1. Yinki Yehova salá samu na mosi na mosi ya beto?

YEHOVA bendá mosi na mosi ya beto na kote ya yandi. (Yoa. 6:44) Kanisa na yina ya zola zonza. Ntangu Yehova vandá tala bamiliard ya bantu yina ke na yinza yayi, yandi talá kima ya valere na kati ya nge: ntima ya mbote yina lenda zola yandi. (1 Ns. 28:9) Yehova zaba nge, yandi ke komprendre nge mpe ke zolá nge. Ya ke mambu mosi yina ke na pesá beto kuraje!

2. Wapi ekzample Yesu sadilá samu na kulakisa luzolo yina Yehova ke na yawu samu na mosi na mosi ya mameme ya yandi?

² Yehova ke zolá nge mingi, yandi ke zolá mpe bampangi ya nge nyonso ya kento na ya bakala. Samu na kusadisa beto na kukomprendre mambu yayi, Yesu kompareke Yehova na ntwadisi mosi ya mameme. Si dimeme mosi na kati ya mameme 100 me zimbana, yinki ntwadisi ke sala? Yandi ke “bika mameme [99 na zulu ya ba-montagne], mpe ke kwenda kusosa dimeme yina me zimbana.” Ntangu ntwadisi me kuzwa dimeme yango, yandi ke dasukila ve yandi. Yandi ke sepela. Wapi leson samu na beto? Mosi na mosi ya mameme ya Yehova ke na valere ya mingi na meso ya yandi. Yesu zonzá: ‘Papa ya munu yina ke na zulu ke ve na nsatu mosi ya bana ya fioti yayi kufwa.’—Mat. 18:12-14.

3. Yinki beto ke zonzila na artikle yayi?

³ Beto zola ata fioti ve ti mpangi ya beto nyonga samu na beto. Yinki beto lenda sala samu beto bwisa ve bampangi ya beto? Mpe yinki beto lenda sala si mpangi mosi me lwalisa beto? Na artikle yayi, beto ke kuzwa bareponse na bakestion yayi. Kasi, beto tala ntete ‘bana ya fioti yayi’ ke zonzilá Matayi 18 ke banani.

4. ‘Bana ya fioti yayi’ ke banani?

⁴ ‘Bana ya fioti yayi’ ke badisiple ya Yesu ya ba-aje nyonso. Bawu nyonso ke faso bana ya fioti samu ba ke ndimá malongi ya Yesu. (Mat. 18:3) Bawu nyonso ke katuká ve na bwala mosi, ba ke ve na bifu mosi, mpe ba ke salá ve bamambu faso mosi. Kasi bawu nyonso ke na kiminu na Yesu. Yesu mpe ke zolá bawu mingi. —Mat. 18:6; Yoa. 1:12.

5. Yinki ya ke salá Yehova ntangu muntu ke bwisá to ke lwalisá mosi ya bisadi ya yandi?

⁵ ‘Bana ya fioti yayi’ nyonso ke na valere na meso ya Yehova. Samu na kuzaba luzolo yina yandi ke na yawu samu na beto, beto kanisa na faso beto ke tadilá bana ya fioti. Beto ke zolá mingi bana. Samu ba ke ve na ngolo, ba zaba ve mambu mingi, mpe ba ke ve na mayela faso bantu ya kukula, beto ke salá nyonso samu na kubumba bawu. Beto ke zolá ve kutala muntu ke na talisá muntu ya nkaka mpasi, kasi ya ke pesá dyaka beto kolere ya kulutila ntangu muntu yina ba ke na talisá mpasi ke mwana ya fioti. Faso mosi mpe, Yehova ke na nsatu ya kubumba beto. Yandi ke kumá na kolere ntangu muntu ke lwalisá to ke bwisá mosi ya bisadi ya yandi.—Iza. 63:9; Mrk. 9:42.

6. Faso ke zonzá 1 Bakorinto 1:26-29, wa’ faso yinza ke talá badisiple ya Yesu?

⁶ Na wa’ faso ya nkaka badisiple ya Yesu ke faso ‘bana ya fioti’? Wapi kalite ya bantu yinza ke pesá valere? Yinza ke pesá valere na ba yina ke na mbongo mingi, ke ya kuzabana mpe ba yina ke na otorite. Kasi, mingi ya badisiple ya Yesu ke ve na bima yayi. Na yawu, bantu ya yinza ke talá ti ba ke kaka bantu ya mpamba, ‘bana ya fioti’ yina ke ve na valere. (Tanga 1 Bakorinto 1:26-29.) Kasi Yehova ke talá ve bawu faso yina.

7. Wa’ faso Yehova zola beto tadila bampangi ya beto?

⁷ Yehova ke zolá bisadi ya yandi nyonso, ya vanda ba yina ke sadilá yandi depuis ntama to ba yina me banda kusadila yandi. Samu bampangi ya beto nyonso ke na valere na meso ya Yehova, beto mpe zolá pesa bawu valere. Beto me lunga ‘kuzola kimvuka nyonso ya bampangi,’ kaka ve ndambu ya bawu. (1 Pi. 2:17) Beto zolá ezite ve na kusala nyonso yina beto lenda sala samu na kubumba bawu mpe kukipe bawu. Si beto me kuwa ti beto me lwalisa to me nyongisa mpangi ya beto, beto zolá sala ve nete ya ke kaka mambu ya fioti, mpe kukanisa ti mpangi ya beto ke lemvokila kaka beto mpe ke zimbana yawu. Samu na yinki ba ya nkaka ke lwalá na mbangu? Samu na barezon mingi. Na faso yina ba kulá, bampangi ya nkaka ke talá ti bampangi me lutila bawu. Ba ya nkaka, samu ba me kwiza na laverite ntama mingi ve, ntangu ya nkaka nabunu ba longoka kulemvokila bampangi. Ya vanda ni beto muntu me lwalisa mpangi to mpangi me lwalisa beto, beto zolá sala nyonso na kuyidika mambu. Dyaka, muntu yina ke nyongá souvent na bamambu yina ke zonzá to ke salá bampangi, zolá ndima ti ya ke kifu mosi ya yimbi, yina yandi zolá sala bangolo na kukatula. Si yandi sala yawu, yandi ke vanda na kilengi mpe kikamarade ya mbote na bampangi.

8. Wapi makanisi bantu vandá na yawu na ntangu ya Yesu yina badisiple mpe vandá na yawu?

⁸ Samu na yinki Yesu zonzilá mambu ya ‘bana ya fioti’? Badisiple yufulá yandi kestion yayi: “Nani [ya vrai ke muntu ya kulutila] nene na Kimfumu ya zulu?” (Mat. 18:1, nwt-MK) Bajwif mingi na ntangu yina vandá tala ti kuvanda na otorite mpe kuvanda muntu ya nene vandá important. Muntu mosi yina ke salá ba-recherche na bamambu mingi zonzá: “Kuzwa nkembo ya bantu mpe kuvanda muntu ya kuzabana vandá kima ya kulutilá important na luzingu ya bawu.”

9. Yinki badisiple ya Yesu zolá sala?

 ⁹ Yesu zabá ti Bajwif mingi vandá kanisa ti ya ke mbote na kulutila bampangi. Na yawu, badisiple ya yandi zolá sala bangolo na kuchanje makanisi yayi. Yandi zonzá na bawu: ‘Muntu ya kulutila nene na kati ya beno, kuma faso leki ya beno nyonso, mpe muntu yina ke twadisá beno kuma faso muntu yina ke sadilá bampangi.’ (Luke 22:26) Beto ke salá bamambu faso ‘leki’ ntangu beto ke ‘talá ti bampangi me lutila’ beto. (Flp. 2:3) Si beto kulisa dikanisi yayi na kati ya bantima ya beto, ya ke sadisa beto na kubwisa ve bampangi.

10. Wapi konseye ya Paul beto zolá sadila?

¹⁰ Si beto tala bien, ya ke na bima yina bampangi me lutila beto. Ya ke ve mpasi na kutala yawu ntangu beto ke sosá kuzaba bifu ya bawu ya mbote. Beto zolá simba konseye yina apotre Paul pesá na bakristo ya Korinte: ‘Nani ke na salá ti nge vanda ve faso mosi na muntu ya nkaka? Wapi kima ke na nge yina ba pesá ve nge? Na yawu, si ba pesá nge yawu, samu na yinki nge ke na salá matalana nete ba pesá nge ve yawu?’ (1 Ko. 4:7) Beto sosa ve ti bampangi ya beto pesa beto nkembo to beto mosi tala ti beto me lutila bawu. Na kifwani, bampangi ya bakala yina ke salá badiskur ya kitoko, to bampangi ya kento yina ke longoká na bantu mingi, zolá pesa ntangu nyonso nkembo na Yehova samu na nyonso yina ba ke na ngolo ya kusala.

11. Wapi leson beto lenda benda na ekzample yina Yesu pesá ya mfumu na esklave ya yandi?

¹¹ Na manima ya kukebisa badisiple ya yandi na kubwisa ve bampangi, Yesu pesá ekzample ya mfumu mosi na esklave ya yandi. Mfumu katulá mfuka ya nene yina esklave vandá defa yandi, yina esklave vandá ata fioti ve na ngolo ya kufuta. Na manima, esklave yango mangá kukatula mfuka ya fioti yina mpangi ya yandi esklave vandá defa yandi. Na nsuka, mfumu tulá esklave ya ntima ya ngolo yayi na boloko. Wapi leson samu na beto? Yesu zonzá: ‘Papa ya munu yina ke na zulu ke sala mpe beno faso yayi si mosi na mosi na kati ya beno lemvokila ve mpangi ya yandi na ntima mosi.’—Mat. 18:21-35.

12. Yinki ya lenda sala bampangi si beto manga kupardone?

¹² Mambu yina esklave yina salá natiná yandi mosi bampasi mpe lwalisá bampangi ya yandi. Ya ntete, yandi lakisá ve ntima ya mbote mpe ya kyadi na mpangi ya yandi esklave ntangu yandi “[tulá] mpangi na boloko tii ntangu yandi [ke] futa mbongo nyonso.” Ya zole, mambu yina yandi salá lwalisá ntima ya ba-esklave ya nkaka yina vandá tala. Ntangu “bisadi ya nkaka [talá] mambu yina, [ba kumá] na kyadi mingi.” Faso mosi mpe, bamambu yina beto ke salá lenda lwalisa bampangi. Si mpangi mosi me sala mambu yina me nyongisa beto mpe beto manga kupardone yandi, yinki lenda salama? Ya ntete, si beto manga kupardone mpangi, beto banda kukipe dyaka ve yandi mpe kulakisa dyaka ve yandi luzolo, ya ke sala yandi mpasi na ntima. Ya zole, bampangi ya nkaka ya kimvuka ke vanda dyaka ve aleze lere ba ke tala ti beto ke na mwa mambu na mpangi ya nkaka.

13. Yinki beto lenda longoka na bamambu yina kuminá pionier mosi?

¹³ Ntangu beto ke lemvokilá bampangi, ya ke natiná beto mosi bambote mpe bampangi ya nkaka. Ni mambu yina kuminá mpe pionier mosi na nkumbu ya Crystal. Mpangi mosi ya kento ya kimvuka zonzilak’ yandi bamambu yina lwalisak’ yandi. Crystal me zonza: “Bantangu ya nkaka, bamambu yina yandi vandá zonzá vandá vrai yimbi. Ya vandá nete yandi vandá tula mu mbele. Mu vandá dyaka ve na nsatu ya kubasika na yandi na predikasion. Tiya mpe kilengi ya munu na predikasion bandá kumanisa.” Crystal vandá kanisa ti yandi vandá na rezon ya kudasuka. Kasi, yandi bumbá ve kolere mpe yandi  mangá kukanisa kaka na yandi mosi. Samu na yinki? Samu yandi vandá ya kukuluka mpe sadilá konseye ya Biblia yina yandi kuzwá na artikle “ Pardonnez de tout votre coeur ” na Yinzo ya kengidi (na Français) ya 15 Octobre 1999. Yandi pardoneke mpangi ya yandi. Crystal me zonza: “Mu me kwiza tala ti beto nyonso ke salá bangolo na kusala bachanjement, mpe Yehova, na ntima mosi, ke pardoneke beto bilumbu nyonso. Kizunu mpe kilengi ya munu me vutuka.”

14. Faso me zonza Matayi 18:21, 22, ntangu ya nkaka wapi mambu vandá na apotre Piere mpe yinki nge lenda longoka na reponse yina Yesu pesak’ yandi?

¹⁴ Beto zaba ti ya ke mbote na kulemvokila. Kasi, ya ke mpasi na kusala yawu. Apotre Piere mpe, bantangu ya nkaka, vandá tala bamambu faso yayi. (Tanga Matayi 18:21, 22.) Yinki lenda sadisa beto? Ya ntete, baka ntangu ya kukanisa na bamambu nyonso yina Yehova ke pardoneke nge. (Mat. 18:32, 33) Yandi ke lemvokilá beto na ntima mosi ata beto me lunga ve kuzwa pardon ya yandi. (Nku. 103:8-10) Faso mosi mpe, beto me ‘lunga kuzola bampangi ya beto.’ Kupardone ke ve kima yina beto zolá manga kusala. Ya ke mfuka yina beto zolá futa na bampangi ya beto. (1 Yoa 4:11) Ya zole, beto baka ntangu ya kukanisa na bamambu ya mbote yina ke salama si beto lemvokila: beto lenda sadisa mpangi yina me lwalisa beto, kutula bumosi na kati ya kimvuka, kubumba kikamarade ya beto na Yehova mpe kuvutula kizunu na kati ya ntima ya beto. (2 Ko. 2:7; Kol. 3:14) Na nsuka, sambila Yehova, muntu yina ke zonzá na beto na kupardone bampangi. Kubika ve Satan bebisa kikamarade ya mbote yina nge ke na yawu na bampangi ya nge. (Ef. 4:26, 27) Beto ke na nsatu Yehova sadisa beto na kubumba kizunu na kati ya kimvuka.

15. Faso ke zonzá Bakolose 3:13, yinki beto lenda sala si mpangi mosi me sala kima yina me nyongisa beto?

¹⁵ Yinki nge zolá sala si mpangi mosi na kati  ya kimvuka me sala kima yina me nyongisa nge mingi? Sala nyonso samu na kubumba lapaix. Zonza na Yehova nyonso yina ke na kati ya ntima ya nge. Zonza na Yehova na kusadisa mpangi yina me lwalisa nge, mpe yandi sadisa nge na kutala bifu ya mbote yina yandi ke zolá na mpangi yina. (Luke 6:28) Si nge ke na lendá ve kuzimbana mambu yina mpangi me sala nge, sosa faso ya mbote ya kuzonzila yandi yawu. Ya ke mbote na kukanisa ti mpangi salá ve mambu na nko. (Mat. 5:23, 24; 1 Ko. 13:7) Ntangu nge ke na sololá na yandi, kukondane ve yandi. Kasi, si yandi ke ve na nsatu beno yidika bamambu? ‘Kontinye kusuporte’ yandi mpe kulakisa yandi ntima ya yinda. (Tanga Bakolose 3:13.) Yina me lutila important, kukangila ve mpangi ya nge kolere, samu ti ya lenda bebisa kikamarade ya nge na Yehova. Kubika ve ata kima sala ti nge kubwa. Si nge sala yawu, nge ke lakisa ti luzolo ya nge na Yehova ke vrai ngolo.—Nku. 119:165.

16. Yinki mosi na mosi ya beto zolá sala?

¹⁶ Beto ke na kilengi ya kusadila Yehova na bampangi ya beto faso ‘kimvuka mosi ya mameme’ na manima ya ‘ntwadisi mosi’! (Yoa. 10:16) Buku Organisés pour faire la volonté de Jéhovah, na paje 165, ke zonzá: “Samu beto ke sepelá na bumosi yina ke na kati ya beto, mosi na mosi ya beto zolá tula diboko samu na kubumba yawu.” Na yawu, beto zolá “longoka na kutala bampangi ya beto faso Yehova ke talá bawu.” Na meso ya Yehova, beto nyonso ke ‘bana ya fioti’ yina yandi ke zolá mingi. Ni faso yayi mpe nge ke talá bampangi ya nge? Yehova ke talá mpe ke pesá valere na bima nyonso yina nge ke salá samu na kusadisa bawu mpe kukipe bawu.—Mat. 10:42.

17. Wapi desizion nge me baka?

¹⁷ Beto ke zolá bampangi ya beto nyonso. Na yawu, beto ‘baka desizion ya kusala ata kima yina lenda bwisa mpangi, to kunata yandi na kusala disumu.’ (Rom. 14:13) Beto ke talá ti bampangi ya beto me lutila beto, mpe na ntima mosi beto ke zolá kupardone bawu. Beto kubwa ve samu na bamambu yina bampangi ya nkaka ke zonzá to ke salá. Kasi, beto baka desizion ya ‘kulanda bamambu yina ke tulá kizunu mpe ke tungá bampangi.’—Rom. 14:19.