BAMVULA nyonso, bampangi mingi yina ba basisá na kimvuka ke vutuká. Kanisa na “Kilengi ya kulutila [yina] ke [vandá] na [zulu]” ntangu mosi na mosi na kati ya bawu ke vutuká. (Luke 15:7, 10) Si nge me vutuka na kimvuka, zaba ti Yesu, ba-ange mpe Yehova ke na kilengi ya kutala bangolo yina nge me sala samu na vutuka. Kasi, kutunga dyaka kindiku ya nge na Yehova lendá baka mwa ntangu. Beto zonzila mwa bampasi yina nge lenda kutana na yawu, mpe bima yina lenda sadisa nge.

Bampangi mingi yina ke vutuká na kimvuka ke nwaná na makanisi ya yimbi. Ntangu ya nkaka, makanisi ya nge lendá vanda faso ya mfumu David. Ata Yehova lemvokilá masumu ya yandi, yandi zonzá: ‘Masumu ya munu me lutila munu.’ (Nku. 40:12; 65:3) Na manima ya kuvutuka na kimvuka, bampangi ya nkaka ke vandá na nsoni, mpe ke kanisá ti Yehova me lemvokila ve bawu. Makanisi yayi, ba lenda nwana na yawu na kati ya bamvula mingi. Na manima ya kubasisa yandi na kimvuka, Isabelle lutisá bamvula 20 avan na kuvutuka. * Yandi me zonza: “Ya vandá mpasi na munu na kundima ti Yehova lemvokilá munu.” Si nge ke ya kulemba, kimpeve ya nge mpe ke vanda ve ngolo. (Bin. 24:10) Sala bangolo samu makanisi ya yimbi lembisa ve nge.

Ba ya nkaka ke na boma ya kutala bangolo nyonso yina ya ke lomba na bawu na kuvutula kindiku ya bawu na Yehova. Na manima ya kuvutuka na kimvuka, Antoine zonzá: “Mu zimbaná babima mingi yina mu longoká mpe yina mu vandá salá ntangu mu vandá ntete na kati ya kimvuka.” Samu na makanisi ya faso yayi, ba ya nkaka ke sosá dyaka ve kusala mingi na kisalu ya Yehova.

Na kifwani, si mupepe ya ngolo me mwangisa yinzo ya muntu, yandi lenda vanda ya kulemba lere yandi ke kanisa na ntangu, mpe kisalu yina yandi ke sala  samu na kutunga dyaka yawu. Faso mosi mpe, si disumu ya ngolo me kwiza bebisa kindiku ya nge na Yehova, nge lenda tala ti ya ke vanda mpasi na nge na kuvutula dyaka kimpeve ya nge faso na ntama. Kasi, zaba ti Yehova ke sadisa nge.

Yehova me zonza na beto: ‘Ntangu yayi, beno kwiza mpe beto vutula bamambu na nzila beto na beto.’ (Iza. 1:18) Nge me sala deja bangolo samu na ‘kuvutula bamambu na nzila’ na Yehova. Yandi ke na kilengi na yina nge me sala yawu. Kuzimbana ve: samu nge me vutuka na Yehova, yandi ke kuzwa mvutu ya kupesa na bisombolo ya Satan.—Bin. 27:11.

Nge me sala deja kima samu na kukwenda pene-pene na Yehova. Yandi me zonza ti yandi mpe ke kwiza pene-pene na nge. (Zaki 4:8) Ya ke mbote yina bampangi me tala ti nge me vutuka na kimvuka. Kasi, ya ke na kima ya nkaka yina nge zolá sala. Nge zolá kulisa ntangu nyonso luzolo samu na Tata mpe Ndiku ya nge, Yehova. Wa’ faso nge lenda sala yawu?

Meka kusala bima yina nge lenda lungisa. Ntangu ya nkaka, nge ke na zaba ntete bamambu ya fioti yina me tadila Yehova, mpe dikanisi ya yandi ya kutula dyaka paradi awa na ntoto. Ya zola zonza ti fondasion ya nge ya kimpeve ke ntete. Kasi, ntangu yayi, nge ke na nsatu ya kuvutula dyaka bifu ya nge ya kimpeve, faso kupreche, kukwenda na balukutakanu mpe kulutisa ntangu na bampangi ya nge ya kento na ya bakala. Beto zonzila bima tatu yina nge lenda sosa kusala.

Sambila Yehova ntangu nyonso. Yehova, Tata ya nge ya zulu zaba ti, samu na makanisi ya yimbi yina nge ke na nwaná na yawu, ya lenda vanda mpasi na nge na kusambila yandi. (Rom. 8:26) Ata faso yina, “[vanda] ya kukwikama na lusambulu.” Zonza na Yehova nsatu ya nge ya kuvutula kindiku na yandi. (Rom. 12:12) Andrej me zonza: “Mu vandá na nsoni, mpe ntima ya munu vandá ve na kizunu. Kasi, na manima ya kusambila, makanisi ya yimbi yayi vandá dyaka ve ngolo. Kizunu vandá vutula dyaka na ntima ya munu.” Si nge zaba ve yinki ya kuzonza na Yehova, nge lenda tala balusambu yina salá mfumu David na manima ya kubalula ntima, na kati ya Bankunga 51 mpe 65.

Vanda na kifu ya kulongoká Biblia. Kudya madya ya kimpeve ke sadisa nge na kuvanda na kiminu ya ngolo, mpe luzolo ya nge samu na Yehova ke kula. (Nku. 19:7-11) Felipe me zonza: “Mu kubwá na disumu yina salá ti ba basisa munu na kimvuka samu mu vandá longoká dyaka ve Biblia. Mu vandá dyaka ve na nsatu mambu ya faso yayi kumina munu. Na yawu, mu baká desizion ya kulongoká Biblia samu na kubumba kimpeve ya munu.” Nge mpe lenda sala faso Felipe. Si nge zaba ve bamambu yina nge lendá longoka, zonza na mpangi mosi yina ke ya kukula na kimpeve na kusadisa nge.

Tunga dyaka kindiku na bampangi ya kimvuka. Ba ya nkaka ntangu ba ke vutuká, ba ke vandá na boma na faso bampangi ya nkaka ke tadila bawu. Larissa me ndima: “Mu vandá na nsoni ya mingi. Samu na disumu yina mu salá, mu vandá tala ti mu lwalisá ntima ya bampangi ya kimvuka. Na kati ya bantangu mingi, makanisi yayi vandá kwamisa munu.” Zaba ti bakuluntu mpe bampangi ya nkaka yina ke ya kukula na kimpeve ke na nsatu ya kusadisa nge na kutunga dyaka kimpeve ya nge. (Tala enkadre “ Yinki bakuluntu lenda sala?”) Ba ke na kilengi yina nge me vutuka, mpe ba ke na nsatu nge sepela dyaka kusadila Yehova.—Bin. 17:17.

Yinki nge lenda sala samu nge vanda dyaka pene-pene na bampangi ya kimvuka? Vanda na bawu na balukutakanu nyonso mpe kwenda preche na bawu. Samu na yinki kusala yawu ke sadisa nge? Felix me zonza: “Bampangi ya kimvuka vandá na nsatu mu vutuka na Yehova. Ba yambá munu maboko ya kufunguka. Bawu nyonso sadisá munu na kutala ti mu vandá na plase na kati ya dikanda ya Yehova, na kutala ti Yehova lemvokilá munu, mpe na kukwenda na mantwala.”—Tala enkadre “ Yinki nge lenda sala?”

Satan ke lemba ve na kufilisa “mipepe ya ngolo” samu na kulembisa nge ntangu nge ke na kutunga dyaka kindiku ya nge na Yehova. (Luke 4:13) Kuvutuka ve manima. Vanda na ngolo ya kumanisa kutunga kimpeve ya nge.

Samu na mameme ya yandi, Yehova zonzá: ‘Mu ke sosa yina me zimbana, mu ke vutula yina ke na yenga-yenga, mu ke kanga babande na yina me lwala, mpe mu ke pesa yina me lemba bukindi.’ (Ezk. 34:16) Yehova me sadisa bampangi mingi na kutunga dyaka kimpeve ya bawu. Zaba ti yandi ke na nsatu na kusadisa nge na kutunga dyaka kindinku ya nge na yandi.