1. Yinki nge ke kanisaka na yina me tadila matsyeleka?

 DIKANDA ya Yehova ke zolaka matsyeleka yina ke katukaka na Biblia. Kiminu ya beto ke ya kutungama na yawu. (Rom. 10:17) Beto me ndima ti Yehova me tula kimvuka ya bakristo mutindu “dikunzi mpe lufulu ya butsyelika.” (1 Tim. 3:15) Na kilengi nyonso, beto ke ‘zitisaka bantwadisi ya beto,’ yina ke sadisaka beto na kubakula matsyeleka ya Biblia mpe ke twadisaka beto na kusala luzolo ya Nzambi.​—Ebr. 13:17.

2. Mutindu ke na lakisaka yawu Zaki 5:19, na wapi mutambu beto lenda kubwa na manima ya kundima matsyeleka?

² Zaki 5:19 ke zonzaka: “Bampangi, kana muntu na kati ya beno me zimbana nzila ya butsyelika, mpe kana muntu ya nkaka vutula yandi.” Verse ke na lakisaka ti na manima ya kundima matsyeleka mpe faso ya kutwadisa ya dibuundu ya Yehova, beto lenda zimbana dyaka nzila ya matsyeleka. Satana ke na nsatu beto bika kutula ntima na Biblia mpe na dibuundu ya Yehova.​—Ef. 4:14.

3. Samu na yinki beto me bonga kukangama ngolo na matsyeleka? (Baefeze 6:13, 14)

³ Tanga Baefeze 6:13, 14. Na mwa ntangu, Dyabulu ke mwangisa bamambu ya luvunu samu na kunata makanda nyonso na kutelemina Yehova. (Luz. 16:13, 14) Beto zaba mpe ti Satana ke sala bangolo ya kulutila samu na kuvuna dikanda ya Yehova. (Luz. 12:9) Ni yawu yina, ya ke mfunu samu na beto  na kuzaba kusala luswaswanu na yina me tadila matsyeleka na luvunu mpe kutumama na matsyeleka. (Rom. 6:17; 1 Pi. 1:22) Kusala yawu ke vuukisa beto na mpasi ya nene.

4. Yinki beto ke zonzila na disolo yayi?

⁴ Na disolo yayi, beto ke tala bifu zole yina ke sadisa beto na kuzaba matsyeleka yina me katuka na Biblia, mpe kundima faso ya kutwadisa ya dibuundu ya Nzambi. Na manima, beto ke tala bamambu tatu yina ke sadisa beto na kubika ve kukangama ngolo na matsyeleka.

BIFU YINA KE SADISA BETO NA KUZABA KUSALA LUSWASWANU NA MAMBU YA TSYELEKA NA YA LUVUNU

5. Wa’ faso boma ya Yehova ke sadisaka beto na kulongoka kusala luswaswanu na matsyeleka mpe luvunu?

⁵ Boma ya Yehova. Na manima ya kukulisa boma ya Yehova, beto ke zolaka yandi mingi mpe ya ke salaka ti beto sala ata kima yina ke nyongisa yandi. Samu na kusepelisa Yehova, beto ke na nsatu ya kulongoka kusala luswaswanu na matsyeleka mpe luvunu. (Bin. 2:3-6; Ebr. 5:14) Mingi-mingi, yina ke sepelisaka bantu ke sepelisaka ve Yehova. Na yawu, beto me fwana kubika ata fioti ve boma ya muntu kuma ngolo kuluta luzolo yina beto ke na yawu samu na Yehova.

6. Wa’ faso boma ya bantu nataka babakala 10 ya Izraele na kubalula bamambu?

⁶ Kana boma ya beto ya bantu me lutila ya Nzambi, ya lenda nata beto ntama na matsyeleka. Beto tala kifwani ya babakala 12 yina kwendaka tala bwala yina Yehova zola pesa na bantu ya Izraele. 10 na kati ya bawu bikaka boma yina ba vandaka na yawu samu na bantu ya Kanana kuma ngolo kuluta luzolo ya bawu samu na Yehova. Ba zonzaka na bantu ya Izraele: ‘Beto lenda nwana ve na bantu yina, samu ba kele ngolo kuluta beto.’ (Kut. 13:27-31) Ya tsyeleka, na meso ya bantu, bantu ya Kanana vandaka ngolo kuluta bantu ya Izraele. Kasi kuzonza ti bantu ya Izraele zola  lenda ve kununga bambeni ya bawu, lakisaka ti ba vanda tala ve Yehova. Babakala 10 yayi lungaka kutula makanisi ya bawu na yina Yehova zolaka ti bantu ya Izraele sala. Ba lungaka mpe kuyindula na yina Yehova salaka samu na bawu. Ya zola sadisa bawu na kutala ti ngolo ya bantu ya Kanana vandaka ata kima na mantwala ya ngolo ya kulutila nene ya Yehova. Yozue na Kalebi landaka ve bawu. Ba vandaka na nsatu ya kusepelisa Yehova. Ba zonzaka na dikanda: ‘Kana Yehova ndima beto, ya tsyeleka yandi ke kotisa beto na ntoto yina mpe ke pesa beto yawu.’​—Kut. 14:6-9.

7. Wa’ faso beto lenda kulisa boma ya beto samu na Yehova? (Tala mpe kizizi.)

⁷ Samu na kukulisa boma ya Yehova, ntangu nyonso beto ke bakaka mikanu, beto me fwana kukanisa na yina ke sepelisaka yandi. (Nku. 16:8) Na ntangu nge ke na tangaka masolo ya Biblia, nge me bonga kuyufula: ‘Kana mu vandaka na mantwala ya mambu yayi, wapi mukanu mu zolaka baka?’ Na kifwani, kanisa ti nge ke na kuwaka babakala 10 ya Izraele kupesa nsangu ya yimbi yina. Nge zolaka kwikila kwandi na nsangu yango mpe kuvanda na boma ya bantu? To nge zolaka bika luzolo ya nge samu na Yehova mpe nsatu ya nge ya kusepelisa yandi nunga? Dikanda nyonso ya Izraele ya ntangu yina, talaka ve ti ni Yozue na Kalebi vanda zonza matsyeleka. Ya salaka ti ba kota ve na ntoto ya nsilulu.​—Kut. 14:10, 22, 23.

8. Wapi kifu beto me fwana kusala ngolo na kukulisa, mpe samu na yinki?

⁸ Kukuluka. Yehova ke lakisaka matsyeleka na ba yina ke ya kukuluka. (Mat. 11:25) Beto lakisaka kukuluka ntangu beto ndimaka kulongoka matsyeleka ya Biblia. (Bis. 8:30, 31) Kasi, beto me fwana kusala keba na kukuma ve na lulendo. Kuvanda na lulendo lenda nata beto na kukanisa ti ndwenga ya Biblia mpe ya dibuundu ya Yehova me lutila ve mayela ya beto.

9. Wa’ faso beto lenda vanda kaka ya kukuluka?

⁹ Samu na kuvanda kaka ya kukulaka, beto me fwana kuzimbana ve ti beto ke fioti na mantwala ya Yehova. (Nku. 8:3, 4) Beto lenda sambila Yehova samu yandi sadisa beto na kuvanda ya kukuluka, na kundima yandi longa beto na nzila ya Biblia mpe ya dibuundu ya yandi, mpe na kutala ti ndwenga ya Biblia mpe ya dibuundu ya Yehova me lutila mayela ya beto. Na ntangu yina nge ke na tangaka Biblia, sosa bima yina ke lakisaka ti Yehova ke zolaka kukuluka mpe ke yiinaka lunangu. Sala bangolo ya kulutila na kuvanda kaka ya kukuluka kana nge me kuzwa mikumba yina ke sala ti nge talana na meso ya bantu.

TATAMANA NA KUTUMAMA NA MATSYELEKA

10. Ba nani Yehova vanda sadila samu na kupesa malongi mpe samu na kutwadisa dikanda ya yandi?

¹⁰ Tatamana na kutula ntima na nzila yina dibuundu ya Yehova ke lakisaka nge. Na ntangu ya ntama, Yehova sadilaka Moyize mpe na manima Yozue samu na kutwadisa dikanda ya yandi. (Yos. 1:16, 17) Na ntangu bantu ya Izraele vanda talaka Moyize na Yozue mutindu bantu yina Yehova vanda sadila, ba vanda kuzwaka balusakumunu. Bamvula mingi na manima, ntangu kimvuka ya bakristo butamaka, bantumwa 12 vanda twadisa. (Bis. 8:14, 15) Na manima, ba bwelaka bakuluntu ya nkaka ya Yeruzalemi na kimvuka ya ba yina vanda twadisa. Na kulandaka faso ya kutwadisa ya bantu ya kukwikama yayi, “kiminu ya bandimi na kati ya mabuundu ya Nzambi vwandaka kuma ngolo, mpe kilumbu ni kilumbu, lutangu ya nkaka ya bandimi vwandaka bwelama.” (Bis. 16:4, 5) Kulanda faso ya kutwadisa ya dibuundu ya Yehova ke natinaka beto mpe bambote bubu yayi. Kasi yinki ya ke salaka na  Yehova ntangu beto ke mangaka kundima bantu yina yandi me pesa lutumu? Mambu yina kuminaka na bantu ya Izraele na ntangu ba vanda kota na ntoto ya nsilulu lenda sadisa beto na kuzwa mvutu.

11. Yinki kuminaka bantu ya Izraele yina mangaka kundima Moyize mutindu muntu yina Yehova soolaka samu na kutwadisa? (Tala mpe kizizi.)

¹¹ Na nzyetolo ya kukota na ntoto ya nsilulu, bantu ya kuzabana mangaka kundima lutumu yina Yehova pesaka na Moyize. Ba zonzaka: ‘Kimvuka ya muvimba ya bantu [kaka Moyize ve] kele santu, bawu nyonso, mpe Yehova ke na kati ya bawu.’ (Kut. 16:1-3) Ata ti samu na Yehova ‘kimvuka ya muvimba’ vandaka santu, yandi soolaka Moyize samu na kutwadisa dikanda ya yandi. (Kut. 16:28) Ntangu ba vanda zonzila yimbi ya Moyize, na kutala, ni yimbi ya Yehova ba vanda zonzila. Samu na bawu, mambu ya mfunu vandaka ve luzolo ya Yehova, kasi luzolo ya bawu mosi. Ba vanda sosa kutalana mpe kuzwa lutumu ya kulutila. Yehova kufwaka bantu yina vanda nata muvusu mpe ba yina vanda landa bawu. (Kut. 16:30-35, 41, 49) Bubu yayi mpe, Yehova ke sepelaka ve na ba yina ke zitisaka ve lutwadusu ya dibuundu ya yandi.

12. Samu na yinki beto me fwana kutatamana na kutula ntima na dibuundu ya Yehova?

¹² Beto lenda tatamana na kutula ntima na dibuundu ya Yehova. Na ntangu ya ke talanaka pwelele ti beto me bonga kusala bansobolo na yina me tadila bamambu yina Biblia ke zonzaka to kisalu ya beto ya kusamuna, ba yina ke twadisaka beto ke kimaka ve kusala yawu. (Bin. 4:18) Ba ke salaka yawu samu ti, na bawu kima ya kulutila mfunu ke ni kusepelisa Yehova. Ba ke salaka mpe nyonso samu mikanu ya bawu kwelana na mambu ya Biblia yina Bambangi ya Yehova nyonso me fwana kulanda.

13. Yinki kele “mambu ya tsyelika,” mpe samu na yinki beto me fwana kusadila yawu?

¹³ “Baka mutindu kifwanusu mambu ya tsyelika.” (2 Tim. 1:13) “Mambu ya tsyelika” ni  bandongosolo nyonso ya bakristo yina ke na kati ya Biblia. (Yoa. 17:17) Bamambu nyonso yina beto ke kwikalaka ke katukaka na Biblia. Kimvuka ya Yehova ke lombaka beto na kukwikila kaka na bamambu yina ke ya kusonama na kati ya Biblia. Kana beto sadila yawu, beto ke kuzwa lusakumunu.

14. Wapi mutindu bakristo ya nkaka bikaka kukangama na “mambu ya tsyelika”?

¹⁴ Yinki lenda kumina beto kana beto kangama ve na “mambu ya tsyelika”? Beto baka kifwani. Na siècle ya ntete, ya vandaka na bakristo yina vanda mwangisa nsangu ya luvunu ti, kilumbu ya Nzambi kumaka. Ya lenda vanda ti, ni mukanda mosi yina ba vanda kanisa ti Polo sonikaka vanda zonzila yawu. Bakristo ya nkaka ya Tesalonika bakaka ve ntangu ya kusosa kuzaba kana ya vandaka tsyeleka to ve. Kasi, ba kwikilaka na yawu mpe mwangisaka yawu. Ba zola vuna ve bawu kana ba bambukaka bamambu yina Polo zonzaka ntangu yandi vandaka ntete na bawu. (2 Tes. 2:1-5) Polo lombaka na bawu na kukwikila ve na mambu nyonso yina ba vanda kuwa. Samu ba kubwa dyaka ve na mutambu yina na mantwala, Polo sukisaka mukanda ya yandi ya 2 Batesalonika mutindu yayi: “Yayi mbote ya munu Polo yina mu me sonika na diboko ya munu mosi. Ya ke kidimbu ya munu na konso mukanda. Yayi ni mutindu mu ke sonikaka.”​—2 Tes. 3:17, NWT.

15. Wa’ faso beto lenda bumba bantima ya beto na masolo ya luvunu yina ke talanaka faso matsyeleka? Pesa kifwani. (Tala mpe bizizi.)

¹⁵ Yinki beto lenda longoka na bamambu yina ntumwa Polo sonikaka na bakristo ya Tesalonika? Ntangu beto ke kuwaka nsangu yina ke na kwelanaka ve na mambu yina beto me longoka na Biblia to ntangu beto ke kuwaka disolo yina ke tulaka ntima na zulu, beto me bonga kuvanda na ndwenga. Na Union soviétique, bambeni ya beto lutisaka mukanda mosi yina vanda talana mutindu ya katukaka na biro yina ke twadisaka bisalu ya beto na yinza nyonso. Mukanda yango vanda zonzila na bampangi ya nkaka na kukabuka na dibuundu ya Yehova mpe kufungula dibuundu ya malu-malu. Mukanda yango  vanda talana mutindu ya vandaka ya tsyeleka. Kasi, bampangi bikaka ve ba vuna bawu. Ba talaka ti mambu yina mukanda vanda zonzila vanda kwelena ve na mambu yina ba longokaka. Bubu yayi, bambeni ya Yehova ke sadilaka internet na bima ya nkaka samu na kuvuna beto mpe kubebisa bumosi ya beto. Beto bika ve “mabanza ya [beto] kuma kidi-kidi na mbangu.” Beto lenda bumba bantima ya beto na kutalaka mbote-mbote kana mambu yina beto me tanga to kuwa ke na kwelanaka na matsyeleka ya Biblia.​—2 Tes. 2:2, NWT; 1 Yoa. 4:1.

16. Kaka faso ke na lakisaka yawu Baroma 16:17, 18, yinki beto me fwana kusala kana muntu me tengama na matsyeleka?

¹⁶ Bumba bumosi na ba yina ke ya kukangama na Yehova. Yehova zola ti beto sadila yandi na bumosi. Beto ke bumba bumosi ya beto kana beto kangama na matsyeleka. Muntu nyonso yina ke mwangisaka bansangu ya luvunu ke katulaka bumosi na kati ya kimvuka. Na yawu, Nzambi me zonza na beto, beto “vanda ntama na bawu.” Kana beto sala ve yawu, beto mosi lenda tengama na matsyeleka.​—Tanga Baroma 16:17, 18, NWT.

17. Yinki beto ke kuzwa kana beto ndima matsyeleka mpe beto kangama ngolo na yawu?

¹⁷ Kundima matsyeleka mpe kukangama na yawu ke sadisa beto na kuvanda pene-pene na Yehova mpe na kubumba kiminu ya beto ngolo. (Ef. 4:15, 16) Beto ke bika ve malongi mpe bamambu nyonso ya luvunu yina Satana ke mwangisaka vuna beto, mpe Yehova ke bumba beto na ntangu ya mpasi ya nene. Tatamana na kukangama na mambu yina ke tsyeleka, ‘mpe Nzambi ya kizunu ke vanda na nge.’​—Flp. 4:8, 9, NWT.