Yesu longá na bantu na kuzinga na kizunu na bampangi. Kasi, kilumbu mosi yandi zonzá na bantumwa: “Beno banza ve ti mu kwizaka awa na ntoto samu na kutula kizunu. Mu kwizaka awa na ntoto samu na kutula ve kizunu, kasi muzingu. Mu kwizaka samu na kukabula mwana ya bakala na tata ya yandi, mwana ya kento na mama ya yandi, kento na bokilo ya yandi ya kento.” (Mat. 10:34, 35) Yinki Yesu vandá sosa kuzonza?

Dikanisi ya Yesu vandá ve ya kukabula makanda. Kasi yandi zabá ti malongi ya yandi zolá nata makanda ya nkaka na kukabuka. Na yawu, ba yina vandá na nsatu ya kukuma bilandi ya Yesu mpe kuzwa mbotokolo zolá zaba ti ba ke kutana na bankwamusu. Kana ba kutaná na bankwamusu yina ke katuká na kento to bakala yina ke sambilá ve Yehova, to na bantu ya dikanda ya bawu, ya lendá vanda mpasi na kukangama na malongi ya Yesu.

Biblia ke lombá na bakristo na kuzinga “na kizunu na bantu nyonso.” (Rom. 12:18) Kasi, malongi ya Yesu lendá kabula makanda ya nkaka. Ya ke salamá ntangu muntu mosi na dikanda me ndima malongi ya Yesu, kasi ba ya nkaka me manga yawu. Na yawu, bantu ya dikandi ya muntu yina me ndima matsyeleka lenda kuma “bambeni” samu na yandi.—Mat. 10:36.

Bilandi ya Yesu yina ke na makanda yina ke sambilá ve dibuundu mosi ke kutaná na bamambu yina lenda meka luzolo ya bawu samu na Yehova mpe Yesu. Na kifwani, bantu ya dikanda yina ke ve bakristo lenda sala bawu tiya samu ba sala bafeti ya mabuundu ya luvunu. Na mantwala ya bamambu ya mutindu yayi, ba ke sosa kusepelisa nani? Yesu zonzaka: “Muntu yina ke zolaka tata to mama ya yandi kulutila munu, kele ya kulunga ve na [kuvanda] kilandi ya munu.” (Mat. 10:37) Yesu vandá zonza ve ti samu na kuvanda ya kulunga na mantwala ya yandi, bilandi ya yandi fwana zola dyaka ve mingi bibuti ya bawu. Kasi yandi vandá zonza na bawu na kuzaba yinki me lutila mfunu na luzingu ya bawu. Kana bantu ya dikanda ya beto ke zolá ve ti beto sadila Yehova, beto ke bika ve kuzola bawu. Kasi na beto, luzolo samu na Yehova ke na kisika ya ntete.

Ya lenda vanda mpasi na kukanga ntima na mantwala ya bankwamusu ya dikanda ya beto. Kasi bilandi ya Yesu zaba mambu yayi: ‘Konso muntu yina ke ndima ve yinti ya yandi ya mpasi mpe ke landa munu ve me lunga ve kuvanda longoki ya munu.’ (Mat. 10:38) Bankwamusu ya dikanda ke mosi ya bampasi yina bakristo ke ndimaka. Kasi ba ke na kivuvu ti ndyatulu ya bawu ya mbote lendá nata bantu ya dikanda ya bawu na kusoba makanisi mpe kusosa kuzaba mambu ya Biblia.—1 Pi. 3:1, 2.