1. Yinki bantu mingi ke na salaka bubu yayi?

 BUBU yayi, bantu me lutila kupesa nkembo na bawu mosi na kisika ya kupesa yawu na bampangi. Na kifwani, ba ke sadilaka internet samu na kupesa nkembo na bawu mosi mpe na bamambu yina ba ke lungisaka. Kasi, kaka bantu ndambu bubu yayi ke pesaka nkembo na Yehova Nzambi. Na disolo yayi, beto ke tala yinki zola zonza kupesa nkembo na Yehova mpe yinki ke nataka beto na kusala yawu. Beto ke tala mpe mutindu beto lenda pesa Yehova nkembo yina me fwanana mpe mutindu yandi mosi ke pesa nkembo na nkumbu ya yandi na bilumbu yina ke kwiza.

YINKI ZOLA ZONZA KUPESA YEHOVA NKEMBO?

 2. Wa’ faso Yehova lakisaka ngolo ya yandi na Mongo ya Sinayi? (Tala mpe kizizi.)

² Biblia ke lakisaka beto ti Yehova ke Nzambi ya kulutila nene. Mwa bilumbu na manima ya kubasisa dikanda ya Izraele na Ezipte, Yehova lakisaka bawu nkembo ya yandi. Kanisa na mambu yayi: Ba milions ya bantu ya Izraele vukanaka na Mongo ya Sinayi samu na kukutana na Nzambi ya bawu. Matuti ya ndombe fukaka kisika yina ba vandaka. Na mbala mosi, ntoto bandaka kuningana ngolo. Ya vandaka mpe na nsemo ya kidumu mpe kidumu vanda bula ngolo. (Bas. 19:16-18; 24:17; Nku. 68:8) Na ntangu dikanda ya Izraele talaka ngolo ya Yehova na bamambu yina yandi salaka, ba yitukaka.

 3. Yinki zola zonza kupesa nkembo na Yehova?

³ Bantu mpe lenda pesa nkembo na Yehova. Mosi ya bafaso ya kupesa nkembo na Yehova ni ntangu beto ke zonzilaka na bantu ngolo ya yandi mpe bifu ya yandi. Mpe ntangu beto ke pesaka yandi nkembo na bamambu nyonso yina yandi ke sadisaka beto na kusala. (Iza. 26:12) Mfumu Davidi ke mosi ya bifwani ya bantu yina pesaka Yehova nkembo. Na lusambu yina yandi salaka na mantwala ya bana ya Izraele, Davidi zonzaka na Nzambi: “[Yehova], bunene, lulendo, nsemo mpe nkembo kele ya nge. Ya tsyelika, nyonso yina kele na zulu mpe na ntoto, yawu kele ya nge.” Na manima ya lusambu ya yandi,  bantu nyonso vutulaka “matondo na [Yehova].”—1 Ns. 29:11, 20.

 4. Wa’ faso Yesu pesaka nkembo na Yehova?

⁴ Ntangu Yesu vandaka awa na ntoto, yandi pesaka nkembo na Tata ya yandi. Yandi zonzaka na bantu ti ni Yehova muntu pesaka yandi ngolo ya kusala bimangu. (Mrk. 5:18-20) Yesu pesaka mpe nkembo na Yehova na faso yandi vanda zonzilaka yandi na bantu ya nkaka mpe na mutindu yandi vanda bakilaka bantu ya nkaka. Kilumbu mosi, Yesu vanda longa na kati ya yinzo ya lusambu. Na kati ya bantu yina vanda kuwa yandi, ya vandaka na kento mosi yina mpeve ya yimbi pesaka kimbevo katuka bamvula 18. Mpeve ya yimbi yina salaka ti yandi vanda ya kukondama mpe vanda lenda ata fioti ve kutelama mbote-mbote. Yesu bakulaka yinki ya vanda sala yandi na ntima mpe vandaka na nsatu ya kusadisa yandi. Na yawu, yandi kwendaka pene-pene ya yandi mpe sololaka na yandi na ntima ya mbote nyonso. Yandi zonzaka: “Kento, nge me beluka na maladi ya nge.” Yesu tulaka maboko na zulu ya kento yango mpe na mbala mosi yandi telamaka mbote-mbote mpe bandaka “kukembila Nzambi.” Samu Yehova belusaka yandi, mambu yayi nataka kento yayi na kukembila Yehova! (Luke 13:10-13) Na yawu, ya ke kwandi na bamambu yina ke nataka beto na kukembila Yehova?

YINKI KE NATAKA BETO NA KUPESA YEHOVA NKEMBO?

 5. Wapi bamambu ke nataka beto na kuzitisa Yehova?

⁵ Beto ke pesaka nkembo na Yehova samu beto ke zitisaka yandi mingi. Beto ke na bamambu mingi yina ke nataka beto na kupesa Yehova buzitu. Na kifwani, Yehova ke muntu ya ngolo nyonso ya zola zonza ti ngolo ya yandi ke sukaka ve. (Nku. 96:4-7) Ndwenga ya yandi ke talanaka pwelele na bima yina yandi salaka. Yandi pesaka beto luzingu mpe bima nyonso yina beto ke na yawu nsatu samu na kuzinga. (Luz. 4:11) Yandi ke ya kukwikama. (Luz. 15:4) Nyonso yina yandi ke salaka ke simbaka, mpe bansilulu ya yandi ke lunganaka kaka. (Yoz. 23:14) Ni na yawu, mbikudi Yeremia zonzaka na yina me tadila Yehova: “Na bantu nyonso ya ndwenga yina kele na kati ya makanda ya bantu, mpe na kati ya bayinsi nyonso ya bintinu, ata mosi me fwanana na nge.” (Yer. 10:6, 7) Ya tsyeleka, beto ke na bamambu mingi yina ke na nataka beto na kuzitisa Tata ya beto ya mazulu. Kasi, beto me fwana kusuka ve kaka na kuzitisa yandi. Beto me lunga kuzola yandi.

 6. Samu na yinki beto ke zolaka Yehova?

⁶ Beto ke pesaka nkembo na Yehova samu beto ke zolaka yandi mingi. Beto ke zolaka Yehova samu ti yandi ke na bifu mingi ya kitoko. Na kifwani, yandi ke ya kufuluka na ntima ya kyadi mpe na mawa. (Nku. 103:13; Iza. 49:15) Ntangu beto ke vandaka na ntima ya kulwala ya ke salaka mpe Yehova mpasi. (Zak. 2:8) Yandi ke sadisaka beto na kuzaba nani yandi kele mpe na kukuma bandiku ya yandi. (Nku. 25:14; Bis. 17:27) Mpe yandi ke ya kukuluka, “yandi ke betamaka samu na kutala, mazulu na ntoto. Yandi ke telemisaka muntu yina me lemba na kati ya mfundu-mfundu.” (Nku. 113:6, 7) Bamambu nyonso yayi, ke ve na nataka nge na kupesaka nkembo na Nzambi ya beto ya nene!—Nku. 86:12.

 7. Wapi bweso ya nene yina beto ke na yawu?

⁷ Beto ke pesaka nkembo na Yehova samu beto zola ti bantu ya nkaka zaba yandi. Bantu mingi zaba ve matsyeleka na yina me tadila Yehova. Samu na yinki? Samu ti Satana me kumisa makanisi ya bawu mpimpa na kuzonzaka bamambu ya luvunu na yina me tadila Yehova. (2 Ko. 4:4) Satana ke nataka bantu na kundima ti Yehova ke Nzambi ya nkele, yandi ke kipeke ve beto mpe ni Yehova ke salaka ti bampasi vanda na yinza. Kasi, beto zaba matsyeleka na yina me tadila Nzambi ya beto. Beto ke na bweso ya kuzonzila na bantu ya nkaka mutindu ya Nzambi yandi kele mpe kusadisa bawu na kukembila yandi. (Iza. 43:10) Nkunga 96 ke zonzilaka mingi kupesa nkembo na Yehova. Na nzila ya nkunga yango beto ke longoka mutindu ya kupesa Yehova nkembo yina me fwanana.

 WA’ FASO BETO LENDA PESA YEHOVA NKEMBO YINA ME FWANANA?

 8. Wapi yina ke bafaso yina beto lenda kembila Yehova? (Nkunga 96:1-3)

⁸ Beto lenda pesa nkembo na Yehova na bamambu yina beto ke zonzaka na yina me tadila yandi. Nkunga 96:1-3 ke zonzaka: “Beno yimbidila [Yehova] nkunga ya malu-malu! Ntoto nyonso, beno yimbidila [Yehova]! Beno yimbidila [Yehova], beno sakumuna nkumbu ya yandi. Beno samuna konso kilumbu mambu ya yandi ya mbote yina ke vuukisaka! Beno mwangisa nsangu ya nkembo ya yandi na kati ya bayinsi. Beno zonzila mambu ya yandi ya ngitukulu na bantu nyonso!” Na baverse yayi, Yehova ke na bokilaka bantu na ‘kuyimbidila yandi,’ na ‘kusakumuna nkumbu ya yandi,’ na ‘kusamuna konso kilumbu mambu ya yandi ya mbote yina ke vuukisaka,’ mpe na ‘kumwangisa nsangu ya nkembo ya yandi na kati ya bayinsi.’ Nyonso yayi, ke bafaso ya kukembila Tata ya beto ya mazulu. Bazwife ya kukwikama mpe Bakristo ya siècle ya ntete vandaka ve na boma ya kuzonzila na bantu ya nkaka bamambu nyonso yina Yehova salaka samu na bawu mpe na kunwanina nkumbu ya yandi. (Dan. 3:16-18; Bis. 4:29) Wa’ faso beto lenda landa kifwani ya bawu?

9-10. Yinki nge me longoka na bamambu yina kuminaka Angelena? (Tala mpe kizizi.)

⁹ Angelena mpangi mosi ya kento yina ke vandaka na États-Unis, nwaninaka na bukindi nyonso nkumbu ya Yehova na mantwala ya bampangi ya yandi ya kisalu. Samu yandi vandaka muntu ya malu-malu na kisalu yina, ba bokila yandi na bantu yina bandaka ntama mingi ve na lukutakanu mosi. Kuna ba pesaka bawu bweso na kuzonzila bamambu na yina me tadila luzingu ya bawu. Angelena bongisaka mwa bafoto samu na kulakisa bawu kilengi yina ke na yandi ya kuvanda mbangi ya Yehova. Kasi tekila yandi zonza, mosi ya mpangi ya yandi ya kisalu zonzaka ti ba kulisaka yandi mutindu mbangi ya Yehova. Yandi bandaka kuzonzila bamambu ya yimbi na yina me tadila Bambangi ya Yehova mpe na yina ba ke kwikilaka. Angelena me zonza: “Ya pesaka munu boma mingi. Kasi mu vanda ndima ve bamambu ya luvunu yina ba vanda zonza na yina me tadila Yehova. Mu baka mukanu ya kuzonzila matsyeleka na yina me tadila yandi. Na yawu mu kanisaka: ‘Mu lenda vanda ve swi, me fwana kuzonza na bawu nani Yehova kele.’” a

¹⁰ Ntangu mpangi yango manisaka kuzonza, na mbangu nyonso Angelena salaka lusambu na kati ya ntima. Yandi zonzaka na yandi na ntima ya mbote nyonso: “Luzingu ya munu ke kaka mutindu mosi na luzingu ya nge. Mu mpe ba kulisaka munu mutindu mbangi ya Yehova, mpe tii bubu yayi mu ke na landaka kaka nzila yina.” Ya vanda  talana ti ba vanda ve na kilengi, kasi Angelena vanda kaka na kizunu. Yandi lakisaka na bampangi ya yandi ya kisalu bafoto yina yandi bakaka na bandiku yandi yina vandaka lakisa kilengi yina ba vandaka na yawu ya kusadila Yehova. Na buzitu nyonso, yandi zonzilaka bawu bamambu yina yandi ke kwikilaka. (1 Pi. 3:15) Yinki ya nataka? Ntangu Angelena manisaka kuzonza, bakala yango kumaka swi. Yandi zonzilaka mwa bamambu ya mbote yina yandi kutanaka na yawu ntangu yandi vandaka ntwenya na Bambangi ya Yehova. Angelena zonzaka: “Munu me fwana kunwanina Yehova samu ti ya ke bweso na kuzonzila matsyeleka na yina me tadila yandi.” Beto mpe ke na bweso ya kukumisa mpe kukembila Yehova ata ti bantu ke na sekaka yandi.

11. Wa’ faso bakristo ya tsyeleka ke landaka malongi yina ke na Nkunga 96:8?

¹¹ Beto lenda pesa nkembo na Yehova na bima ya beto ya ntalu. Nkunga 96:8 (NWT) ke zonzaka: “Beno pesa Yehova nkembo yina me fwanana na nkumbu ya yandi, beno nata dikabu mpe beno kota na bangaanda ya yandi.” Ni yawu bisadi ya Yehova ke salaka samu na kukembila yandi. (Bin. 3:9) Na kifwani, samu na kutunga tempelo mpe kukipe yawu bana ya Izraele pesaka mbongo mpe bima ya bawu ya ntalu. (2 Mf. 12:4, 5; 1 Ns. 29:3-9) Bilandi ya nkaka ya Yesu “pesaka bima ya bawu” samu Yesu na bantumwa ya yandi kuzwa yina ba vandaka na yawu nsatu. (Luke 8:1-3) Biblia ke zonzaka ti ntangu bakristo ya siècle ya ntete kutanaka na mambu ya nsatu, bampangi ya kento na ya bakala yina ke vandaka na bisika ya nkaka filisaka bawu mbongo. (Bis. 11:27-29) Bubu yayi mpe, beto ke kembilaka Yehova na nzila ya makabu yina beto ke pesaka.

12. Wa’ faso makabu yina beto ke pesaka ke nataka na kupesa nkembo na Yehova? (Tala mpe kizizi.)

¹² Beto tala mambu mosi yina ke na lakisaka mutindu makabu yina beto ke salaka ke pesaka nkembo na Yehova. Bansangu ya mvula 2020 vanda zonzila bamambu yina salamaka na bwala ya Zimbabwe. Samu na kati ya mwa bantangu bamvula vanda noka ve, bilanga vanda pesa ve. Luzingu ya bantu mingi na ya mpangi Prisca kumaka mpasi samu ti madya vandaka ve. Ata faso yina, mpangi Prisca bikaka ve kusamuna konso mercredi mpe vendredi, ata na ntangu yina ba ke kundaka bambuma. Bantu yina vanda kisika mosi na yandi vanda seka yandi samu ti yandi vanda kwenda samuna na kisika ya kusala bilanga. Ba vandaka zonza na yandi: “Nge ke kufwa na nsatu.” Prisca vandaka na kundima ti Yehova ke kipe yandi. Ni na yawu, yandi vanda zonzaka na bawu ti: “Yehova ke bikaka ata fioti ve bisadi ya yandi.” Ya bakaka ve ntangu mingi samu yandi kuzwaka madya na nzila ya kimvuka ya beto. Samu ti mosi na mosi ya beto ke pesaka makabu, ya salaka ti Prisca kuzwaka kima ya kudya na bima ya nkaka yina yandi  vandaka na yawu nsatu. Ya kamwisaka ba yina ke vandaka kisika mosi na yandi, mpe ba zonzaka: “Nzambi me bika ve nge, beto zola kulongoka mingi na yina me tadila yandi.” Mingi ya bantu yina vandaka kisika mosi na yandi bandaka kukwenda na balukutakanu.

13. Wa’ faso ndyatulu ya beto ke nataka na kupesa nkembo na Yehova? (Nkunga 96:9)

¹³ Beto lenda pesa nkembo na Yehova na ndyatulu ya beto. Nkunga 96:9 (NWT) ke zonzaka: “Beno [fukama] na ntadisi ya [Yehova], ntangu [busantu] ya yandi ke na kulezima, beno tekita na ntadisi ya yandi, beno bantu nyonso ya ntoto.” Banganga-nzambi vandaka na nsatu ya kuyobila mpe ya kuvanda na bunkete samu na kusala kisalu ya bawu na tempelo. (Bas. 40:30-32) Beto mpe me fwana kuvanda na bunkete, ya zola zonza ve kaka kuyobila. Kasi mpe kukima bamambu nyonso yina Yehova ke yiinaka. (Nku. 24:3, 4; 1 Pi. 1:15, 16) Beto me fwana kusala bangolo na kukatula “kimuntu ya ntama” yina ke mavanga mpe ndyatulu ya yimbi mpe kulwata “kimuntu ya malu-malu.” Ya zola zonza faso ya beto ya kukanisa mpe ndyatulu ya beto ke na lakisaka ti beto ke landa bifu ya mbote ya Yehova. (Kol. 3:9, 10) Na lubakusu ya Yehova, ata bantu yina salaka bamambu ya kulutila yimbi lenda soba mpe kulwata kimuntu ya malu-malu.

14. Yinki nge me longoka na disolo ya Jack? (Tala mpe kizizi.)

¹⁴ Beto tala mambu yina kuminaka Jack. Yandi vanda zolaka mambu ya ngolo mpe vanda pesaka bantu boma. Ni yina salaka ti ba pesa yandi nkumbu ya Démon. Samu na mambu ya yimbi yina yandi salaka, ba tulaka yandi na boloko samu na kufwa yandi. Ntangu Jack vanda vingila kilumbu yina ba ke kufwa yandi, mpangi mosi yina vanda kwendaka samuna na boloko zonzaka na yandi na kulongoka Biblia mpe Jack ndimaka mpe bandaka kulongoka Biblia na yandi. Ata ti yandi vandaka na boloko, yandi salaka bangolo samu na kubika kimuntu ya yandi ya ntama mpe na manima ya mwa ntangu, yandi kuzwaka mbotokolo mpe yandi kumaka mosi ya Bambangi ya Yehova. Jack sobaka mingi ndyatulu ya yandi. Ya salaka ti kilumbu yina ba kwiza baka yandi samu na kufwa yandi, ba yina vanda kengidila bawu vandaka na mansangasa na meso ba zonzaka na yandi na kukwenda mbote. Mpe soda mosi yina vanda sala na boloko zonzaka: “Jack vandaka muntu ya kulutila yimbi na kati ya boloko yayi. Awa yandi me kuma muntu ya mbote.” Lumingu yina landaka lufwa ya yandi, bampangi vutukaka na boloko samu na kusala lukutakanu ya lumingu. Ya kamwisaka bawu na kutala mosi ya ba yina ba kangaka na boloko samu na bamambu ya yimbi yina yandi  salaka, kukwizaka mbala ya ntete na lukutakanu. Samu na yinki yandi kwizaka? Yandi kwizaka samu ya kamwisaka yandi na kutala mutindu Jack sobaka ndyatulu ya yandi. Yandi vandaka na nsatu ya kuzaba yinki yandi zola sala samu na kusadila Yehova. Ya ke na lakisaka pwelele ti ndyatulu ya beto lenda nata bantu na kukembila Tata ya beto ya mazulu.—1 Pi. 2:12.

WA’ FASO YEHOVA KE PESA NKEMBO NA NKUMBU YA YANDI NA MANTWALA?

15. Na mantwala, wa’ faso Yehova ke pesa nkembo na nkumbu ya yandi? (Nkunga 96:10-13)

¹⁵ Nkunga 96:10-13 ke zonzaka: “Beno tuba na bayinsi: “[Yehova] kele ntinu, yinza kele ya kuvwanda mbote, ya lenda kubwa ve, [Yehova] ke fundisaka bantu na kusungama nyonso.” Bika ti mazulu kuyangalala, ntoto kuvwanda na nsayi ya kulutila! Bika ti mubu na nyonso yina ke na yawu kusala makelele. Bika ti bilanga na nyonso ke na yawu kuvanda na nsayi, bika ti bayinti nyonso ya mfinda kusala milolo ya nsayi, na ntadisi ya [Yehova], samu ti yandi ke na kwiza! Ya tsyelika, yandi ke na kwizaka samu na kufundisa yinza, yandi ke fundisa yinza na ludedomo nyonso, yandi ke fundisa bantu na kukwikama ya yandi.” Na verse ya nsuka ya Nkunga 96 ba ke na zonzilaka Yehova mutindu Mfumu mpe Zuzi ya lunungu. Na mantwala, wa’ faso Yehova ke pesa nkembo na nkumbu ya yandi? Yandi ke sala yawu na nzila ya balusambusu ya yandi. Ntangu fioti kaka me bikana Yehova ke mwangisa Babiloni ya nene samu ti mabuundu ya luvunu yayi ke na salaka bamambu ya yimbi mpe ke na longaka mambu ya luvunu na yina me tadila yandi. (Luz. 17:5, 16; 19:1, 2) Ntangu bantu ya nkaka ke tala kumwangana ya Babiloni ya nene, ba lenda baka mukanu ya kukwiza sadila Yehova kintwadi na beto. Na Armagedoni, Yehova ke mwangisa yinza ya Satana yayi, ke kufwa ba yina nyonso ke teleminaka yandi mpe ba yina ke zonzaka mambu ya yimbi na nkumbu ya yandi. Kasi yandi ke vuukisa ba yina ke zolaka yandi, ke tumamaka na yandi mpe ba yina ke kumisaka yandi. (Mrk. 8:38; 2 Tes. 1:6-10) Na kumeka ya nsuka yina ke salama na manima ya bamvula 1000 ya Kimfumu ya Yesu, Yehova ke sukula ya mbala mosi nkumbu ya yandi. (Luz. 20:7-10) Kaka na ntangu yina, “yinza nyonso ke fuluka na luzabu ya nkembo ya [Yehova] mutindu maza ke fulusaka mubu.”—Abak. 2:14.

16. Yinki nge me fwana kutatamana na kusala? (Tala mpe kizizi.)

¹⁶ Ya ke vanda kilengi mingi na kutala bantu nyonso kupesa Yehova nkembo yina me fwanana na nkumbu ya yandi! Tekila kilumbu yina kuma beto lenda sala bangolo na kukembila Nzambi ya beto kisika ni kisika beto kele. Kimvuka ya Bantwadisi me sola Nkunga 96:8 samu na dikanisi ya mvula ya 2025 yina ke sadisa beto na kuzimbana ve kiyeko ya mfunu yina beto ke na yawu ya “Kupesa Yehova nkembo yina me fwanana na nkumbu ya yandi.”