1-2. Wa’ faso mambu yina Longi 11:6 ke zonzá, ke na kwelaná na kisalu ya predikasion?

NA BABWALA ya nkaka, bantu ke sosá kuzaba mingi ntangu ba ke kuwá mambu ya Nzambi. Samu ti ni yina ba vandá vingila! Kasi na babwala ya nkaka mpe, bantu ke sosá ve kuzaba Nzambi to ke sepelá ve na mambu ya Biblia. Wa’ faso bantu mingi ke bakilá mambu ya Nzambi na bwala yina nge kele? Faso ni faso yina bantu ke bakila mambu ya Biblia, Yehova zola beto kontinye kupreche tii ntangu yandi ke zonza, ya me lunga.

² Yehova zaba na wapi ntangu kisalu ya predikasion ke manisa mpe ntangu “nsuka [ya yinza] ke kwiza.” (Mat. 24:14, 36) Avant nsuka ya yinza kuma, wa’ faso beto lenda landa musiku ya “kupemisa ve diboko ya [beto]”? *—Tanga Longi 11:6.

3. Yinki beto ke zonzila na artikle yayi?

³ Artikle yina me luta me zonzila bima yiya (4) yina beto ke na nsatu ya kusala samu na kukuma “ba yina ke pecheke bantu.” (Mat. 4:19) Artikle yayi ke zonzila bima tatu yina beto lenda sala samu na kukulisa nsatu ya beto ya kukontinye na kupreche ata na ntangu ya mpasi. Beto ke longoka samu na yinki ya ke mbote 1) na kutula kisalu ya predikasion na plase ya ntete na luzingu ya beto, 2) na kuvanda na ntima ya yinda, mpe 3) na kubumba kiminu ya ngolo.

4. Samu na yinki beto zolá tula kisalu yina Yehova me pesa beto na plase ya ntete na luzingu ya beto?

⁴ Yesu zonzá na badisiple ya yandi faso bantu ke vanda mpe yinki ke salama na bilumbu ya mansukina. Yandi zabá mambu yina lenda  sala ti, badisiple ya yandi tula dyaka ve Kimfumu ya Nzambi na plase ya ntete na luzingu ya bawu. Yandi zonzá na bawu na “kulala ve pongi.” (Mat. 24:42) Na ntangu ya Noe, ya vandá na mambu mingi yina vandá sala ti bantu sala ve keba na mambu yina Noe vandá zonza. Bamambu ya faso yina mpe ke na salamá bubu yayi. (Mat. 24:37-39; 2 Pi. 2:5) Na yawu, beto zolá tula kisalu yina Yehova me pesa beto na plase ya ntete na luzingu ya beto.

5. Faso beto ke na tangak’ yawu na Bisalu 1:6-8, tii wapi kisika ba zolá mwangisa nsangu ya mbote?

⁵ Bubu yayi, beto ke na nsatu mingi ya kutula kisalu ya predikasion na plase ya ntete. Yesu zonzá ti, badisiple ya yandi zolá kontinye kusala kisalu ya predikasion na manima ya lufwa ya yandi, mpe ba zolá preche kulutila yina yandi salá ntangu yandi vandá awa na ntoto. (Yoa. 14:12) Na manima ya lufwa ya Yesu, badisiple ya yandi ya nkaka vutukilá kisalu ya kupeche bambisi. Na manima ya kuvumbuka ya yandi na lufwa, Yesu salá mirakle samu na kusadisa badisiple ya nkaka na kukanga bambisi mingi. Na manima ya mirakle yina, Yesu lakisá ti, kisalu ya predikasion na ya kukumisa bantu badisiple, me lutila bisalu nyonso yina beto lenda sala. (Yoa. 21:15-17) Kaka mwa ntangu fioti avant yandi kwenda na zulu, Yesu zonzá na badisiple ya yandi ti nsangu ya mbote yina yandi bandá kulonga, ke mwangana tii na ngaanda ya Izrael. (Tanga Bisalu 1:6-8.) Na manima ya bamvula, Yesu lakisá na apotre Yoane vizion ya mambu yina ke salama “na kilumbu ya Mfumu.” * Mosi ya bima yina Yoane talá na vizion ya kitoko yina yandi kuzwá, ya vandá ange mosi yina vandá zonzila “nsangu ya mbote ya ntangu nyonso” samu na “babwala, bandinga, mpe bantu nyonso.” (Luz. 1:10; 14:6) Ya ke na talaná pwelele ti, luzolo ya Yehova samu na beto bubu yayi, ke ya kutala beto kutula diboko na kisalu yayi ke na salamá na ntoto nyonso, tii ntangu ya ke manisa.

6. Wa’ faso beto lenda kontinye na kutula kisalu ya predikasion na plase ya ntete?

⁶ Beto ke lenda kutula kisalu ya predikasion na  plase ya ntete, si beto kanisa na nyonso yina Yehova ke salá samu na kusadisa beto. Na kifwani, yandi ke pesá beto madya mingi ya kimpeve, na papiye to na internet, na ba-audio to na bavideo, mpe na bima ya nkaka. Kanisa ntete na mambu yayi: Na site ya beto, nge lenda kuzwa mikanda to bima ya nkaka na bandinga kuluta 1000! (Mat. 24:45-47) Bantu ke ya kukabuka na ntoto samu ba ke landá mambu ya politik, samu bawu nyonso ke ve na dibuundu mosi, mpe samu ya ke na ba yina ke na bimvwama, kasi, ba ya nkaka ke bapovre. Kasi, bamilion ya batemwe ya Yehova ya yinza nyonso ke na bumosi. Na kifwani, Na kilumbu ya vendredi 19 Avril 2019, batemwe ya Yehova ya yinza nyonso vukaná samu na kutala video yina vanda zonzila dikanisi ya kilumbu (Texte du jour). Na mpimpa ya kilumbu yina, bantu kuluta 20 919 041 vukaná samu na kusala Memorial ya lufwa ya Yesu. Ntangu beto ke kanisá na nyonso yina salamá kilumbu yina, beto ke vanda na nsatu ya kutula Kimfumu ya Nzambi na plase ya ntete na luzingu ya beto.

7. Wa’ faso ekzample ya Yesu ke na sadisá beto na kutula kisalu ya predikasion na plase ya ntete na luzingu ya beto?

⁷ Faso ya nkaka ya kutula kisalu ya predikasion na plase ya ntete, ni kulanda ekzample ya Yesu. Yandi biká ata kima nata yandi na kusala dyaka ve na faso ya mbote kisalu ya predikasion. (Yoa. 18:37) Yandi biká ve Satan vuna yandi, ntangu Satan sosá “kupesa yandi bimfumu nyonso ya ntoto na nkembo ya yawu”, mpe yandi kimá ntangu bantu sosá kutula yandi mfumu. (Mat. 4:8, 9; Yoa. 6:15) Yandi sosá ve kuvanda na bimvwama. Mpe yandi vandá ve na boma ya bantu yina vandá sosa kusala yandi yimbi. (Luke 9:58; Yoa. 8:59) Ntangu mambu ya mpasi ke meká kiminu ya beto, beto lenda kontinye kutula kisalu ya predikasion na plase ya ntete, kaka si beto zimbana ve konseye yina apotre Paul pesá. Yandi zonzá na bakristo na kulanda ekzample ya Yesu, samu “banzutu ya bawu lemba ve mpe bantima ya bawu lemba ve”!—Ebr. 12:3.

8. Kuvanda na ntima ya yinda zola zonza yinki, mpe samu na yinki ya ke kifu ya mbote bubu yayi?

⁸ Muntu yina ke na ntima ya yinda ke vingilá tii ntangu mambu ya yandi ke chanje. Beto ke na nsatu ya kuvanda na ntima ya yinda na bamambu mingi. Beto lenda sosa ti bampasi ya beto manisa, to beto lenda vingila kima ya mbote yina ke na kwizá ve. Profete Abakuki vandá vingila ti, mambu ya yimbi yina vandá salama na Juda manisa. (Aba. 1:2) Badisiple ya Yesu vandá kanisa ti Kimfumu ya Nzambi “zolá talana kaka na ntangu yina,” mpe zolá manisa bampasi yina Baromain vanda talisa bawu. (Luke 19:11) Beto zolá vingila tii ntangu Kimfumu ya Nzambi ke kwiza katula mambu nyonso ya yimbi mpe ke nata yinza ya malu-malu yina ke vanda ya kufuluka na bantu ya mbote. (2 Pi. 3:13) Kasi, beto me bonga kuvanda na ntima ya yinda mpe kuvingila tii ntangu yina Yehova me sola samu na kusala yawu. Beto zonzila bafaso yina Yehova ke na longá beto na kuvanda na ntima ya yinda.

9. Wapi ba-ekzample ke na lakisá ti Yehova ke na ntima ya yinda?

⁹ Yehova ke lakisá ntima ya yinda na faso ya kulutila. Yandi bikilá Noe ntangu ya mingi samu na kutunga arche, mpe na kuvanda “muntu yina ke precheke mambu ya mbote.” (2 Pi. 2:5; 1 Pi. 3:20) Yehova kuwá ntangu Abraham vanda yufula yandi bambala mingi, na yina me tadila desizion ya yandi ya kufwa bwala ya Sodome na Gomore. (Kub. 18:20-33) Na kati ya basiekle mingi, Yehova lakisá ntima ya yinda ya kulutila samu na bana ya Izrael yina ntangu nyonso, vandá kuwa ve yandi. (Neh. 9:30, 31) Beto lenda tala ntima ya yinda ya Yehova samu yandi me pesa na bantu nyonso yina zola kukuma bakamarade ya yandi, ntangu mingi “samu na kubalula bantima.” (2 Pi. 3:9; Yoa. 6:44; 1 Tim. 2:3, 4) Ekzample ya Yehova ke na pesá beto rezon ya mbote ya kuvanda na ntima ya yinda, mpe ya kukontinye na kupreche mpe kulonga bantu. Yandi ke na longá mpe beto na kuvanda na ntima ya yinda  na nzila ya ba-ekzample yina ke na kati ya Biblia.

10. Yinki ekzample ya muntu yina ke salá bilanga yina ke na Zaki 5:7, 8 ke na longá beto?

¹⁰ Tanga Zaki 5:7, 8. Ekzample ya muntu yina ke kundá bandunda to bayinti, ke na lakisá beto faso ya kuvanda na ntima ya yinda. Ya vrai, bandunda to bayinti ya nkaka ke kulá na mbangu. Kasi bayinti mingi, surtout yina ke butá bambuma ke lombá ntangu mingi samu ya yela. Na Izrael ba vandá kundá bambuma na kati ya bangonda 6. Bantu vandá kundá bambuma na manima ya ntangu yina bamvula ya ntete vandá noka, mpe ba vandá kontinye kukunda tii ntangu yina bamvula ya nsuka vandá kubwa. (Mrk. 4:28) Beto ke lakisa ti beto ke mayela, si beto landa ntima ya yinda ya bantu yina ke salá bilanga. Kasi ya lenda vanda mpasi na kusala.

11. Wa’ faso ntima ya yinda lenda sadisa beto na kisalu ya predikasion?

¹¹ Bantu ya masumu ke sosá kuzwa na mbangu bambuma ya kisalu ya bawu. Kasi, si beto zola ti bilanga ya beto buta, beto zolá kipe yawu ntangu nyonso. Beto zolá timuna ntoto, kukunda, kukatula matiti mpe kulosa maza. Si beto ke na nsatu ya kukumisa bantu badisiple ya Yesu, beto mpe zolá sala bangolo. Ya ke lombá ntangu mingi na kusadisa muntu yina ke longoká na beto na kukatula kifu ya kusolá bandinga to bampusu ya bantu, mpe na kuzola bantu nyonso. Ntima ya yinda ke sadisa beto na kulemba ve ntangu bantu ke mangá kuwa beto. Ntangu ba ya nkaka ke ndimá kuwa beto, mpe kulongoka na beto, beto zolá kontinye kulakisa ntima ya yinda. Beto zolá nata ve na ngolo ba yina ke longoká na beto na kukula na kimpeve. Bantangu ya nkaka, ata badisiple ya Yesu vandá zaba ve mbote-mbote yinki yandi vandá sosa kuzonza. (Yoa. 14:9) Beto zimbana ve ti, beto lenda kunda mpe kulosa maza, kasi ni Nzambi muntu ke kulisá bantu na kimpeve.—1 Ko. 3:6.

12. Wa’ faso beto lenda lakisa ntima ya yinda ntangu beto ke precheke na bantu ya famiye ya beto yina ke ve batemwe ya Yehova?

¹² Ya lenda vanda mpasi na beto na kulakisa ntima ya yinda ntangu beto ke precheke bantu ya  famiye ya beto yina ke ve batemwe ya Yehova. Mambu yina ke na Longi 3:1, 7 lenda sadisa beto. Ya ke zonzá: “Ya ke [. . .] na ntangu ya kuvanda swi mpe na ntangu ya kuzonza.” Ndyatulu ya beto ya mbote lenda nata bawu na kuwa mambu ya Biblia mpe beto zolá yidama samu na kuzonzila bawu mambu ya Yehova ntangu ya ke talaná mbote. (1 Pi. 3:1, 2) Beto zolá preche mpe kulonga na tiya nyonso, kasi beto zolá lakisa ntima ya yinda na bantu nyonso mpe na bantu ya famiye ya beto.

13-14. Wapi ba-ekzample ya bantu yina lakisá ntima ya yinda yina beto lenda landa?

¹³ Beto lenda longoka kuvanda na ntima ya yinda na kulandá ekzample ya ba yina lakisá kifu yayi na Biblia mpe na ntangu ya beto. Abakuki zolá ti mambu ya yimbi manisa, kasi yandi lakisá ntima ya yinda ntangu yandi zonzá: “Mu ke telama na kisika ya munu ya kukengila.” (Aba. 2:1) Apotre Paul zonzá ti yandi vandá na nsatu ya “kumanisa” kisalu yina Nzambi pesak’ yandi. Mpe na ntima ya yinda nyonso, yandi kontinyeke kuzonzila nsangu ya mbote.”—Bis. 20:24.

¹⁴ Beto zonzila ekzample ya bampangi yayi ya kukwela yina salá lekole ya Galaad, ba filisá bawu na bwala yina batemwe ya Yehova vandá ve mingi, mpe mabuundu mingi yina vandá kuná, vandá ve ya bakristo. Kaka bantu ndambu vandá zola kulongoka Biblia. Kasi, bampangi ya nkaka yina salá lekole ya Galaad na bawu, yina ba filisá na babwala ya nkaka, vandá zonzila bawu bambote yina ba vandá kuzwa na kisalu ya predikasion mpe faso ba vandá sadisa bantu na kukuma batemwe ya Yehova. Na ntima ya yinda nyonso, ba kontinyeke kupreche ata bantu ya teritware ya bawu vandá manga kuwa bawu. Na manima ya kulutisa bamvula 8 na teritware yina, ba zwá kilengi ya kulongoka na muntu mpe ya kunata yandi tii na bateme. Yinki ba-ekzample ya ntama na ya bubu yayi ke na longá beto? Bampangi yayi ya kukangama na Yehova lenda kota ve madidi na kisalu ya predikasion to kupemisa diboko ya bawu, mpe Yehova ke pesa bawu bambote samu na ntima ya bawu ya yinda. Na yawu, beto “landa ekzample ya ba yina lakisá kiminu mpe ntima ya yinda samu na kuzwa bapromese.”—Ebr. 6:10-12.

15. Wapi mosi ya bafaso yina kiminu ya beto lenda kulisa nsatu ya beto ya kupreche?

¹⁵ Beto ke na kiminu na malongi yina beto ke precheke, na yawu, beto zola ti bantu mingi kuwa yawu. Beto ke tulá ntima na bapromese yina ke na kati ya Biblia. (Nku. 119:42; Iza. 40:8) Beto ke na talá faso baprofesi ya Biblia ke na lunganá bubu yayi. Beto ke talá na meso ya beto faso luzingu ya bantu ke na yidamá, ntangu ba ke bandá kusadila bakonseye ya Biblia. Mambu nyonso yayi ke na natá beto na kundima ti, nsangu ya Kimfumu ya Nzambi, ke mambu yina bantu ke na nsatu ya kuwa.

16. Wa’ faso Nkunga 46:1-3 ke na sadisá beto na kuzaba ti, nsatu ya beto ya kupreche ke vanda mingi si beto ke na kiminu na Yehova mpe na Yesu?

¹⁶ Beto ke mpe na kiminu na Yehova, mpe na Yesu yina Yehova tulá Mfumu ya Kimfumu ya yandi. (Yoa. 14:1) Mambu ni mambu yina ke kumina beto, Yehova ke vanda ntangu nyonso yinzo ya beto ya ngolo mpe ngolo ya beto. (Tanga Nkunga 46:1-3.) Beto ke mpe na konfianse ti Yesu ke na twadisá kisalu ya predikasion depuis na zulu, yandi ke na sadilá ngolo mpe nkembo yina Yehova pesak’ yandi.—Mat. 28:18-20.

17. Pesa ekzample yina ke na lakisá samu na yinki beto zolá kontinye kupreche.

¹⁷ Kiminu ke nata beto na kundima ti Yehova ke pesa beto bambote samu na kisalu ya beto, ntangu ya nkaka na faso yina beto vandá vingila ve. (Lon. 11:6) Na kifwani, bilumbu nyonso bantu mingi ke talá mikanda yina beto ke tulá na baprezentwar. Faso ya kupreche yayi ke kwandi mbote? Ee ya ke mbote! Ministère du Royaume ya Novembre 2014 zonzá ti, étudiante mosi ya Université vandá na nsatu ya kusonika mukanda yina vandá zonzila mambu ya batemwe ya Yehova.  Yandi zabá ve kote vandá salle du Royaume, kasi na Université kote yandi vandá, ya vandá na prezentwar mosi yina vandá na mikanda ya beto, ni kuna yandi kuzwa mambu nyonso yina yandi vandá na yawu nsatu samu na kusonika mukanda ya yandi. Na manima, yandi kumá temwe ya Yehova, mpe bubu yayi yandi ke pionier ya ntangu nyonso. Masolo ya faso yayi ke puseke beto na kontinye na kupreche, samu ya ke lakisá ti, ya ke ntete na bantu yina ke na nsatu ya kuwa mambu ya Kimfumu ya Nzambi.

18. Samu na yinki beto ke zonzá ti kisalu ya predikasion ke manisa na ntangu yina Yehova me zola?

¹⁸ Beto lenda ndima na ntima mosi ti, kisalu ya predikasion ke manisa na ntangu yina me lunga. Beto zonzila mambu yina salamá na ntangu ya Noe. Yehova lakisá ti yandi ke salá mambu nyonso na ntangu ya mbote. Bamvula 120 avant mvula ya nene kubwa, Yehova zabá deja na wapi ntangu yandi ke nokisa yawu. Bamvula mingi avant Yehova zonzá na Noe na kutunga arche. Bamvula 40 to 50 avant mvula noka, Noe kontinye kusala bangolo na kisalu ya yandi. Ata bantu mangá kuwa yandi, yandi kontinyeke kupreche mpe kuzonzila bawu mambu yina zolá salama, tii kilumbu yina Yehova zonzá na yandi na kukota na bibulu na kati ya arche. Na ntangu ya mbote, “Yehova kangá porte ya Arche.”—Kub. 6:3; 7:1, 2, 16.

19. Wapi bambote beto ke kuzwa si beto pemisa ve diboko ya beto?

¹⁹ Na mwa ntangu fioti, Yehova ke zabisa beto ti kisalu ya predikasion me manisa. Dyaka, yandi ke kufwa yinza yayi ya Satan mpe yandi ke nata yinza ya malu-malu samu na bantu nyonso yina ke kuwak’ yandi. Avant mambu yayi salama, beto kontinye na kulanda ekzample ya Noe, Abakuki, mpe ba yina nyonso pemisá ve diboko ya bawu. Beto tula kisalu ya predikasion na plase ya ntete na luzingu ya beto, beto vanda na ntima ya yinda, beto vanda na kiminu ya ngolo na Yehova mpe na bapromese ya yandi.