Ya vandá kyadi na kutala ti, lere mu kumá na 13 ans, kikamarade ya munu na Yehova bandá kukota madidi. Mu bandá kutala nete bakamarade ya munu ya lekole vandá na liberte ya mingi, mpe mu vandá na nsatu ya kuzwa liberte yina. Mu vanda tala ti bamambu yina vanda zonza na munu baparent ya munu mpe misiku ya Biblia, vandá kilo. Mpe mu vandá kanisa ti kusambila Yehova vandá kima mosi ya mpasi. Ata mu vandá kaka na kiminu ti, Yehova ke Nzambi, kasi mu vandá tala ti mu vandá dyaka ve pene-pene na yandi.

Ya vrai, mu biká ve kupreche, kasi mu vanda sala yawu kaka faso yina. Ntangu mu vandá kwendá preche, mu vandá prepareke ve mambu mu ke kwenda zonza, na yawu, ya kumá mpasi na munu na kubanda kusolola na bantu to na kukontinye disolo. Ya salá ti, mu vandá ve na bantu yina ke longoka Biblia na munu to na bantu yina mu ke vutukila kutala mpe mu vandá ve na kilengi ya kusala teritware. Bamambu nyonso yayi salá ti, mu vandá kwendá yiiná kaka predikasion. Mu bandá kuyufula: ‘Wa’ faso muntu lenda sala na kukontinye na kupreche ba-semaine nyonso mpe ba-mois nyonso?’

Ntangu mu kumá na 17 ans, mu kumá na nsatu ya liberte ya kusala bamambu faso mu zola. Na yawu, mu  baká sac ya munu, mu biká yinzo mpe mu kwendá na Australie. Kutala munu kubasika na yinzo, salá baparent ya munu vrai mpasi. Ba vandá na basusi, kasi ba vandá kanisa ti mu ke kontinye kaka kusadila Yehova.

Na Australie, mu kotá dyaka madidi ya kulutila. Mu vandá kwenda dyaka ve ntangu nyonso na balukutakanu. Mu vandá zolá kuvanda na ba-jeune yina, faso munu, vandá kwendá ntangu ya nkaka na balukutakanu, kasi na manima, ba vandá kwendá kunwá malafu mpe kubina na ba-boite de nuit. Ntangu mu ke na kanisá na luzingu ya munu na moment yina, mu ke na talá ti, mu vandá na kati ya laverite mpe na kati ya yinza, kasi mu vandá ve na kilengi na bakote nyonso zole yina.

Bamvula zole na manima, mu kutaná na mpangi mosi ya kento yina zabá ve ti, yandi zolá nata munu na kukanisa na faso mu zolá nata luzingu ya munu. Mu vandá vanda yinzo mosi na bampangi ya kento 5 yina vandá baselibetere. Mpe beto bokilá Ntwadisi ya sirkonskripsion na kento ya yandi Tamara, na kulutisa semaine mosi na yinzo ya beto. Ntangu bakala ya yandi vandá basiká samu na kuyidika bamambu ya kimvuka, Tamara vandá lutisá ntangu na beto, mpe yandi vandá baka ntangu ya kuseka na beto. Mu vandá zolá faso yandi vandá. Yandi vandá na ntima ya kyadi mpe ya vandá ve mpasi na kusolola na yandi. Ya vandá vrai kitoko na kutala ti, muntu yina vandá lutisa ntangu ya yandi na predikasion mpe na kusala kisalu ya Yehova vandá mpe na kilengi ya faso yina.

Tamara vandá salá bamambu na tiya mpe kilengi nyonso. Luzolo ya yandi samu na laverite mpe samu na predikasion, vandá puse beto na kusala nete yandi. Yandi vandá na kilengi samu yandi vandá pesa Yehova ntangu mpe ngolo ya yandi nyonso, kasi mu vandá ve na kilengi samu mu vandá sala ve mingi. Faso ya yandi ya bien ya kutala bamambu mpe kilengi ya mingi yina yandi vandá na yawu, puseke munu na kukanisa na faso ya kunata luzingu ya munu. Ekzample ya yandi ya mbote, salá ti mu kanisa na verite yayi ya important: Yehova ke na nsatu beto nyonso sadila yandi ‘na kilengi’ mpe ‘na makelele ya kilengi.’—Nku. 100:2.

Mu vandá na nsatu ya kuzwa kilengi yina Tamara vandá na yawu, kasi na kuzwa yawu, mu zolá sala bachanjement mingi. Mu chanjeke ve na mbala mosi,  kasi mu bandá ntete kusala bachanjement ya fioti. Mu bandá kuprepare mambu mu ke kwenda zonza na predikasion, mpe mu bandá kubaka servise ya pionier auxiliaire bantangu ya nkaka. Ya sadisá munu na kukatula boma mpe na kuvanda dyaka na konfianse. Samu mu vanda sadila mingi Biblia na predikasion, kilengi ya munu vandá kula. Na manima, mu kumá pionier auxiliaire samu na ba-mois nyonso.

Mu bandá kusala kikamarade na bampangi ya ba-age nyonso, yina vandá pesa ntangu ya bawu na Yehova mpe vandá na kilengi ya kusala yawu. Ekzample ya bawu ya mbote, sadisá munu na kukanisa na yina ke important na luzingu ya munu, mpe mu bandá kutanga Biblia bilumbu nyonso. Mu bandá kuzola mingi kisalu ya predikasion mpe mu kumá pionier ya ntangu nyonso. Depuis ba-année mingi ya vandá mbala ya ntete, mu vanda dyaka na kilengi mpe mu tala kilengi ya kuvanda na salle du Royaume.

Na manima ya mvula mosi, mu kutaná na Alex. Yandi vandá muntu ya bien, yina vandá zolá Yehova mpe predikasion. Yandi vandá assistant mpe pionier depuis 6 ans. Alex precheke ba-mois 7 to 8 na Malawi, kote yina ba vandá na nsatu ya baproklamatere mingi. Kuna, yandi vandá lutisá ntangu mingi na bamisionere yina vandá ba-ekzample ya mbote samu na yandi. Ba natak’ yandi na kukontinye na kutula Kimfumu ya Nzambi na plase ya ntete na luzingu ya yandi.

Na 2003, beto kwelaná, mpe beto kontinye kisalu ya beto ya pionier. Beto longoká baleson mingi ya kitoko mpe Yehova pesá beto babenediksion ya bafaso mingi.

YEHOVA ME PESA BETO BABENEDIKSION YA KULUTILA

Na 2009, beto kuzwá invitasion ya kuvanda bamisionere na Timor-Leste, bwala mosi ya fioti na archipel ya Indonésie. Beto vandá vingila ve yawu, na mbala mosi beto kumá na kilengi mpe boma. Ba-mois 5 na manima, beto kumá na Dili, capital ya bwala yango.

Luzingu ya beto na yinzo ya beto ya malu-malu, vandá ve faso mosi na luzingu yina beto vandá na yawu avant. Beto zolá mesana na faso bantu ya bwala yina vandá sala bamambu, na ndinga ya bawu, madya,  mpe faso luzingu vandá kuna. Na predikasion, bambala mingi, beto vandá bwabana na bantu yina vandá vrai povre, ba yina salá ve lekole ya mingi to salá ve lekole, mpe ba yina ba vandá nyokola. Beto vandá kutana mpe na bantu yina vandá na maladi ya nzutu mpe ya ya yintu samu na guerre mpe bubandi. *

Predikasion vandá vrai kitoko! Na kifwani, kilumbu mosi mu bwabaná Maria, mwana mosi ya kento yina vandá na 13 ans. * Mama ya yandi kufwá bamvula mingi ve mpe yandi vandá talá ve mingi papa ya yandi. Faso ba-jeune ya age ya yandi, Maria zabá ve yinki yandi ke sala na luzingu ya yandi. Mu ke na zabá dyaka kilumbu mosi, yandi dilá ntangu yandi vandá zabisa munu, bamambu yina vandá na yandi na ntima. Kasi, mu zabá ve yinki yandi vandá sosa kuzonza samu mu zabá ve bien ndinga ya yandi. Mu sambilá Yehova, samu yandi sadisa munu na kupesa yandi kuraje, mpe na manima, mu bandá kutangila yandi mwa baverse samu na kupesa yandi ngolo. Na manima ya mwa bamvula, mu vandá tala faso laverite vandá chanje makanisi, faso ya kulwata mpe luzingu nyonso ya Maria. Yandi kuzwá bateme, mpe bubu yayi, yandi ke mpe na bantu yina ke longoká Biblia na yandi. Bubu yayi, Maria ke na kati ya famiye ya nene ya bisadi ya Yehova mpe yandi ke talá ti ba ke zolá yandi.

Yehova me sala ti kisalu ya predikasion na Timor-Leste kwenda na mantwala. Kaka na 10 ans me luta, baproklamatere mingi me kuzwa bateme, me kuma bapionier, ba-assistant mpe bakuluntu. Ba ya nkaka ke salá na Antenne ya Traduction mpe ke sadisá na kusala traduction ya mikanda ya beto na bandinga ya bawu. Ya ke salá mu vrai kilengi na kuwa faso ba ke na yimbá bakantik na bandinga ya bawu, kutala sourire na bafigure ya bawu, mpe kutala faso ba ke na kumá bakaramade ya Yehova.

Luzingu ya beto na Timor-Leste vandá ve faso mosi na luzingu yina beto vandá na yawu na Australie. Kasi mu vandá kanisa ve ti beto zolá kuzwa kilengi ya mingi kuna. Bantangu ya nkaka, beto vandá salá bavoyaje na bus ya fioti, na babantu mingi na kati, bambisi ya kuyuma, mpe bapake ya bandunda yina ba vandá tekisá na zandu. Bilumbu ya nkaka, beto vandá longoka Biblia na bantu yina vandá na bayinzo yina mupepe vandá kotá ve mpe salete, na bamur ya ntoto mpe bansusu vandá tambula na kati. Ya vrai, ata basituasion yayi, mu vandá kanisá bantangu nyonso, ‘Ya ke bien!’

Ntangu mu ke talá na manima, mu ke pesá mersi na baparent ya munu, samu ba salá nyonso samu na kulonga munu mambu ya Yehova mpe kusadisa munu na ntangu yina kikamarade ya munu na Yehova vandá dyaka ve ngolo. Mambu yina ke zonzá Bingana 22:6 talaná na luzingu ya munu. Mama ya munu na papa ya munu ke sepelá mingi samu na Alex mpe munu. Ba ke na kilengi ya kutala faso Yehova ke na sadilá beto na kisalu ya yandi. Depuis 2016, beto ke na salá kisalu ya sirkonskripsion na teritware ya filiale ya Australasie.

Bubu yayi, ya ke mpasi na munu na kundima ti, bamvula yina me luta mu vandá sepelá ve na kisalu ya predikasion. Bubu yayi, mu mase zolá predikasion! Mu me kwiza zaba ti, ata kima ni kima yina lendá kumina beto na luzingu, vrai kilengi ke kwizá nkaka ntangu beto ke sadilá Yehova na ntima ya beto nyonso. Ba 18 ans yayi mu me lutisa na kusadila Yehova na Alex, me vanda bamvula ya kulutila kitoko na luzingu ya munu. Bubu yayi mu me kwiza komprendre ti mambu yina David zonzá na Yehova ke vrai: ‘Ba yina nyonso ke bumbaná na nge, ke vanda na kilengi, ba ke sala makelele ya kilengi ntangu nyonso [. . .]. Ba yina ke zolá nkumbu ya nge ke sepela na nge.’—Nku. 5:11.