ARTIKLE YA KULONGOKA 25
“Mu ke sosa mameme ya munu, munu mosi”
“Mu ke sosa mameme ya munu, munu mosi, mpe mu ke [kipe] bawu.”—EZK. 34:11.
NZIMBU 105 “ Dieu est amour ”
YINA BETO KE LONGOKA *
1. Samu na yinki Yehova ke nete mama yina ke na pesá mwana ya yandi mabene?
“KENTO lenda zimbana kwandi mwana ya yandi yina ke na nwá ntete mabene?” Ni kyuvu yayi Yehova yufulá na bilumbu ya profete Izaya. Nzambi zonzá na dikanda ya yandi: “Ata ya lenda kumina bakento yayi na kuzimbana [bana ya bawu], kasi munu, mu ke zimbana nge ata fioti ve.” (Iza. 49:15) Yehova ke ve na kifu ya kubaká kifwani ya mama. Kasi awa, yandi salak’ yawu. Yehova sadilá kifwani ya mama na mwana ya yandi, samu na kulakisa faso yandi ke na luzolo mingi samu na bisadi ya yandi. Bamama mingi lenda kanisa faso mosi na Jasmin, yina zonzá: “Ntangu nge ke pesá mwana mabene, nge ke tunga kindiku ya ngolo tii na lufwa.”
2. Yinki ya ke salá Yehova na ntima ntangu mosi ya bana ya yandi ke biká kimvuka?
2 Yehova zaba ntangu mosi ya bisadi ya yandi ke biká kusala kisalu ya predikasion, mpe ke kwendá dyaka ve na balukutakanu. Na yawu, yandi ke nyongá mingi, samu ti bamvula nyonso, mingi ya bisadi ya yandi ke biká kimvuka. *
3. Yehova zola yinki?
3 Mingi ya bampangi yina kotá madidi ke vutuká na kimvuka, mpe ya ke salá beto kilengi mingi ntangu ba ke salak’ yawu! Yehova zola ti ba vutuka na kati ya kimvuka ya yandi, beto mpe. (1 Pi. 2:25) Wa’ faso beto lenda sadisa bawu na kuvutuka? Avant beto pesa mvutu na kyuvu yayi, ya ke vanda mbote na kuzaba samu na yinki mingi ke biká kimvuka, mpe ke biká kusala kisalu ya predikasion.
SAMU NA YINKI BANTU YA NKAKA KE BIKÁ KUSADILA YEHOVA?
4. Yinki ke kuminá bantu mingi ntangu ba ke tulá bisalu ya bawu na kisika ya ntete na luzingu ya bawu?
4 Ba ya nkaka me tulá bisalu ya bawu na kisika ya ntete na luzingu ya bawu. Hung, * mpangi mosi ya bakala yina ke vandá na Asie me zonza: “Mu vandá lutisá bantangu mingi na kisalu. Na buzoba nyonso mu vandá kanisa ti, si mu vanda na mbongo mingi, mu ke lenda sadila mbote-mbote Yehova. Na yawu, mu vandá lutisá bantangu mingi na kisalu. Malembe-malembe mu bandá kukima balukutakanu tii mu biká kimvuka. Satan ke sadilá yinza samu, malembe-malembe yandi nata bantu na kubika kusadila Nzambi.”
5. Yinki mulonga ya bampasi salá na mpangi mosi ya kento?
5 Bampangi ya kento na ya bakala ke ya kufuluka na bamambu ya mpasi. Anne ya bwala ya Angleterre ke na bana tanu (5). Yandi me zonza: “Mwana ya munu ya zole ya bakala butamá na maladi mosi ya ngolo. Na manima, ba basisá mwana ya munu ya tatu na kimvuka, mpe mwana ya munu ya nkaka bandá kubela maladi ya yintu. Mu kumá na basusi ya ngolo yina natá munu na kubika kukwenda na balukutaka mpe kusala kisalu ya predikasion. Malembe-malembe, mu kwiza kota madidi.” Bantima ya beto ke na kabulá mpasi yina Anne na dikanda ya yandi ke na lutisá, mpe bampasi yina bampangi ya nkaka ke na bwabanaka.
6. Wa’ faso muntu lenda bika kimvuka si yandi sadila ve Bakolose 3:13?
6 Tanga Bakolose 3:13. Mingi ya bisadi ya Yehova me kumá na nkele samu na mambu yina mpangi mosi ya kimvuka salaka. Apotre Paul kwiza ndima ti, ya lenda vanda na barezon yina lenda nata beto na kuvanda na nkele mpe kuzonzila mambu yina mpangi me sala. Ntangu ya nkaka ba lenda vunisa beto bamambu. Si beto sala ve keba, beto lenda bumba nkele na ntima. Si muntu me bumba nkele, yandi lenda kwenda ntama na dikanda ya Yehova. Beto tala kifwani ya Pablo mpangi mosi ya Amerike ya Sud. Ba vunilá Pablo mambu yina yandi salá ve. Bakuluntu mpe ndimá mambu yango, mpe ba katulak’ yandi ba-resposabilite yina vandá na yandi na kati ya kimvuka. Wa’ faso yandi bakilak’ yawu? Pablo me zonza: “Mu dasuká, mpe malembe-malembe ya natá munu na kubika kimvuka”.
7. Ntima yina ke ve na kizunu, yinki ya lenda natina muntu?
7 Si muntu salá disumu ya ngolo na ntama, ntima ya yandi lenda kwamisa yandi ntangu nyonso mpe kuvanda dyaka ve na kizunu. Ata yandi nyongá masumu ya yandi mpe Yehova lemvokilak’ yandi, yandi lenda kanisa ti, yandi me bonga dyaka ve na kuvanda na kati ya dikanda ya Yehova. Francisco vandá mpe na makanisi ya faso yayi. Yandi me zonza. “Ba pesá mu disipline samu mu salá kinsunza. Ata ti mu biká ve kukwenda na balukutakanu, mu fuluká na basusi mpe mu bandá kutala ti, mu me lunga dyaka ve kuvanda na kati ya dikanda ya Yehova. Mu vandá ve na kizunu na ntima, mpe mu bandá kutala ti, Yehova lemvokilá ve munu. Malembe-malembe mu biká kukwenda na balukutakanu, mpe kusala kisalu ya predikasion.” Yinki nge ke kanisá samu na bampangi yina ke na kutaná na bamambu yayi beto me zonzila? Nge ke vandá na mawa ya bawu? Ya kulutila mfunu, yinki Yehova ke kanisá samu na bawu?
YEHOVA ZOLA BISADI YA YANDI
Ntwadisi ya mameme mosi ya bwala ya Izraele ke na kipeke mbote-mbote dimeme yina zimbanaka (Tala baparagrafe 8-9) *
8. Yehova ke zimbaná kwandi ba yina vandá sadilak’ yandi? Zonzila yawu.
8 Yehova me zimbana ve bantu yina vandá sadilak’ yandi, kasi ba me kota madidi na mwa ntangu fioti. Yandi lenda zimbana ve nyonso yina ba salá samu na yandi. (Ebr. 6:10) Samu na kulakisa faso Yehova ke bakila bisadi ya yandi, profete Izaya me sadila kifwani mosi ya kitoko. “[Faso ntwadisi ya mameme], yandi ke kipeke mameme ya yandi. Na diboko ya yandi, yandi ke vukisa bana ya mameme, mpe yandi ke nata bawu na ntulu ya yandi.” (Iza. 40:11) Yinki ya ke salá ntwadisi ya mameme ya nene Yehova, na ntima, ntangu mosi ya bisadi ya yandi ke biká kusadila yandi? Yesu lakisá pwelele makanisi ya Yehova ntangu yandi yufulá bilandi ya yandi: “Yinki beno me kanisa? [Si] muntu ke na mameme 100 mpe dimeme mosi me zimbana, yandi ke bika mameme 99 yina me zimbana ve na zulu ya mongo, mpe ke kwenda sosa dimeme yina me zimbana? Ya tsyeleka mu ke na zonzá na beno: [Si] yandi kuzwa yawu, yandi ke vanda na kilengi mingi samu na dimeme yina, kuluta kilengi yina ke na yandi samu na mameme 99 yina me zimbana ve.”—Mat. 18:12, 13, nwt-MK.
9. Na ntama, wa’ faso ntwadisi ya mameme ya mbote vandá bakilá mameme ya yandi? (Tala foto ya kuverture.)
9 Samu na yinki beto lenda fwanisa Yehova na ntwadisi ya mameme? Samu ti na ntangu ya ntama, ntwadisi ya mameme ya mbote vandá kipeke mbote-mbote mameme ya yandi. Na kifwani, David nwanisá nkosi mpe urse samu na kubumba mameme ya yandi. (1 Sa. 17:34, 35) Ntwadisi ya mameme ya mbote zolá zaba si mosi ya mameme ya yandi me zimbana. (Yoa. 10:3, 14) Ntwadisi ya mameme ya faso yayi ke bika mameme 99 na ntwadisi ya mameme ya nkaka, samu na kwenda sosa dimeme yina me zimbana. Yesu sadilá kifwani yayi samu na kulonga beto matsyeleka mosi ya mfunu: “Tata ya munu yina ke na mazulu zola ti ata muntu mosi na kati ya bana ya fioti yayi kufwa.”—Mat. 18:14.
Na Izraele ya ntama, ntwadisi ya mameme ke na kipeke mbote-mbote dimeme ya yandi yina zimbaná (Tala paragrafe 9)
YEHOVA KE SOSÁ MAMEME YA YANDI
10. Na Ezekiele 34:11-16, wapi promese Yehova pesá samu na mameme ya yandi yina me zimbana?
10 Yehova ke zolá mosi na mosi ya beto, mpe mwana ya fioti yina me kwenda ntama na kimvuka. Na nzila ya profete Ezekiele, Yehova pesá promese ya kusosa mameme ya yandi yina zimbaná, mpe sadisá bawu na kuvutula kindiku ya mbote na yandi. Mpe yandi zonzá yinki yandi ke salá samu na kuvuukisa bawu. Yina yandi ke sala ke faso mosi na yina ntwadisi ya mameme ya Izraelite zolá sala si dimeme ya yandi me zimbana. (Tanga Ezekiele 34:11-16.) Ntete-ntete, ntwadisi ya mameme zolá sosa dimeme ya yandi, ya ke lomba bangolo mingi na kusala yawu. Ntangu yandi ke tala dimeme yina me zimbana, yandi ke nata yawu kisika mameme ya nkaka kele. Dyaka, si dimeme ke ya kulwala to ke na nsatu, ntwadisi ya mameme zolá sadisa yandi, kukipe bamputa ya yandi, kulakisa yandi luzolo, mpe kudikisa yandi. Bakuluntu, bantwadisi ya mameme ya Nzambi, zolá sala mpe faso mosi, samu na kusadisa muntu nyonso yina me kwenda ntama na kimvuka. (1 Pi. 5:2, 3) Bakuluntu ke sosá ba yina me zimbana, ke sadisá bawu na kuvutuka na kimvuka, mpe na luzolo nyonso ke sadisá bawu na kuvutula kindiku ya bawu na Yehova. *
11. Yinki ntwadisi ya mameme ya mbote zaba?
11 Ntwadisi ya mameme ya mbote ke zabá ti dimeme lenda zimbana. Mpe si dimeme me bika kimvuka, ntwadisi ya mameme ke ngala ve yandi. Beto tala kifwani yina Nzambi biká na faso yina yandi sadisá ndambu ya bisadi ya yandi yina, na mwa ntangu fioti, kwendá ntama na Yehova.
12. Wa’ faso Yehova bakilá Yona?
12 Profete Yona kuwá ve Yehova mpe mangá kukwenda na Ninive. Kasi, Yehova losá ve Yona. Faso ntwadisi ya mameme ya mbote, Yehova vuukisak’ yandi mpe sadisak’ yandi na kuzwa ngolo yina yandi vandá na yawu nsatu, samu na kulungisa kisalu yina Yehova pesak’ yandi. (Yona 2:7; 3:1, 2) Na manima, Nzambi sadilá mwa yinti samu na kusadisa Yona na kuzaba ti, luzingu ya muntu nyonso ke ntalu na meso ya Nzambi. (Yona 4:10, 11) Wapi kileso samu na beto? Bakuluntu zolá lemba ve na mbangu kusadisa ba yina me kota madidi. Kasi, bakuluntu ke sosá kuzaba yinki me nata dimeme na kubika kimvuka. Mpe ntangu dimeme ke vutuka na Yehova, bakuluntu zolá lemba ve na kulakisa yandi luzolo.
13. Yinki beto lenda longoka na faso Yehova bakilá muntu yina soniká Nkunga 73?
13 Muntu yina soniká Nkunga 73 kumá ya kulemba, ntangu yandi talá faso luzingu ya muntu yina ke salá mambu ya yimbi ke talaná nete ya ke ya kubonga. Yandi yufulá si kusala luzolo ya Nzambi ke natá kwandi bambote. (Nku. 73:12, 13, 16) Wa’ faso Yehova bakilak’ yawu? Yandi ngalá ve yandi. Kasi, Nzambi biká basonika mambu yina na kati ya Biblia. Malembe-malembe, yandi kwizá zaba ti ya ke ve na kima ya mbote na luzingu, yina me lutila kuvanda na kindiku na Yehova. (Nku. 73:23, 24, 26, 28) Wapi kileso samu na beto? Bakuluntu zolá juge ve na mbangu ba yina me banda kutula ntembe na bambote yina kusadila Yehova ke nataka. Na kisika ya kujuge bawu, bakuluntu me lunga kusosa kuzaba samu na yinki ba ke na zonzá mpe ke na dyatilá faso yina. Ni kuna, ba lenda sadila Biblia samu na kusadisa bawu.
14. Samu na yinki Elie vandá na nsatu ba sadisa yandi, mpe wa’ faso Yehova sadisak’ yandi?
14 Profete Elie vandá kima mfumu ya kento, Jézabel. (1 Mf. 19:1-3) Yandi vandá kanisa ti ata muntu dyaka vandá sadila Yehova faso profete, mpe yandi vandá kanisa ti kisalu ya yandi vandá ya mpamba. Elie fuluká na basusi, mpe ya natak’ yandi na kusosa lufwa. (1 Mf. 19:4, 10) Na kisika ya kungala Elie, Yehova sadisak’ yandi na kuzaba ti yandi vandá ve yandi mosi, yandi zolá tula ntima na ngolo ya Nzambi. Mpe yandi vandá ntete na mingi ya kusala samu na Yehova. Na ntima ya mbote nyonso, Yehova kuwá Elie mpe pesak’ yandi kisalu ya malu-malu. (1 Mf. 19:11-16, 18) Wapi kileso samu na beto? Beto nyonso, mingi-mingi bakuluntu, zolá lakisa ntima ya mbote na faso ya kubakila bisadi ya Yehova. Si muntu zonza ti yandi ke na nkele to ke na kanisá ti Yehova ke lemvokila yandi ata fioti ve, bakuluntu ke kuwa yandi mbote-mbote ntangu yandi ke basisa yina ke na yandi na ntima. Mpe kuna, ba ke sosa kusadisa dimeme yina me zimbana na kuzaba ti Yehova ke zolá kaka yandi.
YINKI YA KE SALÁ BETO NA NTIMA NTANGU BETO KE TALÁ MAMEME YA NZAMBI YINA ME ZIMBANA?
15. Na Yoane 6:39, wa’ faso Yesu ke bakilá mameme ya Tata ya yandi?
15 Yinki Yehova zola beto kanisa samu na mameme ya yandi yina me zimbana? Kifwani ya Yesu lenda longa beto. Yandi zabá ti mameme ya Yehova nyonso ke mfunu na meso ya yandi, na yawu, Yesu salá nyonso samu na kusadisa mameme ya yinzo ya Izraele yina zimbaná, na kuvutuka na Yehova. (Mat. 15:24; Luke 19:9, 10) Yesu ke ntwadisi ya mbote ya mameme, yandi salá nyonso samu na kuzimbisa ve mameme ya Yehova.—Tanga Yoane 6:39.
16-17. Wa’ faso bakuluntu zolá kanisa na yina me tadila kusadisa ba yina me zimbana? (Tala tablo “Wapi makanisi lenda vanda na dimeme yina me zimbana.”)
16 Apotre Paul lombá na bakuluntu ya kimvuka ya Efeze na kulanda kifwani ya Yesu. “Beno me lunga kusadisa ba yina ke ya kulemba, mpe beno me lunga kubambukila moyo na mambu yina yandi mosi Mfumu Yesu zonzá: ‘kilengi ke vandá mingi na kupesa, kasi na kuzwa, kilengi ke vandá fioti.’” (Bis. 20:17, 35) Nyonso yayi ke na lakisá ti, bakuluntu ke na responsabilite ya nene ya kukengidila dikanda ya Yehova. Salvador, mosi ya bakuluntu ya kimvuka ya bwala ya Espagne zonzá: “Ntangu mu ke talá faso Yehova ke kipeke mameme ya yandi yina me zimbana, ya ke pesá munu ngolo ya kusala nyonso yina mu lenda sala, samu na kusadisa bawu. Mu zaba ti Yehova zola mu kipe bawu.”
17 Bantu nyonso yina biká kimvuka yina artikle yayi me zonzila, ba sadisá bawu na kuvutuka na Yehova. Na ntangu yayi, mingi ya ba yina biká kimvuka ke na sosá mpe kuvutuka. Artikle yina ke landa, ke zonzila pwelele yinki beto lenda sala samu na kusadisa bawu na kuvutukila Yehova.
NZIMBU 139 Imagine-toi dans le monde nouveau
^ par. 5 Samu na yinki bantu ya nkaka yina vandá sadilá Yehova bamvula mingi, me biká kimvuka? Yinki ya ke salá Nzambi na ntima? Artikle yayi ke pesa bamvutu na byuvu yayi. Ya ke zonzila mpe yina beto ke longoka na faso Yehova sadisá na ntangu ya ntama ba yina biká kusadila yandi na mwa ntangu fioti.
^ par. 2 YINA YA ZOLA ZONZA: Proklamatere yina me kota madidi to me bika kimvuka, ke mpangi yina me sala ve kisalu ya predikasion na kati ya bangonda sambanu (6) to kuluta. Ata faso yina, ba yina me kota madidi ke kaka bampangi ya beto, mpe beto ke zolá bawu.
^ par. 4 Ba me soba bankumbu ya nkaka.
^ par. 10 Artikle yina ke landa ke zonzila wa’ faso bakuluntu lenda sala bima tatu yayi.
^ par. 60 YINA BAFOTO KE NA ZONZILAKA: Na yina me tadila dimeme yina me zimbana, ntwadisi ya mameme na Izraele, zolá kwenda sosa yandi, mpe kusadisa yandi na kuvutuka kisika mameme ya nkaka kele. Bubu yayi, ntwadisi ya mameme ya kimpeve ke salá faso mosi na ntwadisi ya mameme ya ntama.
^ par. 64 YINA BAFOTO KE NA ZONZILAKA: Mpangi mosi ya kento yina kotá madidi ke na vingilá bus, mpe ke na talá batemwe zole yina, na kilengi nyonso ke na salá prezantwar.
