Yinki nge lenda sala samu kulongoka ya Biblia natina nge bambote? Nge lenda meka bamambu yayi, yina ke sadisa nge na kutula dikebi na bamambu yina nge ke na longokaka:

• Soola kisika ya mbote. Kana nge lenda, sosa kisika yina ke na bunkete mpe yina ke na nsemo ya mbote yina ke sadisa nge na kutala mbote-mbote bamambu yina nge ke na tangaka. Nge lenda vanda na biro, na mesa, to sosa na ngaanda kisika ya mbote yina lenda sadisa nge na kulongoka.

• Sosa kisika yina nge lenda vanda kaka nge mosi. Yesu soolaka kusambila na “suka-suka” na “kisika yina ata muntu vandaka.” (Mrk. 1:35) Kana kisika yina nge kele ya ke mpasi na kuvanda nge mosi, nge lenda zonza na bantu ya dikanda ya nge to bantu yina ke vandaka na nge, ntangu mpe kilumbu yina nge ke salaka kulongoka ya nge ya Biblia samu ti kilumbu yango nge vanda nge mosi. Mpe nge lenda lomba na bawu na kuzitisa ntangu ya nge ya kulongoka.

• Sala ti makanisi ya nge vanda kisika mosi. Kana nge sadila telefone to tablette samu na kulongoka, tula yawu na mode avion to na mode silencieux samu nge bwa ve na mutambu ya kusosa kutala bima yina ke na telefone. Kana, nge me kanisa na mwa mambu ya nkaka ya kusala, nge lenda sonika yawu samu nge sala yawu na manima ya kulongoka ya nge ya Biblia. Kana ya me kuma mpasi na nge na kutula makanisi ya nge kisika mosi ntangu nge ke na longokaka, nge lenda pema samu na kutambula mpe na kubenda mwa nzutu.