1. Wapi kyuvu bisadi ya Yehova lenda vanda na yawu?

 YA TSYELEKA ya ke kilengi na kuzaba ti Yehova ke zolaka mpe ke sepelaka na bisadi ya yandi nyonso. Biblia ke zonzaka: ‘Yehova ke zolaka bantu ya yandi.’ (Nku. 149:4) Kasi bantangu ya nkaka, samu ti beto ke ya kulemba beto lenda yufula: ‘Yehova ke sepelaka kwandi na munu?’ Na ntangu ya ntama, bantu mingi yina vanda sambilaka Yehova nwanaka na makanisi ya mutindu yayi.​—1 Sa. 1:6-10; Yobi 29:2, 4; Nku. 51:11.

2. Wa’ faso beto lenda sepelisa ntima ya Yehova?

² Biblia ke zonzaka pwelele ti bantu ya masumu lenda sepelisa ntima ya Yehova. Ba lenda sala yawu kana ba lakisa kiminu na Yesu mpe ba kuzwa mbotokolo. (Yoa. 3:16) Kusala yawu ke lakisa ti beto me balula ntima mpe beto me sala Yehova nsilulu ti beto ke sala luzolo ya yandi. (Bis. 2:38; 3:19) Yehova ke sepelaka na beto ntangu beto ke salaka bamambu yango samu na kukuma ndiku ya yandi. Kana beto sala bangolo na kuzitisa nsilulu ya beto ya kusadila Yehova, yandi ke sepela na beto mpe yandi ke bakila beto mutindu bandiku ya yandi ya ntima.​—Nku. 25:14.

3. Wapi byuvu beto ke zonzila na disolo yayi?

³ Kasi yinki ke nataka bampangi ya nkaka na kukanisa ti Yehova ke sepelaka ve na bawu? Wa’ faso Yehova ke lakisaka ti yandi ke na sepelaka na beto? Mpe wa’ faso beto lenda kulisa kiminu ti Nzambi ke sepelaka na beto?

 SAMU NA YINKI YA KE MPASI NA BA YA NKAKA NA KUNDIMA TI YEHOVA KE SEPELAKA NA BAWU?

4-5. Na yinki beto lenda vanda na kundima, kana beto ke kanisaka ti beto ke kaka muntu mpamba?

⁴ Mingi na kati ya beto, katuka bumwana, ke talaka ti ba ke kaka bantu ya mpamba. (Nku. 88:15) Mpangi mosi na nkumbu ya Adrián me zonza: “Mu ke talaka ti mu ke kaka muntu mpamba. Ntangu mu vandaka fioti, mu vanda sambilaka ti dikanda ya munu vanda na paradiso. Kasi mu vanda kanisaka ti munu, mu ke ve ya kulunga samu na kuvanda kuna.” Tony yina kulaka ve na matsyeleka me zonza: “Ata kilumbu mosi, bibuti ya munu zonzilaka munu ti ba ke zolaka munu, to ti ba ke sepelaka na munu. Ya vanda nataka munu na kukanisa ti, ya ke na ata kima mu lenda sala samu na kusepelisa bawu.”

⁵ Kana bantangu ya nkaka beto ke nwanaka na makanisi ya mutindu yayi, beto zimbana ve ti Yehova yandi mosi bendaka beto na sika ya yandi. (Yoa. 6:44) Yandi ke talaka bifu ya mbote yina ke na beto ata ti beto mosi ke talaka ve yawu. Yandi zaba mbote-mbote ntima ya beto. (1 Sa. 16:7; 2 Ns. 6:30) Na yawu beto me bonga ve kuvanda na bantembe ntangu yandi ke zonzaka na beto ti beto ke ntalu na meso ya yandi.​—1 Yoa. 3:19, 20.

6. Ntangu ntumwa Polo vanda kanisaka na masumu yina yandi salaka na ntama, yinki ya vanda salaka yandi?

⁶ Tekila ba longoka matsyeleka, mingi na kati ya beto salaka bamambu ya yimbi yina ke nyongisaka bawu tii bubu yayi. (1 Pi. 4:3) Zaba ti ata bampangi yina ke ya kukangama na Yehova kubanda bamvula ke nwanaka na nzutu ya bawu ya masumu. Ya ke kuminaka kwandi nge na kukanisa ti Yehova lenda lemvokila nge ve? Kana ni yawu, nge ke ve nge mosi. Bisadi mingi ya Yehova ke nwanaka na makanisi ya mutindu yayi. Na kifwani, ntumwa Polo vanda talaka ti yandi ke kaka muntu mpamba, ntangu yandi vanda kanisaka na masumu ya yandi. (Rom. 7:24) Ya tsyeleka, Polo balulaka ntima mpe yandi kuzwaka mbotokolo. Kasi yandi vanda tadilaka yandi mosi mutindu “muntu ya kulutila fioti na kati ya bantumwa” mpe muntu yina me “lutila” bantu nyonso na masumu.​—1 Ko. 15:9; 1 Tim. 1:15.

7. Yinki beto me bonga kuzimbana ve na yina me tadila masumu yina beto salaka na ntama?

⁷ Kana beto balula ntima, Yehova me pesa nsilulu ti yandi ke lemvokila beto. (Nku. 86:5) Kana beto nyonga masumu yina beto me sala, beto lenda vanda na kundima ti Yehova me lemvokila beto.​—Kol. 2:13.

8-9. Wa’ faso beto lenda nwana na makanisi yina ke nataka beto na kutala ti nyonso yina beto ke salaka ke ve ya kulunga samu na kusepelisa ve Yehova?

⁸ Beto nyonso ke na nsatu ya kusala mingi na kisalu ya Yehova. Kasi ba ya nkaka ke talaka ti nyonso yina ba ke salaka ke ve ya kulunga samu na kusepelisa Yehova. Mpangi mosi na nkumbu ya Amanda zonzaka: “Mu ke zolaka kusala mingi samu na Yehova. Kasi, ntangu mu ke lendaka ve kusala yawu, mu ke kanisaka ti mu ke na nyongisaka Yehova, mpe mu lenda sepelisa ve ntima ya yandi.”

⁹ Wa’ faso beto lenda nwana na makanisi yina ke nataka beto na kutala ti beto lenda sepelisa ve Yehova? Kuzimbana ve ti Yehova ke ve na ntima ngolo, mpe yandi lenda lomba ve beto na kusala mambu yina beto ke ve na ngolo ya kusala. Yandi ke sepelaka na bangolo nyonso yina nge ke salaka samu na kusadila yandi. Nge lenda kanisa mpe na ba yina sadilaka Yehova na ntama na ntima ya bawu nyonso. Beto baka kifwani ya Polo. Yandi kwendaka na babwala mingi samu na kusamuna, mpe ya salaka ti bimvuka mingi butuka. Yandi salaka yawu na kati ya bamvula mingi. Kasi, ntangu yandi vandaka dyaka ve na makoki ya kusamuna mutindu yandi vanda salaka yawu na ntama, ya salaka kwandi ti Yehova sepela dyaka ve na yandi? Ve. Yandi tatamanaka na kusala bamambu yina yandi vanda lenda kusala. Mpe Yehova sakumunaka yandi samu na yawu. (Bis. 28:30, 31) Bantangu ya nkaka, kaka mutindu Polo, yina beto ke salaka na kisalu ya Yehova lenda soba. Kasi mambu ya mfunu ni kuzaba samu na yinki beto ke salaka yawu. Awa, beto tala bafaso yina Yehova ke lakisaka ti yandi ke sepelaka na beto.

WAPI MUTINDU YEHOVA KE LAKISAKA TI YANDI KE SEPELAKA NA BETO?

10. Wapi kisika beto lenda “kuwa” Yehova kuzonzila beto ti yandi ke zolaka beto? (Yoane 16:27)

¹⁰ Na nzila ya Biblia. Yehova ke sosaka bafaso ya kulakisa bisadi ya yandi ti yandi ke zolaka bawu, mpe ke sepelaka na bawu. Yehova zonzaka na Yesu ti yandi ke zolaka yandi mingi. Biblia ke zonzilaka bambala zole yina yandi salaka yawu. (Mat. 3:17; 17:5) Nge mpe ke kwandi na nsatu Yehova zonzila nge ti yandi ke zolaka nge? Ya tsyeleka, beto lenda  kuwa ve ndinga ya Yehova. Kasi yandi ke zonzaka na beto na nzila ya Biblia. Ntangu beto ke tangaka bamambu ya kitoko yina Yesu zonzaka na bilandi ya yandi, ya ke mutindu beto ke na “kuwaka” Yehova kuzonzila beto yawu. Yoane 16:27 ke zonzaka: “Yandi mosi ke zolaka beno, samu ti beno ke zolaka munu, mpe samu ti beno ke kwikilaka ti mu katukaka na sika ya yandi.” Yesu landaka mbote-mbote bifu ya Tata ya yandi. Na yawu, kutangaka mambu ya kitoko yina Yesu zonzaka na bilandi ya yandi, ata ti ba vandaka bantu ya masumu, lenda sadisa beto na kutala ti Yehova ke na zonzaka bamambu yango na beto.​—Yoa. 15:9, 15.

11. Samu na yinki kukutana na bampasi zola zonza ve ti Yehova ke na sepelaka dyaka ve na beto? (Zaki 1:12)

¹¹ Na nzila ya lubakusu yina yandi ke pesaka beto. Yehova ke na nsatu ya kusadisa beto. Na kifwani, yandi ke lungisaka bansatu ya beto ya kinsuni. Bantangu ya nkaka, Yehova lenda bika bampasi kumina beto kaka mutindu ya kuminaka Yobi. (Yobi 1:8-11) Kasi, ntangu beto ke kutanaka na bampasi, ya zola zonza ve ti Yehova ke na sepelaka dyaka ve na beto. Ya ke pesaka beto bweso ya kulakisa ti beto ke tudilaka Yehova ntima mpe beto ke zolaka yandi mingi. Ni na yina Zaki 1:12 ke zonzaka: “Kyese na muntu yina ke vibidilaka bantontolo. Na manima ya kununga yawu, yandi ke kuzwa luzingu ya seko mutindu Nzambi salaka nsilulu na bayina ke zolaka yandi.” Na ntangu ya mpasi beto ke tala luzolo ya Yehova, mpe yandi ke sadisa beto na kukanga ntima na mantwala ya yawu.

12. Yinki beto lenda longoka na mambu yina kuminaka Dmitrii?

¹² Beto tala kifwani ya Dmitrii mpangi mosi ya Asie. Yandi vandaka dyaka ve na kisalu mpe yandi lutisaka bangonda mingi na kusosa kisalu. Samu na kulakisa ti yandi tulaka ntima na Yehova, yandi bakaka mukanu ya kulutisa ntangu mingi na kisalu ya kusamuna. Bangonda mingi lutaka, kasi yandi kuzwaka ve kisalu. Na manima, yandi kuzwaka kimbevo yina vanda sala ti yandi vanda kaka na mfulu. Yandi bandaka kukanisa ti yandi ke ve tata to bakala ya mbote. Mpe yandi vanda yufula kana Yehova ke sepelaka kaka na yandi. Kilumbu mosi mwana ya yandi ya kento sonikilaka yandi bamambu yina ke na Izaya 30:15: ‘Beno ke vanda na ngolo kana beno vanda swi mpe beno tula ntima.’ Yandi natinaka yandi yawu mpe zonzaka na yandi: “Papa, kana makanisi ya yimbi ke na kuminaka nge, kanisa na verse yayi.” Dmitrii kwizaka tala ti na lubakusu ya Yehova dikanda ya yandi vandaka na bima ya kudya, kisika ya kuvanda mpe bilele ya kulwata. Dmitrii me zonza: “Mambu yina mu vandaka na yawu nsatu ya kusala, ni  kuvanda swi mpe kubika ve kutula ntima na Yehova.” Kana nge ke na kutanaka na bamambu ya mutindu yayi, nge lenda vanda na kundima ti Yehova ke kipeke nge mpe ke sadisa nge na kukanga ntima.

13. Banani Yehova ke sadilaka samu na kulakisa beto luzolo ya yandi, mpe wa’ faso yandi ke sadilaka bawu?

¹³ Na nzila ya bampangi ya kimvuka. Yehova ke sadilaka bampangi ya beto ya kimvuka samu na kulakisa beto ti yandi ke zolaka beto. Na kifwani, yandi lenda sadila bampangi ya beto samu na kukindisa beto na ntangu yina beto ke na yawu nsatu. Ni yawu kuminaka mpangi mosi ya kento yina ke vandaka na Asie, ntangu ntima ya yandi fulukaka na manyongo mingi. Yandi vandaka dyaka ve na kisalu, mpe yandi vanda beela mingi. Na manima, bakala ya yandi salaka disumu ya nene mpe vandaka dyaka ve kuluntu na kati ya kimvuka. Yandi me zonza: “Mu vanda zaba ve samu na yinki bamambu yayi vanda kumina munu. Mu vanda kanisa ti me sala mambu ya yimbi, mpe ti Yehova vanda sepela dyaka ve na munu.” Mpangi yango bondilaka Yehova samu yandi lakisa yandi kana yandi ke sepelaka kaka na yandi. Wa’ faso Yehova pesaka yandi mvutu? Yandi me zonza: “Bakuluntu ya kimvuka sololaka na munu mpe lakisaka munu ti Yehova ke zolaka kaka munu.” Na manima ya yawu, yandi lombaka dyaka lubakusu na Yehova. Yandi me bwela: “Kaka kilumbu yango, mu kuzwaka mukanda ya bampangi ya kento na ya bakala ya kimvuka. Kutanga bamambu ya kitoko yina vandaka na kati lakisaka munu ti Yehova kuwaka munu.” Ya tsyeleka, Yehova ke lakisaka beto ti yandi ke zolaka beto, na nzila ya bamambu ya kitoko yina bampangi ya beto ke zonzilaka beto.​—Nku. 10:17.

14. Wa’ faso Yehova ke lakisaka dyaka ti yandi ke sepelaka na beto?

¹⁴ Yehova ke lakisaka mpe beto luzolo ya yandi na nzila ya malongi yina bampangi ke pesaka beto ntangu beto ke vandaka na yawu nsatu. Na kifwani, na siècle ya ntete, Yehova sadilaka ntumwa Polo  samu na kusonika mikanda 14 na bakristo ya ntangu yina. Na mikanda yango, ntumwa Polo pesaka bawu malongi ya ngolo. Kasi, yandi salaka yawu na luzolo nyonso. Samu na yinki Yehova twadisaka ntumwa Polo samu na kusonika mikanda yayi? Yehova ke Tata ya mbote, mpe yandi ke sembaka bana “yina yandi ke zolaka.” (Bin. 3:11, 12) Kana ba pesa beto dilongi na nzila ya Biblia, beto tala yawu mutindu Yehova ke na lakisaka beto ti yandi ke zolaka beto, mpe ti yandi ke na sepelaka kaka na beto. (Ebr. 12:6) Ya ke kwandi na bamambu ya nkaka yina ke lakisaka ti Yehova ke sepelaka na beto?

BAFASO YA NKAKA YINA YEHOVA KE LAKISAKA TI YANDI KE SEPELAKA NA BETO

15. Na banani Yehova ke pesaka mpeve ya yandi ya santu, mpe yinki ya ke na lakisaka beto?

¹⁵ Yehova ke pesaka mpeve ya santu na ba yina yandi ke zolaka. (Mat. 12:18) Beto lenda yufula: ‘Na luzingu ya munu, mu me lenda kwandi kulakisa mwa bifu yina mpeve ya santu ke butaka?’ Kifu ya nge ya kuvandaka na ntima ya yinda ke kaka faso mosi na yina nge vandaka na yawu tekila nge zaba matsyeleka? Bangolo yina nge ke na salaka samu na kusadila bifu yina mpeve ya santu ke butaka ke na lakisaka ti Yehova ke sepelaka na nge.​—Tala encadré “ Mbuma ya mpeve ya santu kele . . .”

16. Banani Yehova ke sadilaka samu na kusamuna nsangu ya mbote, mpe yinki ya ke na salaka nge? (1 Batesalonika 2:4)

¹⁶ Yehova pesaka kisalu ya kusamuna nsangu ya mbote na ba yina yandi ke zolaka. Ni na yawu 1 Batesalonika 2:4 ke zonzaka: “Kasi Nzambi talaka ti beto kele ya kulunga, mpe pesaka beto kisalu ya kuzabisa Nsangu ya Mbote. Beto ke sosaka ve na kuyangidika [kusepelisa] bantu, kasi Nzambi yina zaba mabanza ya bantima ya beto.” Tala bambote yina Jocelyn kuzwaka na kisalu ya kusamuna. Kilumbu mosi, yandi vumbukaka yimbi mpe vandaka ve na ngolo ya kwenda kusamuna. Yandi me zonza: “Mu vandaka na nsatu ya kusala ata kima mpe mu talaka ti mu ke kaka muntu mpamba. Kasi samu ti mu vandaka mupasuli-nzila, mpe ya vandaka kilumbu ya munu ya kusamuna, mu salaka lusambu, mpe mu kwendaka samuna.” Kilumbu yango Jocelyn kutanaka na Mary, kento mosi ya mbote yina ndimaka kulongoka Biblia. Mwa bangonda na manima, Mary zonzaka ti Jocelyn vanda konkota na porte ya yandi ntangu yandi vanda sambila Nzambi samu yandi sadisa yandi. Na manima ya kuyindula na mambu yayi, Jocelyn zonzaka: “Mu talaka ti Yehova vanda zonza na munu, ‘Mu ke sepelaka na nge.’” Ya tsyeleka, bantu nyonso ve ke ndimaka ntangu beto ke samunaka bawu. Kasi, beto lenda vanda na kundima ti Yehova ke sepelaka  ntangu beto ke salaka nyonso yina beto lenda sala samu na kuzabisa nsangu ya mbote.

17. Yinki Vicky kwizaka longoka na munkayulu ya Yesu? (Nkunga 5:12)

¹⁷ Ba yina ke sepelisaka Yehova lenda kuzwa bambote yina yandi ke pesaka na manima ya munkayulu ya Yesu. (1 Tim. 2:5, 6) Kasi ata ti beto ke kwikilaka na Yesu, mpe beto kuzwaka mbotokolo, bantangu ya nkaka, ya lenda kumina beto na kuyufula kana Yehova ke sepelaka na beto. Beto zimbana ve ti makanisi ya beto ke vandaka ve ntangu nyonso ya kulunga, kasi, ntangu nyonso, beto lenda tula ntima na Yehova. Yehova ke talaka ba yina ke kwikilaka na munkayulu ya Yesu mutindu bantu ya lunungu, mpe yandi me pesa nsilulu ti yandi ke sakumuna bawu. (Rom. 3:26) Ni na yawu Nkunga 5:12 (NWT) ke zonzaka: “Samu nge ke sakumuna konso muntu ya lunungu, O Yehova. Nge ke zungaka bawu na kundimama ya nge mutindu kinwanunu ya nene ya kisengo.” Kukanisa mbote-mbote na munkayulu ya Yesu sadisaka Vicky. Na manima ya kuyindula na yawu, yandi zonzaka: “Yehova me lakisa munu ntima ya yinda mingi. . . . Mu vanda kanisaka ti yandi lenda zola ve muntu mutindu munu, mpe munkayulu ya Mwana ya yandi lenda fuka ve masumu ya munu.” Na manima ya kukanisa mbote-mbote na munkayulu ya Yesu, yandi bandaka kutala ti Yehova ke zolaka yandi. Kukanisa na munkayulu ya Yesu ke sadisa mpe beto na kutala ti Yehova ke zolaka mpe beto mpe ke sepelaka na beto.

18. Na yinki nge lenda vanda na kundima kana nge tatamana na kuzola Yehova?

¹⁸ Ata ti beto ke sala bangolo samu na kusadila bamambu yina beto me longoka awa, bantangu ya nkaka ya lenda kumina beto na kulemba mpe na kuyufula kana Yehova ke sepelaka na beto. Kana ya kumina nge, kuzimbana ve ti Yehova ke sepelaka na “bayina ke zolaka yandi.” (Zaki 1:12) Tatamana na kusala kindiku ya ngolo na Yehova, mpe baka ntangu ya kusosa bafaso nyonso yina yandi ke lakisaka ti yandi ke sepelaka na nge. Bumba dikanisi ya mfunu yayi: Yehova “kele ve ntama na konso muntu na kati ya beto.”​—Bis. 17:27.