1. Wapi bamambu lenda pesa beto nyonso boma?

 BETO zonzila bamambu yayi bampangi ya beto kutaná na yawu. Nestor na kento ya yandi María, vandá na nsatu ya kwenda samuna kisika yina Bambangi ya Yehova vandá kaka fioti. b Samu ba lenda kusala yawu, ba zolá banda kunata luzingu na mbongo fioti. Kasi ba kumá na boma ti luzingu ya bawu ke vanda mpasi si ba ke kaka na mbongo fioti. Biniam kumá mbangi ya Yehova na bwala mosi yina ba ke niminá kisalu ya beto. Yandi kwizá tala ti samu yandi kumá kisadi ya Yehova, yandi mpe ba ke kwamisa yandi. Ya vandá pesa yandi boma. Kasi yandi vandá na boma ya kulutila ya bantu ya dikanda ya yandi. Yandi vandá zaba ve faso ba zolá bakila bamambu ntangu ba ke zaba ti yandi me kota dibuundu ya malu-malu. Ba talá Valérie na cancer mosi ya ngolo. Ya vandá mpasi na yandi na kuzwa docteur yina ke ndima kusadila ve menga ntangu yandi ke sala yandi opération. Yandi vandá na nsatu ya kuzitisa mambu yina Biblia ke zonzá samu na menga. Valerie vandá mpe na boma ti yandi lenda kufwa.

2. Samu na yinki beto me lunga kusala bangolo na kukatula boma?

² Bamambu ya faso ya bampangi yayi me pesá nge boma? Ya me kuminá mingi na kati ya beto. Si beto bika boma kutwadisa beto, beto ke baka mikanu ya yimbi yina lenda bebisa kindiku ya beto na Yehova. Ni yina Satan ke na vingilá beto sala. Yandi ke sosá mpe kusadila bamambu yina ke pesá beto boma samu na kunata beto na kulanda ve misiku ya Yehova, mutindu musiku ya kusamuna nsangu ya mbote ya Kimfumu. (Luz. 12:17) Satan ke muntu ya yimbi. Yandi zola kutalisa bantu mpasi, mpe yandi ke na ngolo. Kasi beto lenda nunga yandi. Wapi mutindu?

3. Yinki ke sadisa beto na kukatula boma?

 ³ Ntangu beto ke vandá na kiminu ti Yehova ke zolá beto, mpe yandi ke na beto, Satan lenda talisa ve beto boma. (Nku. 118:6) Na kifwani, muntu yina soniká Nkunga 118 kutaná na bamambu ya mpasi mingi. Yandi vandá na bambeni mingi. Na kati ya bawu ya vandá na bantu ya nene (baverse 9, 10). Bantangu ya nkaka, bankwamusu ya yandi lutilaka (verse 13). Yehova sembá mpe yandi na ngolo (verse 18). Ata faso yina, yandi yimbaka: ‘Munu ke wa boma ve.’ Yinki vandá sala ti yandi vanda ve na boma? Yandi zabá ti ata Yehova sembak’ yandi, kasi Tata ya yandi ya mazulu vandá zolak’ yandi mingi. Yandi vandá na kiminu ti mambu ni mambu yina yandi ke kutana na yawu, Yehova Nzambi ya luzolo ke sadisa yandi.—Nku. 118:29.

4. Wapi baboma beto ke lenda kukatula si beto ke na kiminu ti Nzambi ke zolá beto?

⁴ Beto me lunga kuvanda na kiminu ti, Yehova ke zolá mosi na mosi ya beto. Ya ke sadisa beto na kuvanda ve na: 1) boma ya kuvanda ve na kima ya kulunga samu kudikisa dikanda ya beto; 2) boma ya bantu, mpe 3) boma ya lufwa. Bamambu tatu yayi ke pesá bantu mingi boma. Bampangi yina beto me zonzila na kubanda ya disolo yayi, lendá kukatula boma ya bawu, samu ba vandá na kiminu ti Yehova ke zolá bawu.

5. Wapi mambu lenda pesa mfumu ya dikanda boma? (Tala foto ya paje ya kubanda.)

⁵ Mukristo yina ke mfumu ya dikanda zaba ti kisalu ya kudikisa dikanda ya yandi ke na zulu ya yintu ya yandi. (1 Tim. 5:8) Si nge ke mfumu ya dikanda, ntangu ya nkaka na kati ya kimbevo ya COVID-19, nge me vanda na boma ya kuvanda dyaka ve na kisalu, ya kulenda dyaka ve kudikisa dikanda ya nge, to kupesa bawu kisika ya kuvanda. Ntangu ya nkaka mpe, nge me vanda na boma ti si ba katula nge na kisalu, nge ke lenda dyaka ve kuzwa kisalu ya nkaka. To mutindu Nestor na María, yina beto zonzilá na paragrafe ya ntete, nge ke na boma ti nge ke lenda ve kunata luzingu ya nge na mbongo fioti. Satan lendá kukanga bantu mingi nzila ya kusadila Yehova, samu na baboma ya faso yayi.

6. Yinki Satan ke sosá kunata beto na kukanisa?

⁶ Satan ke sosá kunata beto na kutala ti Yehova ke kipeke ve beto. Mpe yandi zola beto kanisa ti beto ke kaka beto mosi samu na kukipe bansatu ya dikanda ya beto. Kutadila bamambu na faso yayi lenda nata beto na kusala nyonso samu na kubumba kisalu ya beto, ata mpe kusala bamambu yina ke bebisa kindiku ya beto na Yehova.

7. Yinki Yesu zonzá samu na bansatu ya beto?

⁷ Yesu zaba Tata ya yandi kulutila bantu nyonso. Na yawu, yandi zonzá ti Nzambi ya beto ‘zaba nyonso yina beto ke na yawu nsatu tekila beto lomba yandi.’ (Mat. 6:8) Mpe Yesu zabá ti Yehova zola kukipe bansatu ya beto. Samu beto ke bakristo, beto ke na kati ya dikanda ya Nzambi. Beto lenda vanda na kiminu ti samu yandi ke Mfumu ya dikanda, Yehova ke landa bamambu yina yandi zonzá na 1 Timote 5:8.

8. a) Yinki ke sadisa beto na kukatula boma ya kuzwa ve kima ya kulunga samu na kudikisa dikanda ya beto? (Matayi 6:31-33) b) Wa’ faso beto lenda sala mutindu bampangi ya kukwela na kizizi, yina ke na kwizá pesa madya na mpangi mosi ya kento?

⁸ Ntangu beto ke vandá na kiminu ti Yehova ke zolá beto mpe ke zolá dikanda ya beto, beto ke sala ve ntembe ti yandi ke pesa beto bima yina beto ke na yawu nsatu. (Tanga Matayi 6:31-33.) Yehova zola kukipe bansatu ya beto samu yandi ke Tata ya luzolo, mpe yandi ke zolá kukabula. Ntangu yandi yidiká ntoto, Yehova suká ve kaka na kupesa beto bima yina ke mfunu samu na luzingu ya beto. Na luzolo nyonso, yandi tulá na ntoto bima yina ke pesá beto  kilengi ya mingi. (Kub. 2:9) Ntangu beto ke kuzwá kaka fioti, beto zolá zimbana ve ti si beto me lenda kuzwa ata fioti yina, ni Yehova muntu me pesa beto yawu. (Mat. 6:11) Nyonso yina beto ke ndimá kubika bubu yayi ke fioti na mantwala ya yina Yehova ke pesá beto. Mpe na bilumbu ke kwiza, yandi ke pesa beto luzingu ya ntangu nyonso. Ni yina Nestor na María kwizá zaba.—Iza. 65:21, 22.

9. Yinki nge lenda longoka na disolo ya Nestor na María?

⁹ Nestor na María vandá na yinzo ya kitoko, mpe bisalu yina vandá pesa bawu mbongo mingi na Colombie. Ba me zonza: “Beto kanisá kubika bima ya nkaka yina vandá na beto samu na kusala mingi na kisalu ya Yehova. Kasi beto vandá na boma ya kuvanda ve na kilengi si beto nata luzingu na mbongo fioti.” Yinki sadisá bawu na kukatula boma? Ba kanisá na bafaso nyonso yina Yehova lakisá bawu luzolo ya yandi. Samu ba vandá na kiminu ti Yehova ke kipe ntangu nyonso bansatu ya bawu, ba biká bisalu ya bawu. Ba teká yinzo ya bawu, mpe ba kwendá kisika mosi na bwala ya bawu yina Bambangi ya Yehova vandá fioti. Yinki ba ke na kanisá na mukanu yina ba bakaka? Nestor me zonza: “Beto me kwiza tala ti mambu yina Matayi 6:33 ke zonzá ke tsyeleka. Beto vandá lenda kuzwa ntangu nyonso bima yina beto vandá na yawu nsatu. Kilengi yina beto ke na yawu bubu yayi me lutila yina beto vandá na yawu na ntama.”

10. Samu na yinki bantu ke na boma ya bantu ya nkaka?

¹⁰ Banda ntangu yina Adam na Eve salá yintu ngolo na Yehova tii bubu yayi, bantu ke salá bampangi yimbi. (Lon. 8:9) Na kifwani, ba yina ke twadisá bantu ya nkaka ke sadilá lutumu ya bawu samu na kunyokola bampangi. Babandi ke salá bamambu ya ngolo mpe ke kufwá bantu. Na l’école, ya ke na ba yina ke fingá to ke kwamisá bampangi. Mpe bantu ya nkaka ke nyokolá ata bantu ya dikanda ya bawu. Nyonso yayi ke salá ti bantu ke na boma ya bantu ya nkaka. Wa’ faso Satan ke sosá kusadila boma ya bantu samu na kunata beto na kubaka mikanu ya yimbi?

11-12. Wa’ faso Satan ke sadilá boma ya bantu?

¹¹ Satan ke sosá kusala ti boma ya bantu nata beto na kubika kisalu ya kusamuna, mpe bima ya nkaka yina Yehova ke zonzá na beto na kusala. Satan ke natá baguvernema ya yinza yayi na kunimina bisalu ya beto mpe na kukwamisa beto. (Luke 21:12; Luz. 2:10) Bantu mingi ke mwangisá bansangu ya luvunu, mpe ke zonzá bamambu ya yimbi na nkumbu ya Bambangi ya Yehova. Ba yina ke ndimá bamambu ya luvunu  yayi lenda seka beto, to kutalisa beto mpasi. (Mat. 10:36) Bafaso ya kusala ya Satan yayi ke na pamusá kwandi beto? Ata fioti ve. Yandi sadilá yawu na siècle ya ntete.—Bis. 5:27, 28, 40.

¹² Satan ke sadilá ve kaka boma ya bankwamusu ya luyalu. Bantu ya nkaka ke vandá na boma ya bamambu yina bantu ya dikanda ya bawu ke kanisa ntangu ba ke kuma Bambangi ya Yehova. Bantangu ya nkaka boma yayi ke lutilá ata boma ti ba bula bawu. Ba ke zolá mingi bantu ya dikanda ya bawu. Ba zola ti bawu mpe kwiza zaba Yehova mpe kuzola yandi. Ya ke salá bawu mpasi na ntima na kuwa bantu ya dikanda ya bawu kuzonzila yimbi ya Nzambi ya matsyeleka, mpe ya bisadi ya yandi. Bantangu ya nkaka, bantu ya dikanda yina vandá kwamisa beto kwizá ndima matsyeleka. Kasi yinki beto ke sala si bantu ya dikanda ya beto me manga beto samu beto me banda kusadila Yehova?

13. Wa’ faso kuvanda na kiminu ti Yehova ke zolá beto lenda sadisa beto na kuvutuka ve manima ata bantu ya dikanda ya beto me manga beto? (Nkunga 27:10)

¹³ Bamambu ya kitoko yina ke ya kusonama na Nkunga 27:10 lenda pesa beto bukindi. (Tanga.) Ntangu beto ke kanisá na luzolo ya mingi yina Yehova ke na yawu samu na beto, beto ke ve na boma ya bamambu yina lenda kumina beto, ata bantu ya dikanda ya beto manga beto. Mpe beto ke na kiminu ti yandi ke pesa beto bambote si beto kanga ntima. Yehova ke kipeke bansatu ya beto. Yandi ke pesa beto kizunu mpe kilengi, mpe yandi ke sadisa beto na kuvanda kaka ya kukangama na yandi. Kaka ni Yehova lenda pesa beto bima nyonso yayi! Ni yawu Biniam, mpangi ya bakala yina beto zonzilá, kwizá tala.

14. Yinki nge lenda longoka na disolo ya Biniam?

¹⁴ Ata luyalu vandá kwamisa bisadi ya Nzambi na bwala yina yandi vandá, Biniam baká mukanu ya kukuma mbangi ya Yehova. Biniam zabá ti Yehova ke zolak’ yandi. Ni yawu sadisak’ yandi na kukatula boma. Yandi me zonza: “Bankwamusu ya luyalu vandá mpasi mingi kulutila yina mu vandá kanisa. Kasi kima yina vandá lutila kupesa munu boma, ni mambu yina dikanda ya munu zolá kanisa ntangu ba zolá zaba ti mu me kuma mbangi ya Yehova. Mu vandá na boma ti mukanu ya munu ya kukuma mbangi ya Yehova nyongisa tata ya munu yina vandá sadila ve Yehova. Mpe ya sala ti bantu ya dikanda ya munu banda kutala munu faso muntu ya mpamba.” Kasi, Biniam zabá ti Yehova ke kipeke ntangu nyonso ba yina yandi ke zolaka. Yandi me zonza: “Mu kanisá na mutindu Yehova sadisá bampangi ya nkaka na kukanga ntima ntangu ya kumá mpasi na bawu  na kuzwa mbongo, ntangu bantu vandá yiina bawu ata ba salá ata kima ya yimbi, mpe ntangu bantu vukaná samu na kubula bawu to kutalisa bawu mpasi. Mu zabá ti si mu vanda kaka ya kukangama na Yehova, yandi ke sakumuna munu. Ba tulá munu na boloko bambala mingi mpe ba bulá munu kuna. Na bantangu yina, mu kwizá tala na meso ya munu mutindu Yehova ke sadisá beto na kati ya bampasi, kana beto ke ya kukangama na yandi.” Yehova kumá Tata ya tsyeleka samu na Biniam, mpe bisadi ya Yehova lakisak’ yandi ti ba vandá bampangi ya yandi.

15. Ya ke kwandi yimbi na kuvanda na boma ya lufwa?

¹⁵ Biblia ke zonzá ti lufwa ke mbeni. (1 Ko. 15:25, 26) Lufwa ke pesá boma. Kasi ntangu beto, to muntu yina beto ke zolá, ke belá, boma ya lufwa ke lutilá dyaka. Samu na yinki? Samu ntangu Yehova yidiká beto, yandi tulá na kati ya beto nsatu ya kuzinga ntangu nyonso. (Lon. 3:11) Ntangu ya nkaka, boma ya lufwa lenda sadisa beto na kubumba luzingu ya beto. Na kifwani, ya lenda nata beto na kudya madya yina ke vanda mbote samu na banzutu ya beto, to na kusala sport. Ntangu beto ke belá, ya lenda sadisa beto na kwenda tala docteur, mpe na kunwa manganga samu na kubeluka. Ya ke sadisá mpe beto na kusala ve bamambu yina lenda tula luzingu ya beto na mpasi.

16. Wa’ faso Satan ke sosá kusadila boma ya lufwa samu na kubebisa kindiku ya beto na Yehova?

¹⁶ Satan zaba ti beto zola ve kufwa. Na yandi, samu na kufwa ve, muntu lenda ndima kusala nyonso, ata kubebisa kindiku ya yandi na Nzambi. (Yobi 2:4, 5) Nyonso yayi ke luvunu! Kasi Satan ke “muntu yina kele [na] ngolo ya kufwa.” Na yawu, yandi ke sadilá boma ya lufwa samu na kunata beto na kubika Yehova. (Ebr. 2:14, 15, nwt-MK) Bantangu ya nkaka, Satan ke natá bantu ya yandi na kuzonza na bisadi ya Yehova ti, ba ke kufwa bawu, si ba vanda kaka ya kukangama na Nzambi. Bantangu ya nkaka mpe, beto lenda vanda na kibemvo ya ngolo yina ke na lombá ti ba kipe beto na mbangu. Satan lenda sadila mambu ya faso yayi samu na kunata beto na kusala bamambu yina misiku ya Nzambi ke niminaka. Na kifwani, ba docteurs to bantu ya dikanda ya beto yina ke sadilá ve Yehova lenda sala beto tiya samu beto ndima menga. To muntu ya nkaka lenda nata beto na kusala bamambu yina ke kwelaná ve na misiku ya Yehova samu beto beluka.

17. Faso Baroma 8:37-39 ke na lakisak’ yawu, samu na yinki beto zolá vanda ve na boma ya lufwa?

¹⁷ Beto zola ve kufwa. Kasi beto zaba ti ata beto kufwa, Yehova ke bika ve kuzola beto. (Tanga Baroma 8:37-39.) Ntangu bandiku ya yandi ke kufwá, Yehova ke zimbaná ve bawu. Samu na yandi, ya ke mutindu ba ke ntete moyo. (Luke 20:37, 38) Yandi ke na nsatu ya mingi ya kuvutula bawu na luzingu. (Yobi 14:15) Yehova futá kima mosi ya ntalu mingi samu beto kuzwa “luzingu ya mvula na mvula.” (Yoa. 3:16, nwt-MK) Beto zaba ti Yehova ke na luzolo ya mingi samu na beto mpe yandi ke kipeke beto. Na yawu, ntangu beto ke belá, to ntangu ba ke sosá kufwa beto, beto ke biká ve Yehova. Beto ke tulá ntima na yandi samu yandi pesa beto bukindi, mayela mpe ngolo. Ni yina salá Valérie na bakala ya yandi.—Nku. 41:3.

18. Yinki nge lenda longoka na disolo ya Valerie?

¹⁸ Ntangu Valérie vandá na bamvula 35, ba talak’ yandi na cancer mosi ya ngolo yina kaka bantu fioti ke kuzwaka. Kukanisa na luzolo ya Yehova samu na yandi, sadisak’ yandi na kukatula boma ya lufwa. Yandi me zonza: “Ntangu ba kwizá tala munu na kimbevo yina, luzingu ya munu na bakala ya munu sobá na mbala mosi. Samu mu beluka, ba zolá sala munu opération mosi ya nene. Mu talá ba docteurs mingi. Kasi bawu nyonso zonzá ti ba ke sala munu opération  kaka si mu ndima menga. Mu zabá yinki musiku ya Nzambi ke zonzá samu na menga. Na yawu, mu mangaka. Yehova me lakisa munu luzolo ya mingi luzingu ya munu nyonso. Ntangu yayi, ya kumá na munu na kulakisa yandi mpe luzolo. Ntangu nyonso yina mu vandá kuzwa bansangu ya yimbi, ya vandá pesa dyaka munu ngolo ya kulutila, ya kupesa Yehova kilengi mpe kubika ve Satan nunga. Na manima, ba salá munu opération ata kubwela munu menga. Mpe ya lutá na faso ya mbote. Ata nabunu mu beluka, Yehova ke pesá beto ntangu nyonso yina beto ke na yawu nsatu. Na kifwani, na lukutakanu ya kimvuka yina salamá tekila kilumbu yina ba talá munu na cancer, beto salá disolo ya Yinzo ya Kengidi yina vandá zonza ‘ Affrontons les difficultés de la vie avec courage. ’ c Disolo yayi kindisá beto mingi. Beto vandá vutukila kutanga yawu. Masolo ya faso yayi, mpe kifu ya kusamuná na ya kuvanda na balukutakanu pesá beto kizunu ya ntima, mpe sadisá munu na bakala ya munu na kutekita ve mpe na kubaka mikanu ya mbote.”

19. Na mwa bilumbu ke kwiza, yinki ke salama?

¹⁹ Samu Yehova sadisá bawu, bakristo ya bisika nyonso na yinza lendá kununga na mantwala ya bampasi, mpe kubika ve ti Satan bwisa bawu. (1 Pi. 5:8, 9) Beto mpe lenda sala faso bawu. Na mwa ntangu fioti, Yehova ke zonza na Yesu mpe na bakristo yina ke yala kintwadi na Yesu na ‘kufwa bisalu ya Dyabulu.’ (1 Yoa. 3:8) Na manima, na yinza ya malu-malu, bisadi ya Nzambi ke ‘wa boma ata ya kima mosi ve mpe ke vanda ve na mambu ya kutekitila.’ (Iza. 54:14; Mika 4:4) Tekila ntangu yayi kuma, beto me lunga kusala bangolo samu na kukatula boma.

20. Yinki ke sadisa beto na kukatula boma?

²⁰ Beto fwana kukulisa ntangu nyonso kiminu ya beto ti Yehova ke zolá mpe ke bumbá bisadi ya yandi. Samu beto lenda kusala yawu, beto zolá kanisa mbote-mbote na mutindu Yehova bumbá bisadi ya yandi ya ntama, mpe kuzonzila yawu na bantu ya nkaka. Beto me lunga kukanisa mpe na faso yandi me sadisa beto mosi na kati ya bampasi. Na lubakusu ya Yehova, beto ke lenda kukatula boma!—Nku. 34:4.