1. Wapi bweso ke na beto mpe samu na yinki beto ke na kilengi?

KUVANDA Temwe ya Yehova ke bweso mpe kilengi ya mingi! Beto ke natá nkumbu ya Nzambi mpe kisalu ya beto ya kupreche mpe ya kulonga bantu ke lakisá ti ya vrai, beto ke Batemwe ya Yehova. Ntangu beto ke sadisá muntu yina ‘ke na ndyatulu ya mbote samu na kuzwa luzingu ya ntangu nyonso’ na kukuma kisadi ya Nzambi, beto ke sepelá mingi. (Bis. 13:48) Beto ke kabulá nsayi yina vandá na Yesu. Yandi ‘kuwá kilengi ya mingi na sadisi ya mpeve santu’ ntangu bilandi ya yandi vandá zonzila yandi bamambu ya mbote yina ba kutaná na yawu na predikasion.—Luke 10:1, 17, 21.

2. Wa’ faso beto lenda lakisa ti kisalu ya kupreche ke mfunu mingi na meso ya beto?

² Kisalu ya kupreche ke mfunu mingi na meso ya beto. Apotre Paul zonzá na Timote: ‘Sala keba ntangu nyonso na nge mosi mpe na malongi ya nge.’ Mpe yandi bwelá: “Kana nge sala mutindu yina, nge ke sala ti Nzambi vuukisa nge mpe ba yina nyonso ke [kuwá] nge .” (1 Tim. 4:16) Beto zaba ti kisalu ya beto ke vuukisá luzingu ya bantu. Beto ke salá ntangu nyonso keba na beto mosi, samu beto ke bantu ya Kimfumu ya Nzambi. Beto zola ti ntangu nyonso ndyatulu ya beto pesa nkembo na Yehova mpe lakisa ti beto ke tulá kiminu na bamambu yina beto ke precheke. (Flp. 1:27) Beto ke ‘salá keba na malongi ya beto’ ntangu beto ke bongisá malongi ya beto mpe beto ke sambilá Yehova sadisa beto avan na kukwenda preche na bantu.

3. Ni bantu nyonso ke ndimá kuwa nsangu ya Kimfumu? Pesa kifwani.

³ Ata beto ke salá bangolo ya beto nyonso samu na kuzonzila na faso ya mbote nsangu ya Kimfumu, kasi bantu mingi lenda manga kuwa yawu. Beto zonzila mambu yina kuminá mpangi Georg Lindal. Na kati ya bamvula 1929 tii 1947, yandi vandá preche kaka yandi mosi na bwala nyonso ya Islande. Yandi kabulá  mikanda kuluta 10000, kasi ata muntu mosi kumá Temwe ya Yehova. Yandi soniká: “Ata ya vandá na ba yina vandá sosa kunimina munu na kupreche, kasi bantu mingi vandá pesa ata valere na bamambu yina mu vandá zonza.” Na manima, ba filisá na Islande bamisionere yina longoká na Galaad. Kasi bawu mpe, kaka na manima ya bamvula 9 yina ba lutisá na kupreche kuna, ba lendá kuzwa mwa bantu yina pesá luzingu na Yehova mpe kuzwá bateme. *

4. Yinki ya lenda sala beto ntangu bantu ke mangá kundima nsangu ya mbote?

⁴ Ya ke salá beto mpasi ntangu bantu ke mangá kuwa mambu ya Nzambi. Paul mpe faso beto, vandá na ‘mawa mingi mpe vandá kuwa mpasi ntangu nyonso’ samu mingi ya bajwife mangá kundima ti Yesu vandá masiya. (Rom. 9:1-3) Kanisa ntete: nge ke na longoká Biblia na muntu. Nge ke na salá bangolo ya nge nyonso samu na kulonga yandi na faso ya mbote, mpe nge ke sambilá samu na yandi. Kasi ata faso yina, yandi ke na kulá ve na kimpeve mpe nge me bika kulongoka na yandi. To nabunu nge longoka na muntu yina nge me nata tii na bateme. Ya zola zonza kwandi ti nge ke na salá ve kisalu ya nge na faso ya mbote mpe Yehova ke na sepelá ve na kisalu ya nge? Na artikle yayi, beto ke kuzwa bamvutu na byuvu zole yayi: 1) Yinki ke lakisá ti kisalu ya beto ke na simbá? 2) Samu na yinki beto zolá vanda ve na ntima tiya na kisalu ya predikasion?

5. Yinki lenda sala ti kisalu ya beto ya predikasion buta ve ntangu nyonso bambuma yina beto ke na vingilá?

⁵ Biblia ke zonzilá mambu yayi samu na muntu yina ke sadilá mambu ya Nzambi: ‘Kima nyonso yina yandi ke sala ke simba.’ (Nku. 1:3) Kasi, ya zola zonza ve ti bamambu nyonso yina beto ke salá samu na Yehova, ke banda kutambulá kaka faso beto me zola. Samu beto nyonso ke bantu ya masumu, luzingu me ‘fuluká na bampasi.’ (Yobi 14:1) Dyaka, ntangu ya nkaka ba-enemi ya beto lenda sosa kukanga beto nzila ya kupreche faso beto me mesaná kusala yawu. (1 Ko. 16:9; 1 Tes. 2:18) Na yawu, yinki ke natá Yehova na kutala ti kisalu ya beto ya predikasion ke na simbá? Beto zonzila mwa bima na kati ya Biblia yina ke sadisa beto na kuzaba yawu.

6. Yinki ke natá Yehova na kutala ti kisalu ya beto ke na simbá?

⁶ Yehova ke talá bangolo ya beto mpe faso beto ke na kangá ntima. Na meso ya Yehova, kisalu ya beto ke simbá ntangu beto ke salak’ yawu na tiya nyonso samu beto ke zolak’ yandi, ata bantu ke na mangá kuwa beto. Paul soniká: ‘Nzambi me konda ve lunungu samu yandi zimbana kisalu ya beno mpe luzolo yina beno lakisá samu na nkumbu ya yandi, mutindu beno me sadila basantu mpe beno ke biká ve kusadila bawu.’(Ebr. 6:10) Yehova ke zimbaná ve kisalu mpe luzolo ya beto, ata beto ke ve na muntu yina beto me nata tii na bateme. Na yawu, nge lenda ndima na ntima ya nge nyonso mambu yayi Paul zonzá na bantu ya Korinte: “kisalu ya  beno ya ngolo na Mfumu ke ve ya mpamba,” ata kisalu yango ke ve na butá bambuma yina nge ke na vingilá.—1 Ko. 15:58.

7. Yinki beto lenda longoka na yina apotre Paul zonzilá samu na kisalu ya yandi?

⁷ Apotre Paul vandá misionere mosi yina zabá kisalu ya yandi. Samu na kisalu ya yandi, bimvuka ya malu-malu butamá na babwala mingi. Kasi bantu ya nkaka vandá zonzila yimbi ya yandi. Ba vandá zonza ti, yandi zabá ve kulonga. Samu na kuvutula na ba yina vandá sosa kulakisa ti balutila yandi, Paul zonzilá ve bantu yikwa yandi sadisá na kukuma bilandi ya Yesu. Kasi yandi soniká: “Mu me sala kulutila bawu.” (2 Ko. 11:23) Faso Paul, beto zolá zimbana ve ti kima yina me lutila valere na meso ya Yehova, ni bangolo ya beto mpe faso beto ke kangá ntima.

8. Yinki beto zolá zimbana ve samu na kisalu ya beto?

⁸ Kisalu ya beto ke sepelisá Yehova. Yesu filisá bilandi 70 samu na kwenda preche nsangu ya Kimfumu. Na manima ba “[vutuká] na kyese nyonso.” Samu na yinki ba vandá na kilengi? Ba zonzá: “Bampeve ya yimbi mpe [tumamá] na beto ntangu beto [bingisá] bawu na nkumbu ya nge.” Kasi, Yesu talá ti faso ya bawu ya kukanisa vandá ve mbote. Yandi zonzá na bawu: “Beno [sepela] ve samu ti bampeve ya yimbi ke na kutumama na beno. Kasi beno [sepela] samu ti bankumbu ya beno ke ya kusonama na mazulu.” (Luke 10:17-20) Yesu zabá ti ni ntangu nyonso ve kisalu ya bawu ya predikasion zolá buta bambuma. Beto zaba ve bantu yikwa na kati ya ba yina bilandi ya Yesu zonzilá mambu ya Nzambi, kumá bakristo. Kilengi ya bawu zolá katuka ve na bambuma ya mbote yina ba kuzwá. Kasi, ba zolá vanda na kilengi samu bangolo ya bawu vandá sepelisa Yehova.

9. Faso me zonza Bagalate 6:7-9, yinki ke salama si beto lemba ve kupreche?

⁹ Si beto lemba ve na kisalu ya predikasion, beto ke kuzwa luzingu ya ntangu nyonso. Si beto ke salá bangolo ya beto nyonso samu na kupreche mpe kulonga bantu, beto ke ‘kunda samu na mpeve’ samu beto ke bika mpeve ya Nzambi sala na luzingu ya beto. Si beto “lemba ve” to beto ‘bika ve,’ Yehova me zonza na beto ti beto ke kuzwa luzingu ya ntangu nyonso, ata beto me sadisa ata muntu na kuzwa bateme.—Tanga Bagalate 6:7-9.

10. Yinki ke salá ti bantu kuwa to manga kuwa nsangu ya Kimfumu?

¹⁰ Ni faso ke ntima ya bantu ke salá ti ba kuwa beto to ba manga. Yesu lakisá mambu yayi ntangu yandi zonzilá disolo ya muntu yina ke salá bilanga. Muntu yango losá bambuma na bantoto ya mutindu na mutindu. Kaka mbuma yina kubwá na ntoto ya mbote kulá. (Luke 8:5-8) Yesu zonzá ti bantoto na disolo ya yandi ke bifwani ya faso bantima ya bantu ke bakilá “mambu ya Nzambi.” (Luke 8:11-15) Faso muntu yina ke salá bilanga, beto lenda sala ve ti, mbuma yina beto me kunda, kula na mbangu. Mbuma ke kulá kaka si ya me bwa na zulu ya ntima ya mbote. Kisalu ya beto ke ya kubika ve kukunda nsangu ya Kimfumu. Faso apotre Paul zonzak’ yawu “konso muntu ke kuzwa difuta na kisalu ya yandi,” kasi ve na bambuma yina kisalu ya yandi ke butá.—1 Ko. 3:8.

11. Samu na yinki Yehova sepelá na predikasion ya Nowe ata bantu kuwá ve yandi? (Tala foto ya kuverture.)

¹¹ Bisadi ya Yehova mingi ya ntama zonzilá mpe mambu ya Nzambi na bantu yina vandá manga kuwa bawu. Na kifwani, Nowe vandá “nsamuni ya lunungu,” na kati ya bamvula 40 to 50. (2 Pi. 2:5, nwt-MK) Ntangu ya nkaka yandi vandá kanisa ti bantu yina yandi vandá preche, zolá manisa na kuwa yandi. Kasi, Yehova zonzá ve ti ni yawu zolá salama. Ntangu yandi pesá Nowe musiku ya kutunga arche, Nzambi zonzá: ‘Nge fwana kota na maswa, nge, bana ya  nge ya bakala, kento ya nge, na bakento ya bana ya nge.’ (Kub. 6:18) Mpe ntangu Yehova zonzá na Nowe yinda mpe nene ya arche, Nowe kwizá tala ti ya zolá lunga ve samu na bantu mingi. Na yawu, yandi zaba ti bantu mingi zolá manga kuwa yandi. (Kub. 6:15) Ni yawu mpe salamá. Ata muntu mosi kuwá mambu yina Nowe vandá zonza. (Kub. 7:7) Samu na yawu, Yehova talá kwandi ti kisalu ya predikasion ya Nowe vandá me simba ve? Ve! Na meso ya Yehova, kisalu ya Nowe ya predikasion simbá, samu yandi salá nyonso yina Yehova lombá na yandi na kusala.—Kub. 6:22.

12. Wa’ faso profete Yeremia bumbá kilengi ya yandi ata bantu vandá manga kuwa yandi mpe kwamisak’ yandi?

¹² Faso mosi mpe profete Yeremia precheke na kati ya bamvula kuluta 40. Kasi, bantu mangá kuwa yandi mpe kwamisak’ yandi. Ngolo ya Yeremia manisá ntangu bantu ‘vandá finga mpe kuseka’ yandi. Na yawu, yandi kanisá na kubika kisalu ya yandi. (Yer. 20:8, 9) Kasi Yeremia lembá ve! Yinki sadisak’ yandi na kukatula makanisi ya yimbi mpe na kubumba kilengi na kisalu ya yandi? Yandi kanisá na bima zole ya mfunu. Ya ntete, nsangu ya Nzambi yina yandi vandá zonzila na bantu zolá pesa bawu ‘bilumbu ya mantwala mpe kivuvu.’ (Yer. 29:11) Ya zole, yandi vandá nata nkumbu ya Yehova. (Yer. 15:16) Beto mpe, nsangu yina beto ke zonzilá ke pesá kivuvu na bantu. Mpe, beto ke natá nkumbu ya Yehova. Beto ke Batemwe ya yandi. Kukanisa na bamambu zole yayi ke sadisa beto na kubumba kilengi ya beto, ata bantu manga kuwa beto.

13. Yinki disolo ya Yesu na Marke 4:26-29 ke na longá beto?

¹³ Ya ke baká ntangu na muntu na kukula na kimpeve. Yesu lakisak’ yawu na disolo ya kisadi ya bilanga yina ke na lalá (Tanga Marke 4:26-29.) Na manima ya kukunda mbuma, mbuma ke kulá malembe-malembe. Yandi lenda sala ve kima samu mbuma kula na mbangu. Beto mpe lenda vingila bantangu mingi samu na kutala muntu yina ke longoká Biblia kusadila mambu yina yandi ke na longoká. Kaka faso muntu yayi lenda sala ve kima samu mbuma yina yandi me kunda kula faso yandi me zola, beto mpe lendá sala ve ti muntu yina ke na longoká na beto kula na kimpeve faso beto me zola. Na yawu, ngolo ya nge zolá manisa ve to nge zolá lemba ve samu ba yina ke na longoká na nge ke na kulá ve na mbangu. Kukumisa bantu bilandi ke lombá beto vanda na ntima ya yinda.—Zaki 5:7, 8.

14. Pesa kifwani yina ke na lakisá ti bambuma ya kisalu ya beto lendá baka ntangu samu na kutalana.

¹⁴ Na bateritware ya nkaka, ya lenda baka bamvula mingi samu bambuma ya kisalu ya beto banda kutalana. Ni mambu yina kuminá bampangi ya kento Gladys na Ruby Allen, yina vandá yaya na leki. Na 1959, ba filisá bawu faso bapionye ya ntangu nyonso na ville mosi ya Canada, na rejon ya Quebec. * Na ville yina, bantu vandá zolá ve Batemwe ya Yehova, mpe eglize katolike vandá na ngolo ya mingi. Na yawu, ata ba yina vandá na nsatu ya kuwa bawu, vandá na boma ya kusala yawu. Gladys me zonza: “Na kati ya bamvula zole beto vandá sala ba-heure 8 na kilumbu, na predikasion ya yinzo na yinzo. Ata muntu mosi ndimá kuwa beto! Bantu vandá kwizá na porte, mpe ntangu ba vandá talá ti ya ke beto, ba vandá vutuká. Kasi, beto lembá ve.” Fioti-fioti, bantu bandá kutadila bamambu na faso ya nkaka, mpe ba ya nkaka vandá ndima kuwa bawu. Bubu yayi, ya ke na bimvuka tatu ya Batemwe ya Yehova na ville yina.—Iza. 60:22.

15. Yinki 1 Bakorinto 3:6, 7 ke longá beto samu na kisalu ya kukumisa bantu bilandi?

¹⁵ Bantu mingi ke tulá diboko samu muntu kuma kilandi ya Yesu. Muntu nyonso na kati ya kimvuka lenda tula diboko samu muntu yina ke  longoká kuma tii na bateme (Tanga 1 Bakorinto 3:6, 7.) Na kifwani, mpangi mosi lenda bika trakte to mosi ya mikanda ya beto na muntu. Mpangi yango lenda tala ti yandi ke vanda ve na ntangu samu na kulongoka Biblia na muntu yina. Na yawu, ya lenda lomba na mpangi ya nkaka na kuvutuka kutala muntu yina. Mpangi ya zole me banda kulongoka Biblia na muntu yina. Ntangu yandi ke kwendá kulongoka na yandi, yandi ke natá bampangi ya nkaka. Mpe mosi na mosi na kati ya bawu lenda sala to zonza kima yina ke simba ntima ya muntu yina. Bampangi ya kento na ya bakala nyonso yina ke kutana na muntu yango ke sadisa yandi na kukula na kimpeve. Na manima, ba yina nyonso sadisá muntu yina lenda sepela ntangu yandi ke kuzwa bateme.—Yoa. 4:35-38.

16. Samu na yinki nge lenda bumba kilengi ya nge na kisalu ya predikasion ata nge ke dyaka ve na sante ya mbote to ngolo ya mingi?

¹⁶ Yinki nge lenda sala si nge ke na lendá ve kupreche mpe kulonga faso na ntama samu nge ke na maladi to nge ke dyaka ve na ngolo ya mingi? Nge lenda vanda kaka na kilengi na yina nge ke na lendá kusala. Beto tala yinki beto lenda longoka na mambu yina David salá ntangu yandi na babakala yina vandá na yandi kwendá baka bafamiye ya bawu mpe bima yina ba-amalekite yibá. Babakala 200 na kati ya basoda ya David vandá dyaka ve na ngolo ya kunwana. Na yawu, ba bikaná samu na kubumba bima. David na babakala yina kwendá nwana na yandi lendá kununga ba-enemi ya bawu, mpe ba lenda kubotola babima mpe bantu yina ba-amalekite baká. Ntangu ba vutuká, David zonzá ti, ya vanda ba yina bikaná to ba yina kwendá nwana, ba zolá kabula babima na kati-kati. (1 Sa. 30:21-25) Disolo yayi ke na longá beto mambu mosi na kisalu ya beto ya kukumisa bantu bilandi. Ba yina ke salá bangolo ya bawu nyonso, ata ba ke dyaka ve na ngolo ya kusala mingi, ba lenda vanda mpe na kilengi samu ba me tula diboko na kusadisa muntu na kubanda kutambula na nzila ya luzingu.

17. Yinki ke pesá beto kilengi?

¹⁷ Faso Yehova ke talá kisalu ya beto samu na yandi ke pesá beto kilengi ya mingi. Yandi zaba ti beto lenda nata ve bantu na ngolo na kuwa beto to na kusambila yandi. Kasi yandi ke talá bangolo ya beto mpe luzolo yina beto ke na yawu samu na yandi. Mpe, yandi ke pesa beto bima ya mbote samu na yawu. Yandi ke longá mpe beto faso ya kuzwa kilengi na yina beto ke na salá na kisalu ya predikasion. (Yoa. 14:12) Beto zaba ti si beto lembá ve, beto ke sepelisa Yehova.