1. Yinki beto longokaka na lukutakanu ya mvula ya 2023?

 NA LUKUTAKANU a ya mvula ya 2023, beto kuzwaka bansobolo samu na ndambu ya malongi ya beto mpe kisalu ya beto ya kusamuna. Na kifwani, beto longokaka ti bantu ya nkaka lenda sadila Yehova na manima ya lufwa ya Babilone ya Nene. Dyaka beto longokaka ti banda novembre 2023, bansamuni ya Kimfumu ke sonika dyaka ve nyonso yina ba ke salaka na kisalu ya kusamuna. Ya zola zonza kwandi ti kisalu ya kusamuna ke dyaka ve mfunu? Ata fioti ve!

2. Samu na yinki bilumbu na bilumbu kisalu ya beto ya kusamuna ke na kumaka mfunu mingi? (Marke 13:10)

² Samu ti ntangu me bikana kaka fioti tekila nsuka ya yinza kuma, kisalu ya beto ya kusamuna me kuma dyaka mfunu mingi. Na yina me tadila kisalu ya kusamuna na nsuka ya yinza, Yesu zonzaka na Marke 13:10 (NWT): “Dyaka, na bayinsi nyonso ba me fwana kusamuna ntete nsangu ya mbote.” Na Matayi, Yesu zonzaka mpe ti ba ke samuna nsangu ya mbote na yinza nyonso tekila “nsuka“ kuma. (Mat. 24:14) “Nsuka” awa kele nsuka ya yinza ya yimbi ya Satana. Yehova soolaka “kilumbu mpe ngunga” yina ya ke salama. (Mat. 24:36; 25:13; Bis. 1:7) Konso kilumbu ke na nataka beto pene-pene na nsuka. (Rom. 13:11) Beto me fwana kubika ve kusamuna tii nsuka ke kwiza.

3. Yinki ke nataka beto na kusamuna?

³ Ntangu beto ke kanisaka na kisalu ya kusamuna, ya ke mbote na kuyufula: Samu na yinki beto ke samunaka nsangu ya mbote?  Ni luzolo ke nataka beto na kusamuna nsangu ya mbote. Ntangu beto ke samunaka, beto ke lakisaka luzolo samu na nsangu ya mbote, samu na bantu, mpe ya kulutila mfunu samu na Yehova mpe nkumbu ya yandi. Beto zonzila mosi na mosi ya yawu.

BETO KE SAMUNAKA SAMU BETO KE ZOLAKA NSANGU YA MBOTE

4. Yinki ya ke salaka nge ntangu nge ke kuwaka bansangu ya mbote?

⁴ Ya salaka nge yinki ntangu nge kuwaka nsangu mosi ya mbote? Ya lenda vanda ntangu muntu ya dikanda ya nge butaka, to nge kuzwaka kisalu yina nge vanda sosa. Ntembe ve, na kilengi nge zonzilaka nsangu ya mbote yayi na dikanda mpe bandiku ya nge. Ya vandaka mpe mutindu yina ntangu nge kuwaka nsangu ya kulutila kitoko: nsangu ya mbote ya Kimfumu ya Nzambi?

5. Yinki ya salaka nge mbala ya ntete yina nge longokaka matsyeleka na yina me tadila Dyambu ya Nzambi? (Tala mpe bizizi.)

⁵ Kanisa yinki ya salaka nge mbala ya ntete nge longokaka matsyeleka ya mambu ya Nzambi. Nge longokaka ti Tata ya nge ya mazulu ke zolaka nge, mpe zola ti nge kota na kati ya dikanda ya yandi. Yandi me pesa nsilulu ya kumanisa bampasi, ya kuvumbula na lufwa bantu yina nge vanda zolaka mingi, mpe bamambu mingi ya nkaka. (Mrk. 10:29, 30; Yoa. 5:28, 29; Rom. 8:38, 39; Luz. 21:3, 4) Ntembe ve, ya sepelisaka nge mingi. (Luke 24:32) Nge zolaka malongi yayi, mpe nge sosaka kuzonzila yawu na bantu ya nkaka.​—Fwanisa na Yeremia 20:9.

6. Yinki nge me longoka na kifwani ya Ernest na Rose?

⁶ Beto zonzila kifwani ya mpangi ya bakala na nkumbu Ernest b yina vandaka na bamvula 10 ntangu tata ya yandi kufwaka. Yandi zonzaka: “Mu vanda yufulaka: ‘Yandi ke na zulu, to ke vumbuka dyaka ve?’ Kutala bana ya nkaka na batata ya bawu vanda nyongisaka munu.” Ernest vanda kwendaka ntangu nyonso na ndyamu ya tata ya yandi. Yandi vanda fukamaka mpe kusambilaka: “Mulemvo Nzambi, wapi kisika yina tata ya  munu kele.” Pene-pene na bamvula 17 na manima, Ernest ndimaka kulongoka Biblia. Yandi sepelaka na kuzaba ti bantu ya kufwa zaba ata kima, ba ke ya kulala pongi ya ngolo, mpe ti ba ke vumbuka na lufwa na bilumbu ke kwiza. (Lon. 9:5, 10; Bis. 24:15) Ernest sepelaka mingi na matsyeleka yina yandi vanda longoka samu yandi kuzwaka bamvutu na byuvu yina vanda kwamisa yandi. Kento ya yandi Rose bandaka mpe kulongoka. Yandi mpe zolaka mingi mambu yina yandi vanda longoka, mpe bawu kuzwaka mbotokolo 1978. Na tiya nyonso ba vanda samuna na dikanda, bandiku ya bawu mpe bantu ya nkaka mambu yina ba vanda longoka. Ernest na Rose sadisaka bantu kuluta 70 na kuzaba Yehova mpe kuzwa mbotokolo.

7. Yinki ke salamaka ntangu luzolo ya matsyeleka ke butaka bambuma na ntima ya beto? (Luke 6:45)

⁷ Ya tsyeleka, ntangu luzolo ya matsyeleka ya Biblia ke kulaka, beto ke lenda ve kukanga bayinwa ya beto. Luke 6:45 ke zonzaka: “Muntu ya mbote ke basisaka mambu ya mbote yina ke na ntima ya yandi ya mbote, mpe muntu ya yimbi ke basisaka mambu ya yimbi yina ke na ntima ya yandi ya yimbi. Ya tsyelika, yinwa ya muntu ke basisaka mambu yina kele ya kufuluka na kati ya ntima ya yandi.” Ya ke salaka beto mutindu ya salaka na bilandi ya siècle ya ntete, yina zonzaka: “Beto lenda manga ve na kuzonzila mambu yina beto talaka mpe kuwaka.” (Bis. 4:20) Samu beto ke zolaka matsyeleka, beto ke sosaka kukabula yawu na bantu mingi.

BETO KE SAMUNAKA SAMU BETO KE ZOLAKA BANTU

8. Yinki ke nataka beto na kusamuna nsangu ya mbote na bantu ya nkaka? (Tala encadré “ Zola bantu​—Kumisa bawu bilandi.”) (Tala mpe kizizi.)

⁸ Mutindu Yehova na Yesu, beto ke zolaka bantu. (Bin. 8:31; Yoa. 3:16) Beto ke vandaka na mawa mingi samu na ba yina ke “ve na Nzambi” mpe samu na ba yina ke “ve na kivuvu.” (Ef. 2:12) Bamambu yina ba ke kutanaka na yawu, ke salaka ti ba vanda mutindu bantu yina ke na kati ya dibulu ya yinda, kasi beto ke na singa yina lenda basisa bawu kuna. Singa yango ke ni nsangu ya mbote ya Kimfumu ya Nzambi. Samu beto ke zolaka bawu mpe ke na kyadi ya bawu, beto ke salaka nyonso na kuzonzila bawu nsangu ya mbote. Nsangu ya mbote yayi lenda pesa bawu kivuvu, kusadisa bawu na kuzwa luzingu ya kitoko bubu yayi, mpe kupesa bawu bweso ya kusepela na “luzingu ya tsyeleka.” Ya kele luzingu ya ntangu nyonso na yinza ya malu-malu.​—1 Tim. 6:19.

9. Wapi mambu beto ke kebisaka bampangi samu na bilumbu yina ke kwiza mpe samu na yinki? (Ezekiele 33:7, 8)

⁹ Luzolo ya beto samu na bantu ke nataka beto na kukebisa bawu ti nsuka ya yinza yayi me kuma pene-pene. Ezekiele 33:7 (NWT) ke zonzaka: “Kasi nge, mwana ya muntu, mu me tula nge kengidi ya yinzo ya Izraele, mpe ntangu  nge ke kuwa mambu yina me katuka na yinwa ya munu, nge fwana pesa bawu lukebisu yina me katuka na munu. Kana mu zonza na muntu ya yimbi, ‘Muntu ya yimbi, nge ke kufwa’ kasi nge zonzila ve yandi samu yandi soba ndyatulu ya yandi, yandi ke kufwa samu na bifu ya yandi mosi samu yandi kele muntu ya yimbi, kasi mu ke lomba menga ya yandi na nge.” Beto ke na kyadi ya bantu nyonso, na kati ya bawu ke na bantu ya dikanda ya beto yina ke sadilaka ve Yehova. Bantu mingi ke nataka luzingu ya bawu na kati ya kidiba. Ba zaba ve ti, “mpasi ya nene yina me salama ntete ve katuka kubanda ya yinza tii ntangu yayi, mpe ya ke salama dyaka ve” ke na kwizaka. (Mat. 24:21) Beto zola ti bantu zaba mambu yina ke salama na ntangu ya lusambusu: ba ke kufwa mabuundu ya luvunu, mpe yinza ya yimbi yayi na mvita ya Armagedoni. (Luz. 16:14, 16; 17:16, 17; 19:11, 19, 20) Beto ke sambilaka samu bantu mingi ndima kuwa mambu yayi mpe ba baka mukanu ya kusadila Yehova na beto. Kasi yinki ke kumina bantu ya dikanda ya beto mpe ba yina ke na manga kuwa beto bubu yayi?

10. Samu na yinki ya ke mfunu na kubika ve kukebisa bantu na mambu yina ke kwiza ntama mingi ve?

¹⁰ Mutindu beto zonzaka yawu na disolo yina lutaka, Yehova lenda vuukisa bantu yina ke banda kukwikila na yandi ntangu ba ke tala kumwangana ya Babilone ya Nene. Kana ni mutindu yina, ya ke mfunu mingi na kubika ve kukebisa bantu. Beto kuzimbana ve mambu yayi: Na ntangu yina, ba lenda bambuka na mambu beto ke zonzaka na bawu bubu yayi. (Fwanisa na Ezekiele 33:33.) Ya lenda nata bawu na kubaka mukanu ya kusadila Yehova tekila yandi kufwa yinza yayi. Mutindu kengidi ya boloko ya bwala ya Filipi yina balulaka ntima kaka na manima ya ntangu yina “ntoto ninganaka na ngolo nyonso,” ya lenda vanda mpe ti bantu ya nkaka balula ntima kaka na manima ya kutala faso ba ke kufwa Babilone ya Nene.​—Bis. 16:25-34.

BETO KE SAMUNAKA SAMU BETO KE ZOLAKA YEHOVA MPE NKUMBU YA YANDI

11. Wapi mutindu kupesa na Yehova nkembo, lukumu mpe ngolo? (Luzabusu 4:11) (Tala mpe bizizi.)

¹¹ Mambu ya kulutila mfunu yina ke nataka beto na kusamuna ke ti beto ke zolaka Yehova Nzambi mpe nkumbu ya yandi ya santu. Kisalu ya kusamuna ke pesaka beto nzila ya kukembila Nzambi yina beto ke zolaka. Na ntima mosi beto ke ndimaka mambu yina Luzabusu 4:11 (NWT) ke zonzaka: “Yehova Nzambi ya beto, nge me fwana kuzwa nkembo, lukumu, mpe ngolo, samu nge muntu yidikaka bima nyonso, mpe ya kwizaka na luzingu mpe ya salamaka samu na luzolo ya nge.” Beto ke pesaka Yehova nkembo na lukumu ntangu beto ke lakisaka na bantu ti ni yandi “muntu yidikaka bima nyonso.” Beto ke pesaka yandi ngolo ya beto, ntangu beto ke sadilaka ntangu, ngolo,  mpe bima nyonso yina beto ke na yawu samu na kusamuna. (Mat. 6:33; Luke 13:24; Kol. 3:23) Beto ke zolaka kuzonzila na bantu, Nzambi yina beto ke zolaka mingi. Beto ke zolaka mpe kuzonzila na bantu nkumbu ya yandi mpe mutindu ya Nzambi yandi kele. Samu na yinki?

12. Wapi mutindu beto lenda pesa nkembo na Yehova na kisalu ya beto ya kusamuna?

¹² Luzolo ya beto na Yehova ke nataka beto na kukumisa nkumbu ya yandi santu. (Mat. 6:9) Beto ke sosaka kuzonza na bantu ti Satana ke vuninaka Yehova bamambu. (Kub. 3:1-5; Yobi 2:4; Yoa. 8:44) Beto ke samunaka samu beto ke zolaka kuzonza na bantu, nani ke Yehova mpe wapi mutindu ya muntu yandi kele. Beto zola ti bantu nyonso zaba ti kifu ya yandi ya kulutila nene ni luzolo, ti misiku ya yandi kele ya kusungama mpe ya lunungu, ntama mingi ve Kimfumu ya yandi ke kwiza kumanisa bampasi nyonso, kunata kizunu mpe kilengi na makanda nyonso. (Nku. 37:10, 11, 29; 1 Yoa. 4:8) Beto ke kumisaka nkumbu ya Yehova santu ntangu beto ke samunaka. Kusala yawu ke lakisaka ti nkumbu ya beto ya Bambangi ya Yehova ke ve ya mpamba. Ya ke pesaka beto kilengi. Samu na yinki?

13. Samu na yinki beto ke sepelaka ntangu ba ke bokilaka beto Bambangi ya Yehova? (Izaya 43:10-12)

¹³ Yehova soolaka beto mutindu “Bambangi” ya yandi. Izaya 43:10-12 (NWT) ke zonzaka: “‘Beno kele bambangi ya munu,’ Yehova muntu me zonza, ‘Ee kisadi ya munu yina mu me soola, samu beno zaba mpe beno kwikila na munu mpe beno lakisa ti mu kele mutindu mosi. Na mantwala ya munu ata Nzambi mosi salamaka ve, mpe na manima ya munu, ata mosi ve vandaka. Munu, munu kele Yehova, mpe katula munu, mvuukisi ya nkaka kele ve.’ ‘Munu Muntu zonzaka, muntu vuukisaka, mpe zonzaka yawu, ntangu nzambi ata mosi ve ya nzenza vandaka na kati na beno.  Ni na yina beno kele bambangi ya munu,’ Yehova muntu me zonza, ‘mpe munu kele Nzambi.’” Mwa bamvula na manima, mukanda mosi ya Kimvuka ya Bantwadisi vanda zonza: “Bweso ya kulutila nene yina beto ke na yawu ni ya kulwata nkumbu Bambangi ya Yehova.” c Samu na yinki? Kanisa ti ba me vunina nge mambu, mpe nge ke na sosaka muntu yina ke zonza na bantu ya nkaka ti mambu yina ba me zonza ke luvunu. Nani nge ke soola? Ntembe ve, nge ke soola muntu yina nge zaba, yina nge ke tudilaka ntima, muntu yina ba zabila mutindu muntu ya mbote. Ya ke sala ti ba kwikila na mambu yina yandi ke zonza. Samu Yehova soolaka beto mutindu Bambangi ya yandi, ya ke na lakisaka ti yandi zaba beto mbote-mbote, yandi ke tudilaka beto ntima mpe yandi zaba ti beto ke zonzila na bantu ya nkaka ti kaka ni yandi ke Nzambi ya tsyeleka. Ya ke bweso ya nene na beto na kuvanda Bambangi ya yandi. Ya ke salaka ti beto sosa bafaso nyonso na kuzonzila nkumbu ya yandi mpe kusukula yawu. Na kusalaka mutindu yayi, beto ke salaka mambu yina nkumbu ya beto zola zonza. Beto ke Bambangi ya Yehova!​—Nku. 83:18; Rom. 10:13-15.

BETO KE BIKA VE KUSAMUNA TII NA NSUKA

14. Wapi bima ya kitoko lenda kwiza ntama mingi ve?

¹⁴ Beto ke na nsatu ya ngolo ya kutala bamambu yina ke salama na bilumbu yina ke kwiza. Na lusakumunu ya Yehova, beto ke na kivuvu ti bantu mingi ke ndima matsyeleka tekila mpasi ya nene banda. Dyaka, beto ke na vingilaka ti ata na ntangu ya mpasi ya nene, bantu mingi lenda bika yinza ya Satana, mpe kukwiza kembila Yehova kintwadi na beto!​—Bis. 13:48.

15-16. Yinki beto ke bika ve kusala, mpe tii na wapi ntangu?

¹⁵ Tekila nsuka kuma, beto ke na bweso ya kusamuna nsangu ya Kimfumu ya Nzambi na ntoto nyonso. Ya ke na kisalu ya mfunu yina ke salama dyaka ve. Beto kuzimbana ve ti beto me fwana kubika ve kukebisa bantu ti nsuka ya yinza yayi ya yimbi ke na kwizaka na mbangu. Na yawu, ntangu ba ke sambisa yinza yayi, ba ke zaba ti nsangu yina beto vanda samuna, katukaka na Yehova Nzambi.​—Ezk. 38:23.

¹⁶ Yinki beto ke tatamana na kusala? Samu beto ke zolaka nsangu ya mbote, bantu, mpe ya kulutila nyonso, beto ke zolaka Yehova Nzambi na nkumbu ya yandi, beto ke bika ve kusamuna na tiya mpe na mbangu nyonso tii ntangu Yehova ke zonza, “Yimeni!”