Samu na kusepelisa Yehova beto me fwana kuvanda na kiminu. Kasi, Biblia ke zonzaka ti “bantu nyonso ve ke vandaka na kiminu.” (2 Tes. 3:2, NWT) Awa ntumwa Polo vanda zonzila ‘bantu yina ke talisaka mpasi mpe bantu ya yimbi,’ yina vanda kwamisa yandi. Na ntangu yina, yandi vanda sosa ba vuukisa yandi na maboko ya bawu. Kasi bamambu yandi zonzaka ke mpe tsyeleka samu na bantu ya nkaka. Ata ti ya ke talanaka pwelele, bantu mingi ke mangaka na kundima ti ya ke na muntu yidikaka yinza. (Rom. 1:20) Ba ya nkaka lenda zonza ti ba ke kwikilaka na kima to na muntu yina ke na ngolo mingi. Kasi kukwikila ya faso yayi ke lungaka ve na kusepelisa Yehova.

Beto me bonga kundima ti Yehova kele mpe yandi ke pesaka difuta na ba yina ke na kiminu ya ngolo. (Ebr. 11:6) Kiminu ke na kati ya mbuma ya mpeve ya santu. Kusambila Yehova lenda sadisa muntu na kuzwa mpeve ya santu. (Luke 11:9, 10, 13) Kima ya nkaka ya mfunu yina ke sadisa na kuzwa kiminu, ni na kutangaka Biblia buku yina Nzambi nataka bantu na kusonika na nzila ya mpeve ya yandi ya santu. Na manima, beto me lunga kuyindula na yina beto me tanga mpe kusala bangolo na kusadila yina beto ke na longokaka. Na kusalaka mutindu yayi, mpeve ya santu ya Yehova lenda sadisa beto na luzingu ya beto, mpe ya ke sadisa beto na kuvanda na kiminu yina ke sepelisaka Yehova.