ARTIKLE YA KULONGOKA 30
Kulemba ve na kutambula na kati ya matsyeleka
“Mu ke ve na kilengi ya kulutila yayi: kuwa ti bana ya munu ke na tambulá na kati ya matsyeleka.”—3 YOA. 4.
NZIMBU 54 “ C’est ici le chemin ”
YINA BETO KE LONGOKA *
1. Faso me zonza 3 Yoane 3, 4, yinki ke salá ti beto vanda na kilengi?
KANISA ntete na kilengi yina vandá na apotre Yoane ntangu yandi kuwá ti, ba yina nyonso yandi sadisá na kuzaba matsyeleka, vandá kontinye kusadila Yehova! Ba vandá kutana na bamambu mingi ya mpasi, mpe Yoane vandá sala bangolo mingi samu na kutunga kiminu ya bakristo yina yandi vandá bakila faso bana ya yandi ya kimpeve. Faso mosi mpe, beto ke vandá na kilengi ntangu bana yina beto me buta to ya kimpeve ke pesá luzingu ya bawu na Yehova, mpe ke kontinyeke na kusadila yandi.—Tanga 3 Yoane 3, 4.
2. Samu na yinki Yoane soniká mikanda tatu?
2 Na mvula 98 N.B., ya lenda vanda ti Yoane vandá zinga na Efeze to pene-pene na Efeze. Ntangu ya nkaka, yandi kwendá vanda kuna na manima ya kubasika na boloko yina yandi salá na île ya Patmos. Kaka na kati ya bantangu yina, mpeve ya Yehova natak’ yandi na kusonika mikanda tatu. Yandi soniká mikanda yayi samu na kunata bakristo na kubumba kiminu ya bawu na Yesu, mpe na kulemba ve na kutambula na kati ya matsyeleka.
3. Na wapi byuvu beto ke kuzwa bamvutu?
3 Yoane vandá apotre ya nsuka yina vandá ntete na luzingu, mpe ya vandá sala yandi mpasi na kutala ti, malongi ya luvunu bandá kukota na kati ya kimvuka. * (1 Yoa. 2:18, 19, 26) Ba-aposta vandá zonza ti ba zaba Nzambi, kasi ba vandá landa ve misiku ya yandi. Beto zonzila malongi yina Yoane pesaka. Ntangu beto ke na zonzilak’ yawu, beto sosa mpe bamvutu na byuvu tatu yayi: Yinki zola zonza kutambula na kati ya matsyeleka? Yinki lenda kanga beto nzila samu beto tambula dyaka ve na kati ya matsyeleka? Mpe wa’ faso beto lenda sadisa bampangi na kukangama na matsyeleka?
YINKI ZOLA ZONZA KUTAMBULA NA KATI YA MATSYELEKA?
4. Faso ke na zonzilá 1 Yoane 2:3-6 mpe 2 Yoane 4, 6, yinki beto ke na yawu nsatu samu na kutambula na kati ya matsyeleka?
4 Samu na kulenda kutambula na kati ya matsyeleka, beto ke na nsatu ya kuzaba matsyeleka yina ke na kati ya Biblia. Dyaka, beto zolá “sadila misiku ya [Yehova]”, ya zola zonza kuzitisa yawu. (Tanga 1 Yoane 2:3-6; 2 Yoane 4, 6.) Yesu biká kifwani ya kulunga na faso yina beto zolá landa misiku ya Yehova. Na yina, faso ya mbote ya kusadila misiku ya Yehova, ke ni ya kulanda mbote-mbote kifwani ya Yesu.—Yoa. 8:29; 1 Pi. 2:21.
5. Yinki beto zolá ndima?
5 Samu na kukontinye na kutambula na kati ya matsyeleka, beto zolá ndima ti Yehova ke Nzambi ya matsyeleka, mpe mambu nyonso yina yandi ke zonzá na beto na nzila ya Biblia, ke matsyeleka. Beto zolá ndima mpe ti, Yesu ke Masiya yina Yehova salá promese. Bubu yayi, bantu mingi ke ndimá ve ti, Yehova solá Yesu faso Mfumu ya Kimfumu ya yandi. Yoane zonzá ti ya ke na “[bantu] ya luvunu,” yina lenda puse ba yina ke ve ya kuyidama samu na kunwanina matsyeleka yina ke zonzilá Yehova na Yesu, na kusala faso bawu. (2 Yoa. 7-11) Yoane soniká: “Nani ke muntu ya luvunu? Ya ke muntu yina ke [zonzá] ti Yesu ke ve Kristo.” (1 Yoa. 2:22) Samu na kulanda ve mambu ya luvunu, beto zolá longoka Biblia. Ya lenda sadisa beto na kuzaba Yehova na Yesu. (Yoa. 17:3) Mpe kaka ni yawu ke sadisa beto na kundima ti beto ke na matsyeleka.
YINKI LENDA KANGA BETO NZILA SAMU BETO TAMBULA DYAKA VE NA KATI YA MATSYELEKA?
6. Wapi mambu ntwenya mosi ya temwe ya Yehova kutaná na yawu?
6 Bakristo nyonso zolá sala keba na kulanda ve malongi ya yinza. (1 Yoa. 2:26) Bakristo ya bantwenya zolá sala mingi keba na malongi yina. Alexia, * ntwenya ya bamvula 25 yina ke vandá na France me zonza: “Ntangu mu vandá na lekole, mu longoká malongi yina ke zonzá ti Nzambi kele ve (évolution) mpe malongi ya nkaka ya yinza. Ya natá munu na kusala ntembe na matsyeleka. Malembe-malembe, mu bandá kutala ti malongi yango ke mbote. Mu kwizá tala ti, ya ke ve mbote na kusosa kuzaba mambu yina Biblia ke zonzá, kasi kuwa kaka mambu yina baprofesere ya munu vandá zonza.” Alexia longoká buku La vie: comment est-elle apparue? Évolution ou création? Na manima ya mwa balumingu, ntembe ya yandi manisaka. Alexia me zonza: “Mu longoká mbote-mbote Biblia, ni yina natá munu na kundima ti, ya ke matsyeleka. Mu kwizá zaba mpe ti kulanda misiku ya Nzambi na luzingu, ke pesa munu kilengi mpe kizunu.”
7. Na yinki beto zolá sala keba, mpe samu na yinki?
7 Bakristo nyonso, ya vanda bantwenya to ba yina ke ya kukula, zolá lakisa ve na meso ya bantu ti ba ke sadilá Yehova, mpe na manima, ba ke salá mambu ya yimbi. Yoane zonzá pwelele ti, beto lenda tambula ve na kati ya matsyeleka si beto ke salá kinsunza. (1 Yoa. 1:6) Si beto zola Yehova sepela na beto, ntangu nyonso beto zolá zimbana ve ti yandi ke talá mambu nyonso yina beto ke salaka. Ata bantu ke talá ve mambu yina beto ke salá na mansweki, Yehova lenda tala nyonso yina beto ke salaka.—Ebr. 4:13.
8. Yinki beto me bonga kulosa?
8 Beto zolá losa faso ya yinza ya kutadila disumu. Apotre Yoane soniká: “Si beto zonza ti, ‘Beto ke ve na disumu,’ beto ke na vuná banzutu ya beto mosi.” (1 Yoa. 1:8) Na ntangu ya Yoane, ba-aposta vandá zonzá ti muntu lenda vanda kaka ndiku ya Nzambi, ata yandi ke na salá mambu yina Nzambi ke niminaka. Bubu yayi beto ke na zingá na bantu yina ke kanisá mpe faso yina. Mingi ke zonzá ti ba ke kwikilá na Nzambi, kasi, ba ke mangá faso ya Nzambi ya kutadila disumu, mingi-mingi ntangu ya ke vandá mambu ya kuvukisa nzutu. Ya ke na bafaso ya kuvukisa nzutu yina Nzambi niminá, kasi bantu ke zonzá ti, ya ke ya yawu ve yimbi, muntu lenda sala yina yandi zola kusala.
Bantwenya, beno sosa kuzaba samu na yinki Yehova ke zonzá ti mambu yayi ke yimbi to ve. Ni kuna nge ke vanda na ngolo ya kuzonza samu na yinki nge me sola kusala ve mambu ya yimbi (Tala paragrafe 9) *
9. Samu na yinki ya ke mbote na bantwenya na kusala mambu yina Biblia ke zonzaka?
9 Ya ke vandá mpasi mingi na bantwenya ya bakristo na kukontinye kutala mambu ya kuvukisa nzutu faso Biblia ke zonzak’ yawu, samu ti bandiku ya kisalu to bandiku ya lekole ke sosá kunata bawu na kuchange faso ya bawu ya kutala mambu ya kuvukisa nzutu. Ni mambu yayi kuminá Aleksandar. Yandi me zonza: “Bana ya nkaka ya kento na lekole, vandá sosa kupuse munu na kuvukisa nzutu na bawu. Ba vandá zonzá ti, samu mu vandá manga kubasika na bawu, mu vandá muntu yina ke basiká na bampangi bakala (homosexuelle).” Mambu ya faso yayi lenda kumina mpe nge. Kasi, si nge sadila mambu yina Biblia ke zonzá, nge ke pesa nzutu ya nge buzitu, nge ke bumba sante ya nge, nge ke vanda ve na basusi, mpe nge ke bumba kindiku ya nge na Yehova. Si ntangu nyonso nge sala bangolo samu na kusala ve mambu ya yimbi, ya ke vanda ve mpasi na nge na kusala mambu ya mbote. Kuzimbana ve, faso ya yinza ya kutadila mambu ya kuvukisa nzutu me katuka na Satan. Na yina, ntangu nge ke mangá kukanisa faso bantu ya yinza, nge ke ‘nungá mfumu ya [mambu] ya yimbi.’—1 Yoa. 2:14.
10. Wa’ faso 1 Yoane 1:9 ke na sadisá beto na kusadila Yehova na kizunu na ntima?
10 Beto ke ndimá ti ni Yehova muntu me lunga kuzonza na beto yinki ke disumu. Mpe beto ke salá bangolo samu na kubwa ve na disumu. Kasi ntangu beto ke salá disumu, beto ke zonzilak’ yawu na Yehova na lusambu. (Tanga 1 Yoane 1:9.) Mpe si beto kubwa na disumu ya nene, beto ke sosa bakuluntu ya kimvuka sadisa beto, samu ti ni Yehova muntu tulá bawu kuna samu na kukipe beto. (Zaki 5:14-16) Kasi, beto zolá kontinye ve na kukanisa na masumu yina beto salá na ntama. Samu na yinki? Samu ti Tata ya beto ya luzolo, pesá mwana ya yandi faso munkayulu, samu beto kuzwa mulemvo ya masumu ya beto. Yehova zonzá ti, yandi ke lemvokila ba yina ke nyonga masumu ya bawu na ntima nyonso. Na yina, ata kima lenda kanga beto nzila ya kusadila Yehova na ntima ya kizunu.—1 Yoa. 2:1, 2, 12; 3:19, 20.
11. Wa’ faso beto lenda bumba makanisi ya beto samu malongi ya luvunu lembisa ve kiminu ya beto?
11 Beto zolá losa malongi ya ba-aposta. Satan ke sosá ntangu nyonso kulembisa kiminu ya bakristo. Na yawu, beto zolá vanda na mayela ya kuzaba yinki ke matsyeleka mpe yinki ke luvunu. * Ba-enemi ya beto lenda sadila internet na ba-site ya yawu, samu na kusosa kulembisa kiminu ya beto na Nzambi mpe luzolo ya beto samu na bampangi. Kutula ve ntima na mambu ya luvunu yina, ya me katuka na Satan!—1 Yoa. 4:1, 6; Luz. 12:9.
12. Samu na yinki beto zolá kumisa kiminu ya beto ngolo na matsyeleka yina beto longokaka?
12 Samu na kubika ve Satan lembisa kiminu ya beto, beto zolá tula ntima ya beto nyonso na Yesu, mpe kundima ti Yehova sadilak’ yandi samu na kulungisa dikanisi ya yandi. Dyaka, beto zolá tula ntima na ba yina Yehova ke na sadilá bubu yayi samu na kutwadisa kimvuka ya yandi. (Mat. 24:45-47) Kifu ya kutanga Biblia ntangu nyonso, ke kulisa kiminu ya beto. Na yina, kiminu ya beto ke vanda nete yinti yina barasine me kwendá ntama na yisi ya ntoto. Paul mpe zonzá mambu ya faso yayi ntangu yandi soniká na kimvuka ya bakolose. Yandi zonzá: “Yawu yina, faso beno me ndima Mfumu Kristo Yesu, beno kontinye na kutambula na bumosi na yandi, beno tula [barasine] ya ngolo na yandi, beno tungama na yandi, mpe beno vanda na kiminu ya ngolo.” (Kol. 2:6, 7) Si beto sala bangolo samu na kukumisa kiminu ya beto ngolo, Satan na yinza ya yandi ke lenda ve kunata beto na kubika matsyeleka.—2 Yoa. 8, 9.
13. Yinki beto zolá zimbana ve, mpe samu na yinki?
13 Beto zolá zimbana ve ti, yinza ke yiiná beto. (1 Yoa. 3:13) Yoane zonzá na beto ti “yinza nyonso ke na lutumu ya mfumu ya yimbi.” (1 Yoa. 5:19) Yinza yayi me kuma pene-pene na lufwa, mpe Satan ke na kumá dyaka na nkele ya kulutila. (Luz. 12:12) Yandi ke sadilá ve kaka bunsunza mpe luvunu ya ba-aposta, kasi yandi ke sadilá mpe bankwamusu ya ngolo. Satan zaba ti kaka ntangu fioti me bikana na yandi, na yawu, yandi ke na salá nyonso samu na kukanga kisalu ya predikasion mpe kulembisa kiminu ya beto. Ya ke pamusá ve beto ntangu babwala mingi ke niminá kisalu ya predikasion. Ata faso yina, ya ke lembisá ve bampangi ya beto ya kento na ya bakala yina ke vandá na babwala yango. Kima ni kima yina Satan ke sala na bisadi ya Yehova, ba ke kangama kaka na Yehova!
BETO SADISA BAMPANGI NA KUKANGAMA NA MATSYELEKA
14. Na wa’ faso beto lenda sadisa bampangi ya beto na kubumba kiminu?
14 Samu na kusadisa bampangi ya beto na kubumba kiminu, beto zolá lakisa bawu ntima yina ke talá kyadi ya bampangi. (1 Yoa. 3:10, 11, 16-18) Na ntangu ya mbote mpe na ntangu ya mpasi, beto zolá lakisa luzolo na bampangi. Na kifwani, nge me zaba kwandi mpangi yina me fwidila muntu yina yandi vandá zolá, mpe ke na nsatu ba pesa yandi ngolo to ba sadisa yandi na bafaso mingi? Nge me zaba kwandi bampangi yina mipepe to bamvula ya ngolo me nata bima ya bawu to me bebisa yawu, mpe yina ke na nsatu ba sadisa bawu na kuyidika bayinzo to ba-salle du Royaume ya bawu? Beto ke lakisá luzolo mpe ntima ya kyadi na bampangi, ve kaka na mambu yina beto ke zonzá, kasi, na bamambu yina beto ke salá samu na bawu.
15. Faso me zonza 1 Yoane 4:7, 8, yinki beto zolá sala?
15 Beto ke landá kifwani ya Tata ya beto ya mazulu ntangu beto ke lakisá luzolo na kati ya beto. (Tanga 1 Yoane 4:7, 8.) Faso mosi ya mbote ya kulakisa luzolo ke ni na kulemvokilá bampangi. Na kifwani, mpangi yina me lwalisa beto lenda lomba mulemvo. Beto ke lakisa luzolo ntangu beto ke lemvokila yandi mpe ke zimbana mambu yina yandi me sala. (Kol. 3:13) Mpangi Aldo dasuká ntangu mpangi yina yandi vandá pesá buzitu zonzá mambu ya yimbi na nkumbu ya bantu ya bwala ya yandi. Yandi me zonza: “Mu vandá sambila ntangu nyonso Yehova samu yandi sadisa munu na kutadila ve mpangi yina na faso ya yimbi.” Kasi Aldo salá kima mosi. Yandi lombá na mpangi yango na kukwenda na yandi na predikasion. Kuna, Aldo zabisak’ yandi ti mambu yandi zonzá, salak’ yandi mpasi na ntima. Yandi me bwela: “Ntangu mpangi yina kuwak’ yawu, yandi lombá mulemvo. Na faso ya yandi ya kuzonza, mu talá ti yandi nyongá mingi mambu yina yandi zonzaka. Na manima ya mambu yina, beto vutulá kindiku ya beto.”
16-17. Wapi desizion nge me baka?
16 Apotre Yoane lakisá luzolo ya mingi na bampangi ya yandi, mpe zolá ti, ba vanda na kiminu ya ngolo. Luzolo ya yandi talaná pwelele na kati ya mikanda tatu yina yandi sonikilá bawu. Ya ke mbote mingi na kuzaba ti, bakento na babakala yina ke kwenda yala na Yesu na zulu, ke zolá mpe ke kipeke bampangi faso Yoane!—1 Yoa. 2:27.
17 Beto bumba na ntima malongi nyonso beto me longoka na artikle yayi. Beto baka desizion ya kulemba ve na kutambula na kati ya matsyeleka, ya kulanda misiku ya Yehova na luzingu ya beto nyonso. Longoka Biblia, mpe tula ntima ya nge na mambu yina ya ke zonzaka. Tunga kiminu ya ngolo na Yesu. Losa malongi ya yinza yayi mpe ya ba-aposta. Kubika ata muntu kutana nge na kusala mambu ya yimbi na mansweki to kunata nge na kusala disumu. Bika misiku ya Yehova twadisa luzingu ya nge. Ntangu bampangi ke salá mambu yina ke lwalisá beto, beto lemvokila bawu, mpe ntangu ba ke vandá na nsatu ya beto, beto sadisa bawu, ni faso yina beto ke sadisa bawu na kuvanda ngolo. Ata bamambu ya mpasi yina beto ke kutaná na yawu, beto ke lemba ve na kutambula na kati ya matsyeleka.
NZIMBU 49 Jéhovah, nous réjouirons ton coeur
^ par. 5 Beto ke na zingá na yinza yina Satan, tata ya luvunu ke na yalaka. Na yawu, ya lenda vanda mpasi mingi na beto na kutambula na kati ya matsyeleka. Bakristo ya siekle ya ntete mpe kutaná na bamambu ya mpasi. Samu na kusadisa bawu mpe beto, mpeve ya Yehova natá apotre Yoane na kusonika mikanda tatu. Na mikanda yina, beto ke zaba yinki lenda nata beto na kutambula dyaka ve na kati ya matsyeleka, mpe yinki beto lenda sala.
^ par. 3 Tala tablo “ Rezon yina natá Yoane na kusonika mikanda ya yandi.”
^ par. 6 Ba me soba bankumbu ya nkaka.
^ par. 11 Tala artikle ya kulongoka “As-tu vraiment tous les faits?” na Yinzo ya Kengidi (na Français) ya Août 2018.
^ par. 59 PICTURE DESCRIPTION: YINA BAFOTO KE NA ZONZILAKA: Na lekole, ntwenya mosi ya kento ke kuwá mpe ke talá bima yina ke lakisá ti, ya ke ve yimbi na kuvukisa nzutu kento na kento to bakala na bakala. (Na babwala ya nkaka, ba-couleur ya arc-en-ciel ke kidimbu ya homosexualité.) Na manima, yandi me baka ntangu ya kusala ba-recherche samu na kukulisa kiminu ya yandi. Ya sadisak’ yandi na kubaka desizion ya mbote.
