1-2. Samu na yinki baverse ya nkaka ya Biblia ke kumá mfunu ya kulutila ntangu bamambu ke sobá na luzingu ya beto?

 BAKALA na kento yina ke na kwelaná ke landá mbote-mbote discours yina ba ke pesá kilumbu ya bawu ya makwela. Baverse ya Biblia yina ba ke tangila bawu, ba me kuwa deza yawu. Kasi kilumbu yina baverse yayi ke simba dyaka ya kulutila ntima ya bawu. Samu na yinki? Samu ti banda kilumbu yina, ba ke sadila yawu na makwela ya bawu.

² Mambu yayi mpe ke salamá samu na bakristo yina me kuma bibuti. Na kati ya bamvula mingi, ba vandá me kuwa ba-discours yina vandá zonzila faso ya kukulisa bana. Kasi ntangu yayi ba ke na bakilá dyaka ve malongi yayi mutindu na ntama. Samu na yinki? Samu bawu mpe mase kulisa bana. Ya ke kisalu ya nene. Ntangu bamambu ke sobá na luzingu ya beto, beto ke bandá kutadila malongi ya Biblia yina ke na zonzilá mambu ya beto na faso ya nkaka. Ni na yawu, kaka faso Yehova zonzá na bamfumu ya Izraele, ‘bilumbu nyonso’ bisadi ya Nzambi ke tangá Biblia, mpe ke kanisá mbote-mbote na yina ba ke tangaka.—Kul. 17:19.

3. Yinki beto ke zonzila na artikle yayi?

³ Bibuti ya bakristo, Yehova pesá beno bweso mosi ya nene: kulonga bana ya beno mambu ya yandi. Kasi kulonga bana ya beno zola zonza ve kaka kuzonzila bawu nani ke Nzambi. Beno zola sadisa bawu na kuvanda na luzolo ya mingi samu na yandi. Yinki beno lenda sala samu na kusadisa bana ya beno na kuzola Yehova? Na Artikle yayi beto ke zonzila misiku ya  Biblia 4 yina lenda bakisa beno. (2 Tim. 3:16) Beto ke zonzila mpe bambote yina kuzwá bibuti ya nkaka ya bakristo samu ba sadilá malongi ya Biblia.

4. Zonzila musiku ya ntete yina lenda sadisa bibuti na kukulisa luzolo ya Yehova na bantima ya bana ya bawu? (Zaki 1:5)

⁴ Musiku ya ntete: Sosa Yehova twadisa nge. Lomba na Yehova pesa nge mayela yina nge ke na yawu nsatu samu na kusadisa bana ya nge na kuzola yandi. (Tanga Zaki 1:5.) Malongi yina ke katuká na Yehova me lutila malongi nyonso yina bibuti lenda kuwa na bantu ya nkaka. Samu na yinki beto ke na zonzak’ yawu? Ya ntete, Yehova zaba faso ya mbote ya kukulisa bana, samu yandi ke Tata banda ntama. (Nku. 36:9) Ya zole, malongi yina yandi ke pesá ke natiná ntangu nyonso bambote na ba yina ke sadilak’ yawu.—Iza. 48:17.

5. a) Yinki kimvuka ya Yehova ke salá samu na kusadisa bibuti? b) Na video ya mpangi Amorim na kento ya yandi, yinki nge me longoka na mutindu ba kulisá bana ya bawu?

⁵ Na nzila ya Biblia mpe kimvuka ya yandi, Yehoha ke pesá madya ya kimpeve yina bibuti lenda sadila samu na kusadisa bana ya bawu na kuzola yandi. (Mat. 24:45) Na kifwani, bibuti lenda kuzwa malongi ya mbote na rubrique yina ke na site internet ya beto, na nkumbu ya “Lubakusu samu na dikanda.” Na ntama bima yina ke na rubrique yina vandá basiká na Réveillez-vous ! Jw.org ke mpe na bavideo mingi yina lenda sadisa bibuti na kuzaba wapi mutindu ba lenda sadila malongi ya Yehova samu na kukulisa bana ya bawu. *—Bin. 2:4-6.

6. Yinki tata mosi me zonza na malongi yina yandi na kento ya yandi ke kuzwá na kimvuka ya Yehova?

⁶ Bibuti mingi me vutula matondo na lubakusu yina Yehova ke pesá bawu na nzila ya kimvuka ya yandi. Tata mosi na nkumbu ya Joe me zonza: “Kusadisa bana 3 na kuzola Yehova ke ve kisalu ya fioti. Munu na kento ya munu ke sambilá mingi samu Yehova sadisa beto. Mpe bambala mingi beto ke kuzwá artikle to video yina ke kwizá kaka na ntangu yina beto ke na yawu nsatu. Ntangu nyonso, beto ke sosá Yehova twadisa beto.” Joe na kento ya  yandi me tala ti ba-artikle mpe bavideo yayi ke sadisá bana ya bawu na kukuma pene-pene na Yehova.

7. Samu na yinki bibuti me bonga kusala bangolo na kuvanda bifwani ya mbote samu na bana ya bawu? (Baroma 2:21)

⁷ Musiku ya zole: Vanda kifwani ya mbote. Bana ke talá yina bibuti ya bawu ke salaka. Bambala mingi ba ke landá kifwani ya bawu. Ya tsyeleka, bibuti nyonso ke bantu ya masumu. (Rom. 3:23) Kasi bibuti yina ke na ndwenga ke salá nyonso samu na kuvanda bifwani ya mbote samu na bana ya bawu. (Tanga Baroma 2:21.) Tata mosi me zonza mambu yayi samu na bana: “Bana ke faso éponge. Éponge ke miná maza to mafuta yina ba ke tulá kisika yina ya kele.” Yandi me bwela: “Ntangu nge ke sala bamambu yina ke na kwelaná ve na yina nge ke longá bawu, ba ke zabisa nge yawu.” Na yawu, si beto ke na nsatu bana ya beto zola Yehova, luzolo ya beto mosi samu na yandi zolá vanda ngolo mpe zolá talana.

8-9. Yinki beto me longoka na bamambu yina Andrew na Emma me zonza?

⁸ Ya ke na bafaso mingi yina bibuti lenda sadisa bana ya bawu na kuzola Yehova. Tala yinki Andrew mpangi mosi ya ntwenya yina ke na bamvula 17 me zonza: “Bibuti ya munu longá munu ti ya ke mfunu na kusambila. Bampimpa nyonso, papa ya munu vandá kwizá sambilá na munu ata ti mu sambilá deza. Ntangu nyonso, bibuti ya munu vandá zonza na munu na leki ya munu ya kento ti, beto lenda sambila Yehova bambala nyonso yina beto zola. Bubu yayi lusambu ke mfunu mingi samu na munu. Ya ke ve mpasi na munu na kusambila mpe na kutala ti Yehova ke Tata yina ke zolá munu.” Bibuti, beno zimbana ve ti si beno zola Yehova, ya ke sadisa bana ya beno na kuzola mpe yandi.

⁹ Beto zonzila mpe kifwani ya Emma. Ntangu tata ya bawu biká bawu, yandi vandá na bamfuka mingi mpe ya kumá na yintu ya mama ya bawu. Emma me zonza: “Bambala mingi mama vandá ve na mbongo. Kasi, yandi vandá zonza kaka ti Yehova ke kipeke bisadi ya yandi. Mutindu ya yandi ya kuzinga vandá lakisa ti yandi vandá na kiminu na bamambu yina yandi vandá zonza. Mama ya beto vandá sadilá na luzingu ya yandi, bamambu yina yandi vandá longá beto.” Wapi kileso samu na beto? Ata na bantangu ya mpasi, kifwani ya mbote ya bibuti lenda longa bana ya bawu.—Gal. 6:9.

10. Yinki vandá sala ti bibuti na Izraele vanda na ntangu ya mingi ya kusolola na bana ya bawu? (Kulonga Misiku 6:6, 7)

¹⁰ Musiku ya tatu: Solola ntangu nyonso na bana ya nge. Yehova pesá na bibuti ya Izraele musiku ya kulonga bana ya bawu ntangu nyonso nani yandi kele. (Tanga Kulonga Misiku 6:6, 7.) Na kilumbu, bibuti yayi vandá na bantangu mingi samu na kusolola na bana ya bawu mpe kukulisa luzolo ya Yehova na kati ya bantima ya bawu. Na kifwani, mwana ya bakala vandá lutisá bantangu mingi na tata ya yandi na bilanga, samu kukunda mpe kubuka bambuma. Mwana ya kento vandá bikaná na mama na yinzo, samu na kutunga mpe kusala bisalu ya nkaka. Samu bibuti vandá salá kintwadi na bana ya bawu, ba vandá na ntangu ya mingi ya kusolola na bawu na bamambu ya mfunu. Na kifwani, ba lendá zonzila na bana ya bawu ntima ya mbote ya Yehova, mpe faso yandi vandá sadisa dikanda ya bawu.

11. Bubu yayi, wapi yina ke mosi ya bantangu yina bibuti lenda solola na bana ya bawu?

¹¹ Bubu yayi luzingu ke dyaka ve faso na ntama. Na babwala mingi, bibuti ke lutisá ve kilumbu nyonso na bana ya bawu. Ba lenda vanda na kisalu mpe bana ya bawu na  l’école. Na yawu, bibuti me bonga kusala bangolo samu na kuzwa ntangu ya kusolola na bana ya bawu. (Ef. 5:15, 16; Flp. 1:10) Kulongoka ya dikanda ke mosi ya bantangu yina ba lenda solola na bana. Alexandre ntwenya mosi ya bakala me zonza: “Ntangu nyonso tata ya beto ke yidiká ntangu samu na kulongoka ya beto ya dikanda. Mpe yandi ke biká ata kima kanga beto nzila ya kulutisa ntangu yina kintwadi. Na manima ya kulongoka, beto ke salá masolo.”

12. Yinki mfumu ya dikanda zolá sosa bana ya yandi sala ntangu yandi ke na longoká na bawu?

¹² Kana nge ke mfumu ya dikanda, yinki nge lenda sala samu bana ya nge sepela na kulongoka ya beno ya dikanda? Nge lenda longoka na bawu buku ya malu-malu Sepela na luzingu ya ntangu nyonso! Na buku yayi, ya ke ve mpasi na kuzwa masolo ya kitoko. Nge ke na nsatu bana ya nge zonzila nge bamambu yina ke na bawu na ntima? Na yawu, kusadila ve kulongoka ya dikanda samu na kungala bawu. Mpe kudasuka ve ntangu bana ya nge ke zonzá bamambu yina ke kwelaná ve na misiku ya Biblia. Sepela na yina ba ke na zonzá na nge bamambu yina ba ke na kanisaka. Mpe sadisa bawu na kutala ti ba lenda zonza na nge nyonso yina ke na bawu na ntima. Nge lenda sadisa bana ya nge kaka si nge zaba mambu yina ke na bawu na ntima.

13. Wapi bantangu ya nkaka bibuti ke na yawu ya kusadisa bana ya bawu na kukuma pene-pene na Yehova?

¹³ Bibuti, beno sosa bantangu na kati ya kilumbu na kusadisa bana ya beno na kukuma pene-pene na Yehova. Beno vingila ve kaka ntangu beno ke longoká Biblia na bawu samu na kuzonzila bawu nani ke Nzambi ya beto ya luzolo. Tala yinki Lisa mama mosi me zonza: “Beto ke sadilá nyonso yina Yehova yidiká samu na kuzonzila bana ya beto nani ke Yehova. Na kifwani, ntangu yimbwa ya beto ke salá bamambu yina ke sekisá bana ya beto, beto ke zonzá na bawu ti Yehova ke zolá kusekisa bantu mpe yandi ke sepelá na luzingu kaka mutindu beto.”

14. Samu na yinki bibuti me lunga kusadisa bana ya bawu na kusola bandiku ya mbote? (Bingana 13:20)

¹⁴ Musiku ya yiya: Sadisa bana ya nge na kuvanda na bandiku ya mbote. Biblia ke lakisá pwelele ti bandiku ya beto lendá nata  beto na kusala bamambu ya mbote to ya yimbi. (Tanga Bingana 13:20.) Bibuti, beno me zaba kwandi bandiku ya bana ya beno? Beno me kutana kwandi na bawu mpe beno me lutisa kwandi ntangu na bawu? Yinki beno lenda sala samu na kusadisa bana ya beno na kuzwa bandiku yina ke zolá Yehova? (1 Ko. 15:33) Beno lenda bokila bampangi yina ke na kimpeve ya ngolo na kulutisa ntangu na dikanda ya beno.—Nku. 119:63.

15. Yinki bibuti lenda sala samu na kusadisa bana ya bawu na kuvanda na bandiku ya mbote?

¹⁵ Beto tala yinki Tony na kento ya yandi salá samu na kusadisa bana ya bawu na kuvanda na bandiku ya mbote. Yandi me zonza: “Na kati ya bamvula, munu na kento ya munu me bokila na yinzo ya beto, bampangi mingi ya ntwenya to ya kukula ya bwala ya beto to ya babwala ya nkaka. Beto vandá kabula kima ya kudya na bawu mpe beto vandá sala kulongoka ya dikanda kintwadi na bawu. Ya ke faso ya kitoko ya kusala kindiku na bampangi yina ke zolá Yehova mpe ke sadilak’ yandi na kilengi. Beto me yamba na yinzo ya beto bantwadisi ya circonscription, ba-missionnaire mpe bampangi ya nkaka. Bana ya beto me longoka mingi na kuwá masolo yina ba vandá kabula na beto, mpe na kutalá tiya ya bawu mpe kisalu ya ngolo yina ba vandá sala samu na Yehova. Nyonso yayi sadisá bana ya beto na kukuma pene-pene na Yehova.” Bibuti, beno sala nyonso samu bana ya beno vanda na bandiku ya mbote.

16. Yinki kibuti lenda sala si mwana ya yandi me manga kusadila Yehova?

¹⁶ Yinki nge lenda sala si ata bangolo ya nge nyonso, mwana ya nge me manga kusadila Yehova? Kukanisa ve ti nge ke kibuti ya yimbi. Yehova pesá na beto nyonso, ata mpe na mwana ya nge nzila ya kusola si yandi ke sadila yandi to ve. Si mwana ya nge me bika Yehova, vanda na kiminu ti ya ke na kilumbu yina yandi ke vutuka. Kanisa na disolo ya mwana yina biká yinzo. (Luke 15:11-19, 22-24) Mwana yayi salá bamambu mingi ya yimbi, kasi na manima yandi vutuká na yinzo. Bantu ya nkaka lendá zonza: ‘Mambu yayi ke kaka disolo. Mwana ya munu lenda vutuka kwandi  na Yehova?’ Ee yandi lenda! Ni yawu salamá samu na Elie ntwenya mosi.

17. Wa’ faso disolo ya Elie lenda kindisa nge?

¹⁷ Samu na bibuti ya yandi, Elie me zonza: “Ba salá nyonso samu na kusadisa munu na kuzola Yehova mpe mambu ya yandi, Biblia. Kasi ntangu mu vandá na bamvula 15, mu mangá kulanda nzila yina ba lakisá munu.” Elie bandá kusala bamambu ya yimbi mpe vandá bumbá yawu. Bibuti ya yandi salá nyonso na kusadisa yandi na kuyidika kindiku ya yandi na Yehova, kasi yandi mangaka. Ntangu yandi biká yinzo ya bibuti, ndyatulu ya yandi lutilá dyaka kubeba. Kasi bantangu ya nkaka, yandi vandá solola mambu ya Nzambi na mosi ya bandiku ya yandi. Elie me zonza: “Samu mu vandá zonzila Yehova na ndiku ya munu, munu mpe banda kukanisa na Yehova. Fioti-fioti, bambuma ya matsyeleka yina bibuti ya munu kundá na kati ya ntima ya munu, bandá kukula.” Na manima, Elie vutukilá Yehova. * Kanisa na kilengi yina ya salá na bibuti ya Elie na yina ba longak’ yandi na kuzola Yehova kubanda bufioti ya yandi.—2 Tim. 3:14, 15.

18. Yinki ya ke salá beno ntangu beno ke talá bibuti yina ke salá bangolo ya bawu nyonso na kulonga bana ya bawu na kuzola Yehova?

¹⁸ Bibuti, Yehova me pesa beno bweso ya nene: kusadisa bana ya beno na kukuma bisadi ya yandi. (Nku. 78:4-6) Ya ke ve kisalu ya fioti. Beto ke na siiká beno mingi na bangolo nyonso yina beno ke na salá samu na kusadisa bana ya beno. Beno lemba ve na kulonga bana ya beno na kuzola Yehova, mpe na kutumama na yandi. Si beno sala yawu, beno ke sepelisa Tata ya beto ya luzolo.—Ef. 6:4.