DISOLO YA KULONGOKA 43
NZIMBU 90 Beno kindisa bampangi
Wa’ faso kukatula bantembe
“Beno sosa kuzaba mambu nyonso kana ya ke ya tsyeleka.”—1 TES. 5:21, NWT.
YINA BETO KE LONGOKA
Yinki beto lenda sala kana beto ke na bantembe na kisalu ya beto samu na Yehova.
1-2. a) Wapi bantembe bisadi ya Yehova lenda vanda na yawu? b) Yinki beto ke tala na disolo yayi?
YA VANDA bantwenya to bantu ya kukula, bantangu ya nkaka beto nyonso lenda vanda na bantembe. a Na kifwani, mpangi mosi ya ntwenya lenda yufula kana Yehova ke na tulaka yandi dikebi. Ya lenda nata yandi na kuvanda na bantembe na kuzwa mbotokolo. Mpangi ya nkaka, ntangu yandi vandaka ntwenya soolaka kutula Kimfumu ya Nzambi na kisika ya ntete na kisika ya kusosa mbongo mingi. Yandi lenda vanda na bantembe ti ya vandaka mukanu ya mbote, kana bubu yayi yandi ke kaka na mbongo ndambu samu na kukipe dikanda ya yandi. Ya lenda vanda mpe na mpangi ya kento yina me nuna mpe ke dyaka ve na ngolo mingi. Yandi lenda tala ti yandi ke dyaka ve mfunu mingi samu ti yandi ke dyaka ve na salaka mingi. Ya me kuminaka nge na kuyufula byuvu mutindu: ‘Mu ke kwandi mfunu na meso ya Yehova? Nyonso mu salaka samu na Yehova vandaka kwandi mfunu? Mu ke kwandi dyaka mfunu samu na Yehova?’
2 Kana beto ke ve na bamvutu ya kulunga na byuvu yayi, ya lenda sala ti beto lemba kusadila Yehova. Na disolo yayi, beto ke tala malongi ya Biblia yina lenda sadisa beto kana beto ke na bantembe ti 1) Yehova ke tulaka beto dikebi, 2) mikanu yina beto bakaka na ntama vandaka mbote, to 3) beto ke kaka mfunu na meso ya Yehova.
WA’ FASO NGE LENDA KATULA BANTEMBE YINA KE NA NGE?
3. Wapi yina ke mosi ya bafaso yina lenda sadisa beto na kukatula bantembe?
3 Mosi ya bafaso yina beto lenda katula bantembe ya beto, ni kusosa bamvutu na byuvu ya beto na Biblia. Kusala yawu ke sadisa beto na kuvanda ngolo, na kukula na kimpeve mpe na kubongama mbote-mbote samu beto “telama ngolo na kiminu.”—1 Ko. 16:13, NWT.
4. Wa’ faso beto lenda “sosa kuzaba mambu nyonso kana ya ke ya tsyeleka”? (1 Batesalonika 5:21)
4 Tanga 1 Batesalonika 5:21, NWT. Na verse yayi Biblia ke na kindisaka beto na ‘kusosa kuzaba bamambu nyonso kana ya ke ya tsyeleka.’ Wa’ faso beto lenda sadila malongi yayi? Kana beto ke na bantembe na mambu, beto sosa yina Biblia ke zonzaka na mambu yango. Na kifwani, ntwenya mosi lenda tala ti yandi ke ve mfunu na meso ya Yehova. Kukanisa mutindu yina ke na lakisaka kwandi ti ya tsyeleka yandi ke ve mfunu na meso ya Yehova? Ve. Yandi me bonga ‘kusosa kuzaba mambu nyonso kana ya ke ya tsyeleka.’ Na yawu, yandi zola longoka na Biblia mutindu Yehova ke tadilaka yandi.
5. Wa’ faso beto lenda kuzwa mvutu ya Yehova na mambu yina ke na kwamisaka beto?
5 Ntangu beto ke tangaka Biblia, ya ke mutindu beto ke na kuwaka Yehova kuzonzila beto. Kasi, kana beto ke na mwa bantembe na mambu, beto me lunga kubwela bangolo samu na kuzwa mvutu na mambu yina ke na kwamisaka beto. Beto lenda sosa baverse yina ke na zonzilaka mambu ya beto. Beto lenda sadila bima yina kimvuka ya Yehova me pesa beto samu na kuzaba dyaka mingi na mambu yina ke na kwamisaka beto. (Bin. 2:3-6) Beto lenda sambila Yehova na kutwadisa beto ntangu beto ke na sosaka, mpe samu yandi sadisa beto na kuzwa dikanisi ya yandi na kyuvu ya beto. Beto lenda sosa malongi ya Biblia mpe kusosa kusadila yawu na mambu yina ke na beto. Beto lenda sosa mpe masolo ya Biblia ya bantu yina kutanaka na bamambu ya mutindu beto.
6. Wa’ faso balukutakanu lenda sadisa beto na kukatula bantembe?
6 Beto lenda kuwa dyaka Yehova na ntangu ya balukutakanu. Kana beto kwenda ntangu nyonso na balukutakanu, beto lenda kuwa discours, to mvutu ya mpangi mosi yina ke na zonzilaka yina beto ke na yawu nsatu samu na kukatula bantembe ya beto. (Bin. 27:17) Beto tala wa’ faso beto lenda katula mwa bantembe yina lenda vanda na beto.
KANA NGE KE NA BANTEMBE TI YEHOVA KE TULAKA NGE DIKEBI
7. Wapi kyuvu ya ba nkaka lenda yufula?
7 Ya me kuminaka kwandi nge na kuyufula: ‘Yehova ke talaka kwandi munu?’ Kana nge ke na talaka ti nge ke kaka muntu ya mpamba, nge lenda kanisa ti ya ke vanda mpasi na nge na kukuma ndiku ya muntu yina yidikaka bima nyonso. Ya lenda vanda mpe ti mfumu Davidi vandaka na makanisi ya faso yayi. Kasi yandi zabaka mpe ti Yehova ke tulaka bantu dikebi. Yandi yufulaka: ‘O Yehova, muntu kele nani samu nge tala yandi, mwana ya muntu kele nani samu nge tudila yandi dikebi?’ (Nku. 144:3) Wapi kisika beto lenda kuzwa mvutu na kyuvu yayi?
8. Mutindu 1 Samuele 16:6, 7, 10-12 ke zonzaka yawu, na wapi bantu Yehova ke tulaka dikebi?
8 Biblia ke lakisaka ti, bantu yina ke talanaka ve mfunu na meso ya bantu, Yehova ke tulaka bawu dikebi. Na kifwani, Yehova fidisaka Samuele na Yese na kwenda tula mafuta na mosi ya bana ya yandi samu yandi kuma mfumu ya Izraele. Yese vandaka na bana 8, kasi yandi bokilaka kaka bana 7. Yandi bokilaka ve Davidi yina vandaka mwana-nsuka. b Kasi, ni Davidi Yehova soolaka. (Tanga 1 Samuele 16:6, 7, 10-12.) Yehova zabaka nani vandaka Davidi: ntwenya mosi yina vanda zolaka yandi mingi.
9. Samu na yinki nge lenda ndima ti Yehova ke tulaka nge dikebi? (Tala mpe kizizi.)
9 Kanisa na mutindu yina Yehova lakisaka ti nge ke mfunu na meso ya yandi. Mutindu yandi pesaka nge malongi na ntangu yina nge vandaka na yawu nsatu. (Nku. 32:8) Kana yandi zaba ve nge mbote-mbote, wa’ faso yandi zola lenda kusala yawu? (Nku. 139:1) Kusadila malongi ya Yehova, mpe kutala mutindu ya ke na sadisaka nge ke nata nge na kundima ti yandi ke tulaka nge dikebi. (1 Ns. 28:9; Bis. 17:26, 27) Yehova ke talaka mpe bangolo yina nge ke salaka. Yehova zaba ti nge ke muntu ya mbote mpe yandi zola kuvanda ndiku ya nge. (Yer. 17:10) Ya ke sepelisa yandi kana nge ndima kuvanda ndiku ya yandi.—1 Yoa. 4:19.
“Kana nge sosa [Yehova], yandi ke bika ti nge tala yandi.”—1 Ns. 28:9 (Tala paragrafe 9) c
WKANA NGE KE NA BANTEMBE NA MIKANU YINA NGE BAKAKA NA NTAMA
10. Wapi byuvu lenda kwizila beto ntangu beto ke kanisaka na mikanu yina beto bakaka na ntama?
10 Bantu ya nkaka lenda yufula kana mikanu yina ba bakaka na ntama vandaka mbote. Ya lenda vanda ti ba mangaka kusosa kuvanda na mbongo mingi samu na kusala mingi na kisalu ya Yehova. Bubu yayi, bamvula mingi na manima, ba lenda tala ti ba yina landaka kusosa mbongo mingi ke na luzingu ya mbote. Ya lenda nata bawu na kuyufula: ‘Nyonso yina mu salaka na kisalu ya Yehova vandaka kwandi mfunu? Mu zola sadila kwandi ve ntangu yina na kusosa mbongo yina zola sadisa munu bubu yayi?’
11. Yinki vanda kwamisa muntu yina sonikaka Nkunga 73?
11 Kana byuvu ya mutindu yayi ke kwizilaka nge, nge lenda kanisa na muntu yina sonikaka Nkunga 73. Yandi vanda talaka luzingu ya yandi kaka faso yina ntangu yandi vanda fwanisaka yawu na ya bantu yina vanda sadilaka ve Yehova. (Nku. 73:3-5, 12) Ya vandaka mutindu nyonso vandaka mbote na luzingu ya bawu. Kutala mutindu yina vanda nata yandi na kukanisa ti bangolo nyonso yina yandi vanda sala na kusadila Yehova, vandaka kaka ya mpamba. Makanisi yayi vanda sala ti yandi vanda ‘na manyongi kilumbu ya muvimba.’ (Nku. 73:13, 14) Yinki sadisaka yandi na kukatula makanisi ya yimbi yayi?
12. Mutindu Nkunga 73:16-18 ke zonzaka yawu, wa’ faso muntu yina sonikaka nkunga yayi katulaka bantembe yina vandaka na yandi?
12 Nkunga 73:16-18 (NWT) ke zonzaka: “Ntangu mu sosaka kubakula yawu, ya vanda kwamisa munu, tii ntangu mu kotaka na kisika ya santu ya nene ya Nzambi, mpe mu bakulaka mantwala ya bawu. Ya tsyeleka nge me tula bawu na ntoto ya ndelo. Nge ke sala ti ba kubwa mpe ba kufwa.” Muntu yina sonikaka Nkunga 73 kotaka na kisika ya Santu ya Yehova. Kuna, kisika yina ke vandaka kizunu, yandi sobaka makanisi ya yandi. Yandi kwizaka tala ti luzingu ya bantu yina ke sadilaka ve Yehova ke ve kitoko, mutindu ya vanda talana mpe ba ke ve na kivuvu samu na mantwala. Na yawu, ya sadisaka yandi na kukatula makanisi ya yimbi yina vandaka na yandi. Yandi kuzwaka kizunu samu yandi talaka ti kusadila Yehova vandaka mukanu ya kulutila mbote. Na yawu, yandi vandaka dyaka na nsatu ya kulutila ya kutatamana kusadila Yehova.—Nku. 73:23-28.
13. Wa’ faso nge lenda kuzwa kizunu, kana nge ke na mwa bantembe na mikanu yina nge bakaka na ntama? (Tala mpe kizizi.)
13 Wa’ faso Biblia lenda sadisa nge mpe na kuzwa luzingu ya mutindu yayi? Tala luzingu ya ba yina ke sadilaka ve Yehova, mpe tala luzingu ya nge, bambote yina ke na nge samu nge ke sadilaka Yehova. Wapi yina me lutila? Samu ba ke ve na kivuvu, bantu yina ke sadilaka ve Yehova ke kufwaka nzutu samu na kuvanda na luzingu ya kitoko bubu yayi. Kasi nge, Yehova me pesa nge nsilulu ya kupesa nge bambote ya kulutila yina nge lenda kanisa. (Nku. 145:16) Kanisa ntete: Luzingu ya nge zola vanda kwandi mbote kana nge bakaka ve mikanu ya mbote? Mambu ya tsyeleka ke ti: Ntangu nyonso yina beto ke bikaka luzolo ya beto samu na Yehova mpe samu na bampangi twadisa mikanu ya beto, mikanu ya beto ke vandaka kaka mbote.
Kanisa na bambote yina nge ke kuzwa na yinza ya malu-malu (Tala paragrafe 13) d
KANA NGE KE NA BANTEMBE TI NGE KE NTETE MFUNU NA MESO YA YEHOVA
14. Yinki lenda nata ba ya nkaka na kuvanda na bantembe, mpe wapi kyuvu ba lenda yufula?
14 Samu ba me nuna, bisadi ya Yehova ya nkaka lenda vanda na manyongi samu ba ke na beelaka mingi to ke dyaka ve na ngolo. Ya lenda nata bawu na kuvanda na mwa bantembe ti ba ke ntete mfunu na meso ya Yehova. Ba lenda yufula: ‘Mu ke kwandi kaka mfunu na meso ya Yehova?’
15. Na yinki muntu yina sonikaka Nkunga 71 vandaka na kundima?
15 Muntu yina sonikaka Nkunga 71 vandaka mpe na makanisi ya mutindu yayi. Yandi sambilaka: ‘Kuyambula ve munu ntangu ngolo ya munu me manisa.’ (Nku. 71:9, 18) Ata faso yina, yandi vandaka na kundima ti kana yandi bikana ya kukangama, Yehova ke sadisa yandi mpe ke twadisa yandi. Yandi longokaka ti Yehova ke sepelaka na ba yina ke pesaka bangolo ya bawu nyonso samu na kusadila yandi ata ti ba lenda sala dyaka ve mingi.—Nku. 37:23-25.
16. Wapi bamambu bampangi yina me nuna lenda sala samu na Yehova? (Nkunga 92:12-15)
16 Kana nge ke ya kununa, sosa kutala nge mosi mutindu Yehova ke talaka nge. Ya lenda sadisa nge na kukula na kimpeve, ata nge ke dyaka ve na ngolo ya kusala nyonso yina nge vanda salaka. Nkunga 92:12-15 (NWT) ke zonzaka: “Kasi muntu ya lunungu ke yela mutindu diba mpe yandi ke kuma nene mutindu yinti ya sedre ya Libani. Ba me kundaka bawu na yinzo ya Yehova. Ba ke yela na bangaanda ya Nzambi ya beto. Ata na bununu ba ke bika ve kuyela. Ba ke vanda kaka ngolo mpe ya mubisu. Ba ke tuba ti Yehova kele mbote. Yandi kele Ditadi ya munu, muntu yina kukondwa lunungu ke vandaka ve na yandi.” Kutula ve makanisi ya nge na yina nge ke dyaka ve na ngolo ya kusala, kasi na yina nge lenda sala. Na kifwani, nge lenda kindisa bampangi na kiminu ya nge mpe kulakisa ti nge ke sepelaka na bawu. Nge lenda zonzila mutindu Yehova me sadisa nge na kati ya bamvula, mpe mutindu kivuvu ya nge na bansilulu ya yandi me lutila kukuma ngolo. Kuzimbana mpe ve ti nge lenda sadisa bampangi na balusambu ya nge. (1 Pi. 3:12) Beto vanda na ngolo mingi to ve, beto nyonso lenda sala kima samu na kusadila Yehova mpe kusadisa bampangi.
17. Samu na yinki beto me fwana ve kubwa na mutambu ya kufwanisa yina bampangi ke salaka na yina beto ke salaka?
17 Kana nge ke na nyongaka samu nge lenda sala dyaka ve mingi na kisalu ya Yehova, vanda na kundima ti yandi lenda zimbana ata fioti nyonso yina nge salaka na ntama. Kubwa ve na mutambu ya kufwanisa yina nge ke na makoki ya kusala na yina bampangi lenda sala. Samu ti, ni yawu ve Yehova ke salaka. (Gal. 6:4) Na kifwani, Maria pesaka Yesu mafuta mosi ya ntalu mingi. (Yoa. 12:3-5) Kasi kento mosi ya mufwidi tulaka na tempelo kaka bambongo zole ya fioti yina vandaka ve mfunu mingi. (Luke 21:1-4) Yesu sepelaka na makabu ya bawu nyonso zole. Mpe, na meso ya Yehova, nyonso yina nge ke salaka, ya vanda fioti to mingi samu na luzolo yina nge ke na yawu samu na yandi, ke ntalu mingi samu na yandi.
18. Yinki lenda sadisa beto na kukatula bantembe ya beto? (Tala mpe encadré “ Biblia lenda sadisa nge na kukatula bantembe.”)
18 Ya tsyeleka, beto lenda vanda na bantembe bantangu ya nkaka. Kasi, mutindu beto me tala yawu, Biblia lenda sadisa beto na kukatula yawu. Na yawu, nwana na kukatula bantembe yina ke na nge, mpe vanda na kundima ti Yehova ke zolaka nge mpe ke tulaka nge dikebi. Yandi ke sepelaka na nyonso yina nge ke salaka samu na yandi, mpe ke pesa nge difuta samu na yawu. Nge lenda vanda na kundima ti Yehova ke talaka bisadi ya yandi nyonso ya kukwikama, ke zolaka bawu mpe ke tulaka bawu dikebi.
NZIMBU 111 Kilengi ya beto
a YINA YA ZOLA ZONZA: Na disolo yayi, bantembe ke bamambu yina ke nataka beto na kutala ti beto ke ve mfunu na meso ya Yehova to ti mikanu ya mbote yina beto bakaka vandaka ve mbote. Ya ke ve bantembe na bamambu yina Biblia ke zonzaka, mutindu kiminu na Yehova mpe na bansilulu ya yandi.
b Biblia ke zonzilaka ve mbote-mbote bamvula yina vandaka na Davidi ntangu Yehova soolaka yandi na kukuma mfumu. Kasi, ya lenda vanda ti yandi vandaka ntete ntwenya.—Tala Yinzo ya Kengidi ya 1er septembre 2011, paje 29, paragrafe 2.
