1. Yinki Yehova ke talá na bisadi ya yandi?

YEHOVA NZAMBI ya beto ‘ke zolá bantu ya yandi.’ (Nku. 149:4) Kuzaba mambu yayi ke salá beto vrai kilengi! Yehova ke talá bifu ya beto ya mbote, yandi ke talá muntu ya mbote yina beto lenda kuma mpe yandi ke sadisá beto na kukuma bakamarade ya yandi. Si beto vanda kaka ya kukangama na yandi, yandi ke vanda ntangu nyonso pene-pene na beto!—Yoa. 6:44.

2. Samu na yinki ya ke vandá mpasi na ba ya nkaka na kundima ti Yehova ke zolá bawu?

² Ba ya nkaka lenda zonza: “Mu zaba ti Yehova ke zolá bisadi ya yandi, kasi wa’ faso mu lenda zaba ti yandi ke zolá munu?” Samu na yinki ba ya nkaka lenda yufula kestion yayi? Oksana * yina talá mpasi mingi ntangu yandi vandá mwana ya fioti me zonza: “Mu vandá na vrai kilengi ntangu mu zwá bateme mpe mu bandá kisalu ya pionier. Kasi 15 ans na manima, basuvenir ya yimbi ya bamambu ya mpasi yina mu kutaná na yawu ntangu mu vandá mwana ya fioti, banda kuvutukila munu. Mu bandá kukanisi ti Yehova vandá ndima ata fioti ve ti, mu vanda na kati ya bisadi ya yandi mpe mu vandá merite ve luzolo ya yandi.” Yua, mpangi ya kento ya pionier yina kutaná mpe na bamambu mingi ya mpasi ntangu yandi vandá fioti me zonza: “Mu pesá luzingu ya munu na Yehova samu mu vandá na nsatu ya kutalisa yandi kilengi. Kasi mu vandá tala ti, Yehova lenda zola ata fioti ve munu.”

3. Yinki beto ke zonzila na artikle yayi?

³ Faso bampangi ya kento zole yayi beto me zonzila, nge mpe ke zolá Yehova. Kasi ya lenda vanda mpasi na nge na kundima ti yandi ke zolá nge. Samu na yinki nge ke na nsatu ya kundima ti Yehova ke kipeke nge? Mpe yinki lenda sadisa nge si nge ke na kanisá  ti Yehova ke zolá ve nge? Beto ke pesa bareponse na bakestion yayi.

4. Samu na yinki ya ke yimbi samu na kimpeve ya beto na kumanga kundima ti Yehova ke zolá beto?

⁴ Luzolo ke na ngolo ya kunata beto na kusala bamambu. Si beto zaba ti Yehova ke zolá beto mpe ke sadisá beto, beto ke vandá na nsatu ya kusadila yandi na ntima ya beto nyonso, ata beto ke na kutaná na bampasi na luzingu ya beto. Kasi, si beto ke na mangá ti Yehova ke kipeke beto, “ngolo ya beto ke vandá ve mingi.” (Bin. 24:10) Dyaka, kuvanda ya kulemba mpe kubanda kukanisa ti Nzambi ke zolá ve beto, ke sala ti beto vanda ve na ngolo ntangu Satan ke sosa kunwanisa beto.—Ef. 6:16.

5. Yinki kuminá na bampangi ya nkaka yina vandá kanisa ti Nzambi ke zolá ve bawu?

⁵ Bampangi yina bandá kukanisa ti Yehova ke zolá ve bawu mpe ke kipeke ve bawu, vandá dyaka ve na kimpeve ya ngolo. Jacques yina ke kuluntu ya kimvuka me zonza: “Ata mu salá na Bethel, mpe mu kwendá preche na bateritware yina ke zonzá bandinga ya nkaka, mu vandá kontinye kaka kuyufula si Yehova vandá sepela na kisalu yina mu vandá sala samu na yandi. Mu bandá mpe kuyufula si Yehova ke wá bapriere ya munu.” Eva yina ke mpe na servise ya ntangu nyonso me zonza: “Mu kwizá longoka ti ya ke yimbi samu na kimpeve ya beto, na kukanisa ti Yehova ke zolá ve beto. Ya lenda bebisa kisalu yina beto ke salá samu na Yehova. Ya lenda manisa nsatu ya beto ya bima ya kimpeve mpe kumanisa kilengi ya beto ya kusadila Yehova.” Michael yina ke pionnier ya ntangu nyonso mpe kuluntu ya kimvuka me zonza: “Si nge ke ve na kiminu ti Nzambi ke kipeke nge, nge ke kwenda ntama na yandi.”

6. Yinki beto me lunga kusala ntangu beto ke bandá kukanisa ti Yehova ke zolá ve beto?

⁶ Masolo yayi ke na lakisá faso kiminu ya beto lenda beba si beto ke na kanisá ti Yehova ke zolá ve beto. Kasi yinki beto me lunga kusala ntangu beto ke bandá kukanisa faso yayi? Na mbangu nyonso, beto zolá losa makanisa yayi! Lomba na Yehova sadisa nge na kukatula makanisa yina ke na ‘kwamisá nge’ mpe na kutula na plase ya yawu, ‘kizunu ya Nzambi yina ke bumba ntima ya nge mpe makanisi ya nge.’ (Nku. 139:23; Flp. 4:6, 7) Mpe kuzimbana ve, nge ke ve kaka nge mosi. Bampangi ya beto ya nkaka yina ke ya kukangama na Yehova, ke nwaná na makanisi ya yimbi. Ya ke mpe na bisadi ya Yehova ya ntama yina nwaná na makanisi ya faso yayi. Beto  tala yinki beto lenda longoka na ekzample ya apotre Paul.

7. Wapi bamambu ya mpasi Paul vandá nwana na yawu?

⁷ Bantangu ya nkaka nge ke talá ti nge ke na baresponsabilite mingi, mpe ya ke mpasi na nge na kusala bima yina nge ke na nsatu ya kusala? Si ya ke faso yina, disolo ya Paul lenda sadisa nge. Yandi vandá na susi, samu na bampangi ya kimvuka kaka mosi ve, kasi “ya bimvuka nyonso.” (2 Ko. 11:23-28) Nge ke na maladi yina ke na manisá ve mpe ke na katulá nge ntangu nyonso kilengi? Paul vandá na “disende na nzutu,” yina vandá kwamisa yandi. Disende yango lenda vanda maladi mosi yina vandá talisa yandi mpasi mpe yandi vandá na nsatu ya manisa. (2 Ko. 12:7-10) Bantangu ya nkaka masumu ya nge ke manisá nge kuraje? Paul mpe masumu ya yandi vandá manisá yandi ngolo. Yandi zonzá ti yandi ke “muntu ya mawa” samu ntangu nyonso yandi vandá nwana na masumu ya yandi.—Rom. 7:21-24.

8. Yinki sadisá Paul na kukanga ntima ata bamambu yina vandá na yandi?

⁸ Ata yandi kutaná na bamambu mingi ya mpasi, Paul kontinyeke kusadila Yehova. Yinki pesak’yandi ngolo ya kusala yawu? Ata yandi zabá bien ti yandi vandá muntu ya masumu, yandi vandá na kiminu ya ngolo na sakrifise ya Yesu. Yandi zabá mpe bien ti Yesu zonzá ti “muntu nyonso yina ke lakisa kiminu na [Yesu] [. . .] ke kuzwa luzingu ya ntangu nyonso.” (Yoa. 3:16; Rom. 6:23) Ya vrai, Paul vandá na kati ya ba yina lakisá kiminu na sakrifise ya Yesu. Yandi zabá bien ti, Yehova ke eziteke ve na kupardone ata ba yina me sala masumu ya ngolo si ba nyonga masumu ya bawu.—Nku. 86:5.

9. Yinki beto lenda longoka na bamambu yina Paul zonzá na Bagalate 2:20?

⁹ Paul vandá mpe na kiminu ti Yehova ke zolá yandi mingi samu yandi zabá ti Nzambi filisá Yesu samu na kufwa samu na yandi. (Tanga Bagalate 2:20.) Beto tala mambu ya kitoko yayi yandi zonzá na nsuka ya verse yayi: ‘Mwana ya Nzambi [. . .] zolá munu mpe kufwá samu na munu.’ Paul tulá ve balimite na luzolo ya Nzambi mpe bandá ve kuzonza: “Mu lenda tala samu na yinki Yehova ke zolá bampangi, kasi yandi lenda zola ata fioti ve munu.” Paul rapeleke na bakristo ya Rome: “Ntangu beto vandá ntete bantu ya masumu, Kristo kufwá samu na beto.” (Rom. 5:8) Ata kima lenda tula balimite na luzolo ya Nzambi samu na beto!

10. Yinki mambu yina ke na Baroma 8:38, 39 ke na longá beto?

¹⁰ Tanga Baroma 8:38, 39. Paul zabá na ntima  ya yandi nyonso ti luzolo ya Nzambi ke nene. Yandi soniká ti ata kima ‘lendá kabula beto na luzolo ya Nzambi.’ Yandi zabá bien faso Yehova lakisá ntima ya yinda na ba-izraelite. Yandi zabá mpe faso Yehova lakisá yandi ntima ya kyadi. Na yawu, ya ke nete Paul vandá zonza: “Depuis Yehova filisá Mwana ya yandi na kufwa samu na munu, mu lenda manga ata fioti ve ti yandi ke zolá munu?”—Rom. 8:32.

11. Ata Paul salá masumu nyonso yina yandi ke na zonzilá na 1 Timote 1:12-15, samu na yinki yandi vandá ndima ti Nzambi zolak’ yandi?

¹¹ Tanga 1 Timote 1:12-15. Ya vandá salá Paul vrai mpasi lere yandi vandá kanisá na bamambu nyonso ya yimbi yina yandi salá avant yandi kuma mukristo. Ya lenda pamusa ve beto ntangu yandi me zonza ti yandi vandá “muntu yina lutilá” bantu nyonso na kusala masumu! Avant yandi zaba laverite, yandi vandá kwamisa bakristo na ba-ville nyonso yina ba vandá. Yandi vandá tula ba ya nkaka na boloko mpe vandá sepelá ntangu tribunal vandá baká desizion ya kufwa bakristo ya nkaka. (Bis. 26:10, 11) Kanisa na mpasi yina ya vandá sala yandi na ntima ntangu yandi vandá talá na balukutakanu bakristo ya jeune yina ba kufwá baparent samu na yandi? Paul nyongá mambu nyonso ya yimbi yina yandi salá, kasi yandi zabá ti ya lenda chanje ve mambu nyonso ya yimbi yina yandi salá na ntama. Yandi ndimá ti Kristo kufwá samu na yandi, mpe na konfianse nyonso yandi soniká: “Samu na ntima ya mbote ya nene ya Nzambi mu ke faso mu kele.” (1 Ko. 15:3, 10) Wapi yina ke leson samu na beto? Nge zolá ndima ti Yesu kufwá samu na nge mpe lufwa ya yandi me pesa nge okazion ya kusala kikamarade na Yehova. (Bis. 3:19) Ni mambu yina nge ke na salá bubu yayi mpe yina nge ke sala na mantwala, ke important na meso ya Nzambi. Kasi ve masumu yina nge salá na ntama, ata nge vandá temwe ya Yehova to nge vandá ve yawu na ntangu yina.—Iza. 1:18.

12. Wa’ faso mambu yina ke na 1 Yoane 3:19, 20 lenda sadisa beto si beto ke na kanisá ti beto ke ve na valere to ba me lunga ve kuzola beto?

 ¹² Yina nge zaba ti Yesu kufwá samu na masumu ya nge, nge lenda kanisa: “Mu ke na meriteke ve kuzwa kado ya kitoko yayi.” Samu na yinki nge lenda vanda na makanisi yayi? Ntima ya beto ya masumu lenda vuna beto, ya lenda nata beto na kukanisi ti beto ke ve na valere to ba me lunga ve kuzola beto. (Tanga 1 Yoane 3:19, 20.) Ntangu makanisi ya faso yayi ke kwizilá nge, nge zolá zimbana ve ti “Nzambi me lutila bantima ya beto nene.” Ata beto ke na ndimá ve ti Yehova ke zolá beto mpe ke lemvokilá beto, kasi beto zaba ti Papa ya beto ya zulu ke kontinye kuzola mpe kulemvokila beto. Beto zolá nata ntima ya beto na kutala beto faso Yehova ke tadilá beto. Na kusala yawu, beto zolá longoka Biblia, kusambila ntangu nyonso, mpe kulutisa ntangu na batemwe ya Yehova ya nkaka. Samu na yinki ya ke important na kusala bima nyonso yayi?

13. Wa’ faso kulongoka Biblia lenda sadisa beto? (Tala enkadre “ Biblia sadisá bawu.”)

¹³ Kulongoka Biblia bilumbu nyonso, ke sadisa nge na kuzaba dyaka bien bifu ya mbote ya Yehova. Nge ke zaba ti yandi ke zolá nge mingi. Kukanisa mbote-mbote na baverse ya Biblia yina beto ke tangá bilumbu nyonso, lenda sadisa beto na kutala pwelele luzolo ya Yehova, mpe na “kuyidika bamambu” na makanisi mpe na ntima ya beto. (2 Tim. 3:16) Kevin, kuluntu mosi yina ke nwaná na makanisi yina ke na natak’ yandi na kutala ti yandi ke kaka muntu ya pamba me zonza: “Kutanga Nkunga 103 mpe kukanisa na yawu, ke sadisá munu na kuyidika makanisi ya munu mpe na kuzaba faso Yehova ke tadilá munu.” Eva yina beto me zonzila deja, me zonza: “Na nsuka ya kilumbu, mu ke baká ntangu ya kukanisa na mambu yina ke important samu na Yehova. Ya ke tulá lapaix na ntima ya munu, mpe ya ke kulisá kiminu ya munu.”

14. Wa’faso priere lenda sadisa beto?

¹⁴ Sambila ntangu nyonso. (1 Tes. 5:17) Si nge ke na nsatu ya kusala kikamarade ma muntu, nge me lunga kusolola na yandi ntangu nyonso mpe kuzonzila yandi makanisi ya nge. Ya ke mpe faso mosi na kikamarade ya beto na Yehova. Ntangu beto ke zonzilá yandi na priere makanisi ya beto, mpe bamambu yina ke na beto na ntima, beto ke lakisá ti beto ke salak’ yandi konfianse mpe beto zaba ti yandi ke zolá beto. (Nku. 94:17-19; 1 Yoa. 5:14, 15) Yua yina beto me zonzila deja me zonza: “Ntangu mu ke sambilá, mu ke zonzilá ve kaka na Yehova bamambu yina me kumina munu kilumbu yina. Mu ke fungulá yandi ntima ya munu mpe mu ke zonzilá yandi mambu yina mu ke na kanisá. Fioti-fioti mu me banda kutala Yehova, ve faso chef ya kompani ya nene, kasi faso Papa yina ke zolá mingi bana ya yandi.”—Tala enkadre “ Nge me tangak’ yawu?”

15. Wa’faso Yehova ke lakisá ti yandi ke kipeke beto?

 ¹⁵ Lutisa ntangu na bakamarade ya nge ya kimvuka, ba ke bakado ya Yehova. (Zaki 1:17) Papa ya beto ya zulu ke lakisá ti yandi ke kipeke beto, samu yandi pesá beto bampangi ya kento na ya bakala na kati ya kimvuka yina ke lakisá beto ‘luzolo ntangu nyonso.’ (Bin. 17:17) Na letre ya yandi na Bakolose, Paul zonzilá bakristo yina sadisá yandi, mpe yandi bokilá bawu ‘ba yina pesak’ yandi ngolo ya mingi.’ (Kol. 4:10, 11) Yesu mpe vandá na nsatu ba sadisa yandi mpe yandi sepelá ntangu bakamarade ya yandi, ba-ange to bantu, sadisak’ yandi.—Luke 22:28, 43.

16. Wa’ faso bakamarade ya beto yina ke ya kukula na kimpeve lenda sadisa beto na kuvanda pene-pene na Yehova?

¹⁶ Nge ke lombá kwandi mpe ke ndima ti bakamarade ya kimvuka sadisa nge? Ntangu beto ke zonzilá na bakamarade ya beto yina ke ya kukula na kimpeve baprobleme yina ke na beto, ya zola zonza ve ti beto ke na kiminu ya fioti, kasi ya lenda bumba beto. Tala mambu yina Jacques yina beto zonzilá deja me zonza: “Kusala kikamarade na bampangi yina ke ya kukula na kimpeve, sadisá munu mingi. Ntangu makanisi ya yimbi vandá kwizila munu, bakamarade ya munu ya mbote yayi vandá baka ntangu ya kuwa munu mpe kurapele munu ti ba vandá zolá munu. Ntangu ba vandá sala yawu, mu vandá lenda kutala luzolo ya Yehova mpe faso yandi vandá kipe munu.” Ya ke important samu na beto na kusala kikamarade na bampangi ya beto ya kimvuka!

17-18. Nani beto me lunga kuwa, mpe samu na yinki?

¹⁷ Satan ke na nsatu beto bika kusala bamambu ya mbote. Yandi ke na nsatu beto ndima ti Yehova ke zolá ve beto, mpe beto ke ve bantu ya bien samu Yehova vuukisa beto. Kasi faso beto me tala yawu, mambu nyonso yayi ke kaka luvunu.

¹⁸ Yehova ke zolá nge. Nge ke na valere ya mingi na meso ya yandi. Si nge kuwa yandi faso Yesu salak’ yawu, nge ke ‘vanda kaka na kati ya luzolo ya yandi’ ntangu nyonso. (Yoa. 15:10) Na yawu, kuwa ve Satan to ntima ya nge ya masumu. Kasi, kuwa Yehova, yina ke talá mambu ya mbote yina ke na ntima ya muntu nyonso. Zaba ti ‘yandi ke zolá bantu ya yandi,’ na nge mpe!