Byuvu ya ba yina ke tangá mikanda ya beto
Samu na yinki ntangu fioti avant yandi kufwa Yesu zonzá mambu yina David zonzá na Nkunga 22:1?
Avant yandi kufwa Yesu zonzá mambu yina ke na Matayi 27:46: “Nzambi ya munu! Nzambi ya munu! Samu na yinki nge me bika munu?” Ntangu Yesu zonzá mambu yayi, yandi lungisá mambu yina David zonzá na Nkunga 22:1. (Mrk. 15:34) Ya ke yimbi na kukanisa ti Yesu zonzá mambu yayi samu yandi vandá dyaka ve na konfianse na Yehova to samu yandi vandá dyaka ve na kiminu na Nzambi na ntangu yina. Yesu zabá bien samu na yinki yandi zolá kufwa mpe yandi vandá ya kuyidama na kufwa. (Mat. 16:21; 20:28) Yandi zabá mpe ti na ntangu yina yandi vandá kufwa, Yehova zolá ‘bumba dyaka ve’ yandi. (Yobi 1:10) Samu Yehova bumbá ve yandi na ntangu yina, Yesu lakisá ti yandi vandá ya kukangama na Nzambi ata na kati ya bampasi yina natak’ yandi na lufwa.—Mrk. 14:35, 36.
Na yawu, samu na yinki Yesu zonzá mambu yina ke na Nkunga? Ata beto zaba ve bien samu na yinki yandi zonzak’ yawu, beto zonzila mwa barezon yina lenda nata yandi na kuzonza yawu. *
Ntangu yandi zonzá bamambu yayi, Yesu vandá sosa kulakisa kwandi ti Yehova zolá sala ata kima ntangu yandi vandá kufwa? Yesu zolá pesa luzingu ya yandi samu na kufata masumu ya beto, na yawu, Yehova zolá sadisa ve yandi. Yesu vandá muntu, mpe yandi zolá ‘meka lufwa samu na bantu nyonso.’—Ebr. 2:9.
Ntangu Yesu zonzilá mambu yina ke na Nkunga, yandi vandá sosa kwandi kunata bantu na kukanisa na chapitre ya Nkunga yina nyonso? Na ntangu yina, bajwif mingi vandá kanga na yintu baverse ya Bankunga. Ntangu ba kuwá verse mosi ya Bankunga, na mbala mosi ba kanisa na chapitre yina nyonso. Si ni yina Yesu vandá na nsatu ya kusala, ya zola zonza ti yandi sadisá badisiple ya yandi na kuserapele baprofesi mingi ya Bankunga yina ke zonzilá bamambu yina zolá salama tii na lufwa ya yandi. (Nku. 22:7, 8, 15, 16, 18, 24) Dyaka, baverse ya nsuka ya chapitre yayi ya Nkunga ke pesá nkembo na Yehova, mpe ke zonzá ti yandi ke Mfumu ya ntoto nyonso.—Nku. 22:27-31.
Ntangu yandi zonzilá mambu yina David zonzá, Yesu vanda lakisa kwandi ti yandi vandá innocent? Avant ba kufwa yandi, tribunal ya bajwif vuniná yandi bamambu ti, yandi fingá Nzambi. (Mat. 26:65, 66) Tribunal vukaná na mbangu na kati-kati ya mpipa, mpe bajujek’ yandi sans kulanda misiku. (Mat. 26:59; Mrk 14:56-59) Ntangu Yesu yufulá kestion, “Nzambi ya munu! Nzambi ya munu! Samu na yinki nge me bika munu?” Yesu vandá lakisa ntangu ya nkaka ti yandi salá ata kima ya yimbi mpe ya vandá na ata rezon ya kufwa yandi.
Yesu vandá rapele kwandi na bantu ya nkaka ti David talá mpe mpasi, kasi ya zolá zonza ve ti Yehova vandá zola dyaka ve yandi? Kestion yayi David yufulá vanda lakisa ve ti, yandi vandá dyaka ve na kiminu. Na manima ya kuyufula kestion yayi, yandi zonzá ti yandi vandá na konfianse ti Yehova ke vuukisá bisadi ya yandi, mpe Yehova kontinyeke na kupesa yandi bima ya mbote. (Nku. 22:23, 24, 27) Faso mosi mpe, Yesu, “Mwana ya David,” talá mpasi na zulu ya poto, ya zolá zonza ve ti Yehova mangak’ yandi.—Mat. 21:9.
Yesu vandá zonzila kwandi mpasi yina ya vanda sala yandi na kutala ti Yehova vandá bumba dyaka ve yandi samu yandi lakisa na faso ya kulunga ti yandi ke ya kukangama na Yandi ata na kati ya bampasi? Ntangu Yehova yidiká Yesu, dikanisi ya yandi vandá ve ya kubika Yesu tala mpasi mpe kufwa. Dikanisi ya kutala Yesu kufwa kwizá kaka na manima ya disumu ya Adam na Eve. Yesu salá ata kima ya yimbi, kasi yandi zolá tala mpasi mpe kufwa samu na kupesa reponse na bamambu yina Satan zonzá, mpe kupesa luzingu ya yandi faso sakrifise samu na kufuta masumu ya beto. (Mrk. 8:31; 1 Pi. 2:21-24) Ya zolá salama kaka si Yehova katulá proteksion yina yandi tulá na Yesu, mpe ya vandá mbala ya ntete na luzingu ya Yesu, ya kuvanda sans proteksion ya Yehova.
Yesu vandá sosa kwandi kusadisa badisiple ya yandi na kukanisa na rezon yina natá Yehova na kubika yandi kufwa mpe kutala mpasi na zulu ya poto? * Yesu zabá ti lufwa ya yandi faso muntu yina salá mambu ya yimbi na zulu ya poto, zolá nata bantu mingi na kubula dibaku. (1 Ko. 1:23) Si badisiple ya yandi zolá tala kaka vrai rezon ya lufwa ya yandi, ba zolá zaba yinki lufwa ya yandi zola zonza. (Gal. 3:13, 14) Na yawu, ba zolá tala ve yandi faso muntu yina salá mambu ya yimbi, kasi faso muntu yina ke vuukisa bawu.
Rezon ni rezon yina natá Yesu na kuzonza bamambu yayi, beto zaba ti ntangu yandi kufwa na zulu ya poto, yandi salá volonte ya Yehova. Kaka mwa ntangu fioti na manima ya kuzonza mambu yina ke na Nkunga, Yesu zonzá: “ya me lungana!” (Yoa. 19:30; Luke 22:37) Ya vrai, Yehova katulá mwa ntangu fioti proteksion yina Yesu vandá na yawu, samu Yesu lungisa bamambu yina Yehova filisak’ yandi na kusala awa na ntoto. Ya salá mpe ti, yandi lungisa bamambu nyonso yina ba soniká samu na yandi “na kati ya misiku ya Moyize, na kati ya baprofete mpe Bankunga.”—Luke 24:44.
^ par. 2 Tala mpe baparagrafe 9 na 10 ya artikle “Longoka na bamambu ya nsuka yina Yesu zonzá,” na numero yayi.
^ par. 5 Lere yandi vandá preche, bantangu ya nkaka Yesu vanda zonza bamambu to kuyufula bakestion yina vanda katuka ve na makanisi ya yandi mosi. Yandi vanda sala yawu, samu na kupesa badisiple ya yandi okazion ya kulakisa kiminu ya bawu.—Mrk. 7:24-27; Yoa. 6:1-5; tala Yinzo ya Kengidi (na Français), ya 15 Octobre 2010, p. 4-5.
