1. Wa’ faso beto me bonga kutadila lusambu?

 MUNTU yina yidiká zulu na ntoto me pesa beto bweso ya nene ya kusambila yandi. Kanisa fioti na mambu yayi: beto lenda zonza na Yehova mambu nyonso yina beto ke na yawu na ntima na ndinga ni ndinga, mpe na ntangu yina beto me soola. Ya vanda na mfulu ya l’hôpital to na boloko, beto lenda sambila na kiminu ti Tata ya beto ya luzolo ke kuwa beto. Beto ke na vutulá matondo mingi na bweso yayi.

2. Wapi mutindu mfumu Davidi lakisá ti yandi vandá sepelá na bweso ya kusambila?

² Mfumu Davidi vandá sepela mingi na bweso ya kusambila. Yandi yimbilá Yehova: ‘Bika lusambu ya munu vanda mutindu mananasi yina ba me yidika na ntwala ya nge.’ (Nku. 141:1, 2) Na ntangu ya Davidi, ba vandá sala keba na mutindu yina ba vandá yidika mananasi yina banganga-nzambi vandá sadila samu na kusambila Yehova. (Bas. 30:34, 35) Na yawu, ntangu Davidi sadilá kifwani ya mananasi, yandi vandá na nsatu ya kuzonza ti yandi mpe vandá sala keba na bamambu yina yandi ke zonza na Yehova na lusambu. Beto mpe zola mingi ti balusambu ya beto sepelisa Yehova.

3. Wa’ faso beto me bonga kusambila Yehova, mpe samu na Yinki?

³ Ntangu beto ke sambilá Yehova, beto me lunga kusala yawu na buzitu nyonso. Kanisa na bimona-meso yina Izaya, Ezekiele, Danyele mpe Yoane kuzwaka. Bimona-meso yina vandá ve mutindu mosi, kasi ya vandá na kima mosi yina yawu nyonso vandá lakisa. Nyonso vandá lakisa Yehova mutindu Mfumu ya nene mingi. Izaya ‘talaka Yehova ya kuvanda na kiti mosi ya kimfumu ya yinda mpe ya kunanguka.’ (Iza. 6:1-3) Ezekiele talá Yehova ya kuvanda na zulu ya pusu-pusu na mazulu mpe ‘nsemo mutindu ya  mukyama’ vandá zunga yandi. (Ezk. 1:26-28) Danyele talá ‘Kuluntu ya Bilumbu’ ya kulwata lele ya mpembe mpe milaka ya tiya vandá basika na kiti ya kimfumu ya yandi. (Dan. 7:9, 10) Mpe Yoane talá Yehova ya kuvanda na zulu ya kiti ya kimfumu mpe mukyama yina vandá mutindu emerode vandá zunga kiti yango. (Luz. 4:2-4) Ntangu beto ke kanisá na nkembo nyonso yina ke na Yehova, ya ke natá beto na kuzimbana ve ti kusambila yandi ke bweso ya nene, mpe beto me bonga kusala yawu na buzitu. Na yawu, yinki beto me bonga kuzonza na balusambu ya beto?

4. Yinki beto ke longoká na bamambu ya ntete yina Yesu zonzá na lusambu yina yandi longá na bilandi ya yandi na Matayi 6:9, 10?

⁴ Tanga Matayi 6:9, 10. Na disolo yina yandi salá na zulu ya mongo, Yesu longá na bilandi ya yandi mutindu ya kusambila yina ke sepelisá Nzambi. Na manima ya kuzonza “beno fwana kusambila mutindu yayi,” Yesu zonzá bamambu ya ntete ya mfunu yina beto me bonga kuzonzila na balusambu ya beto. Yandi sambilá samu mvindu yina ba losá na nkumbu ya Yehova katuka, samu Kimfumu ya yandi kwiza mpe kufwa bambeni ya Yehova, mpe samu na mambu ya mbote nyonso yina Yehova ke kanisá kusala samu na ntoto mpe bantu na bilumbu yina ke kwiza. Kuzonzila bamambu yayi na balusambu ya beto ke lakisá ti luzolo ya Yehova ke mfunu samu na beto.

5. Yehova ke wá kwandi ntangu beto ke zonzilak’ yandi bamambu ya beto?

⁵ Na bamambu yina Yesu zonzá na manima, yandi lakisá ti ya ke mbote beto sambila samu na bamambu ya beto. Beto lenda lomba na Yehova na kupesa beto madya samu na kilumbu, na kulemvokila masumu ya beto, na kubumba beto na bantotolo, mpe na kuvuukisa beto na muntu ya yimbi. (Mat. 6:11-13) Ntangu beto ke lombá bamambu yayi na Yehova, beto ke lakisá yandi ti beto ke na nsatu ya lubakusu ya yandi mpe beto zola kusepelisa yandi.

6. Beto me bonga kusambila kwandi kaka na bamambu yina Yesu zonzá na lusambu yina yandi longaka? Zonzila yawu.

⁶ Yesu vandá vingila ve ti bilandi ya yandi landa bamambu nyonso yina yandi zonzá na lusambu mutindu yandi zonzak’ yawu. Na balusambu ya nkaka yina Yesu salá, yandi zonzilá bamambu ya nkaka yina vandá mfunu samu na yandi na ntangu yina. (Mat. 26:39, 42;  Yoa. 17:1-26) Faso mosi mpe, beto lenda sambila na bamambu nyonso yina beto ke na yawu na ntima. Ntangu beto ke vandá na mukanu ya kubaka, beto lenda sambila samu na kuzwa mayela. (Nku. 119:33, 34) Ntangu ba ke pesá beto kisalu yina ke mwa mpasi, beto lenda sambila samu na kuzaba mutindu ya kusala yawu. (Bin. 2:6) Bibuti lenda sambila samu na bana ya bawu. Bana lenda sambila samu na bibuti ya bawu. Mpe beto nyonso me bonga kusambila samu na bantu yina ke longoká Biblia na beto, mpe ba yina beto ke kutaná na kisalu ya kusamuna. Kasi na balusambu ya beto, beto zolá lomba ve kaka bima na Yehova.

7. Samu na yinki beto me bonga kukembila Yehova na balusambu ya beto?

⁷ Beto me bonga kukembila Yehova na balusambu ya beto. Ya ke ve na muntu yina me lunga kuzwa nkembo mutindu Yehova. Yandi ke ‘mbote mpe ya kuyidama na kulemvokila.’ Mpe yandi ke ‘wilaka bantu mawa mpe ke fwilaka bawu kyadi, yandi ke dasukaka na nswalu ve mpe kele ya kufuluka na luzolo ya kukwikama mpe kukwikama.’ (Nku. 86:5, 15) Ya tsyeleka bamambu nyonso yina Yehova ke salá, mpe bifu nyonso ya mbote yina ke na yandi ke natá beto na kukembila yandi.

8. Na wapi bima beto lenda vutula Yehova matondo? (Nkunga 104:12-15, 24)

⁸ Dyaka, beto me lunga kuvutula matondo na Yehova na bima yina yandi ke pesá beto. Na kifwani, beto lenda vutula yandi matondo na kitoko ya bafololo, na bima mingi yina yandi pesá beto samu na kudya mpe na kilengi yina beto ke na yawu na kuvanda na bandiku. (Tanga Nkunga 104:12-15, 24.) Tata ya beto ya luzolo ke pesá beto bima nyonso yayi mpe bima mingi ya nkaka samu beto vanda na kilengi. Ya kulutila mfunu, beto me bonga kuvutula matondo mingi na Yehova na malongi yina yandi ke pesá beto samu beto bumba kiminu ya beto ngolo, mpe na kivuvu yina yandi ke pesá beto samu na bilumbu yina ke kwiza.

9. Yinki lenda bakisa beto na kuzimbana ve kuvutula Yehova matondo? (1 Batesalonika 5:17, 18)

⁹ Ya ke ve mpasi na kuzimbana kuvutula Yehova matondo na nyonso yina yandi ke salá samu na beto. Yinki lenda sadisa nge na kuzimbana ve? Nge lenda sonika na mukanda bamambu yina nge me lomba na Yehova. Na manima, nge lenda tala yawu samu na kutala wa’ faso Yehova  me pesa mvutu na balusambu ya nge. Mpe ntangu nge ke tala yawu, sambila Yehova samu na kuvutula yandi matondo na lubakusu ya yandi. (Tanga 1 Batesalonika 5:17, 18.) Beto nyonso ke sepelá ntangu bantu ya nkaka ke vutulá beto matondo. Faso mosi mpe, ntangu beto ke zimbaná ve kuvutula Yehova matondo na bamvutu yina yandi ke pesá na balusambu ya beto, ya ke salak’ yandi kilengi. (Kol. 3:15) Kasi ya ke na mambu ya nkaka ya mfunu yina beto me bonga kuvutula Nzambi matondo.

10. Faso me lakisa yawu 1 Piere 2:21, samu na yinki beto me bonga kuvutula Yehova matondo na yina yandi filisá Yesu?

¹⁰ Tanga 1 Piere 2:21. Beto me bonga kuvutula Yehova matondo na yina yandi filisá Mwana ya yandi yina yandi ke zolá mingi samu yandi kwiza longa beto. Ntangu beto ke longoká luzingu ya Yesu, beto ke zabá bamambu mingi na yina me tadila Yehova, mpe yinki beto me bonga kusala samu na kusepelisa yandi. Kana beto lakisa kiminu na munkayulu ya Yesu, beto lenda vanda na kizunu mpe kindiku ya ngolo na Yehova.—Rom. 5:1.

11. Samu na yinki beto ke sambilá Yehova na nkumbu ya Yesu?

¹¹ Beto ke na vutulá Yehova matondo mingi na yina beto lenda sambila yandi na manima ya Mwana ya yandi. Ni na nzila ya Yesu Yehova ke pesá beto bima yina beto ke lombak’ yandi na lusambu. Yehova ke kuwá mpe ke pesá bamvutu na balusambu yina beto ke salá na nkumbu ya Yesu. Yesu zonzaka: “Nyonso yina beno ke lomba na nkumbu ya munu, mu ke sala yawu, samu ti nkembo ya Tata talana na Mwana.”—Yoa. 14:13, 14.

12. Na wapi mambu ya nkaka beto me bonga kuvutula matondo na Yehova samu na Mwana ya yandi?

¹² Yehova ke lemvokilá beto na nzila ya munkayulu yina Yesu pesá samu na masumu ya beto. Biblia ke zonzá ti, samu na beto, Yesu ke “nganga-nzambi ya nene [yina] me vanda na diboko ya kitata ya kiti ya kimfumu ya Nzambi na zulu.” (Ebr. 8:1, nwt-MK) Yandi ke “nzonzi [ya beto] na ntwala ya Tata.” (1 Yoa. 2:1) Beto ke vutulá Yehova matondo mingi na yina yandi pesá beto nganga-nzambi mosi ya nene yina zaba ti beto ke bantu ya masumu, mpe yina ‘ke bondilaka samu na beto’. (Rom. 8:34; Ebr. 4:15) Beto ke bantu ya masumu. Na yawu, kana Yesu kufwá ve, beto zolá vanda ve na bweso ya kusambila Yehova. Ntembe ve, ya ke ve na kima yina beto lenda sala samu na kuvutula Yehova matondo na faso ya kulunga na yina yandi pesá Mwana ya yandi yina yandi ke zolá mingi.

13. Mpimpa yina tekilá lufwa ya yandi, wa’ faso Yesu lakisá ti yandi vandá zolá bilandi ya yandi?

¹³ Na mpimpa yina tekilá lufwa ya yandi, Yesu lutisá ntangu mingi na kusambila samu na bilandi ya yandi. Yandi lombá na Tata ya yandi na ‘kubumba bawu samu na muntu ya yimbi.’ (Yoa. 17:15) Na kusalá yawu, yandi lakisá ti yandi vandá zolá mingi bilandi ya yandi. Yesu zabá ti na mwa ntangu fioti yandi ke kutana na bampasi mingi. Ata faso yina, yandi vandá na manyongi samu na bantumwa ya yandi.

14. Wa’ faso beto lenda lakisa ti beto ke zolá bampangi ya beto ya kento na ya bakala?

¹⁴ Mutindu Yesu, beto ke kanisá ve kaka na bansatu ya beto. Beto ke sambilá mingi samu na bampangi ya beto ya kento na ya bakala. Ntangu beto ke salak’ yawu, beto ke lakisá ti beto ke tumamá na musiku yina Yesu pesá beto ya kuzolasana, mpe beto ke lakisá na Yehova ti beto ke zolá bampangi ya beto bakristo. (Yoa. 13:34) Kusambila samu na bampangi ya beto ke ve mpamba. Biblia ke zonzá na beto ti “kubondila ya muntu ya lunungu ke vandaka ngolo mingi.”—Zaki 5:16, nwt-MK.

15. Samu na yinki bampangi ya beto ke na nsatu ya balusambu ya beto?

 ¹⁵ Bampangi ya beto ya kento na ya bakala ke lutisá bantangu mingi ya mpasi. Na yawu, ba ke na nsatu ya balusambu ya beto. Beto lenda lomba na Yehova na kusadisa bawu na kukanga ntima na kati ya kimbevo, to ntangu ba ke kutaná na bamambu mutindu kuningana ya ntoto, mupepe ya ngolo, bamvita kisika yina ba ke vandá, bankwamusu mpe bampasi ya nkaka. Beto lenda sambila mpe samu na bampangi yina ke tulá luzingu ya bawu na mpasi samu na kusadisa bampangi. Kana nge zaba bampangi yina ke na lutisá bantangu ya mpasi, nge lenda zonzila bankumbu ya bawu ntangu nge ke sambilaka. Ntangu beto ke lombá na Yehova na kusadisa bampangi ya beto na kukanga ntima na kati ya bampasi, beto ke lakisá ti luzolo ya beto samu na bawu ke ya tsyeleka.

16. Samu na yinki beto me lunga kusambila samu na bampangi yina ke twadisá beto?

¹⁶ Bampangi yina ke twadisá beto ke sepelá na balusambu yina beto ke salá samu na bawu, mpe ba ke na nsatu ya yawu. Ntumwa Polo zabá ti yandi vandá na nsatu bampangi sambila samu na yandi. Yandi sonikaka: ‘Beno sambila mpe samu na munu, samu ntangu munu ke fungula yinwa ya munu, ba pesa munu mambu yina munu fwana tuba, samu munu tuba na bukindi nyonso ntangu munu ke zabisa kinsweki ya santu ya nsangu ya mbote.’ (Ef. 6:19) Bubu yayi mpe, bampangi yina ke twadisá beto ke salá kisalu ya ngolo mingi. Ntangu beto ke lombá na Yehova na kusakumuna kisalu ya bawu, beto ke lakisá ti beto ke zolá bawu.

17-18. Na wapi ntangu ba lenda lomba na beto na kusambila na mantwala ya bampangi, mpe yinki beto me bonga kuzimbana ve?

¹⁷ Bantangu ya nkaka, ba ke lombá na beto na kusambila na mantwala ya bampangi. Na kifwani, mpangi ya kento yina ke longoká Biblia na muntu lenda lomba na mpangi yina me kwiza na yandi na kusambila. Ntangu ya nkaka, mpangi yina me kwiza na yandi zaba ve muntu yina ke longoká Biblia. Na yawu, ya lenda vanda mbote mpangi yayi sala lusambu ya nsuka. Ya ke sadisa yandi na kuzaba mambu yina yandi ke zonza na lusambu.

¹⁸ Ba lenda lomba na mpangi ya bakala na kusala lusambu na lukutakanu ya kimvuka, to na lukutakanu samu na kusamuna. Bampangi ya  bakala yina ke na bweso yayi zolá zimbana ve samu na yinki beto ke salá balukutakanu yayi. Ba fwana sadila ve lusambu samu na kupesa malongi na bampangi, to samu na kukabula bansangu. Na balukutakanu mingi ya kimvuka, ba ke pesá ba minutes 5 samu na nzimbu mpe lusambu. Na yawu, mpangi yina ke sambilá zolá zonza ve “mambu mingi,” mingi-mingi kana ya ke lusambu ya kubanda.—Mat. 6:7.

19. Yinki ke sadisa beto na kuvanda ya kuyidama samu na kilumbu yina Yehova ke fundisa bantu?

¹⁹ Kilumbu yina Nzambi ke fundisa bantu me kuma pene-pene. Na yawu, beto me bonga kutula lusambu na kati ya bamambu ya ntete na luzingu ya beto. Samu na mambu yayi, Yesu zonzaka: “Beno lala pongi ve ! Beno sambila ntangu nyonso, samu ti beno kuzwa ngolo ya kuvibidila [to kukanga ntima] mambu nyonso yina ke salama .” (Luke 21:36) Kana beto ke sambilá ntangu nyonso, kiminu ya beto ke vanda ngolo, mpe beto ke vanda ya kuyidama samu na kilumbu ya Yehova.

20. Yinki beto me bonga kusala samu balusambu ya beto vanda mutindu mananasi ya nsunga ya kitoko?

²⁰ Yinki beto me tala na disolo yayi? Bweso ya kusambila ke ntalu mingi samu na beto. Bamambu ya kulutila mfunu yina beto me bonga kuzonzila na balusambu ya beto, ni bamambu yina Yehova ke na nsatu ya kulungisa. Mpe beto me bonga kuvutula matondo na Yehova samu na Mwana ya yandi, mpe samu na Kimfumu yina yandi ke na twadisaka. Ya ke mbote mpe beto sambila samu na bampangi ya beto. Yehova zola mpe ti beto sambila samu na bansatu ya beto, mpe samu yandi sadisa beto na kubumba kiminu ya beto. Ntangu beto ke baká ntangu ya kubongisa bamambu yina beto ke zonza na lusambu, beto ke lakisá ti beto ke sepelá na bweso ya nene yayi. Bamambu yina beto ke zonza ke vanda mutindu mananasi ya nsunga ya kitoko yina ke pesá Yehova ‘kyese.’—Bin. 15:8.