1-2. Wapi bweso Yehova ke na pesaka bisadi ya yandi ya kukwikama?

 KANA ba yufula nge, ‘Nani ke Yehova samu na nge?’ Wapi mvutu nge ke pesa? Ntangu ya nkaka nge lenda zonza, ‘Yandi ke Tata ya munu, Nzambi ya munu mpe ndiku ya munu.’ Ya lenda vanda ti nge ke talaka Yehova na bafaso ya nkaka. Kasi nge ke talaka kwandi yandi mutindu muntu yina lenda yamba nge?

² Mfumu Davidi fwanisaka bisadi ya Yehova na bantu yina Yehova ke yambaka na tenta ya yandi. Yandi yufulaka: ‘O Yehova, nani lenda vanda nzenza na tenta ya nge? Nani lenda zinga na mongo ya nge ya santu?’ (Nku. 15:1) Bamambu yayi mpeve ya santu nataka yandi na kusonika ke na lakisaka ti, Yehova zola kuyamba beto samu beto vanda bandiku ya yandi. Ya ke bweso ya nene Yehova me pesa beto.

YEHOVA ZOLA TI BETO VANDA BANTU YINA YANDI ME BOKILA

3. Nani vandaka muntu ya ntete yina Yehova yambaka, mpe yinki ya salaka na bawu zole?

³ Yehova vandaka kaka yandi mosi tekila yandi banda kuyidika bima nyonso. Kasi, ntangu yandi yidikaka Mwana ya yandi ya ntete, Yehova yambaka yandi na tenta ya yandi mpe ya vandaka kilengi mingi samu na Yandi. Biblia ke zonzaka ti Yehova vanda ‘zolaka mingi’ Mwana ya yandi. Mwana ya yandi vandaka muntu ya ntete yina yandi bokilaka na tenta ya yandi mpe yandi vanda ‘kuwaka kyese na mantwala ya Yehova ntangu nyonso.’​—Bin. 8:30.

4. Banani dyaka Yehova bokilaka na kukota na tenta ya yandi?

⁴ Na manima Yehova yambaka mpe bambazi na tenta ya yandi, ntangu yandi yidikaka bawu. Biblia ke bokilaka bawu ‘bana ya  Nzambi’ mpe ke lakisaka ti ba ke na kilengi ya kuvanda na yandi. (Yobi 38:7; Dan. 7:10) Na kati ya bamvula mingi, banzenza ya Yehova vandaka kaka ba yina vanda vandaka na yandi na zulu. Kasi na manima ya sobaka, ntangu Yehova yidikaka bantu. Yandi pesaka bawu mpe bweso ya kukota na tenta ya yandi. Na kati ya bantu yina Yehova bokilaka na tenta ya yandi vandaka na Enoki, Nowe, Abrahami, mpe Yobi. Biblia ke lakisaka ti ba vandaka bandiku ya Yehova samu ba vanda tumamaka ‘na Nzambi ya tsyeleka.’​—Kub. 5:24; 6:9; Yobi 29:4; Iza. 41:8.

5. Yinki beto lenda longoka na mbikudulu yina ke na Ezekiele 37:26, 27?

⁵ Na kati ya bamvula, Yehova bikaka ve kubokila bandiku ya yandi na kuvanda na tenta ya yandi. Ezekiele 37:26, 27 (NWT) ke zonzaka: “Mu ke sala luwawanu mosi ya kizunu na bawu. Ya ke vanda luwawanu mosi ya kukondwa nsuka na bawu. Mu ke tula bawu na bwala ya bawu, ke kumisa bawu mingi mpe ke tula kisika ya munu ya santu na kati ya bawu samu na ntangu nyonso. Tenta ya munu ke vanda na bawu, mu ke vanda Nzambi ya bawu, mpe ba ke vanda bantu ya munu.” Na mbikudulu yayi, Ezekiele ke na longaka beto ti Nzambi ya tsyeleka zola ti bisadi ya yandi ya kukwikama vanda pene-pene na yandi. Yandi me pesa nsilulu ya kusala “luwawanu mosi ya kizunu na bawu.” Mbikudulu yayi, ke na zonzilaka ba yina ke na kivuvu ya kwenda zinga na zulu mpe ba yina ke na kivuvu ya kuzinga awa na ntoto. Ba ke vanda na bumosi na kati ya tenta ya Yehova mutindu “nkonga mosi” (Yoa. 10:16) Mbikudulu yango ke na lunganaka bubu yayi!

NZAMBI KE KIPEKE BETO KISIKA NI KISIKA YINA BETO KELE

6. Wa’ faso muntu ke kumaka nzenza na tenta ya Yehova, mpe tenta yango ke na wapi kisika?

⁶ Na ntama, bantu vanda sadilaka tenta samu na kupema mpe kubumbana na bamambu mutindu bamvula. Nzenza yina ba vanda bokilaka vanda vingilaka na ba yina ke yamba yandi ti, ba kipe yandi mbote-mbote ntangu yandi ke kota na tenta ya bawu. Ntangu beto ke kukipesaka na Yehova, beto ke kotaka na tenta ya yandi. (Nku. 61:4) Beto ke sepelaka na madya mingi ya kimpeve yina beto ke na yawu kintwadi na bampangi ya nkaka yina me kuma mpe banzenza na tenta ya Yehova. Tenta yango ke ve kaka na kisika mosi. Ya lenda vanda ti nge kwendaka na bwala ya bunzenza, ntangu ya nkaka, na lukutakanu mosi ya spécial kuna, nge talaka bampangi mingi ya nkaka yina ke mpe na kilengi ya kuvanda na tenta ya Yehova. Beto lenda kutana na bantu ya mutindu yayi bisika nyonso na yinza.—Luz. 21:3.

7. Samu na yinki beto lenda zonza ti bisadi ya Yehova yina kufwaka ke ntete banzenza ya tenta ya yandi? (Tala mpe kizizi.)

 ⁷ Yinki beto lenda zonza samu na bisadi ya Yehova ya kukwikama yina kufwaka? Ya ke kwandi mbote na kuzonza ti ba ke ntete banzenza ya tenta ya Yehova? Ee! Samu na yinki beto lenda zonza yawu? Samu ti na yintu ya Yehova ba ke kaka moyo. Yesu zonzaka: “Na disolo yina ke zonzilaka yinti ya bansende, Moyize mpe lakisaka ti bantu ya kufwa ke vumbuka na lufwa, ntangu yandi bokilaka Yehova ‘Nzambi ya Abrahami, Nzambi ya Izaki mpe Nzambi ya Yakobi.’ Yandi ke Nzambi ya bantu ya moyo kasi ya bantu ya kufwa ve, samu ti na yandi bawu nyonso ke moyo.”​—Luke 20:37, 38, NWT.

WAPI BAMBOTE BETO KE NA YAWU MPE YINKI BETO ME FWANA KUSALA?

8. Wapi bambote beto ke na yawu samu beto ke na tenta ya Yehova?

⁸ Kaka mutindu tenta lenda vanda kisika ya kubumbana na bima mutindu ntangu to mvula, tenta ya Yehova mpe ke bumbaka banzenza ya yandi na mambu nyonso yina lenda bebisa kindiku ya bawu na yandi, mpe ke pesaka bawu kivuvu ya tsyeleka samu na mantwala. Ntangu beto ke bikanaka ya kukangama na Yehova, Satana lenda sala ve beto kima ya yimbi samu na ntangu nyonso. (Nku. 31:23; 1 Yoa. 3:8) Na yinza ya malu-malu, Yehova ke tatamana na kubumba kaka bandiku ya yandi ya kukwikama na mambu nyonso yina lenda bebisa kindiku ya bawu na yandi, kasi yandi ke bumba mpe bawu na lufwa.​—Luz. 21:4.

9. Yinki Yehova ke na vingilaka na banzenza ya yandi?

⁹ Ya ke bweso ya nene na kuvanda banzenza na tenta ya Yehova, na kusepela na kuvanda na kindiku ya ngolo na yandi samu na ntangu nyonso. Yinki beto me lunga kusala samu beto vanda kaka banzenza ya yandi? Kana muntu me bokila nge na yinzo ya yandi, nge ke vanda na nsatu ya kusala bamambu yina yandi ke na vingilaka nge sala. Na kifwani, ya lenda sepelisa yandi kana nge katula mapapa ya nge tekila nge kota na yinzo ya yandi mpe na kilengi nyonso nge ke sala yawu. Mutindu mosi mpe, beto ke na nsatu ya kuzaba yinki Yehova ke na vingilaka beto sala samu beto bikana banzenza na tenta ya yandi. Luzolo ya beto samu na Yehova ke nata beto na kusala kima ni kima yina beto ke na ngolo ya kusala ‘samu na kusepelisa yandi.’ (Kol. 1:10) Kana beto tala Yehova mutindu ndiku ya beto, beto ke tala yandi mutindu Tata ya beto yina beto me lunga kuzitisa. (Nku. 25:14) Na dikanisi yayi na yintu, beto me lunga kuzitisa yandi ntangu nyonso mpe kuzimbana ve nani yandi kele. Na yawu, buzitu ya faso yayi ke sadisa beto na kuvanda ve na ndyatulu yina ke nyongisa yandi. Ya tsyeleka beto ke na nsatu ya ‘kutambula kukondwa lulendo’ na Nzambi ya beto.​—Mika 6:8.

NA MESO YA YEHOVA BANTU YA IZRAELE NYONSO VANDAKA MUTINDU MOSI

10-11. Wa’ faso ya ke na talanaka ti na meso ya Yehova bantu nyonso ke mutindu mosi na faso yandi bakilaka bantu ya Izraele na ntoto ya kuyuma?

¹⁰ Yehova ke bakilaka banzenza ya yandi nyonso mutindu mosi. (Rom. 2:11) Beto lenda longoka dyaka mingi na yawu na mutindu yina yandi bakilaka bantu ya Izraele na ntoto ya kuyuma ya Sinai.

¹¹ Ntangu yandi basisaka bawu na bungamba na Ezipte, Yehova soolaka banganga-Nzambi samu na kusala na tabernacle. Yandi pesaka mpe balevi bisalu ya nkaka na tabernacle. Yehova vanda kipe kwandi ba yina vanda sala na tabernacle to pene-pene ya yawu kuluta ba yina vanda zinga na bisaka ya nkaka? Ve! Samu na Yehova bawu nyonso vandaka faso mosi.

12. Yinki ke na lakisaka ti Yehova bakilaka bana ya Izraele nyonso faso mosi na ntoto ya kuyuma? (Kubasika 40:38) (Tala mpe kizizi.)

¹² Muntu nyonso ya Izraele, ya vanda ba yina vandaka pene-pene na tabernacle to ntama, vandaka  na bweso ya kuvanda na kindiku ya ngolo na Yehova. Na kifwani, Yehova bongisaka bamambu samu dikanda nyonso vanda na luve ya kutala kimangu ya dikunzi ya dituti mpe ya dikunzi ya tiya yina vandaka na zulu ya tabernacle. Kubasika 40:38 (NWT) ke zonzaka: “Dituti ya Yehova vandaka na zulu ya yinzo ya tenta na ntangu, mpe tiya vanda bikanaka na zulu ya yawu na mpimpa na meso ya yinzo ya Izraele ya mumvimba na bitini nyonso ya nzyetelo ya bawu.” Ntangu dituti vanda kwendaka, bantu nyonso ata ba yina vandaka ntama na tabernacle vanda talaka yawu. Ba yina vandaka ntama, vanda yidikaka bisaka ya bawu, kukutika tenta ya bawu, mpe kulanda dikanda nyonso. (Kut. 9:15-23) Bantu nyonso vanda kuwaka makelele ya ngolo ya bampungi zole yina vanda pesaka nzila na bantu nyonso na kutambula. (Kut. 10:2) Ya ke na talanaka pwelele ti, kuvanda pene-pene na tabernacle vandaka ve kima yina vanda lakisaka ti ya tsyeleka muntu ke na kindiku ya ngolo na Yehova. Kasi, muntu nyonso ya dikanda ya Izraele vandaka na luve ya kuvanda nzenza ya tenta ya Yehova. Mpe Yehova zola twadisa mpe kubumba bawu nyonso. Mutindu mosi mpe bubu yayi, kisika ni kisika beto kele Yehova ke zolaka, ke kipeke mpe ke bumbaka beto.

NA MESO YA YEHOVA BANTU NYONSO KE MUTINDU MOSI

13. Samu na yinki beto lenda zonza ti na Yehova bisadi ya yandi nyonso ke faso mosi?

¹³ Bubu yayi, mingi na kati ya beto ke zingaka pene-pene na biro yina ke twadisaka bisalu ya beto na yinza nyonso, to mosi ya Babetele ya Bambangi ya Yehova. Ba ya nkaka ke salaka kuna. Ya ke salaka ti bampangi yayi, ke tulaka diboko na bisalu mingi yina ke salamaka kuna mpe ba ke salaka kintwadi na ba yina ke twadisaka dibuundu. Ba ya nkaka ke salaka mutindu bantwadisi ya circonscription to ke na service spécial ya nkaka. Ata ti nge ke ve na salaka ata mosi ya bisalu yayi, nge lenda vanda na kundima ti Yehova ke zolaka bantu nyonso yina yandi me bokila mpe yina ke ya kundimama na yandi. Mpe yandi  ke tekaka dikebi na mosi na mosi ya beto. (1 Pi. 5:7) Yehova ke pesaka madya ya kimpeve na bisadi ya yandi nyonso, yandi ke twadisaka mpe ke bumbaka bawu.

14. Wapi kifwani ya nkaka ke na lakisaka ti na meso ya Yehova bantu nyonso ke faso mosi?

¹⁴ Kima ya nkaka yina ke na lakisaka ti beto ke faso mosi na meso ya Yehova ni mutindu yandi salaka ti bantu nyonso bubu yayi vanda na bweso ya kutanga Biblia. Ntangu ba sonikaka Biblia ya vandaka kaka na bandinga tatu: Ebre, Arami, mpe Greke. Ya zola zonza kwandi ti ba yina ke tangaka Biblia na bandinga tatu yayi me lutila kuvanda pene-pene na Yehova na ba yina ke tangaka yawu na bandinga ya nkaka? Ve! Ya ke ve ni faso yina.​—Mat. 11:25.

15. Yinki ke na lakisaka pwelele ti na meso ya Yehova bantu nyonso ke faso mosi? (Tala mpe kizizi.)

¹⁵ Ya ke ve ni mayela, lukolo ya yinda, to kuzaba bandinga yina ba sonikaka Biblia na mbandukulu, ke sala ti beto vanda bantu yina Yehova ke bokilaka. Yehova ke pesaka ndwenga na bantu nyonso ya yinza, kasi ve kaka na ba yina salaka lukolo ya yinda. Ba bangulaka Biblia na bandinga kuluta 1 000. Na yawu, bantu nyonso na yinza lenda longoka Biblia mpe kukuma ndiku ya Nzambi.​—2 Tim. 3:16, 17.

BIKANA KAKA NZENZA YA YEHOVA

16. Mutindu ke na lakisaka yawu Bisalu 10:34, 35, wa’ faso beto lenda bikana banzenza ya Yehova?

¹⁶ Ya ke bweso ya nene na kuvanda bantu yina Yehova ke yambaka na tenta ya yandi. Yandi zaba kuyamba na ntima ya mbote mpe luzolo kulutila bantu nyonso. Yehova ke talaka bantu nyonso mutindu mosi, ata kisika yina muntu me katuka, mayela, ndinga, mpusu to bamvula ya yandi, yandi vanda kento to bakala, Yehova ke yambaka bantu ya mutindu nyonso. Kasi yina Yehova ke vingilaka na bawu, ni ba tumama na yandi.​—Bisalu 10:34, 35 ke zonzaka: “Na yina, Pyele bandaka na kuzonza mpe tubaka: ‘Ya tsyelika, mu zaba ti Nzambi ke talaka bantu nyonso mutindu mosi. Ni yawu yina, na konso yinsi, muntu yina ke zitisaka Nzambi mpe ke salaka mambu ya kudedama ke yangidikaka [sepelisaka] Nzambi.’”

17. Wapi kisika beto lenda zaba dyaka mingi na yina me tadila kuvanda nzenza na tenta ya Yehova?

¹⁷ Na Nkunga 15:1, Davidi yufulaka: ‘O Yehova, nani lenda vanda nzenza na tenta ya nge? Nani lenda zinga na mongo ya nge ya santu?’ Yehova nataka Davidi na kusonika bamvutu ya byuvu yayi. Na disolo yina ke landa beto ke tala mwa bamambu yina beto me fwana kusala samu na kubikana banzenza ya Yehova.