? (Tala mpe bizizi.)
11 Kanisa na wapi mutindu luzingu ya nge ke vanda na paradiso awa na ntoto. Nge ke vanda dyaka ve na manyongi na yina me tadila maladi mpe lufwa. (Iza. 25:8; 33:24) Yehova ke pesa nge bima nyonso ya mbote yina nge ke na yawu nsatu. Nge ke vanda kwandi na nsatu ya kulongoka bamambu mingi na yina me tadila bibulu? Nge ke kanisa kwandi na kulongoka kuyimba? Nge ke vanda kwandi na nsatu ya kulongoka kusala ba-dessin? Na paradiso beto ke vanda na nsatu ya bantu yina me zaba kisalu ya kutunga mpe ya ba yina zaba kusala bilanga. Bantu ke vanda mpe na nsatu ya kukunda mpe kubongisa madya, kuyidika bima samu na kusala bisalu yango, mpe kukipe yawu. (Iza. 35:1; 65:21) Na ntangu nge ke zinga ntangu nyonso nge ke vanda na ntangu ya kusala bamambu nyonso yayi mpe ya kulutila.
12 Ya ke vanda kilengi mingi na kuyamba ba yina ke vumbuka na lufwa! (Bis. 24:15) Kanisa mpe na kilengi yina beto ke vanda na yawu na kulongoka dyaka na yina me tadila Yehova na nzila ya bima mingi yina yandi yidikaka. (Nku. 104:24; Iza. 11:9) Kulutila nyonso yayi beto ke sala dyaka ve mambu ya yimbi! Na yawu, beto ke sadila Yehova na faso ya kulunga, mpe beto ke vanda dyaka ve na nsatu ya kulomba mulemvo ya masumu. Nge ke wombisa kwandi luzingu yina nge ke vanda na yawu na paradiso kaka samu na “kuzinga mwa ntangu na kati ya mikembo ya masumu”? (Ebr. 11:25, Ngwisani ya malu-malu.) Ya ke vanda ve mbote! Luzingu ya kitoko yina beto ke vanda na yawu na yinza ya malu-malu me lutila bima nyonso yina beto lenda kuzwa bubu yayi na yinza yayi. Kuzimbana ve ti paradiso ke vanda ve ntangu nyonso kivuvu yina beto ke vingila. Na ntangu ya ke lungana ya ke vanda kisika yina beto ke zinga samu na ntangu nyonso. Nyonso yayi ke lungana samu ti Yehova me zola beto, mpe me pesa Mwana ya yandi samu na kufwa samu na beto.
Wapi bambote yina beto ke kuzwa na paradiso yina nge ke na vingilaka mingi? (Tala baparagrafe 11-12)
VUTULA YEHOVA MATONDO SAMU NA LUZOLO YA YANDI
13. Wa’ faso beto lenda lakisa ti beto ke vutulaka Yehova matondo samu na luzolo ya yandi? (2 Bakorinto 6:1)
13 Wa’ faso beto lenda lakisa ti beto ke vutulaka Yehova matondo na yina yandi pesaka ntalu ya kufuta? Na kutulaka kisalu ya yandi na kisika ya ntete na luzingu ya beto. (Mat. 6:33) Beto zimbana ve ti Yesu kufwaka “samu ba yina ke na zingaka, zinga dyaka ve samu na bawu mosi kasi samu na muntu yina kufwaka samu na bawu mpe yina ba vumbulaka na lufwa.” (2 Ko. 5:15) Yehova me lakisa beto ntima ya kulutila mbote mpe me lemvokila beto. Kana beto sala nyonso yina beto lenda sala samu na kusadila yandi, beto ke lakisa ti beto ke bakulaka yina nyonso yandi me sala samu na beto mpe beto ke vutula yandi matondo.—Tanga 2 Bakorinto 6:1.
14. Wa’ faso beto lenda lakisa ti beto ke tulaka ntima na malongi yina Yehova ke pesaka beto?
14 Beto lenda lakisa mpe ti beto ke vutulaka matondo samu na luzolo ya Yehova na kutulaka ntima na yandi mpe na kulandaka malongi yina yandi ke pesaka beto. Wa’faso beto lenda sala yawu? Na ntangu beto ke vandaka na mukanu ya kubaka, ya lenda vanda na yina me tadila lekole yina beto ke sala to kisalu yina beto lenda ndima. Beto me fwana kutala yinki Yehova zola ti beto sala. (1 Ko. 10:31; 2 Ko. 5:7) Na ntangu beto ke tulaka ntima ya beto na Yehova samu na kubaka mikanu, kiminu ya beto na yandi mpe kindiku ya beto na yandi ke kumaka dyaka ngolo ya kulutila. Mpe ya ke sadisaka beto na kuvanda ata fioti ve na bantembe na kivuvu ya kuzinga ntangu nyonso.—Rom. 5:3-5; Zaki 2:21, 22.
15. Wa’ faso beto lenda lakisa ti beto ke vutulaka Yehova matondo na ntangu ya kubambuka moyo lufwa ya Yesu?
15 Ya ke dyaka na mambu ya nkaka yina beto lenda sala samu na kulakisa ti beto ke vutulaka matondo na luzolo ya Yehova. Beto ke sala nyonso yina beto lenda sala na kati ya balumingu tekila kilumbu ya kubambuka moyo mpe na manima, samu na kulakisa Yehova ti beto ke vutulaka yandi matondo na yina yandi pesaka beto ntalu ya kufuta. Beto ke kanisa ve kaka na kukwiza beto mosi na kilumbu ya kubambuka moyo lufwa ya Yesu, kasi beto ke bokila mpe bantu ya nkaka na kuvanda na beto. (1 Tim. 2:4) Zonzila na bantu yina nge ke bokila faso lukutakanu ya kubambuka moyo lufwa ya Yesu ke salama. Bavideo yina ke na jw.org, Samu na yinki Yesu kufwaka? mpe Bambuka lufwa ya Yesu, lenda sadisa nge. Nge lenda lakisa bawu yawu. Bakuluntu me bonga ve na kuzimbana na kubokila ba yina me kotaka madidi na kimpeve. Kanisa na kilengi yina ke vanda na mazulu mpe na ntoto kana mosi ya mameme ya Yehova yina zimbanaka vutuka! (Luke 15:4-7) Na kilumbu ya kubambuka moyo, beto suka ve kaka na kupesa mbote na ba yina beto zabasana. Kasi beto pesa mpe mbote na bantu ya malu-malu, mpe na ba yina me kwiza ve na balukutakanu na kati ya bantangu mingi. Beto zola ba tala ti beto me yamba bawu na faso ya mbote!—Rom. 12:13.
16. Samu na yinki beto me bonga kusala mingi na kisalu ya kusamuna na ntangu ya kubambuka moyo lufwa ya Yesu?
16 Na kati ya balumingu tekila kilumbu ya kubambuka moyo lufwa ya Yesu mpe na manima, nge lenda kanisa kwandi na kusala mingi samu na Yehova? Kusala yawu ke mutindu ya kulakisa ti beto ke vutulaka matondo na yina nyonso Nzambi mpe Kristo me sala samu na beto. Kana beto sala mingi na kisalu ya kusamuna, beto ke tala dyaka ya kulutila mutindu Yehova ke sadisaka beto mpe kiminu ya beto na yandi ke lutila kukuma ngolo. (1 Ko. 3:9) Dyaka, kuzimbana ve na kutanga baverse yina ba ke pesaka na kati ya balumingu ya kubambuka moyo lufwa ya Yesu yina ke na mukanda Longoka Biblia bilumbu nyonso to yina ke na kati ya mukanda ya lukutakanu Luzingu mpe kisalu ya beto ya bukristo. Na kulongoka ya Biblia ya nge mosi nge lenda sosa dyaka kuzaba mingi na yina me tadila baverse yayi.
17. Yinki ke sepelisaka Yehova? (Tala mpe encadré “ Bafaso beto lenda vutula Yehova matondo samu na luzolo ya yandi.”)
17 Ntangu ya nkaka bamambu mutindu maladi, bununu, kisalu to bamambu ya nkaka, lenda sala ti ya vanda mpasi na nge na kusadila makanisi nyonso yina ba me pesa na disolo yayi. Kuzimbana ve, Yehova ke fwanisaka ve yina nge ke pesaka na yina bantu ya nkaka ke pesaka, yandi ke talaka yina ke na kati ya ntima nge. Yehova ke na kilengi mingi ntangu yandi ke talaka mutindu nge ke vutulaka yandi matondo samu na dikabu ya kitoko yayi, ntalu ya kufuta.—1 Sa. 16:7; Mrk. 12:41-44.
18. Samu na yinki beto ke vutulaka Yehova na Yesu matondo?
18 Ya ke kaka ni na nzila ya ntalu ya kufuta beto ke kuzwa mulemvo ya masumu ya beto, kukuma ndiku ya Yehova mpe kuvanda na kivuvu ya luzingu ya ntangu nyonso. Bika ti beto vutula Yehova ntangu nyonso matondo samu na luzolo ya yandi, yina nataka yandi na kupesa beto balusakumunu nyonso yayi. (1 Yoa. 4:19) Bika beto lakisa mpe ti beto ke vutulaka Yesu matondo, samu yandi me zola beto mingi mpe yandi me pesa luzingu ya yandi samu na beto!—Yoa. 15:13.
NZIMBU 154 Luzolo ke manisaka ve
