Ba yina ke tangá disolo yayi na mbangu lendá yufula kyuvu yayi. Kasi na disolo ya Biblia yayi, ya ke na babakala zole yina vandá na nkumbu ya Mefibosheti. Beto tala faso bamambu lutilá mpe yinki ya lenda longa beto.

Saule mfumu ya Izraele, vandá na bana ya bakala 7 mpe ya kento zole. Mwana ya ntete ya Saule vandá Yonatani. Na manima, Saule butá mwana ya nkaka yina vandá na nkumbu ya Mefibosheti. Yandi butá yandi na Rispa, dikangu ya yandi. Yonatani mpe vandá na mwana na nkumbu ya Mefibosheti. Ya zola zonza ti mfumu Saule vandá na mwana mpe mutekolo na nkumbu ya Mefibosheti.

Mfumu Saule bandá kuyina bantu ya Gibeoni mpe sosá kufwa bawu nyonso. Yandi kufwá ba ya nkaka na kati ya bawu. Yina yandi vandá sosa kusala vandá yimbi mingi. Samu na ntangu ya Yosua, bakuluntu ya Izraele salá luwawanu ya kizunu na bantu ya Gibeoni.—Yos. 9:3-27.

Na ntangu ya Saule, luwawanu yina vandá ntete. Kasi Saule landá ve yawu. Yandi sosá kufwa bantu ya Gibeoni nyonso. Ya salá ti ‘mfuka ya menga vanda na zulu ya Saule mpe na zulu ya yinzo ya yandi.’ (2 Sa. 21:1) Na manima, Davidi kumá mfumu. Bantu ya Gibeoni yina vuuká zonzilak’ yandi yimbi yina ba salá bawu. Davidi yufulá bawu yinki yandi zolá sala samu na kufuta masumu yina Saule salá bawu, mpe samu Yehova sakumuna dyaka bwala. Bantu ya Gibeoni lombá ve mbongo. Ba zonzá ba pesa bana 7 ya muntu yina ‘kanisaka kumanisa bawu,’ samu ba kufwa bawu. (Kut. 35:30, 31) Davidi ndimá yina ba lombaka.—2 Sa. 21:2-6.

Na ntangu yina, Saule na Yonatani kufwaka. Kasi mwana ya Yonatani Mefibosheti vandá moyo. Yandi vandá na makulu ya kufwa samu ti ntangu yandi vandá mwana ya fioti, yandi kubwaka. Yandi vandá ve na Saule ntangu yandi kufwá bantu ya Gibeoni. Ntangu Yonatani vandá ntete moyo, yandi na Davidi salá luwawanu ya kindiku. Luwawanu yango zolá tadila mpe Mefibosheti, samu yandi vandá mwana ya Yonatani. (1 Sa. 18:1; 20:42) Biblia ke zonzá: ‘Mfumu [Davidi] wilaka Mefibosheti mwana ya Yonatani mwana ya Saule mawa, samu na ndefi yina Davidi na Yonatani mwana ya Saule, kudyaka na ntwala ya Yehova.’—2 Sa. 21:7.

Yinki Davidi salá samu na kuzitisa bamambu yina yandi zonzá na bantu ya Gibeoni? Yandi pesá bawu bana zole ya Saule mpe mitekolo ya yandi 5. Na kati ya bana ya Saule yina ba pesá na bantu ya Gibeoni, mosi vandá na nkumbu ya Mefibosheti. (2 Sa. 21:8, 9) Bamambu yina Davidi salá katulá mfuka ya menga na bwala.

Mambu yayi ke ve kaka disolo ya mpamba. Musiku ya Nzambi vandá zonzá pwelele: ‘Bawu fwana kufwa ve bana samu na mambu yina batata ya bawu me sala.’ (Kul. 24:16) Yehova zolá ndima ve ba kufwa bana zole ya Saule mpe mitekolo ya yandi 5 si ba salá ata kima ya yimbi. Musiku yango vandá zonza mpe: ‘Muntu fwana kufwa kaka samu na masumu ya yandi mosi.’ Ya zola zonza ti bana ya Saule mpe mitekolo ya yandi yina kufwá, tulá diboko na lufwa ya bantu ya Gibeoni. Na yawu, ntangu ba kufwá bawu, ba futá samu na yimbi yina ba salaka.

Disolo yayi ke na lakisá ti muntu lendá sala ve mambu ya yimbi, mpe na manima kuzonza ti, yandi landá kaka misiku yina ba vandá pesa yandi. Kingana mosi ke zonzaka: ‘Kumisa kipalapala nzila ya makulu ya nge, mpe banzila ya nge nyonso ke vanda ya kusungama.’—Bin. 4:24-27; Ef. 5:15.