Ya talaná pwelele ti Yesu kumá pretre ya nene ntangu yandi kuzwá bateme na mvula 29 N.B. Wa’ faso beto me zaba yawu? Na bateme ya yandi, Yesu lakisá ti, yandi yidamá samu na kupesa luzingu ya yandi faso munkayulu yina vandá kifwani ya autel ya “luzolo” ya Nzambi. (Gal. 1:4; Ebr. 10:5-10) Ni na bateme ya Yesu autel yina bandá kuzinga. Ntangu ya nkaka, temple ya nene ya kimpeve, bandá mpe kuzinga na ntangu yina. Temple yango ke bima nyonso yina Yehova salá samu beto sambila yandi na faso ya mbote na nzila ya munkayulu ya Yesu.—Mat. 3:16, 17; Ebr. 5:4-6.

Temple ya nene ya kimpeve vandá na nsatu ya pretre ya nene. Na yina Yehova solá Yesu na nzila “ya mpeve [santu] mpe pesak’ yandi ngolo.” (Bis. 10:37, 38; Mrk. 1:9-11) Yinki ke na natá beto na kundima dyaka ti, ba solá Yesu na kuvanda pretre ya nene avant lufwa ya yandi mpe kuvumbuka ya yandi na lufwa? Kifwani ya Aaron na ya bapretre ya nkaka ya nene yina kwizá na manima ya yandi, ke sadisa beto na kupesa mvutu na kyuvu yayi.

Misiku yina Yehova pesá na Moyize ke zonzá ti, kaka pretre ya nene lenda kota na kati ya chambre ya kulutila santu ya tabernakle to ya temple. Ni rido vandá kabulá chambre yango na chambre ya nkaka yina ba vandá bokilá santu. Pretre ya nene vandá lutá rido, samu na kukota na chambre ya kulutila santu kaka kilumbu ya kuwisana. (Ebr. 9:1-3, 6, 7) Aaron na ba ya nkaka, ba solá ntete bawu faso bapretre ya nene, avant ba luta rido samu na kukota na chambre ya kulutila santu. Na yina, Yesu mpe ba solá ntete yandi faso pretre ya nene avant yandi kufwa mpe luta “rido yina ke nzutu ya yandi,” samu na kukwenda zinga na zulu. (Ebr. 10:20) Na yawu, apotre Paul zonzá ti Yesu kumá “faso pretre ya nene” mpe kotá “na tente ya nene mpe ya kulunga yina salamá ve na maboko,” yina ke na “zulu.”—Ebr. 9:11, 24.

Kaka ni na ntangu yina Yehova ndimá allianse ya malu-malu, mpe fungulak’ yawu na bantu nyonso. Samu na yinki beto me zonza yawu? Ntangu Yesu kwendá na zulu mpe lakisá ntalu ya luzingu ya yandi ya kulunga yina yandi pesá samu na beto, yandi salá kima ya ntete na bima tatu yina salá ti, Yehova ndimá allianse ya malu-malu mpe fungula yawu na bantu nyonso. Yinki yandi salá dyaka?

Ntete-ntete, Yesu kwendá na mantwala ya Yehova; na manima, yandi lakisá ntalu ya munkayulu ya yandi na Yehova, mpe na kumanisa, Yehova ndimá ntalu ya menga ya Yesu yina mwanganaka. Samu Yehova ndima allianse ya malu-malu, ya bongá ti mambu nyonso yayi salama.

Biblia ke zonzá ve na beto pwelele ntangu yina Yehova ndimá ntalu ya munkayulu ya Yesu. Na yina, beto lenda zaba ve mbote-mbote ntangu yina Yehova ndimá allianse ya malu-malu mpe fungulak’ yawu na bantu nyonso. Kasi beto zaba ti, Yesu kwendá na zulu bilumbu 10 avant kilumbu ya pentecote. (Bis. 1:3) Na nyonso, kaka na kati ya mwa ntangu fioti yina, yandi lakisá ntalu ya sakrifise ya yandi na Yehova, mpe Yehova ndimak’ yawu. (Ebr. 9:12) Mambu nyonso yayi talaná pwelele na kilumbu ya pentecote 33. (Bis. 2:1-4, 32, 33) Allianse ya malu-malu funguká na bantu nyonso.

Na bunkufi, Yehova ndimá allianse ya malu-malu mpe fungulak’ yawu na bantu nyonso, na manima ya kundima ntalu ya menga ya Yesu yina mwanganaka. Allianse ya malu-malu bandá kusala na pretre ya nene Yesu Mediatere ya yawu.—Ebr. 7:25; 8:1-3, 6; 9:13-15.