1-2. Wa’ faso beto lenda landa nzila yina biká makulu ya Yesu? Wapi ekzample lenda sadisa beto na kuzaba yawu.

KANISA ntete, beno ke grupe ya bantu, mpe beno ke na tambulá na kati ya bruse mosi yina ke na bapieje mingi mpe ntoto yina beno ke na dyatilá ke poto-poto. Muntu mosi yina zaba bien bruse yina, ke na mantwala ya beno. Ntangu yandi ke na tambulá, makulu ya yandi ke na biká nzila to bitambi na zulu ya poto-poto. Na distanse yina nge kele, nge ke na talá ve bien muntu yina ke na natá beno! Kasi, nge ke ve na boma. Samu ti, nge na ba yina ke na tambulá na nge, beno ke na salá nyonso na kulanda banzila yina ke na biká makulu ya yandi!

² Yinza yayi beto ke na zingá bubu yayi, ke faso bruse yina ke na bapieje mingi, mpe vrai bakristo ke faso grupe ya bantu yina ke na tambulá na kati ya yawu. Beto ke na kilengi, na yina Yehova pesá beto muntu yina zaba bien nzila: Mwana ya yandi Yesu, samu beto landa mbote-mbote nzila yina biká makulu ya yandi. (1 Pi. 2:21) Livre mosi yina ke salá bakomentere ya Biblia zonzá ti, awa Piere vandá kompare Yesu na guide: muntu yina ke lakisá nzila. Faso guide, makulu ya Yesu biká nzila yina beto lenda landa. Beto mase zonzila bakestion tatu yayi: Yinki zola zonza kulanda nzila yina makulu ya Yesu biká? Samu na yinki beto me lunga kusala yawu? Mpe wa’ faso beto ke lenda kusala yawu?

3. Yinki zola zonza kulanda nzila yina me bika makulu ya muntu?

³ Yinki zola zonza nzila yina me bika makulu ya muntu? Na Biblia, ba-mot “kutambula” mpe “makulu” ntangu ya nkaka ke zonzilá muntu yina ke na salá kurse ya luzingu. (Kub. 6:9; Bin. 4:26) Beto lenda kompare faso muntu me nata luzingu ya yandi, na nzila yina ke biká makulu ntangu muntu ke tambulá.  Na yawu, kulanda nzila yina me bika makulu ya muntu zola zonza kulanda ekzample ya yandi, to kusala bamambu faso yandi.

4. Yinki zola zonza kulanda nzila yina makulu ya Yesu biká?

⁴ Na yawu, yinki zola zonza kulanda nzila yina me bika makulu ya Yesu? Na bunkufi, ya zola zonza kulanda ekzample ya yandi. Na verse teme ya beto, apotre Piere ke na zonzilá ekzample ya mbote yina Yesu biká samu yandi kangá ntima na kati ya bampasi. Kasi, ya ke na bima mingi ya nkaka yina Yesu salá yina beto lendá landa. (1 Pi. 2:18-25) Ya vrai, bima nyonso yina Yesu zonzá mpe salá na luzingu ya yandi nyonso, ke ekzample yina beto zolá landa.

5. Muntu ya masumu lenda landa kwandi na faso ya kulunga ekzample ya Yesu? Zonzila yawu.

⁵ Kasi beto ke bantu ya masumu, na yawu beto ke lenda kwandi kulanda mbote-mbote ekzample ya Yesu? Ee, beto ke lenda. Piere zonzá ve ti beto zolá landa nzila yina biká makulu ya Yesu na faso ya kulunga, kasi yandi zonzá na beto ‘na kulanda mbote-mbote nzila yina biká makulu ya Yesu.’ Beto ke lenda kusala yawu si beto sala nyonso yina beto lenda sala faso bantu ya masumu samu na kulanda mambu yayi zonzá apotre Yoane: ‘Zinga faso Yesu zingaka.’—1 Yoa. 2:6.

6-7. Samu na yinki kulanda nzila yina biká makulu ya Yesu, ke nata beto na kukuma pene-pene na Yehova?

⁶ Kulanda nzila yina makulu ya Yesu biká ke nata beto pene-pene na Yehova. Samu na yinki beto lenda zonza yawu? Ya ntete, Yesu bikilá beto ekzample ya kulutila kitoko na faso ya kunata luzingu yina ke sepelisa Nzambi. (Yoa. 8:29) Na yawu, si beto landa nzila yina makulu ya Yesu biká, beto ke pesa Yehova kilengi. Mpe beto lenda ndima ti, Papa ya beto ya zulu ke vandá pene-pene na ba yina ke salá nyonso na kukuma bakamarade ya yandi.—Zaki 4:8.

⁷ Ya zole, Yesu landá na faso ya kulunga ekzample ya Papa ya yandi. Ni na yawu yandi  zonzá: “Muntu yina me tala munu me tala mpe [Papa].” (Yoa. 14:9) Beto lenda landa bifu ya mbote yina vandá na Yesu mpe faso yandi vandá bakilá bantu ya nkaka. Na kifwani, yandi lakisá ntima ya kyadi na muntu mosi yina vandá na lepre, yandi vandá na plase ya kento mosi yina vandá na maladi mosi ya ngolo mpe yandi tala kyadi ya ba yina fwidilá bantu yina ba vandá zolá. Kulanda ekzample ya Yesu ke sadisa beto na kusala bamambu faso Yehova. (Mrk. 1:40, 41; 5:25-34; Yoa. 11:33-35) Si beto landa bifu ya mbote ya Yehova ntangu nyonso, kikamarade ya beto na yandi ke kuma ngolo.

8. Zonzila samu na yinki, kulanda nzila yina biká makulu ya Yesu ke sadisa beto na ‘kununga’ yinza.

⁸ Kulanda nzila yina biká makulu ya Yesu ke sadisa beto na kubika ve yinza yayi nata beto na kutula dyaka ve kisalu ya Yehova na plase ya ntete. Na mpipa ya nsuka yina yandi lutisá awa na ntoto, Yesu lendá kuzonza: “Mu me nunga yinza.” (Yoa. 16:33) Yandi zolá zonza ti yandi biká ve, yandi landá ve makanisi, faso ya kunata luzingu mpe faso ya kusala bamambu ya bantu ya yinza. Yesu zimbaná ata fioti ve rezon yina ba filisá yandi awa na ntoto: kusukula nkumbu ya Yehova. Yinki beto lenda zonza samu na beto? Na yinza yayi ya ke na bima mingi yina lenda nata beto na kutula dyaka ve kisalu ya Yehova na plase ya ntete. Kasi, si faso Yesu, beto kontinye na kutula volonte ya Yehova na plase ya ntete, beto mpe ke “nunga” yinza.—1 Yoa. 5:5.

9. Yinki beto me lunga kusala samu na kukontinye na kutambula na nzila ya luzingu ya ntangu nyonso?

⁹ Kulanda nzila yina biká makulu ya Yesu ke nata beto na kuzwa luzingu ya ntangu nyonso. Ntangu jeune mosi yina vandá na mbongo mingi yufulá yinki yandi zolá sala na kuzwa luzingu ya ntangu nyonso, Yesu zonzá na yandi: “Kwiza mpe landa munu.” (Mat. 19:16-21) Na bajwif yina vandá ndima ve ti yandi vandá Kristo, Yesu zonzá: ‘Mameme ya munu, ke wá ndinga ya munu mpe mu me zaba bawu [. . .]. Mpe ba ke landá munu. Mu ke pesa bawu luzingu ya ntangu nyonso.’ (Yoa. 10:24-29) Na Nicodème, mosi ya ba yina vandá na tribunal ya bajwif yina bandá kuzola malongi ya Yesu, Yesu zonzá na yandi ti ba yina nyonso ‘ke lakisa kiminu na yandi’ ke ‘kuzwa luzingu ya ntangu nyonso.’ (Yoa. 3:16) Beto ke lakisá kiminu ya beto na Yesu ntangu beto ke sadilá mambu yina yandi zonzá mpe salá. Si beto sala yawu, beto ke kontinye na kutambula na nzila ya luzingu ya ntangu nyonso.—Mat. 7:14.

10. Yinki beto me lunga kusala samu na kulongoka kuzaba bien Yesu? (Yoane 17:3)

¹⁰ Avant na kulanda nzila yina biká makulu ya Yesu, beto zolá zaba ntete bien yandi. (Tanga Yoane 17:3.) ‘Kulongoka na kuzaba’ Yesu, ke kima yina beto zolá kontinye na kusala. Beto zolá kontinye kulongoka na kuzaba mingi bifu ya yandi ya mbote, makanisi ya yandi, mpe misiku ya yandi. Ata beto ke na kati ya laverite depuis ntama to ntama mingi ve, beto zolá kontinye kusala bangolo samu na ‘kulongoka kuzaba’ Yehova na Yesu.

11. Yinki ba-evanjile 4 ke zonzilá?

 ¹¹ Samu na kusadisa beto na kuzaba mwana ya yandi, na luzolo nyonso Yehova tulá ba-evanjile 4 (Matayi, Marke, Luke na Yoane) na kati ya Biblia. Ya ke zonzilá disolo ya luzingu ya Yesu mpe kisalu ya yandi ya predikasion. Ba-livre 4 yayi ke zonzilá beto mambu yina Yesu zonzá, salá, mpe wapi yina vandá makanisi ya yandi. Ya ke sadisá beto mpe na ‘kutala mbote-mbote’ ekzample ya Yesu. (Ebr. 12:3) Ya vrai, ya ke na banzila yina biká makulu ya Yesu ntangu yandi vandá awa na ntoto. Na yawu, si beto longoka ba-evanjile, beto ke lenda kuzaba Yesu vrai bien. Ya ke sala ti, beto landa bien nzila yina biká makulu ya yandi.

12. Wa’ faso beto lenda zaba dyaka ya kulutila mambu yina ke na ba-evanjile?

¹² Samu na kuzaba dyaka ya kulutila mambu yina ke na kati ya ba-evanjile, beto zolá nsuka ve kaka na kutanga yawu. Beto zolá baka ntangu ya kulongoka yawu, mpe ya kukanisa na yina beto me tanga. (Tala Yosua 1:8, note.) Beto zonzila bima zole yina lenda sadisa beto na kubaka ntangu ya kukanisa na bamambu yina beto me tanga na ba-evanjile mpe kusadila yawu.

13. Wa’ faso nge lenda sala ti disolo yina ke na evanjile kuma faso film na yintu ya nge?

¹³ Ya ntete: kumisa disolo yina evangile ke na zonzilá faso film na yintu ya nge. Sadila mayela ya nge samu na kutala, kuwa, mpe kuzaba faso bamambu salamá. Na kusadisa nge na kusala yawu, sala mwa barecherche na kati ya mikanda ya beto. Tala bamambu yina salamá na baverse yina ke avant mpe na manima ya baverse yina nge ke na longoká. Sosa kuzaba mingi bantu mpe babwala yina disolo ke na zonzilá. Kompare disolo yina nge ke na tangá na evanjile mosi, na faso ke na zonzilá yawu ba-evanjile ya nkaka. Bantangu ya nkaka, evanjile mosi lenda pesa badetaye yina ba-evanjile ya nkaka me pesa ve.

14-15. Wa’ faso beto lenda sadila baleson yina beto me benda na kati ya ba-evanjile na luzingu ya beto?

¹⁴ Ya zole: sadila disolo yina ke na zonzilá evanjile na luzingu ya nge. (Yoa. 13:17) Na manima ya kulongoka mbote-mbote disolo yina ke na evanjile, nge lenda yufula: ‘Ya ke kwandi na leson na  kati ya disolo yayi yina mu lenda sadila na luzingu ya munu? Wa’ faso mu lenda sadila disolo yayi samu na kusadisa muntu ya nkaka?’ Kanisa na muntu yina nge zaba, mpe na manima, na luzolo mpe buzitu, kabula yandi leson yina nge me longoka.

¹⁵ Beto zonzila disolo mosi mpe beto tala faso beto lenda sadila bametode zole yayi beto me zonzila. Ya ke disolo ya veuve yina vandá povre, yina Yesu talá na kati ya temple.

16. Zonzila disolo yina ke na Marke 12:41.

¹⁶ Sala ti disolo kuma faso film na yintu ya nge. (Tanga Marke 12:41.) Kanisa na faso mambu lutilá. Ya ke kilumbu ya 11 Nisan 33 N.B., bilumbu me bikana kaka fioti avant Yesu kufwa. Yesu me lutisa kilumbu nyonso na kupreche na kati ya temple. Ba-enemi ya yandi me sala nyonso samu ya vanda mpasi na yandi na kusala yawu. Avant, ba ya nkaka sosá kuzaba nani pesak’ yandi permision ya kusala bamambu yina yandi vandá sala. Ba ya nkaka mpe sosá kuyufula yandi bakestion yina ba vandá kanisa ti yandi ke lenda ve kupesa bareponse. (Mrk. 11:27-33; 12:13-34) Ntangu yayi, Yesu me kwenda na kote ya nkaka ya temple. Kote yina yandi me kwenda, ke ntangu ya nkaka kote yina ba ke bokilá lakur ya bakento. Ya ke ve mpasi na yandi na kutala ba-boite yina ba me tula na bamur samu na kutula mbongo. Yandi me vanda mpe me banda kutala faso bantu ke na tulá mbongo na kati ya ba-boite. Yandi ke na talá faso bantu ya mbongo ke na tulá mbongo mingi. Ntangu ya nkaka, na distanse yina yandi kele, yandi ke na wá faso mbongo ke na bwá na kati ya ba-boite.

17. Wa’ faso vandá situasion ya veuve ya povre yina ke zonzilá Marke 12:42.

¹⁷ Tanga Marke 12:42. Na manima, Yesu me tala kento mosi. Ya ke ‘veuve’ mosi ya povre. (Luke 21:2) Luzingu ya yandi ke vrai mpasi. Ntangu ya nkaka, yandi vandá ve na mbongo samu na kusumba bima yina yandi vandá na yawu nsatu. Ata faso yina, yandi ke na kwendá na kote yina ke ba-boite mpe me tula ba-piece zole ya mbongo yina ntangu ya nkaka salá ve makelele ntangu ya vandá kota na kati ya boite. Yesu me zaba yikwa kento yayi me tula na boite. Yandi me tula ba-lepta zole, mbongo mosi yina vandá na valere ya fioti na ntangu yina. Valere ya yawu vandá lunga ve samu na kusumba ata moineau mosi, ndeke yina ba vandá tekisá na ntalu ya kulutila fioti na bandeke nyonso.

18. Faso me zonza Marke 12:43, 44, yinki Yesu zonzá samu na mbongo yina pesá veuve mosi?

¹⁸ Tanga Marke 12:43, 44. Yesu sepelá mingi na mambu yina salá veuve yayi. Na yawu, yandi bokilá badisiple ya yandi, lakisá bawu veuve yango mpe zonzá: ‘Veuve yayi, me tula mbongo mingi kulutila bantu nyonso.’ Na manima yandi bwelá: ‘Ba yina ke na mbongo mingi, me tula mbongo yina ba vandá ve na yawu nsatu, kasi yandi, na kati ya bupovrete ya yandi, yandi me tula nyonso yina yandi vandá na yawu, bima ya yandi nyonso ya kuzinga.’ Ntangu veuve yayi, pesá mbongo nyonso yina yandi vandá na yawu kilumbu yina, yandi lakisá ti yandi vandá na konfianse ti Yehova ke kipe yandi.—Nku. 26:3.

19. Wapi leson ya important beto lenda benda na mambu yina Yesu zonzá samu na veuve yina vandá povre?

¹⁹ Sadila leson yina nge me benda na disolo yayi na luzingu ya nge. Nge lenda yufula: “Wapi leson mu lenda benda na mambu yina Yesu zonzá samu na veuve yina vandá povre?” Kanisa na veuve yayi. Ntangu ya nkaka yandi vandá na nsatu ya kupesa mingi na Yehova. Kasi, yandi salá nyonso yina yandi lenda sala, yandi pesa na Yehova nyonso yina vandá na yandi. Mpe Yesu zabá ti, mbongo yina yandi pesá, vandá na valere ya mingi na meso ya Papa ya yandi Yehova. Beto lenda benda leson yayi ya important: Yehova ke vandá na kilengi ntangu beto ke pesak’ yandi bima ya kulutila mbote yina beto ke na yawu, ntima ya beto nyonso, mpe ngolo ya beto  nyonso. (Mat. 22:37; Kol. 3:23) Yandi ke vandá na kilengi ntangu yandi ke na talá ti beto ke na salá nyonso yina beto lenda sala! Yandi ke talá mpe ntangu yina beto ke lutisá na ngolo yina beto ke salá, na kusambila yandi, na kisalu ya predikasion, mpe na balukutakanu ya beto.

20. Wapi faso nge lenda sadila leson yina nge me benda na disolo ya veuve ya povre? Pesa ekzample.

²⁰ Wa’ faso nge lenda sadila leson yina nge me benda na disolo ya veuve yina vandá povre? Kanisa na ba yina lenda kuzwa kuraje si nge rapele bawu ti Yehova ke sepelá na yina ba ke lendá kupesa yandi. Na kifwani, nge zaba kwandi mpangi mosi ya kento ya kukula yina ke ve na sante ya bien to ke dyaka ve na ngolo mpe ke na nyongá to ke na tala ti yandi ke dyaka ve na valere samu yandi ke salá dyaka ve mingi na predikasion faso na ntama? To nge lenda kanisa na mpangi mosi ya bakala yina ke na maladi mosi ya kronik yina ke talisá yandi mpasi mpe yandi ke nyongá samu yandi ke lendá dyaka ve kukwenda na balukutakanu nyonso na salle du Royaume? Nge lenda sadisa mosi na mosi ya bampangi yayi si nge zonza na bawu bamambu yina ke “mbote samu na kutunga.” (Ef. 4:29) Kabula na bawu leson ya kitoko yina nge me benda na disolo ya veuve ya povre. Bamambu ya kitoko yina nge ke zonzila bawu, lenda rapele bawu ti, Yehova ke sepelá na yina ba ke pesak’ yandi na ntima mosi. (Bin. 15:23; 1 Tes. 5:11) Si nge felisite bampangi samu ba ke na pesá na Yehova na ntima mosi, ata yina ba ke na pesá ke fioti, nge ke lakisa ti nge ke na landá mbote-mbote nzila yina biká makulu ya Yesu.

21. Wapi desizion nge me baka?

²¹ Beto ke na vrai kilengi ya kutala ti na kati ya ba-evanjile, ya ke na badetaye mingi ya luzingu ya Yesu yina ke sadisá beto na kulanda ekzample ya yandi to na kulanda mbote-mbote nzila yina biká makulu ya yandi! Beto lenda sala programe ya kulongoka ba-evanjile ntangu beto ke longoká Biblia na famiye to beto mosi. Beto zimbana ve ti, samu na kubenda baleson ya bien na masolo yina beto ke na longoká, beto zolá kumisa masolo yina faso film na yintu ya beto mpe kusadila yawu na luzingu ya beto. Beto ke ve kaka na nsatu ya kulanda mambu yina Yesu salá, kasi ya kulanda mpe mambu yina yandi zonzá. Na artikle ke landa, beto ke tala yinki beto lenda longoka na bamambu ya nsuka yina Yesu zonzá avant yandi kufwa.