BETO nyonso ke ndimá ti, ni Yehova ke na twadisá mpe ke na kipeke bisadi ya yandi na “bantangu yayi ya mansukina.” (2 Tim. 3:1) Na yina, beto nyonso zolá landa misiku ya Yehova. Mpe beto lenda zonza ti, beto ke faso ba-izraelite ntangu ba vandá na kati ya dezert. Ntangu trompete vandá bulá, ya vandá samu na kulakisa bawu yinki ya kusala.

Yehova lombá na Moyize na kusala batrompete zole ya kisengo (argent) samu yandi “sadila yawu na kubokila kimvuka nyonso ya ba-izraelite mpe samu na kukatula bakamp.” (Kut. 10:2) Ba-pretre vandá bulá trompete na bafaso mingi samu na kuzonzila na ba-izraelite yinki ba zolá sala. (Kut. 10:3-8) Bubu yayi, bisadi ya Yehova ke kuzwá misiku na bafaso mingi. Na disolo yayi, beto ke zonzila bafaso tatu yina beto ke kuzwá misiku mpe ke zaba na yinki ya ke faso ntangu ba vandá bulá batrompete na Izraele. Ba faso tatu yango ke, ntangu ba ke bokilá beto na balukutakanu ya nene, ntangu bakuluntu ke zwá formasion mpe ntangu ba ke sobá faso ya kutambula mpe ya kusala ya kimvuka ya Yehova.

Ntangu Yehova vandá zola ti “ba-izraelite nyonso” vukana na mantwala ya Est ya tabernakle, baprete vandá bula trompete. (Kut. 10:3) Makanda nyonso vandá kabuká na bitini 4 samu na kuvukana pene-pene ya tabernakle. Samu ya salama, ba vandá bulá trompete na bafaso mingi. Ba yina vandá zinga pene-pene ya tabernakle vandá kuma na balukutakanu na baminute fioti. Kasi ba yina vandá ntama, ya vandá lomba na bawu bangolo mpe ntangu mingi na kukuma kuna. Ata faso yina, Yehova vandá zola ti bawu nyonso vukana samu na kuwa misiku ya yandi.

Bubu yayi, beto ke vukaná dyaka ve na mantwala ya tabernakle, kasi ba ke bokilá beto na balukutakanu ya nene ya bisadi ya Yehova. Na kati ya balukutakanu yango beto lendá zonzilá balukutakanu ya bilumbu tatu mpe ya nkaka. Ni kuna beto ke zwá malongi mpe bansangu ya mfunu. Na yinza, bisadi ya Yehova nyonso ke sepalá na baprograme ya faso yina. Mpe ba yina ke kwizá na balukutakanu yina, ke talá kilengi ya kuvanda kintwadi na bampangi ya bawu. Ba ya nkaka ke salá bavoyage ya yinda, ba ya nkaka ve. Kasi, bawu nyonso me zaba ti, ya ke mbote na kusala bangolo samu na kuvanda na balukutakanu.

Ba yina ke vandá ntama mingi na bisika yina balukutakanu ya beto ke salamá, bawu mpe lenda kuzwa kwandi bambote ya balukutakanu yango? Na nzila ya ba-apareye yina me basika ntama mingi ve, mingi ya bawu lenda landa balukutakanu kisika yina ba kele, mpe kutala yawu nete ba ke kuna. Na kifwani, ntangu mpangi yina siège mondial filisá, kwizá na bethel ya Bénin, bampangi yina ke na Arlite, mosi ya babwala  ya Niger yina ke na dezert ya Sahara, landá lukutakanu yina yandi salá, na nzila ya ba-apareye. Bantu kuluta 21 landá programe yango. Na kati ya bawu, ya vandá na bampangi zole ya bakala na ya kento mpe na ba yina ke zolá malongi ya beto. Ata ba vandá ntama, kasi ba talá nete ba vukaná na kimvuka ya 44131 ya bampangi yina vandá na lukutakanu. Mpangi mosi soniká: “Matondo mingi samu beno me sadisa beto na kulanda programe yina. Ya me lakisa dyaka faso yina beno ke tulá beto na bantima ya beno.”

Ntangu ba vandá bulá trompete kaka mbala mosi, ya vandá samu na kubokila “bamfumu ya bantu 1000,” na kukwiza na lukutakanu. (Kut. 10:4) Na balukutakanu yina, Moyize vandá pesa bawu formasion to bansangu. Ya vandá sadisá bawu na kusala mbote-mbote bisalu yina ba vandá pesa bawu na kati ya makanda ya bawu. Si nge vandá mosi ya bamfumu yina, nge zolá sala ve nyonso samu na kuvanda na balukutakanu yango?

Bubu yayi, bakuluntu ya kimvuka ke ve “bamfumu”. Mpe, ba ke sosá ve kuyala na zulu ya mameme ya Nzambi yina ba ke na kipeke. (1 Pi. 5:1-3) Kasi ba ke salá bangolo ya bawu na kutwadisa na faso ya mbote mameme. Mpe na ntima nyonso, ba ke ndimá ntangu ba ke bokilá bawu na kuzwa baformasion faso Ecole du Ministère du Royaume. Na baformasion yango, bakuluntu ke longoká faso ya mbote ya kuyidika bamambu na kimvuka. Na yawu, bawu mpe kimvuka nyonso lenda vanda na kindiku ya ngolo na Yehova. Ata nabunu nge sala mosi ya balekole yayi, nge lenda kuzwa bambote ya yawu, samu ti ba yina salak’ yawu ke sadilá yina ba ke longoka samu na kusadisa kimvuka.

Ntangu ya nkaka, bapretre vandá bulá trompete samu makelele wakaná ngolo mpe malembe. Ya vandá samu na kuzabisa ti, Yehova me lomba na bawu nyonso na kukwenda. (Kut. 10:5, 6) Ba-izraelite vandá kwendá na buzitu, mpe ba vandá nwaniná ve nzila. Na kusala yawu, ya vanda lomba bawu bangolo mingi. Ntangu ya nkaka, ba-izraelite ya nkaka vandá zolá ve kukwenda kisika ya nkaka. Samu na yinki?

Ya lenda vanda samu ba vandá zaba ve samu na yinki ba zolá kwenda bisika mingi mpe na ntangu yina ba vandá vingila ve. “Bantangu ya nkaka nuage vandá bikaná kuna katuka na nkokila tii na suka”. Na bantangu yina “nuage vandá sala bilumbu zole, ngonda mosi to bilumbu mingi” (Kut. 9:21, 22) Bambala yikwa ba-izraelite changeke bisika ya kuvanda? Buku ya kutanga na kikapu 33, me zonzila bambala 40.

Ntangu ya nkaka ba-izraelite vandá salá mwa bilumbu na bisika yina vandá na mpewo, kisika ya kitoko na kuvanda. Samu ti, ba vandá na kati ya “dezert ya nene yina vandá pesa boma.” (Kul. 1:19) Na yawu, ba ya nkaka vandá na boma ya kukatuka kisika yina ba vandá, samu na kukwenda ve na kisika yina lenda vanda yimbi.

Ntangu ba vandá banda kukwenda, ba ya nkaka vandá lenda ve na kuvingila tii ntangu ya bawu ya kukwenda ke lunga. Bawu nyonso vandá kuwa ntangu trompete vanda bulá, kasi ba zolá kwenda ve bawu nyonso na mbala mosi. Makanda yina vandá kwenda ntete, ni yina vandá na Est ya kamp, ya vandá dikanda ya Juda, Issakar, mpe Zabulon. (Kut. 2:3-7; 10:5, 6) Na manima bapretre vandá bula dyaka trompete, mpe makanda tatu yina vandá na Sud vanda kwendá. Bapretre vandá salá faso yina tii ntangu bana ya Izraele nyonso ke kwenda.

Ya me kuminá deja nge na kuvanda na makanisi mingi samu mambu ya nkaka ya kimvuka ya Yehova ke na changeke. Nge lenda kanisa ti mambu yina ke na changeke na kimvuka me lutila mingi. Ntangu ya nkaka nge me zola faso bamambu ke na salamá, na yina, nge zola ve ti ya soba. Ya lenda vanda mpasi na nge na kukanga ntima mpe na kusadila misiku to mambu yina me soba, mpe ya lenda baka beto ntangu na kulanda nzila yina ba ke na lakisa beto. Na nyonso, si beto sala bangolo na kundima mpe kusadila mambu yina me soba, beto ke kwiza tala ti ya vandá mbote samu na beto, mpe beto ke sepelisa Yehova.

Na ntangu ya Moyise, Yehova twadisá bamilion ya babakala, bakento na bana na kati ya dezert. Si Yehova twadisá mpe kipeke ve bawu, ba zolá vuuka ve. Bubu yayi, Yehova ke na twadisá beto na kati ya bantangu yayi ya nsuka yina me fuluka na bamambu ya yimbi. Yandi ke na sadisá beto na kuvanda na kindiku ya mbote na yandi, mpe ke na salá ti kiminu ya beto vanda ngolo! Beto zola sala nyonso yina me lunga na bangolo ya beto, samu na kulanda misiku ya Yehova faso salá ba-izraelite yina zabá kuwa batrompete!