1. Yinki lenda sadisa Bambangi ya Yehova na kutatamana na kusadila Yehova ata ti ba ke na kutanaka na bampasi?

 BIBLIA ke zonzilaka bantangu ya beto yayi, mutindu bantangu yina “bampasi ke lutila.” (2 Tim. 3:1) Yinza nyonso ke na kutanaka na bampasi, kasi Bambangi ya Yehova ke kutanaka na bankwamusu ya mutindu na mutindu samu ti ba ke sadilaka Yehova. Kubambuka ti, Yehova ke sadisa beto mpe yandi ke “Nzambi ya moyo” ke mosi ya bamambu yina lenda sadisa beto na kutatamana na kusadila yandi.​—Yer. 10:10; 2 Tim. 1:12.

2. Na wapi mutindu Yehova ke Nzambi ya moyo?

² Yehova ke Nzambi ya tsyeleka. Yandi ke talaka bampasi nyonso yina beto ke kutanaka na yawu mpe ke sosaka bafaso ya kusadisa beto. (2 Ns. 16:9; Nku. 23:4) Kana beto zimbana ve ti, Nzambi ke na beto mpe ti yandi ke ya kubongama samu na kusadisa beto, ya ke pesa beto ngolo ya kukanga ntima na mantwala ya bampasi. Beto tala wa’ faso bamambu yayi salamaka na mfumu Davidi.

3. Yinki Davidi vanda sosa kuzonza ntangu yandi zonzaka: ‘Yehova kele na luzingu!’?

³ Mfumu Davidi zabaka Yehova mpe vanda tudilaka yandi ntima. Ntangu mfumu Saule na bambeni ya nkaka vanda sosa kufwa yandi, Davidi sambilaka Yehova samu na kuzwa lubakusu. (Nku. 18:6) Ntangu Nzambi pesaka mvutu na lusambu ya yandi mpe vuukisaka yandi, Davidi zonzaka: ‘Yehova kele na luzingu!’ (Nku. 18:46) Yinki Davidi vanda sosa kuzonza? Na yandi, Yehova ke Nzambi ya moyo mpe ya tsyeleka yina ke bikaka ata fioti ve bisadi ya yandi. Ya tsyeleka, Davidi talaka na luzingu ya yandi ti, yandi vanda sadila Nzambi ya tsyeleka yina ke vandaka kaka ya kubongama  samu na kusadisa yandi mpe ya pesaka yandi ngolo ya kutatamana na kusadila yandi.​—Nku. 18:28, 29, 49.

4. Wapi bambote beto ke kuzwa kana beto zimbana ve ti Yehova ke Nzambi ya moyo?

⁴ Kuzaba ti Yehova ke Nzambi ya moyo lenda sadisa beto na kusadila yandi na tiya nyonso. Ya ke pesa beto ngolo ya kukanga ntima na mantwala ya bampasi mpe beto ke tatamana na kusadila yandi. Dyaka, beto ke vanda kaka na nsatu ya kuvanda pene-pene na yandi.

NZAMBI YA MOYO KE PESA NGE NGOLO

5. Ntangu beto ke kutanaka na bamambu ya mpasi, na yinki beto lenda vanda na kundima? (Bafilipi 4:13)

⁵ Kana beto zimbana ve ti Yehova ke Nzambi ya moyo, mpe ti yandi ke sadisa beto, beto ke lenda kukanga ntima na bamambu nyonso, ya vanda ya fioti to ya nene. Yehova ke Nzambi ya ngolo nyonso. Ya ke ve na mambu yina me lutila yandi na ngolo. Na yawu, yandi lenda pesa beto ngolo ya kukanga ntima. (Tanga Bafilipi 4:13.) Ya ke pesaka beto ngolo ya kunwana na bamambu ya mpasi yina beto ke kutanaka na yawu. Ntangu beto ke talaka diboko ya Yehova na bamambu ya fioti-fioti yina beto ke kutanaka na yawu, ya ke pesaka dyaka beto kiminu ti yandi ke sadisa dyaka beto ntangu beto ke kutana na bampasi ya kulutila.

6. Wapi bamambu na buntwenya ya Davidi, kulisaka kundima ya yandi ti Yehova ke sadisa yandi?

⁶ Beto tala bamambu zole ya luzingu ya Davidi, yina kulisaka kundima ya yandi ti Yehova ke sadisa yandi. Kilumbu mosi ntangu yandi vandaka ntete ntwenya, Davidi vanda kengidila mameme ya tata ya yandi mpe nkosi nataka dimeme mosi. Kilumbu ya nkaka, ours mpe salaka yawu. Davidi lakisaka bukindi bambala zole yayi. Yandi bingisaka bimbulu yango mpe vuukisaka mameme. Kasi, Davidi vanda kanisa ve ti yandi lendaka kusala yawu na ngolo ya yandi mosi. Yandi vandaka na kundima ti ni Yehova pesaka yandi ngolo samu na kusala yawu. (1 Sa. 17:34-37) Davidi zimbanaka ata fioti bamambu yayi. Kuyindula na yawu sadisaka yandi na kuvanda na kiminu ti Nzambi ya moyo ke bika ve kupesa yandi ngolo na mantwala.

7. Wapi mutindu, faso ya Davidi ya kutadila bamambu sadisaka yandi na kunwana na Goliati?

⁷ Dyaka, ntangu yandi kumaka pene-pene na bamvula 20, Davidi kwendaka kisika yina vandaka basoda ya Izraele. Ntangu yandi kumaka kuna, yandi talaka ti basoda ya Izraele vandaka na boma samu na Goliati muntu ya filistia yina ‘kwizaka sombola basoda ya Izraele.’ (1 Sa. 17:10, 11) Kutala nzutu ya Goliati mpe kuwa bamambu yina yandi vanda zonza vanda pesa bawu boma mingi. (1 Sa. 17:24, 25) Kasi, Davidi vanda tala ve bamambu faso bawu. Samu na yandi, Goliati sombolaka ve kaka basoda ya Izraele, kasi yandi ‘sombolaka mpe Nzambi ya moyo.’ (1 Sa. 17:26) Davidi tulaka kiminu ya yandi nyonso na Yehova. Yandi zimbanaka ve faso Yehova sadisaka yandi ntangu yandi vanda kengidila mameme ya tata ya yandi, mpe yandi vandaka na kundima ti Yehova ke sadisa dyaka yandi na mambu yayi. Na makanisi yayi na yintu, Davidi nwanaka na Goliati mpe kufwaka yandi.​—1 Sa. 17:45-51.

8. Ntangu beto ke na kutanaka na bampasi, yinki lenda sadisa beto na kutula ntima na Yehova? (Tala mpe kizizi.)

⁸ Kana beto zimbana ve ti Nzambi ya moyo ke ya kubongoma samu na kusadisa beto, beto mpe ke lenda kununga bampasi. (Nku. 118:6) Kuyindula na yina Yehova salaka samu na beto na ntama, ke kumisa dyaka ngolo kifu ya beto ya kutulaka yandi ntima. Kutanga masolo ya Biblia ke sadisa nge na kuzimbana ve mutindu Yehova sadisaka bisadi ya yandi. (Iza. 37:17, 33-37) Na jw.org, nge lenda kuzwa mpe masolo yina ke lakisaka mutindu Yehova sadisaka bampangi ya nkento na ya bakala ya ntangu ya beto. Kuzimbana ve nyonso yina Yehova me sala samu na kusadisa nge. Kana nge ke na talaka ti nabunu Yehova  vuukisa nge na bamambu ya ngitukulu mutindu kunwana na ours to nkosi, kunyonga ve. Samu na yinki? Mambu ya tsyeleka ke ti, Yehova me sala bamambu mingi samu na nge! Yandi soolaka nge samu nge vanda ndiku ya yandi. (Yoa. 6:44) Mpe tii bubu yayi, yandi ke na sadisaka nge na kukangama kaka na matsyeleka. Nge lenda lomba na yandi na kusadisa nge na kubambuka balusambu yina nge salaka yina yandi pesaka bamvutu, to mutindu yandi sadisaka nge na ntangu ya mpasi mpe ntangu yina yandi pesaka nge lubakusu yina nge vandaka na yawu nsatu. Kuyindula na bamambu yayi ke sadisa nge na kukulisa kiminu ti Yehova ke bika ve kusadisa nge.

9. Ntangu beto ke kutanaka na bampasi, yinki beto me bonga kuzimba ve? (Bingana 27:11)

⁹ Kutala Yehova mutindu Nzambi ya moyo, ke sadisa beto na kutala bampasi ya beto na faso ya mbote. Faso ya beto ya kubakila bampasi lenda sadisa na kupesa mvutu na Satana yina zonzaka ti ntangu beto ke kutana na bantangu ya mpasi, beto ke bika kusadila Yehova. (Yobi 1:10, 11) Bingana 27:11 (NWT) ke zonzaka: “Mwana ya munu, vanda mayela mpe pesa ntima ya munu kyese, Samu mu pesa mvutu na muntu yina ke sombolaka munu.” Ntangu beto ke bikanaka ya kukwikama na Yehova ata na bantangu ya mpasi, beto ke lakisaka luzolo ya beto samu na yandi mpe ti Satana ke muntu ya luvunu. Nge ke kisika yina luyalu me nimina kisalu ya beto? Nge ke na bamambu ya mbongo? Ba me pesa nge mvutu ya yimbi na kisalu ya kusamuna? To nge ke na bamambu ya nkaka ya mpasi? Kuzimbana ve ti mambu ya mpasi yina nge ke na kutanaka na yawu ke bweso ya kusepelisa ntima ya Yehova. Mpe kuzimbana ve ti Yehova ke bika ve ti nge kutana na bampasi kulutila yina nge lenda kanga ntima. (1 Ko. 10:13) Yandi ke pesa nge ngolo samu nge lemba ve.

NZAMBI YA MOYO KE PESA NGE DIFUTA

10. Yinki Nzambi ya moyo ke sala samu na bisadi ya yandi?

¹⁰ Yehova ke pesaka difuta na bisadi ya yandi. (Ebr. 11:6) Bubu yayi, yandi ke na sadisaka beto na kusepela na yina beto ke na yawu, na kuvanda na kizunu mpe na mantwala, yandi ke pesa beto luzingu ya ntangu nyonso. Beto lenda tudila yandi  ntima na kundima ti yandi ke na nsatu mpe ngolo ya kupesa beto difuta. Kiminu na bamambu yayi ke sadisaka beto na kubika ve na kusadila yandi kaka faso bisadi ya yandi ya kukwikama ya ntama salaka yawu. Ni yina Timote salaka na siècle ya ntete.​—Ebr. 6:10-12.

11. Yinki nataka Timote na kusala mingi samu na kimvuka? (1 Timote 4:10)

¹¹ 1 Timote 4:10 ke zonzaka: “Ya tsyelika, beto ke na kusala na ngolo mpe kunwana, samu ti beto tulaka kivuvu ya beto na Nzambi ya moyo. Yandi kele Kivuukisi ya bantu nyonso, mingi ya bayina ke kwikilaka.” Timote vandaka na kiminu ya ngolo ti Yehova zola pesa yandi difuta. Ni na yawu yandi salaka bangolo mingi samu na kusadila Yehova na bampangi. Na wapi mutindu? Ntumwa Polo kindisaka yandi na kubongisa faso ya yandi ya kulonga, ya vanda na kisalu ya kusamuna to na kati ya kimvuka. Yandi zola vanda mpe kifwani ya mbote samu na bantwenya mpe bantu ya kukula. Dyaka, Polo pesaka yandi kisalu ya ngolo ya kusala, mutindu kupesa malongi ya ngolo na luzolo nyonso na bampangi yina vandaka na nsatu yawu. (1 Tim. 4:11-16; 2 Tim. 4:1-5) Ata ti bampangi ya nkaka vanda talaka ve kisalu yina yandi vanda salaka, to ba vanda sepelaka ve, yandi vandaka na kundima ti Yehova ke pesa yandi difuta.​—Rom. 2:6, 7.

12. Yinki ke nataka bakuluntu na kutatamana na kusala mingi samu na kimvuka? (Tala mpe kizizi.)

¹² Bubu yayi mpe, bakuluntu lenda vanda na kundima ti Yehova ke sepelaka na kisalu nyonso ya ngolo yina ba ke salaka. Ata ti ba ke mivungi, ba ke samunaka, mpe ke longaka, kasi mingi na kati ya bawu ke tulaka mpe diboko na kisalu ya kutunga bayinzo ya kimfumu mpe ke sadisaka bampangi yina ke kutanaka na bamambu mutindu kuningana ya ntoto. Ba ya nkaka ke salaka na CLH to na ba groupes de visite aux malades. Bakuluntu yina ke tulaka diboko na bamambu ya mutindu yayi ke lakisaka ti ya ke ve dibuundu ya bantu, kasi ya Yehova. Na yawu, ba ke salaka mingi samu na kimvuka mpe ba ke na kundima ti Yehova ke pesa bawu difuta samu na yawu.—Kol. 3:23, 24.

13. Yinki ya ke salaka Yehova ntangu yandi ke talaka bangolo yina mosi na mosi ya beto ke salaka samu na kisalu ya yandi?

 ¹³ Beto nyonso lenda vanda ve bakuluntu, kasi beto nyonso ke na kima yina beto lenda pesa na Yehova. Yandi ke vandaka na kilengi ntangu beto ke salaka bangolo ya kusadila yandi na ntima ya beto nyonso. Mpe makabu yina mosi na mosi ke salaka samu na kisalu ya yandi ata ti ya ke vandaka ve mingi, ke pesaka yandi kilengi. Ya ke sepelisaka yandi ntangu beto ke salaka bangolo na kupesa mvutu na balukutakanu, ntangu beto ke tulaka ve ntima na bafoti ya bampangi mpe ke lemvokilaka bawu. Kana nge ke na talaka ti bamambu yina nge ke na salaka samu na Yehova ke kaka fioti, vanda na kundima ti, ya ke ntalu mingi na Yehova. Yandi ke zolaka nge samu na yawu mpe yandi ke pesa nge difuta.​—Luke 21:1-4.

BIKANA KAKA PENE-PENE NA NZAMBI YA MOYO

14. Wa’ faso kutatamana na kubumba kindiku ya ngolo na Yehova ke sadisaka beto na kuvanda kaka ya kukwikama? (Tala mpe kizizi.)

¹⁴ Kana nge ke na kindiku ya ngolo na Yehova, ya ke vanda ve mpasi na nge na kubikana ya kukangama na yandi. Ni yina salamaka samu na Yosefi. Yehova vandaka muntu ya tsyeleka na meso ya yandi. Na yawu, yandi mangaka kusala kinsuza samu na kunyongisa ve yandi. (Kub. 39:9) Samu beto tala Yehova mutindu muntu ya tsyeleka, beto me fwana kubaka ntangu ya kusambila yandi mpe kulongoka Biblia. Kusala yawu ke kulisa dyaka kindiku ya beto na yandi. Kindiku ya ngolo na Yehova ke sala ti, mutindu Yosefi, beto vanda ve na nsatu ya kusala kima ni kima yina ke nyongisa yandi.​—Zaki 4:8.

15. Wapi kileso beto lenda benda na yina kuminaka bana ya Izraele na ntoto ya kuyuma? (Baebre 3:12)

¹⁵ Ntangu bantu ke zimbanaka ti Yehova ke Nzambi ya moyo, ya lenda vanda mpasi na bawu na kuvanda ya kukwikama na yandi. Ni yawu kuminaka bana ya Izraele ntangu ba vandaka na ntoto ya kuyuma. Ba zabaka ti Yehova kele, kasi ba bandaka kusala ntembe ti yandi ke kipe bansatu ya bawu. Ba kumaka tii na kuyufula: ‘Yehova ke kwandi na kati ya beto to ve?’ (Bas. 17:2, 7) Ni yawu nataka bawu na kumanga kuwa Nzambi. Beto ke ve na nsatu ya kulanda kifwani ya bawu ya yimbi.​—Baebre 3:12 ke zonzaka: “Bampangi,  beno vwanda na nkebolo [sala keba], samu ti ata muntu na kati ya beno vwanda na ntima ya yimbi, yina ke kwikilaka ve, mpe yina ke nataka yandi na kumanga Nzambi ya moyo.”

16. Yinki lenda meka kiminu ya beto?

¹⁶ Yinza zola ti ya vanda mpasi na beto na kuvanda pene-pene na Yehova. Bantu mingi ke ndimaka ve ti Nzambi kele. Bantangu ya nkaka, ya lenda talana ti ba yina ke zitisaka ve misiku ya Nzambi ke nataka luzingu ya mbote samu ti ba ke na mbongo mingi. Kutala bamambu ya mutindu yayi lenda meka kiminu ya beto. Ata ti beto ke ndimaka ti Nzambi kele, beto lenda banda kusala bantembe ti yandi ke kipe beto. Makanisi ya mutindu yayi kuminaka mpe muntu yina sonikaka Nkunga 73. Yandi vanda tala ti ba yina vanda zitisaka ve misiku ya Nzambi vandaka na luzingu ya kitoko. Ya nataka yandi na kuyufula samu na yinki ya ke mfunu na kusadila Nzambi.​—Nku. 73:11-13.

17. Yinki ke sadisa beto na kubikana kaka pene-pene ya Yehova?

¹⁷ Yinki sadisaka muntu yina sonikaka Nkunga yayi na kusoba faso ya yandi ya kutala bamambu? Yandi yindulaka na bamambu ya mpasi yina ke kumina ba yina ke tulaka ve ntima na Yehova. (Nku. 73:18, 19, 27) Yandi yindulaka mpe na bambote yina kusadila Yehova ke nataka. (Nku. 73:24) Beto mpe lenda yindula na bafaso nyonso yina Yehova sakumunaka beto. Beto lenda kanisa mpe na mutindu luzingu ya beto zola vanda kana beto vanda sadila ve Yehova. Kana beto zimbana ve samu na yinki ya ke mbote na beto na kusadila Yehova, ya ke sadisa beto na kubikana ya kukangama na yandi. Mpe mutindu muntu yina sonikaka Nkunga, beto ke zonza: ‘Samu na munu, kupusana pene-pene ya Nzambi ke mbote.’​—Nku. 73:28.

18. Samu na yinki beto ke ve na boma ya mantwala?

¹⁸ Beto lenda nunga bamambu ya mpasi yina beto ke na kutanaka na yawu na bilumbu ya nsuka yayi, samu ti beto ke “bisadi ya Nzambi ya moyo mpe ya tsyeleka.” (1 Tes. 1:9, NWT) Nzambi ya beto, ke Nzambi ya moyo mpe yandi ke bika ata fioti ve kusadisa beto. Yandi lakisaka yawu na bisadi ya yandi ya ntama, mpe yandi ke na lakisaka beto yawu bubu yayi. Ntangu me bikana kaka fioti samu ti ntoto kutana na mpasi ya kulutila nene yina nabunu ntete ya salama. Kasi, beto ke vanda ve beto mosi. Yehova ke vanda na beto. (Iza. 41:10) Beto nyonso ke “lenda kutuba na kivuvu nyonso: ‘Mfumu kele kisadisi ya munu mpe mu ke vwanda ve na boma ya kima.’”​—Ebr. 13:5, 6.