DISOLO YA KULONGOKA 4
NZIMBU 18 Matondo mingi na munkayulu ya Yesu
Yinki ntalu ya kufuta ke na longaka beto?
“Beno tala wapi mutindu Nzambi lakisaka luzolo ya yandi.”—1 YOA. 4:9, Ngwisani ya malu-malu.
NA BUNKUFI
Ntalu ya kufuta ke na longaka beto bifu ya kitoko yina Yehova na Yesu me lakisa.
1. Samu na yinki konso mvula ya ke mbote na beto na kuvanda na kilumbu ya kubambuka moyo lufwa ya Yesu?
NTEMBE ve, ntalu ya kufuta ke dikabu mosi ya kitoko yina Yehova pesaka beto. (2 Ko. 9:15) Samu ti Yesu pesaka luzingu yandi mutindu munkayulu, nge lenda vanda na kindiku ya ngolo na Nzambi mpe kivuvu ya kuzinga ntangu nyonso. Beto ke na bamambu mingi yina ke nataka beto na kuvutula matondo na Yehova yina pesaka ntalu ya kufuta. Samu ti yandi ke zolaka beto mingi. (Rom. 5:8) Yesu lombaka na beto na kuvanda na kilumbu ya kubambuka moyo lufwa ya yandi, samu na kusadisa beto na kuvutula ntangu nyonso matondo mpe na kuzimbana ata fioti ve yina Yehova na Yesu salaka samu na beto.—Luke 22:19, 20.
2. Yinki beto ke zonzila na disolo yayi?
2 Na mvula yayi, kilumbu ya kubambuka moyo lufwa ya Yesu ke vanda samedi 12 avril 2025. Ntembe ve, beto nyonso ke na vingilaka kilumbu yayi. Ya ke vanda mbote na mosi na mosi ya beto na kubaka ntangu na kati ya balumingu tekila kilumbu yayi mpe na manima samu na kukanisa mbote-mbote na yina Yehova na Yesu me sala samu na beto. Na disolo yayi, beto ke tala yinki ntalu ya kufuta ke na longaka beto na yina me tadila Yehova na Mwana ya yandi. Mpe disolo yina ke landa ke sadisa beto na kubakula faso beto ke kuzwa bambote na nzila ya ntalu ya kufuta mpe mutindu beto lenda vutula matondo samu na yawu.
YINA NTALU YA KUFUTA KE NA LONGAKA BETO NA YEHOVA
3. Wa’ faso lufwa ya muntu mosi lenda vuukisa bantu mingi? (Tala mpe kizizi.)
3 Ntalu ya kufuta ke longaka beto ti Yehova ke zolaka lunungu. (Det. 32:4) Na wapi mutindu? kanisa mwa fioti: Ntangu Adami tumamaka ve na Yehova yandi kumaka muntu ya masumu mpe kufwaka. Samu beto kele bana ya yandi, beto mpe kumaka bantu ya masumu mpe ke kufwaka. (Rom. 5:12) Samu na kuvuukisa beto na disumu mpe na lufwa Yehova filisaka Yesu samu na kupesa luzingu ya yandi mutindu ntalu ya kufuta. Kasi, wa’ faso lufwa ya muntu mosi ya kulunga lenda vuukisa bantu mingi na disumu mpe na lufwa? Ntumwa Polo zonzaka: “Mutindu bantu mingi kumaka bantu ya masumu na nzila ya kukondwa kutumama ya muntu mosi [Adami], mutindu mosi mpe bantu mingi ke kuma bantu ya lunungu na nzila ya kutumama ya muntu mosi [Yesu].” (Rom. 5:19; 1 Tim. 2:6) Polo ke na zonzaka ti bantu nyonso ke bantu ya masumu, ni yawu ke salaka ti ba kufwa samu ti muntu mosi ya kulunga tumamaka ve na Nzambi. Samu na kuvuukisa beto, muntu mosi ya kulunga kutumamaka na Nzambi.
Na nzila ya muntu mosi Adami beto nyonso byadilaka disumu na lufwa mpe na nzila ya muntu mosi Yesu beto ke vuuka na disumu mpe lufwa (Tala paragrafe 3)
4. Samu na yinki Yehova bikaka ve kwandi bana ya Adami yina tumamaka na yandi kuzinga ntangu nyonso?
4 Ya bongaka kwandi ti Yesu kufwa samu na kuvuukisa beto? Samu na yinki Yehova bikaka kwandi ve bana ya Adami yina tumamaka na yandi kuzinga ntangu nyonso? Samu beto ke bantu ya masumu beto lenda kanisa ti ya ke faso ya mbote ya kuyidika mambu yina Adami salaka. Kasi ya zola kwelana ve na lunungu ya Yehova. Samu ti ya zola talana mutindu Adami salaka ve disumu ya ngolo mpe ti bana ya yandi vandaka ve bantu ya masumu. Kasi ni yawu ve.
5. Samu na yinki beto lenda vanda na kundima ti Yehova ke sala ntangu nyonso mambu yina ke mbote?
5 Kana, Yehova pesaka ve ntalu ya kufuta mpe bikaka ti bana ya Adami zinga ntangu nyonso ata ti ba vandaka bantu ya masumu, yandi zola zitisa ve lunungu ya yandi. Na yawu, ya zola nata bantu na kukanisa ti Yehova lenda kanga dyaka meso mbala ya nkaka mpe kusala ve mambu yina yandi zonzaka ti yandi ke sala na mantwala. Kasi ya lenda salama ve, samu ti Yehova salaka mambu ya kulunga ata ti ya lombaka yandi na kupesa Mwana ya yandi mutindu munkayulu. Ya ke na nataka beto na kuvanda na kundima ti, yandi ke sala ntangu nyonso mambu yina ke ya kulunga.
6. Wapi kifu ya nkaka nataka Yehova na kufilisa Mwana ya yandi? (1 Yoane 4:9, 10)
6 Luzolo ke kifu ya nkaka yina nataka Yehova na kupesa Mwana ya yandi samu na beto. (Yoa. 3:16) 1 Yoane 4:9, 10 ke zonzaka: “Beno tala wapi mutindu Nzambi lakisaka beto luzolo ya yandi. Yandi fidisaka Mwana ya yandi kaka mosi na yinza, samu ti beto kuzwa luzingu na yandi. Luzolo kele mutindu yayi: Ya kele ve ti ni beto zolaka Nzambi. Kasi ni yandi zolaka beto mpe fidisaka Mwana ya yandi, samu ti yandi kufwa samu na kukatula masumu ya beto.” (Ngwisani ya malu-malu) Ntalu ya kufuta ke na longaka ve beto kaka ti, Yehova zola ti beto kuzwa luzingu ya ntangu nyonso kasi mpe beto kota na dikanda yandi. Ntangu Adami sumukaka, Yehova bingisaka yandi na kati ya dikanda ya yandi. Kubanda ntangu yina, bantu nyonso butukaka na ngaanda ya dikanda ya Nzambi. Kasi na nzila ya ntalu ya kufuta, Yehova ke lemvokila masumu mpe ke kotisa na kati ya dikanda yandi bantu nyonso yina ke lakisa kiminu mpe ke tumama na yandi. Bubu yayi, beto lenda vanda na kindiku ya ngolo na Yehova mpe na bampangi ya beto ya kento na ya bakala. Ntembe ve, Yehova ke zolaka beto mingi.—Rom. 5:10, 11.
7. Wapi mutindu bampasi yina Yesu kutanaka na yawu ke sadisaka beto na kubakula luzolo ya mingi yina Yehova ke na yawu samu na beto?
7 Beto lenda bakula luzolo yina Yehova ke na yawu na beto, kana beto kanisa na mpasi yina ya salaka yandi na kutala mpasi yina Mwana ya yandi kutanaka na yawu. Satana zonzaka ti ata kisadi ya Nzambi lenda bikana ya kukangama na yandi na kati ya bampasi. Yehova lakisaka ti Satana ke muntu ya luvunu ntangu yandi bikaka Yesu tala mpasi tekila yandi kufwa. (Yobi 2:1-5; 1 Pi. 2:21) Yehova talaka mutindu bantu vanda sombola Yesu, basoda vanda bula yandi, mpe na manima ba komaka yandi na yinti. Yehova talaka mutindu Mwana ya yandi kufwaka na faso mosi ya yimbi. (Mat. 27:28-31, 39) Yehova vandaka na ngolo ya kusala ti Mwana yandi kutana ve na bampasi yayi. Na kifwani, na ntangu bambeni zonzaka: “Bika Nzambi vuukisa yandi, kana yandi ke na nsatu ya yandi.” Yehova vandaka na ngolo ya kusala yawu. (Mat. 27:42, 43) Kana yandi salaka yawu, Yesu zola pesa ve luzingu ya yandi mutindu ntalu ya kufuta mpe beto zola vanda na ata kivuvu. Na yawu, Yehova bikaka ti Mwana ya yandi kanga ntima tii na lufwa.
8. Ya salaka kwandi Yehova mpasi na ntima, na kutala Mwana ya yandi kutala mpasi? Zonzila yawu. (Tala mpe kizizi.)
8 Beto me bonga kukanisa ve ti samu Yehova ke Nzambi ya ngolo nyonso ti yandi ke ve na kimuntu! Yehova salaka beto na makoki ya kulakisa bifu mutindu, luzolo mpe lunungu. Samu Biblia ke zonzaka ti yandi yidikaka beto na kifwani ya yandi, yandi mpe ke ‘nyongaka.’ (Nku. 78:40, 41) Kanisa mpe na disolo ya Abrahami na Izaki. Yehova lombaka na Abrahami na kupesa mwana ya yandi nkaka mosi na munkayulu. (Kub. 22:9-12; Ebr. 11:17-19) Beto lenda kanisa na yina ya salaka Abrahami na ntima na ntangu yandi vanda bongama na kufwa mwana yandi Izaki na mbele. Kanisa na kyadi ya mingi yina Yehova vandaka na yawu na ntima, ntangu yandi vanda tala bantu kutalisa Mwana ya yandi mpasi mpe na manima kufwa yandi!—Tala na jw.org video Landa kiminu ya bawu—Abrahami, Kitini 2.
Ya salaka Yehova mpasi na kutala Mwana ya yandi kutala mpasi (Tala paragrafe 8)
9. Yinki Baroma 8:32, 38, 39 ke na longaka nge na yina me tadila luzolo yina Yehova ke na yawu samu na nge mpe bampangi ya nge?
9 Ntalu ya kufuta ke na longaka beto ti, Yehova ke zolaka beto kulutila bantu ya dikanda ya beto to bandiku ya beto ya ntima. (Tanga Baroma 8:32, 38, 39.) Ntembe ve, luzolo yina Yehova ke na yawu samu na beto me lutila luzolo yina beto ke na yawu samu na beto mosi. Nge ke kwandi na nsatu na kuzinga ntangu nyonso? Nsatu ya nge ya kuzinga ntangu nyonso me lutila ve yina Yehova ke na yawu samu na nge. Nge ke kwandi na nsatu ti Yehova lemvokila masumu ya nge? Nsatu ya nge me lutila ve yina Yehova ke na yawu samu na nge. Yina nyonso Yehova zola ti nge sala ke kundima dikabu ya kitoko yina yandi me pesa, kulakisa kiminu na yandi mpe kutumama na yandi. Ntalu ya kufuta ke dikabu ya kitoko yina ke lakisaka luzolo ya kulutila yina Yehova ke na yawu samu na beto. Mpe na yinza ya malu-malu beto ke longoka bamambu mingi ya kulutila na yina me tadila luzolo ya Yehova.—Ekl. 3:11.
YINA NTALU YA KUFUTA KE NA LONGAKA BETO NA YESU
10. a) Samu na yinki Yesu vandaka na mawa na yina me tadila lufwa ya yandi? b) Wa’ faso Yesu lakisaka ti Yehova ke zonzaka matsyeleka? (Tala mpe encadré “ Kukangama ya Yesu na Yehova lakisaka ti Satana ke muntu ya luvunu.”)
10 Yesu ke tulaka dikebi na mambu yina bantu ke kanisaka na yina me tadila Tata ya yandi. (Yoa. 14:31) Yesu vandaka na mawa mingi na kuwa makanisi ya yimbi yina bantu vandaka na yawu na Tata yandi. Samu ba vanda kanisa ti Yesu bongaka kufwa samu yandi fingaka Nzambi. Ni na yawu, yandi sambilaka: “Tata ya munu, kana ya lenda salama, nata kopo yayi ntama na munu.” (Mat. 26:39) Kasi, samu ti Yesu bikanaka ya kukangama na Yehova tii na lufwa, yandi lakisa ti mambu yina Satana zonzaka na yina me tadila Tata yandi vandaka luvunu.
11. Wa’ faso Yesu lakisaka ti yandi ke zolaka mingi bantu? (Yoane 13:1)
11 Ntalu ya kufuta ke na longaka mpe beto ti bantu ke mfunu mingi na meso ya Yesu, mingi-mingi bilandi ya Yesu. (Bin. 8:31; tanga Yoane 13:1.) Na kifwani, Yesu zabaka ti bamambu ya nkaka yina yandi zolaka kwiza sala na zulu ya ntoto zola vanda mpasi mingi, mingi-mingi lufwa ya mpasi yina yandi zolaka kutana na yawu. Yesu salaka ve bamambu nyonso ya mpasi yayi kaka samu Yehova lombaka na yandi na kusala yawu. Kasi, yandi salaka yawu samu yandi ke zolaka bantu. Ni na yawu, Yesu tulaka ntima ya yandi nyonso na kusamuna, kulonga mpe kusala samu na mpangi. Ata na kilumbu ya lufwa ya yandi, Yesu bakaka ntangu ya kusukula makulu ya bantumwa ya yandi. Yandi pesaka bawu bukindi mpe longaka bawu. (Yoa. 13:12-15) Na manima, ntangu Yesu vandaka na zulu ya yinti ya mpasi yandi baka mwa ntangu ya kupesa kivuvu na kimpumbulu yina vandaka na lweka yandi. (Luke 23:42, 43; Yoa. 19:26, 27) Mpe yandi yidikaka bamambu samu kilandi yandi mosi kipe mama ya yandi. Yesu lakisaka ve kaka luzolo na ntangu yandi vanda kufwa. Kasi, yandi salaka yawu luzingu yandi nyonso.
12. Wa’ faso Yesu ke na sadisaka beto bubu yayi?
12 Ya tsyeleka Yesu kufwaka “mbala mosi.” Kasi tii bubu yayi, yandi ke kaka na salaka bamambu mingi samu na beto. (Rom. 6:10) Samu na yinki beto lenda zonza yawu? Samu ti yandi ke na tatamana na kusala samu beto kuzwa bima ya mbote bubu yayi na nzila ya ntalu ya kufuta. Beto zonzila bamambu yina yandi ke na salaka. Yandi ke na yalaka mutindu Mfumu, nganga-nzambi ya nene, mpe mutindu Mfumu ya dibuundu. (1 Ko. 15:25; Efe. 5:23; Ebr. 2:17) Yandi ke na salaka kisalu ya kuvukisa ba yina ba tulaka mafuta mpe nkonga ya nene ya bantu. Kisalu yayi, ke manisa tekila mpasi ya nene manisa. (Mat. 25:32; Mrk. 13:27) Na bantangu ya nsuka yayi, yandi ke mpe na salaka nyonso samu na kusadisa bisadi ya yandi na kuzwa madya ya mbote na kimpeve. (Mat. 24:45) Mpe na kati ya bamvula 1 000 ya luyalu ya yandi, yandi ke bika ve na kusadisa beto. Ya tsyeleka, Yehova pesaka Mwana ya yandi samu na beto! a
KUBIKA VE NA KULONGOKA
13. Wa’ faso kuyindula lenda sadisa beto na kulongoka dyaka mingi na yina me tadila luzolo yina Yehova na Yesu ke na yawu samu na beto?
13 Nge lenda sosa kuzaba dyaka mingi ya kulutila na yina me tadila luzolo yina Yehova na Yesu ke na yawu samu na beto, kana nge bika ve kuyindula na yawu. Na kati ya balumingu ya kubambuka moyo lufwa ya Yesu mpe na manima, nge lenda tanga mbote-mbote babuku ya Matayi, Marke, luke na Yoane. Kutanga ve bikapu mingi na mbala mosi. Kasi, kwenda malembe-malembe mpe sosa bamambu ya nkaka yina ke sadisa nge na kuzaba samu na yinki nge me bonga kuzola Yehova mpe Yesu. Mpe sala nyonso samu na kukabula bamambu yina nge ke longokaka na bantu ya nkaka.
14. Wa’ faso kusosa na mikanda ya beto lenda sadisa beto na kulongoka dyaka mingi na yina me tadila ntalu ya kufuta mpe malongi ya nkaka? (Nkunga 119:97) (Tala mpe kizizi.)
14 Kana ya me sala bamvula mingi banda ntangu ke kuzwaka mbotokolo, nge lenda yufula kana ya ke na bamambu ya malu-malu yina nge lenda longoka na yina me tadila lunungu ya Nzambi, luzolo ya yandi mpe ntalu ya kufuta. Mambu ya tsyeleka ke ti beto ke vanda kaka na mingi ya kulongoka na yina me tadila bamambu yayi mpe ya nkaka. Na yawu, yinki nge lenda sala? Tanga mpe longoka bamambu ya Biblia yina ke na kati ya mikanda ya beto. Kana, nge me kutana na verse yina nge ke na bakulaka ve mbote-mbote sosa na mikanda ya beto. Na manima, na kati ya kilumbu yindula na bamambu yina nge me kuzwa mpe yinki ya ke na longaka nge na yina me tadila Yehova, Mwana ya yandi mpe luzolo yina ba ke na yawu samu na nge. Nkunga 119:97 (NWT) ke zonzaka: “Mu ke zolaka mingi musiku ya nge. Bilumbu nyonso mu ke yindulaka yawu konso ntangu.”
Ata ti ya me sala bamvula mingi banda ntangu yina beto kuzwaka mbotokolo, beto lenda longoka dyaka mingi na yina me tadila ntalu ya kufuta (Tala paragrafe 14)
15. Samu na yinki ya ke mfunu na kutatamana na kusosa bamambu ya malu-malu ntangu beto ke tangaka Biblia?
15 Kulemba ve, kana nge ke ve na kuzwaka bamambu ya malu-malu yina ke simba ntima ya nge, na ntangu nge ke na tangaka to ke na sosaka na mikanda ya beto. Sala mutindu nge ke na sosaka wolo. Bantu yina ke sosaka wolo ke na ntima ya yinda samu ti, ba ke lutisaka bangunga mingi to bilumbu tekila ba kuzwa mwa ditadi ya fioti ya wolo. Ba ke salaka bangolo nyonso yayi samu ti ata ditadi ya fioti ya wolo ke mfunu mingi na meso ya bawu. Ntembe ve, bamambu ya malu-malu yina beto ke kuzwaka na Biblia me lutila wolo! (Nku. 119:127; Bin. 8:10) Na yawu, tatamana na kutanga Biblia mpe na kusosa bamambu ya malu-malu ntangu nge ke longokaka.—Nku. 1:2.
16. Wapi mutindu beto lenda landa kifwani ya Yehova na Yesu?
16 Ntangu nge ke na longokaka sosa bafaso yina nge lenda sadila bamambu yina nge ke na longokaka. Landa kifwani ya lunungu ya Yehova na kubakilaka mpangi na faso ya mbote. Landa kifwani ya luzolo yina Yesu ke na yawu samu na Tata yandi mpe samu na bampangi. Sala na luzolo nyonso bamambu yina Yehova ke zolaka, mpe sadisa bampangi ata na ntangu yina ya lenda vanda mpasi na nge na kusala yawu. Mpe landa kifwani ya Yesu na kusamunaka na bantu ya nkaka samu bawu mpe kuzwa bweso ya kundima dikabu ya mfunu yina Yehova me pesa.
17. Yinki beto ke zonzila na disolo yina ke landa?
17 Ntangu beto ke tatamanaka na kulongoka na yina me tadila ntalu ya kufuta, luzolo yina beto ke yawu samu na Yehova na Yesu ke kulaka. Mpe samu beto ke zolaka bawu, bawu mpe ke zola beto ya kulutila. (Yoa. 14:21; Zaki 4:8) Bika ti beto sadila mbote-mbote bima nyonso yina Yehova me pesa beto samu na kutatamana na kulongoka na yina me tadila ntalu ya kufuta. Na disolo yina ke landa beto ke longoka bamambu ya nkaka ya kitoko to balusakumunu ya nkaka yina beto ke na yawu samu Yesu kufwaka samu na beto mpe mutindu beto lenda lakisa ti beto ke vutulaka bawu matondo.
NZIMBU 107 Beto zola mutindu Yehova
a Kuvukisa ya “bima yina ke na mazulu” yina Polo ke zonzilaka na Baefeze 1:10, ke ve kuvukisa ya “bima yina ke na mazulu” yina Yesu ke zonzilaka na Matayi 24:31 mpe na Marke 13:27. Polo ke zonzilaka ntangu yina Yehova ke soola bantu yina ke yala na Yesu na zulu. Kasi, Yesu ke zonzilaka ntangu yina bantu yina ba tulaka mafuta yina bikanaka awa ntoto ke vukana na mazulu na ntangu ya mpasi ya nene.
