1. Yinki kele luzolo ya Yehova bubu yayi?

 BUBU yayi, Yehova zola ti beto samuna nsangu ya mbote ya Kimfumu na ntoto nyonso. (Mrk. 13:10; 1 Tim. 2:3, 4) Ni Yehova muntu ya kuzwa kisalu yayi. Mpe samu kisalu yayi ke mfunu mingi na yandi, yandi me tula Mwana ya yandi Yesu yina yandi zola mingi samu na kutwadisa yawu. Na Yesu mutindu Ntwadisi, beto lenda vanda ya kundima ti kisalu ya kusamuna ke salama na mutindu Yehova me zola, tekila nsuka ya yinza yayi kuma.—Mat. 24:14.

2. Yinki beto ke zonzila na disolo yayi?

² Na disolo yayi, beto ke tala wapi mutindu Yesu ke sadilá “kisadi ya kukwikama mpe ya mayela” samu na kupesa bilandi ya yandi madya ya kimpeve, mpe ke twadisá bawu samu na kulungisa kisalu ya nene ya kusamuna yina nabunu ntete ya salama. (Mat. 24:45) Beto ke tala mpe yinki mosi na mosi na kati ya beto lenda sala samu na kulakisa ti beto ke landá Yesu mpe kisadi ya kukwikama.

3. Wapi lutumu Yesu kuzwaka?

³ Yesu ke na twadisá kisalu ya kusamuna. Wa’ faso beto zaba yawu? Mwa bilumbu tekila yandi kwenda na zulu, Yesu kutaná na ndambu ya bilandi ya yandi na mongo mosi na Galilea. Yandi zonzá na bawu: “Nzambi pesaka munu lulendo [to lutumu] nyonso na zulu mpe na ntoto.” Kaka na manima ya kuzonza mambu yayi, yandi zonzaka: ‘Yawu yina, beno kwenda mpe beno kumisa bantu ya makanda nyonso balongoki.’ (Mat. 28:18, 19) Bamambu yina Yesu zonzá ke na lakisá ti na kati ya lutumu yina yandi  kuzwá, yandi kuzwá mpe lutumu ya kutwadisa kisalu ya kusamuna.

4. Wa’ faso beto zaba ti Yesu ke na twadisá kisalu ya kusamuna tii na ntangu ya beto?

⁴ Yesu zonzá ti kisalu ya kusamuna mpe ya kukumisa bantu bilandi ya yandi ke salama na ‘makanda nyonso.’ Yandi zonzá mpe ti yandi ke vanda na bilandi ya yandi “bilumbu nyonso tii na nsuka ya yinza.” (Mat. 28:20) Bamambu yandi zonzá ke na lakisá pwelele ti Yesu zolá twadisa kisalu ya kusamuna tii na ntangu ya beto.

5. Wa’ faso beto ke na tulá diboko samu na kulungisa Nkunga 110:3?

⁵ Yesu vandá ve na boma ti ya vanda ve na bantu mingi samu na kusala kisalu ya kusamuna na ntangu ya mansukina. Yandi zabá ti bamambu yayi yina ke na buku ya Bankunga zolá lungana: ‘Bantu ya nge ke kudipesa na luzolo ya bawu mosi na kilumbu yina nge ke twadisa basoda ya nge ya mvita.’ (Nku. 110:3) Kana nge ke na salá kisalu ya kusamuna, zaba ti nge ke na tulá diboko samu na kulungisa mbikudulu yayi, mpe kusadisa Yesu na kisadi ya kukwikama. Kisalu ke na kwendá na mantwala. Kasi ya ke na bamambu yina ke na sosá kukanga beto nzila samu na kulungisa yawu.

6. Wapi yina ke mosi ya bamambu ba yina ke na samuná Kimfumu ke na kutaná na yawu bubu yayi?

⁶ Mosi ya bamambu yina ba yina ke samuná Kimfumu ke kutaná na yawu, ni bankwamusu ya ba apostats, bamfumu ya mabuundu, mpe bantu ya luyalu. Bantu yayi ke zonzá bamambu mingi ya luvunu samu na kisalu ya beto. Kana bantu yina beto zaba, ba yina ke salá na beto, to bantu ya makanda ya beto ndima bamambu ya luvunu yayi, ba lenda sala beto tiya samu beto bika kusadila Yehova mpe kusamuna. Na babwala ya nkaka, bambeni ya beto ke sosá kupesa bampangi ya beto boma, ke kangá bawu, mpe ke tulá ba ya nkaka na boloko. Bamambu nyonso yayi ke na pamusá ve beto. Yesu zonzaka: ‘Makanda nyonso ke yina beno samu na nkumbu ya munu.’ (Mat. 24:9) Samu bantu yayi ke yiná beto, ya ke na lakisá ti Yehova ke ndimá beto. (Mat. 5:11, 12) Ni Satan ke na manima ya bankwamusu yayi. Kasi Yesu me lutila yandi na ngolo. Na lubakusu ya yandi, nsangu ya mbote ke na mwanganá na yinza nyonso.

7. Yinki ke na lakisá nge ti Luzabusu 14:6, 7 ke na lunganaka?

⁷ Mambu ya nkaka yina beto ke kutaná na yawu na kisalu ya kusamuna, ni mambu ya bandinga. Beto ke kutaná na bantu yina ke zonzá bandinga mingi. Kasi, na Luzabusu yina yandi pesá na ntumwa Yoane, Yesu lakisá ti na ntangu ya beto, mambu ya bandinga ke kanga ve nzila na nsangu ya mbote. (Tanga Luzabusu 14:6, 7.) Wa’ faso bamambu yina yandi zonzá ke na lunganaka? Bubu yayi, beto ke pesá na bantu mingi bweso ya kuwa nsangu ya Kimfumu. Na kifwani, bantu ya yinza nyonso lenda kuzwa mambu ya Biblia na site ya beto jw.org, samu site yango ke na bandinga kuluta 1000! Kimvuka ya Bantwadisi me pesa nzila samu na kubangula buku Sepela na luzingu ya ntangu nyonso! na bandinga kuluta 700. Ni buku yayi beto ke na sadilá mingi bubu yayi samu na kukumisa bantu bilandi ya Yesu. Dyaka, bantu ya makutu ya kufwa lenda kuzwa madya ya kimpeve na nzila ya bavideo. Mpe ba yina ke na meso ya kufwa lenda kuzwa yawu na nzila ya bandinga ya braille. Beto ke na talá faso bambikudulu ya Biblia ke na lunganaka. Bantu “ya bandinga [nyonso] ya makanda” ke na longoká kuzonza “ndinga ya bunkete,” matsyeleka ya Biblia. (Zak. 8:23; Sof. 3:9) Ni Yesu ke na twadisá kisalu nyonso yayi.

8. Bubu yayi, wapi bambuma kisalu ya beto ya kusamuna me buta?

⁸ Bubu yayi, kimvuka ya Yehova ke na bantu kuluta 8 millions, yina ke vandá na babwala kuluta 240. Mpe bamvula nyonso bantu mingi  ke zwá mbotokolo. Kasi mambu yina me lutila mfunu ni kutala bifu ya bakristo, ‘kimuntu ya malu-malu,’ yina bilandi ya malu-malu yayi me kulisa. (Kol. 3:8-10) Mingi me bika bamambu ya ngolo, mpe bafaso nyonso ya kuvukisa nzutu yina ke kwelaná ve na misiku ya Nzambi. Ba me bika kuyina bampangi samu na mpusu ya bawu, mpe kutula bwala ya bawu na mantwala. Mbikudulu ya Izaya 2:4 ke na lunganaka. Bantu yayi ‘ke na longoká dyaka ve mvita.’ Bangolo nyonso yina beto ke salá samu na kulwata kimuntu ya malu-malu ke sadisá na kubenda bantu ya nkaka na kimvuka ya Yehova. Mpe ya ke na lakisá ti beto ke na landá Ntwadisi ya beto, Yesu Kristo. (Yoa. 13:35; 1 Pi. 2:12) Nyonso yayi ke na salamá samu Yesu ke na twadisá beto.

9. Na Matayi 24:45-47, yinki Yesu zonzá ke salama na ntangu ya nsuka?

⁹ Tanga Matayi 24:45-47. Yesu zonzá ti na bilumbu ya nsuka yandi ke tula “kisadi ya kukwikama mpe ya mayela” samu na kupesa madya ya kimpeve na bilandi ya yandi. Mambu yina yandi zonzá ke lakisá ti kisadi yayi zolá sala kisalu ya ngolo na ntangu ya beto. Ni yina mpe yandi ke na salaka. Ntwadisi ya beto ke sadilá ndambu ya bantu yina ba tulá mafuta ya mpeve ya santu (bantu yina ba soolá na kwenda zinga na zulu), samu na kupesa madya ya kimpeve “na ntangu ya kulunga” na bisadi ya Nzambi, mpe na ba yina ke sosá kuzaba mambu ya Biblia. Babakala yayi ke talá ve ti ba ke bamfumu ya kiminu ya bampangi. (2 Ko. 1:24) Kasi, ba ke ndimá Yesu mutindu ‘Ntwadisi mpe komanda’ ya bilandi ya yandi.—Iza. 55:4.

10. Na kizizi, wapi buku me sadisa nge na kubanda kusadila Yehova?

¹⁰ Banda 1919, kisadi ya kukwikama me bongisa mikanda mingi samu na kusadisa ba yina ke sosá kuzaba matsyeleka na kubanda kulongoka Biblia. Na 1921, ba salá buku La Harpe de Dieu samu na kusadisa bantu na kuzaba malongi  ya ntete ya Biblia. Na manima, ba me basisa mikanda ya nkaka, samu bantangu ke na kwendá sobaka. Wapi buku me sadisa nge na kuzaba mpe kuzola Tata ya beto ya mazulu? Ya vandá ni “ Que Dieu soit reconnu pour vrai !, ” La vérité qui conduit à la vie éternelle, Vous pouvez vivre éternellement sur une terre qui deviendra un paradis, La connaissance qui mène à la vie éternelle, Qu’enseigne réellement la Bible ?, Yinki biblia ke longa beto?, to Sepela na luzingu ya ntangu nyonso!, buku ya beto ya malu-malu? Mosi na mosi ya babuku yayi basiká na ntangu yina beto vandá na yawu nsatu.

11. Samu na yinki beto nyonso ke na nsatu ya madya ya kimpeve?

¹¹ Ya vanda ba yina me banda kulongoka Biblia ntama mingi ve to ba yina me sala bamvula na kati ya matsyeleka, beto nyonso ke na nsatu ya madya ya ngolo ya kimpeve. Ntumwa Polo sonikaka: ‘Madya ya ngolo kele samu na bantu ya kuyela.’ Polo bwelá ti kusadila bamambu yina beto ke longoká na Biblia ke sadisa beto na “kusala luswaswanu na kati ya mambu ya mbote mpe ya yimbi.” (Ebr. 5:14) Bubu yayi, bantu mingi ke salá bamambu ya yimbi ya kulutila. Na yawu, ya lenda vanda mpasi na bisadi ya Yehova na kulanda misiku ya yandi. Kasi Yesu ke salá nyonso samu beto kuzwa madya ya kimpeve yina ke sadisa beto na kubumba kiminu ya beto ngolo. Beto ke kuzwá madya yayi na Biblia. Yesu ke twadisá kisalu ya kisadi ya kukwikama samu na kubongisa mpe kukabula madya ya kimpeve.

12. Mutindu Yesu, wa’ faso beto me pesa lukumu na nkumbu ya Nzambi?

¹² Mutindu Yesu, beto me pesa na nkumbu ya Nzambi lukumu yina ya me lunga kuzwa. (Yoa. 17:6, 26) Na kifwani, na 1931 beto baká nkumbu yina ke na Biblia ya Bambangi ya Yehova. Na yawu, beto me lakisa ti nkumbu ya Nzambi ke mfunu mingi samu na beto, mpe beto zola ti ba zaba beto na nkumbu ya Tata ya beto ya  mazulu. (Iza. 43:10-12) Mpe kubanda na octobre ya mvula yina, nkumbu ya Yehova ke basiká na paje ya ntete ya Yinzo ya Kengidi. Mpe La Bible. Traduction du monde nouveau, me vutula nkumbu ya Nzambi na bisika yina ya vandá na Biblia. Bisadi ya Nzambi me sala ve mutindu mabuundu yina ke zonzá ti ba ke bakristo, yina me katula nkumbu ya Nzambi na babiblia mingi yina ba me sala.

13. Samu na yinki nge ke ya kundima ti Yesu ke sadilá “kisadi ya kukwikama mpe ya mayela” bubu yayi? (Yoane 6:68)

¹³ Na nzila ya “kisadi ya kukwikama mpe ya mayela,” Yesu me sala kimvuka mosi ya kitoko awa na ntoto, samu na kusadisa bantu na kusambila Yehova na faso ya mbote. Yinki nge ke na kanisá samu na kimvuka yayi? Ntangu ya nkaka, nge ke na kabulá makanisi yina vandá na ntumwa Piere ntangu yandi zonzá na Yesu: “Na sika ya nani beto ke kwenda? Nge ke na mambu yina ke pesaka luzingu ya seko.” (Yoa. 6:68) Wapi kisika mosi na mosi ya beto zolá vanda bubu yayi kana beto zabá ve kimvuka ya Yehova? Na nzila ya kimvuka yayi, Yesu ke salá ti beto kuzwa nyonso yina beto ke na yawu nsatu samu beto vanda ya kukangama na Nzambi. Yandi ke pesá mpe beto malongi samu beto lungisa kisalu ya kusamuna na mutindu ya mbote. Mpe yandi ke sadisá beto na kulwata ‘kimuntu ya malu-malu,’ samu na kusepelisa Yehova.—Ef. 4:24.

14. Na kati ya kimbevo ya COVID-19, wapi bambote nge me kuzwa na kuvanda na kati ya kimvuka ya Yehova?

¹⁴ Na kati ya bantangu ya mpasi, Yesu ke lakisá na bilandi ya yandi nzila ya kulanda. Beto me tala bambote na kulanda nzila yina yandi ke lakisá ntangu kimbevo ya COVID-19 bandaka. Na yinza, bantu mingi zabá ve yinki ya kusala. Kasi Yesu salá nyonso samu na kulakisa beto pwelele yinki ya kusala samu na kubumba banzutu  ya beto. Kimvuka ya Yehova zonzá na beto na kulwata ba masques ntangu beto ke bisika yina ke na bantu, mpe na kuvanda ve pene-pene na bantu. Ba zonzá na bakuluntu na kuzaba ntangu nyonso wa’ faso bampangi ya kimvuka ya bawu kele, mpe yinki ba ke na yawu nsatu na kinsuni mpe na kimpeve. (Iza. 32:1, 2) Na nzila ya bansangu ya Kimvuka ya Bantwadisi, beto kuzwá malongi mpe bima ya nkaka samu na kukindisa beto.

15. Na kati ya kimbevo ya COVID-19, wapi malongi beto me kuzwa samu na kusala balukutakanu mpe kisalu ya kusamuna, mpe wapi bambuma ya me buta?

¹⁵ Na kati ya kimbevo ya COVID-19, ba zonzá na beto pwelele yinki ya kusala samu na balukutakanu ya kimvuka, mpe kisalu ya kusamuna. Na mbala mosi, beto bandá kusala balukutakanu ya kimvuka mpe ya nene na nzila ya internet. Beto bandá mpe kusamuna mingi na mikanda mpe na téléphone. Yehova me sakumuna bangolo ya beto. Bafiliale mingi me zonza ti lutangu ya ba yina ke samuná me kuma mingi. Bampangi mingi me kuzwa bamambu ya mbote na kati ya ntangu yayi.—Tala encadré “ Yehova ke sakumuná kisalu ya beto ya kusamuna.”

16. Na yinki beto lenda vanda na kiminu?

¹⁶ Ntangu ya nkaka, ya ke na bampangi yina vandá kanisa ti misiku yina kimvuka ya Yehova vandá pesa na kati ya kimbevo ya COVID-19, lutisaka. Kasi bambala mingi, ya talaná ti misiku yina vandá mbote. (Mat. 11:19) Mpe ntangu beto ke kanisá na mutindu Yesu ke twadisá na luzolo nyonso bilandi ya yandi, beto ke na kiminu ti mambu ni mambu yina ke kwiza na mantwala, Yehova na Mwana ya yandi ke vanda na beto.—Tanga Baebre 13:5, 6.

17. Yinki ya ke salá nge na kulanda Yesu, Ntwadisi ya beto?

¹⁷ Beto ke na kilengi mingi samu Yesu ke Ntwadisi ya beto! Beto ke na kati ya kimvuka yina ke na bumosi. Bandinga, bampusu mpe babwala ke kabulá ve beto. Beto ke kuzwá madya mingi ya kimpeve, mpe malongi yina beto ke na yawu nsatu samu na kulungisa kisalu ya beto ya kusamuna. Mosi na mosi na kati ya beto ke kuzwá malongi samu na kulwata kimuntu ya malu-malu, mpe beto ke longoká kuzola bampangi. Beto ke na bulá ntulu samu Yesu kele Ntwadisi ya beto.