1. Yinki muntu nyonso me lunga kusola?

 BUBU yayi, bantu nyonso me lunga kusola: ba ke ndima kwandi ti Yehova, muntu yina me lunga kuyala na zulu ya bantu, vanda Mfumu ya bawu, to ba ke landa mbeni ya yandi Satan? Na mambu yayi, muntu ve ke zonza ti yandi ke na kati-kati. Mukanu yina bantu ke baka ke sala ti ba kuzwa luzingu ya ntangu nyonso, to ve. (Mat. 25:31-33, 46) Na ntangu ya “mpasi ya nene” bantu ke kuzwa kidimbu samu na kuvuuka to samu na kufwa.—Luz. 7:14, nwt-MK; Luz. 14:9-11; Ezk. 9:4, 6.

2. a) Yinki Baebre 10:35-39 ke zonzá na beto na kusala? b) Wa’ faso buku ya Luzabusu lenda sadisa beto?

² Tanga Baebre 10:35-39. Si nge me sola Kimfumu ya Yehova, nge me baka mukanu ya mbote. Na tiya nyonso nge ke sadisá bantu ya nkaka na kusala faso nge. Nge lenda sadila buku ya Luzabusu samu na kunata bawu na kusola. Buku yayi ke zonzilá bamambu yina ke kumina ba yina ke mangá Yehova. Kasi ya ke zonzilá mpe bambote yina ke kuzwa ba yina nyonso ke bikana ya kukangama na yandi. Ya me lunga beto longoka matsyeleka ya mfunu yina ke na Luzabusu. Ya ke kulisa nsatu ya beto ya kuvanda kaka ya kukangama na kisalu ya Yehova. Dyaka, beto lenda sadila bamambu yina beto me longoka samu na kusadisa bantu ya nkaka, na kubaka mukanu ya mbote mpe kuvutuka ve manima.

3. Yinki beto ke zonzila na artikle yayi?

³ Na artikle yayi beto ke tala byuvu yayi: Yinki Yehova me bumbila na ba yina ke ndima ti yandi yala na zulu ya bawu? Mpe yinki ke kumina ba yina ke sola kulanda kibulu ya ngitukulu ya mbwaki yina ke na Luzabusu?

4. Nani ntumwa Yoane talá ya kutelama na Yesu na zulu?

⁴ Na kimona-meso, ntumwa Yoane talá bimvuka zole ya bantu. Bantu ya bimvuka yayi ke ndimá Yehova yala na zulu ya bawu, mpe ba ke na zwá luzingu ya ntangu nyonso. Kimvuka ya ntete ke na bantu 144000. (Luz. 7:4) Yehova baká bawu awa na ntoto samu na kukwenda yala na Yesu na zulu, na Kimfumu ya yandi to guvernema. Kintwadi na Yesu, ba ke vanda Bamfumu ya ba yina ke vanda awa na ntoto. (Luz. 5:9, 10; 14:3, 4) Na kimona-meso yina, Yoane talá bawu ya kutelama na Yesu na zulu ya mongo ya Sioni.—Luz. 14:1.

5. Na bilumbu yina ke kwiza, yinki ke salama samu na ndambu ya bakristo 144 000 yina ke ntete awa na ntoto?

⁵ Banda ntangu ya bantumwa tii bubu yayi, Yehova ke na solá bakristo 144 000 samu na kukwenda yala na Yesu na zulu. (Luke 12:32; Rom. 8:17) Ba lakisá na Yoane ti na bilumbu ya nsuka, kaka ndambu ya bakristo yayi ke vanda ntete awa na ntoto. Luzabusu ke bokilá bawu “bayina bikanaka.” Tekila mpasi ya nene banda, ba ke kuzwa ‘kidimbu’ ya nsuka yina ke lakisa ti Nzambi me ndima bawu. (Luz. 7:2, 3; 12:17) Na manima, na kati ya mpasi ya nene, ba ke kwenda vukana na zulu na bakristo ya nkaka yina kufwá ya kukangama na Nzambi. Kuna, kintwadi na Yesu, ba ke kuma Bamfumu ya Kimfumu ya Nzambi.—Mat. 24:31; Luz. 5:9, 10.

6-7. a) Wapi kimvuka ya nkaka Yoane talá, mpe yinki buku ya Luzabusu ke zonzá samu na bawu? b) Samu na yinki bakristo 144 000 yina ke ntete awa na ntoto mpe ‘kimvuka ya nene ya bantu’ me lunga kuzaba bamambu yina ke na Luzabusu kikapu 7?

⁶ Na manima ya kutala bakristo 144 000, Yoane talá “kimvuka mosi ya nene ya bantu.” Kimvuka yayi ke ve mutindu kimvuka ya ba yina ke kwenda vanda na zulu. Ata muntu lenda zaba yikwa ba kele. (Luz. 7:9, 10, nwt-MK) Yinki Luzabusu ke zonzá samu na bawu? Yoane sonikaka: ‘Bawu kele bantu yina me katuka na mpasi ya nene; bawu me sukula mazwela (to ba-robe ya yinda) ya bawu mpe bawu me kumisa yawu mpembe na menga ya Mwana ya Dimeme.’ (Luz. 7:14) Na manima ya kuvuuka na mpasi ya nene, ‘kimvuka ya nene ya bantu’ ke zinga awa na ntoto, mpe ke kuzwa bambote mingi.—Nku. 37:9-11, 27-29; Bin. 2:21, 22; Luz. 7:16, 17.

⁷ Beto vanda na kivuvu ya kukwenda na zulu to ya kuzwa luzingu ya ntangu nyonso awa na ntoto, beto zolá vanda na kiminu ti beto ke kuzwa bambote yina ke na Luzabusu 7. Kulungana ya bamambu yayi ke vanda ntangu mosi ya kilengi samu na bimvuka zole yayi ya bisadi ya Nzambi. Beto ke sepela mingi na mukanu yina beto baká ya kundima ti Yehova vanda mfumu ya beto. Yinki buku ya Luzabusu ke zonzilá dyaka samu na mpasi ya nene?—Mat. 24:21.

8. Wa’ faso mpasi ya nene ke banda, mpe yinki bantu mingi ke sala?

⁸ Faso artikle yina me luta zonzilak’ yawu, na mwa ntangu fioti, baguvernema ya yinza yayi ke nwanisa Babilone ya Nene, kifwani ya mabuundu nyonso ya luvunu. (Luz. 17:16, 17) Ya ke vanda kubanda ya mpasi ya nene. Ntangu bantu ya yinza ke tala yawu, ba ke kwiza kwandi mingi kusadila Yehova? Ve. Luzabusu kikapu 6 ke lakisá ti na ntangu yina, ba yina ke sadilá ve Yehova ke sosa baguvernema mpe bakompani ya nene ya yinza yayi bumba bawu. Na meso ya bawu, bima yayi ke faso bamongo. Ba ke kwenda bumbana ve na kisika ya Yehova mpe ya Kimfumu ya yandi. Na yawu, Yehova ke tala ti ba ke bambeni ya yandi.—Luke 11:23; Luz. 6:15-17.

9. Na kati ya mpasi ya nene, yinki ke lakisa ti bisadi ya Yehova ke ve faso mosi na bantu ya yinza yayi, mpe yinki ya ke nata?

 ⁹ Na kati ya mpasi ya nene, bisadi ya Yehova ke sala ve faso bantu ya yinza. Ba ke vanda kimvuka kaka mosi na ntoto yina ke sadila Yehova. Ba ke manga kulanda “kibulu ya ngitukulu.” (Luz. 13:14-17) Kukangama ya bawu na Yehova ke fulusa bambeni ya Nzambi na nkele. Baguvernema nyonso ya yinza ke vukana samu na kunwanisa bawu na babwala nyonso. Baguvernema yayi ke kwiza nwanisa bisadi ya Yehova, Biblia ke bokilá bawu Gogi ya Magogi.—Ezk. 38:14-16.

10. Faso Luzabusu 19:19-21 ke na zonzak’ yawu, yinki Yehova ke sala ntangu ba ke kwiza nwanisa bisadi ya yandi?

¹⁰ Yinki Yehova ke sala ntangu ba ke nwanisa bisadi ya yandi? Yandi zonzaka: ‘Nkele ya munu ya ngolo ke pela.’ (Ezk. 38:18, 21-23) Luzabusu kikapu 19 ke lakisá yinki ke salama na manima. Yehova ke filisa Mwana ya yandi kunwanina bisadi ya yandi, mpe kufwa bambeni ya bawu. Yesu ke kwiza nwana ve kaka yandi mosi. Yandi ke vanda na ‘bimvuka ya basoda ya zulu,’ bambazi ya kukangama na Nzambi, mpe bakristo 144 000. (Luz. 17:14; 19:11-15) Wa’ faso mvita yayi ke manisa? Bantu nyonso mpe bimvuka nyonso yina ke salá yintu ngolo na Yehova ke kufwa ya mbala mosi.—Tanga Luzabusu 19:19-21.

11. Wapi mambu ya kulutila mfunu buku ya Luzabusu ke zonzá ti ya ke salama?

¹¹ Kanisa na kilengi yina ke vanda na bisadi ya Nzambi yina ke vuuka ntangu bambeni ya Nzambi nyonso ke kufwa. Kilengi ya mingi ke vanda mpe na zulu ntangu Babilone ya Nene ke kufwa. Kasi, ya ke na kima ya nkaka yina ke pesa ba yina ke na zulu kilengi ya kulutila. (Luz. 19:1-3) Ya ke mambu ya mfunu mingi yina buku ya Luzabusu ke zonzilaka: ‘makwela ya Mwana ya Dimeme.’—Luz. 19:6-9.

12. Faso Luzabusu 21:1, 2 ke lakisak’ yawu, na wapi ntangu makwela ya Mwana ya Dimeme ke salama?

¹² Makwela yango ke salama na wapi ntangu? Bakristo 144 000 nyonso ke vukana na zulu tekila Armagedoni banda. Kasi, ni na ntangu yina ve makwela ya Mwana ya Dimeme ke salama. (Tanga Luzabusu 21:1, 2.) Makwela ya Mwana ya Dimeme ke salama na manima ya Armagedoni, ntangu bambeni nyonso ya Nzambi ke kufwa.—Nku. 45:3, 4, 13-17.

13. Makwela ya Mwana ya Dimeme ke vukisa banani?

¹³ Makwela ya Mwana ya Dimeme ke vukisa banani? Kaka faso makwela ke vukisá kento na bakala, dikwela yayi ke vukisa Mfumu Yesu Kristo na “kento” ya yandi, bakristo 144000. Makwela yayi ke vanda kubanda ya kuyala ya guvernema ya Nzambi awa na ntoto samu na bamvula 1 000.—Luz. 20:6.

14-15. Wapi kifwani Luzabusu kikapu 21 ke sadilá samu na kuzonzila bakristo 144 000? (Tala foto ya paje ya kubanda.)

¹⁴ Samu na kuzonzila bakristo 144 000, Luzabusu kikapu 21 ke sadilá kifwani ya bwala mosi ya kitoko na nkumbu ya ‘Yeruzalemi ya malu-malu.’ (Luz. 21:2, 9) Fondation ya bwala yango ke matadi 12. Na zulu ya yawu ba me sonika “bankumbu 12 ya bantumwa 12.” Yoane ke na kilengi ya mingi ntangu yandi me tala matadi yayi. Samu na yinki? Samu yandi me tala nkumbu ya yandi ya kusonika na zulu ya mosi ya matadi yango. Ya ke bweso ya nene samu na yandi!—Luz. 21:10-14; Ef. 2:20.

¹⁵ Bwala yayi ke ata fioti ve mutindu babwala ya nkaka. Bala-bala ya nene ya bwala yango ke ya kusalama na wolo. Ba-porte ya yawu ke  bapalata 12, mpe ya ke na matadi ya ntalu na zulu ya bibaka ya yawu mpe ba-fondation. Ba-côté nyonso ke yinda mutindu mosi. (Luz. 21:15-21) Kasi Yoane kwizá tala ti ya ke na kima mosi yina ke ve na bwala yango. Yandi me zonza: ‘Mu talaka ve tempelo na kati ya yawu, samu Yehova Nzambi ya kulutila ngolo mpe Mwana ya Dimeme kele tempelo ya yawu. Mpe mbanza vandaka ve na nsatu ti ntangu mpe ngonda pesa yawu nsemo, samu nkembo ya Nzambi vandaka pesa yawu nsemo, mpe Mwana ya Dimeme vandaka mwinda ya yawu.’ (Luz. 21:22, 23) Ya ke na lakisá ti bakristo 144 000 to Yeruzalemi ya malu-malu ke vanda na Yehova. (Ebr. 7:27; Luz. 22:3, 4) Yehova na Yesu ke tempelo ya bwala yayi.

16. Wapi bambote bantu ke kuzwa na kati ya bamvula 1 000 yina Kimfumu ya Nzambi ke yala ntoto?

¹⁶ Bakristo yina ke kwenda vanda na zulu ke na kilengi ya mingi ntangu ba ke kanisá na bwala yina. Ba yina ke na kivuvu ya kuzwa luzingu ya ntangu nyonso awa na ntoto zolá sosa mpe kuzaba bwala yayi. Samu na yinki? Samu ti, na kati ya bamvula 1 000 yina Kimfumu ya Nzambi ke yala, Yeruzalemi ya malu-malu ke natina bambote mingi na ba yina ke vanda awa na ntoto. Yoane talá bambote yango. Ya vandá mutindu “nzadi yina kele na maza yina ke pesaka luzingu.” Mpe pene-pene na maza yango, ya ke na ‘bayinti ya luzingu’ yina vandá buta makasa “samu na kubelusa bantu ya bayinsi.” (Luz. 22:1, 2) Bantu nyonso yina ke vanda na ntoto na ntangu yina, ke vanda na kilengi ya kuzwa bambote yayi. Ba yina ke tumama na Nzambi ke tala fioti-fioti disumu kukatuka na banzutu ya bawu. Bimbevo ke vanda dyaka ve, bampasi ke vanda dyaka ve, mpe bantu ke dila dyaka ve na mawa.—Luz. 21:3-5.

17. Faso Luzabusu 20:11-13 ke lakisak’ yawu, banani ke kuzwa bambote yina ke nata Kimfumu ya Nzambi na kati ya bamvula 1000?

¹⁷ Banani ke vanda awa na ntoto na kati ya bamvula 1 000 samu na kuzwa bambote yina Kimfumu ya Nzambi ke nata? Ya ntete, kimvuka ya nene ya bantu yina ke vuuka na Armagedoni, mpe bana yina ba lenda buta na yinza ya malu-malu. Luzabusu kikapu 20 ke zonzá mpe ti bantu ya kufwa ke vumbuka. (Tanga Luzabusu 20:11-13.) Na kati ya ba yina ke vumbuka na lufwa, ya ke vanda na “bantu ya lunungu,” bantu ya mbote yina  kufwá na ntama. Ya ke vanda mpe na ‘bantu ya kukondwa lunungu,’ yina kuzwá ve bweso ya kulongoka kuzaba Yehova. (Bis. 24:15, nwt-MK; Yoa. 5:28, 29) Ya zola zonza kwandi ti bantu nyonso yina kufwá ke vumbuka na kati ya bamvula 1000? Ve. Bantu yina, na ntima ya yimbi nyonso mangá kusadila Yehova tekila ba kufwa, ke vutuka ve na luzingu. Ba zwá bweso ya kusadila Nzambi, kasi ba lakisá ti ba ke ve na nsatu ya kuzinga na paradis.—Mat. 25:46; 2 Tes. 1:9; Luz. 17:8; 20:15.

18. Wa’ faso bantu ke kuma awa na ntoto na nsuka ya bamvula 1 000?

¹⁸ Na nsuka ya bamvula 1 000, ba yina nyonso ke vanda awa na ntoto, ke kuma bantu ya kulunga. Disumu yina katuká na Adam ke zimbana. Ata muntu ke vanda dyaka na nzutu ya masumu. (Rom. 5:12) Yimbi nyonso yina disumu ya Adam natá ke manisa. Ntangu bamvula 1000 ke manisa, ba yina ke vanda awa na ntoto ke kuma bantu ya kulunga. Ya ke vanda net ba me ‘vutuka na luzingu.’ —Luz. 20:5.

19. Samu na yinki Yehova ke bika Satan kumeka bantu mbala ya nsuka?

¹⁹ Ntangu yandi vandá awa na ntoto, Yesu bikaná ya kukangama na Nzambi ata bangolo nyonso yina Satan salá samu na kubwisa yandi. Ba yina ke kuma bantu ya kulunga ke landa kwandi kifwani ya Yesu, mpe ke bikana ya kukangama na Nzambi ntangu Satan ke meka bawu? Muntu nyonso ke pesa mvutu na kyuvu yayi samu na yandi mosi ntangu ba ke basisa Satan na dibulu ya yinda na nsuka ya bamvula 1 000. (Luz. 20:7) Ba yina ke kubwa ve na ntangu yina, ke kuzwa luzingu ya ntangu nyonso, mpe ata kima ya yimbi ke yala dyaka na zulu ya bawu. (Rom. 8:21) Ba yina ke sala yintu ngolo na Nzambi ke kuzwa lufwa ya ntangu nyonso, kintwadi na Satan mpe ba-démon ya yandi.—Luz. 20:8-10.

20. Yinki ya ke na salá nge na kuzaba bamambu yina ke zonzá buku ya Luzabusu?

²⁰ Na manima ya kulongoka mwa bamambu na buku ya Luzabusu, yinki ya ke na salá nge? Ntembe ve, nge ke na kilengi ya kukanisa na ntangu yina nge ke tala bambikululu ya buku yayi kulungana. Kuzaba bamambu yayi ke na pesá ve nge nsatu ya mingi ya kubokila bantu ya nkaka na kwiza sambila Yehova na nge na faso ya kulunga? (Luz. 22:17) Ntangu ya nkaka, bamambu nyonso ya kitoko yina ke na vingilá beto, ke na pesá beto nsatu ya kuzonza mutindu ntumwa Yoane zonzaka: ‘Amen! Mfumu Yesu, Kwiza.’—Luz. 22:20.