NTANGU ba ke yufulá Lisa a kima ya ntete yina natak’ yandi na kundima matsyeleka, yandi ke zonzaka: “Mu vandá sepela mingi na ntima ya mbote yina bampangi ya kento na ya bakala vandá lakisaka.” Ni yawu mpe bendá Anne na matsyeleka. Yandi me zonza: “Kima yina mu zolá ntete na Bambangi ya Yehova vandá ntima ya bawu ya mbote, kulutila malongi ya bawu.” Bubu yayi, bampangi ya kento yayi ke zolá mingi kutanga Biblia mpe kukanisa na yina ba ke tangaka. Kasi kima yina bendá bawu na matsyeleka, ni ntima ya mbote yina ba talá na bampangi.

Wa’ faso beto lenda lakisa ntima ya mbote yina ke kindisa ba yina ke vandá na beto? Beto zonzila bafaso zole yina beto lenda sala yawu: na bamambu yina beto ke zonzá mpe na yina beto ke salaka. Na manima beto ke tala na banani beto me lunga kulakisa ntima ya mbote.

Bingana kikapu 31 ke zonzá ti kento yina me fwana ke na ‘musiku ya ntima ya mbote’ na ludimi ya yandi. (Bin. 31:26) Yandi ke biká musiku yina twadisa bamambu yina yandi ke zonzá, mpe mutindu yandi ke zonzak’ yawu. Batata mpe me lunga kuvanda na musiku yayi na bayinwa ya bawu. Bibuti mingi zaba ti kuzonzila bana bamambu na ndinga ya ngolo mpe na luzolo ve, ke yimbi samu na bana. Mpe ya lenda sala ti ba sadila ve bamambu yina bibuti ke zonzaka. Na yawu, samu bamambu yina ba ke zonzá simba bantima ya bana ya bawu, bibuti me lunga kuzonzila yawu na ntima ya mbote.

Nge vanda kibuti to ve, wa’ faso nge lenda longoka kuzonza na ntima ya mbote? Kitini ya ntete ya Bingana 31:26 ke zonzilá beto yinki ya kusala. Ya me zonza: ‘Yandi ke fungula yinwa ya yandi na mayela.’ Ya zola zonza kusadila mayela samu na kusola bamambu yina beto ke zonza mpe faso ya kuzonzila yawu. Tekila beto zonza, beto lenda yufula: ‘Bamambu yina mu ke zonza ke vutula kwandi kizunu to ke bebisa dyaka bamambu?’ (Bin. 15:1) Ya tsyeleka, beto me lunga kukanisa mbote-mbote tekila beto zonza.

Kingana ya nkaka ke zonzaka: ‘Kuzonza kukondwa kuyindula kele mutindu kulwalisa muntu na mbele ya kunwana.’ (Bin. 12:18) Beto me lunga kukanisa na yinki nzonzolo ya beto mpe faso ya beto ya kuzonza lenda sala na bampangi. Ya ke sadisa beto na kusala keba na bamambu yina ke basiká na yinwa ya beto. Kana beto ke landá ‘musiku ya ntima ya mbote,’ beto ke zonza ve bamambu ya ngolo, mpe beto ke zonza ve na mutindu yina ke lwalisa bampangi. (Ef. 4:31, 32) Beto ke katula makanisi mpe nzonzolo ya yimbi. Na kisika ya yawu, beto ke zonza bamambu ya mbote, na ndinga yina ke kindisa bampangi. Yehova lakisá kifwani ya mbote na mambu yayi, ntangu yandi pesá ngolo na kisadi ya yandi Eli yina vandá na boma. Mbazi yina Yehova filisá zonzá na Eli na ‘ndinga mosi ya lembami, mpe ya yisi.’ (1 Mf. 19:12) Kasi kuvanda muntu ya mbote ke suká ve kaka na kuzonza bamambu ya mbote. Beto me lunga mpe kusala bamambu ya mbote na bampangi. Wa’ faso beto lenda sala yawu?

Beto ke landá kifwani ya Yehova ntangu beto ke zonzá bamambu na ntima ya mbote, mpe ke salá bamambu ya mbote samu na bampangi. (Ef. 4:32; 5:1, 2) Lisa mpangi ya kento yina beto me zonzila, ke na zabá dyaka ntima ya mbote yina Bambangi ya Yehova lakisá na dikanda  ya yandi. Yandi me zonza: “Ntangu ya lombá na dikanda ya beto na kukatuka na mbangu kisika yina beto vandá, bampangi ya bakala zole ya kimvuka ya beto na bakento ya bawu baká mwa bilumbu na kisalu ya bawu, samu na kwiza sadisa beto na kukanga bima. Na ntangu yina, mu vandá longoka ntete ve Biblia.” Ntima ya mbote yina bampangi yayi lakisá na dikanda ya Lisa natak’ yandi na kusosa kuzaba mbote-mbote matsyeleka.

Anne mpangi ya kento yina beto me zonzila, sepelá mpe na ntima ya mbote yina Bambangi ya Yehova lakisak’ yandi. Yandi me zonza: “Samu bantu mingi vandá bakilá munu na faso ya yimbi, mu vandá tulá dyaka ve ntima na bantu. Mbala ya ntete yina mu kutaná na Bambangi ya Yehova, mu vandá tala ti ba vandá kwizá ve na munu na makanisi ya mbote. Mu yufulaka: ‘Samu na yinki ba ke na salá nyonso yayi samu na munu?’ Kasi ntima ya mbote yina lakisá munu mpangi yina vandá longoka Biblia na munu natá munu na kutula yandi ntima.” Yinki ya salaka? Anne me zonza: “Mu bandá kutula makanisi ya munu na bamambu yina mu vandá longoka.”

Kima yina salá ti Lisa na Anne zola kulongoka matsyeleka vandá ni ntima ya mbote mpe luzolo  yina bampangi ya kimvuka lakisá bawu. Ya sadisá bawu na kutula ntima na Yehova mpe na bisadi ya yandi.

Bantu ya nkaka ke zonzá bamambu ya mbote na bampangi mpe ke seká na bantu nyonso, samu ni mutindu yina bamambu ke lutilá kisika yina ba kulaka. Ya ke mbote na kulakisa buzitu na bampangi. Kasi si beto ke na salak’ yawu kaka samu ni mutindu yina beto kulá, ya ke ve ntima ya mbote yina ke katuká na Nzambi.—Tala Bisalu 28:2.

Ntima ya mbote yina ke katuká na Nzambi ke kitini ya mbuma yina mpeve ya santu ke butaka. (Gal. 5:22, 23) Na yawu, samu na kukulisa ntima ya mbote yayi, beto me lunga kubika mpeve ya santu sadisa beto. Beto ke salak’ yawu samu beto ke na nsatu ya kulanda kifwani ya Yehova mpe ya Yesu. Mpe samu beto ke bakristo, beto zola kusadisa bampangi ya beto. Na yawu, beto zola kulakisa ntima ya mbote samu beto ke zolá Yehova mpe bampangi ya beto. Ya ke sala ti ntima ya beto ya mbote vanda kifu yina ke katuká na ntima, mpe yina ke sepelisa Nzambi.

Ya lenda vanda ve mpasi na kulakisa ntima ya mbote na ba yina lakisá beto ntima ya mbote, to na ba yina beto zaba. (2 Sa. 2:6) Mosi ya bafaso ya kusala yawu ni ya kuvutula bawu matondo. (Kol. 3:15) Kasi yinki beto ke sala si beto ke na talá ti muntu me lunga ve beto lakisa yandi ntima ya mbote?

Kanisa na mambu yayi: Yehova ke kifwani ya kulutila na yina me tadila kulakisa ntima ya mbote na ba yina me lunga ve kuzwa yawu. Mpe Biblia ke longá beto mambu ya mfunu samu na kifu yayi. Kitini ya Biblia na ndinga ya Greke ke zonzilá bambala mingi ‘ntima ya mbote ya nene.’ Wa’ faso Nzambi ke lakisá beto ntima ya mbote?

Yehova ke lakisá ntima ya mbote na bantu nyonso yina me zinga awa na ntoto. Yandi ke pesá bawu bima nyonso yina ba ke na yawu nsatu samu na kuzinga. (Mat. 5:45) Ata na ntangu yina beto zabá ntete ve yandi, Yehova lakisá beto ntima ya mbote. (Ef. 2:4, 5, 8) Na kifwani, yandi filisá Mwana ya yandi kaka mosi yina yandi ke zolá mingi kufwa samu na bantu nyonso. Ntumwa Polo soniká ti Yehova pesá Mwana ya yandi mutindu munkayulu “na kutadila bunene ya ntima ya mbote [ya] yandi ya nene.” (Ef. 1:7, nwt-MK) Mpe ata bambala mingi beto ke salá masumu mpe ke nyongisak’ yandi, Yehova ke biká ve kutwadisa beto mpe kulonga beto. Misiku ya yandi mpe malongi ya yandi ke mutindu “mvula ya fioti.” (Kul. 32:2) Beto lenda futa ata fioti ve Yehova na ntima ya mbote nyonso yina yandi ke lakisá beto. Mpe beto zaba ti si Yehova lakisá ve beto ntima ya yandi ya mbote, beto zolá vanda ve na kivuvu samu na bilumbu ke kwiza.—Tala 1 Piere 1:13.

Ntembe ve, ntima ya mbote ya Yehova ke natá beto na kuzola yandi, mpe na kulanda kifwani ya yandi. Ya ke salá ti beto sola ve bantu yina beto ke lakisa ntima ya mbote, mpe beto lakisa kifu yayi ntangu nyonso na bampangi. (1 Tes. 5:15) Ntangu beto ke lakisá ntima ya mbote bilumbu nyonso ya luzingu ya beto, beto ke mutindu tiya na kilumbu ya madidi. Beto ke pesa ngolo na bantu ya dikanda ya beto, bampangi ya beto bakristo, ba yina ke salá na beto, bampangi ya l’école mpe ba yina ke vandá pene-pene na beto.

Kanisa na bantu ya dikanda ya nge to ya kimvuka yina lenda sepela na ntima ya mbote yina nge lenda lakisa na bamambu yina nge ke zonza to nge ke sala samu na bawu. Ya lenda vanda na mpangi mosi na kimvuka ya beno yina ke na nsatu ba sadisa yandi na kukipe yinzo ya yandi to lupangu ya yandi, to kusumbila yandi bima na zandu. Dyaka, na kisalu ya kusamuna, si nge me tala muntu yina ke na nsatu ba sadisa yandi, kuvingila ve. Lakisa yandi ntima ya mbote.

Beto landa kifwani ya Yehova, mpe bika ti ‘musiku ya ntima ya mbote’ twadisa ntangu nyonso bamambu yina beto ke zonzá mpe ke salaka.